الجزيرة للسياحة و التسوق، من يسيح و من يتسوق؟

05:40 PM December, 15 2016

سودانيز اون لاين
سيف النصر محي الدين-
مكتبتى
رابط مختصر

يمكن الواحد يفهم الترويج لبورتسودان كقبلة سياحية لالاف السودانيين الما عندهم قدرة على السفر
خارج البلاد او لا يرغبون في ذلك اساسا. بورتسودان فيها بحر و معالم سياحية و جوها يختلف
عن جو بقية البلاد. ممكن نشاط موسمي زي ده يدر قدر من الدخل الاضافي للمدينة و للولاية
عموما. و لكن هل يبرر نجاح مهرجان سياحة و تسوق في بورتسودان للوالي صاحب
الفكرة أن يصطحب فكرته تلك معه اينما ذهب؟
هل المقصود أن يأتي اهالي القرى و الحلال لمدني خلال فترة المهرجان؟
هم كده كده اساسا بمشوا مدني لاي حاجة او الخرطوم لو كانت اقرب.
هل المقصود تشجيع سكان المدينة على الاستهلاك و زيادة الانفاق لانعاش الحركة التجارية؟
الكلام ده واضح انو ممكن ينجح في دول و مدن يحقق سكانها فائضا في الدخل يمكنهم أن
ينفقوه خلال المواسم و الاعياد و فترات التخفيضات، هل هذا هو الحال في مدني؟
حتى لو افترضنا أن زين و غيرها من الشركات هي الممولة لمصاريف حفل الافتتاح
و خلافه برضو يظل انو ده سفه و انفاق في غير محلو، اذ من المؤكد أن اولويات
المواطنين تختلف و المواضع التي تعاني القصور و تحتاج للانفاق اكيد بتكون اكثر من أن تحصى.

بما أن هذا المهرجان المزعوم يشهد دورته الثانية اليومين ديل، هل من متبرع
ينورنا بنتائج الدورة الاولى. كم كسبت الولاية من المهرجان و كيف أثر المهرجان في حركة
المال و الاعمال و التجارة بالولاية.
و بالنسبة لهذا العام ما هي المحلات و المراكز التجارية و المولات و القرى السياحية و الفنادق
و المطاعم و السينمات و المسارح المشاركة في المهرجان؟
ما هي العروض و الفعاليات المصاحبة للمهرجان و ما هي المسابقات و الجوائز المرصودة
لجذب السائحين و تشجيع المتسوقين؟

اعلم علم اليقين أنه لا اجابة لاسئلتي اعلاه و ان المردود من المهرجان المزعوم هو صفر كبير.
لذا فبدلا من هذه العروض البائسة و الشو الاعلامي الهزيل و الصرف غير الرشيد
الا يجدر الالتفات لما يهم الولاية و مواطنها فعلا؟
الحقيقة أن هذا النظام غير قادر على الاهتمام بما يهم الناس و ما ينفعهم و لا حل
الا بكنسه الى مزبلة التاريخ الشهيرة.

صباح النصر يا دوك .

يا دوك ؟
اعلم علم اليقين أنه لا اجابة لاسئلتي
اعلاه و ان المردود من المهرجان المزعوم هو
صفر كبير. لذا فبدلا من هذه العروض البائسة
و الشو الاعلامي الهزيل و الصرف غير الرشيد
الا يجدر الالتفات لما يهم الولاية و مواطنها فعلا؟
تصدق نفسي اعرف البستدرج هذه الانقاذ للاستعجال
بزوالها منو ؟ حقيقة حاجة اغرب من الخيال يدعموا
الحراك بالصورة المباشرة دي !!!
للأسف سؤالي برضو ما لاقيه ليه اجابة !

وسلمت يا دوك .

كلام فارغ ساي ..
سياحة شنو ، ايلا عامل زي هبنقة ولا مين بتاع كتاب المطالعة داك ، وقع منو الريال قالو ليهو ليهو ما شلتو في جيبك لييه ، المرة الجاية لمن ادوهو اجرتو حليب كب الحليب في جيبو !
السياحة عايزة مقومات بنى تحتية في الاول ، اسي تلقا حمامات عامة زي الناس مافي ! لو انزنقت الا تشتري بامبرز اكس لارج
ومقومات طبيعية وموارد مالية وبشرية
ممكن تكون في سياحة في مدني بس بتحتاج قروش كتيرة جدا ما متوفرة في السودان ، مازي بورسودان .. حتى بورسودان ذاتا لولا البحر والطقس ما كان في زول بمشي ليها ، ياخي مطاعم مافيها ، وبالمناسبة الموسم بتاعا كلو ايام معدودة وبنتهي ما تسمع الهيلمانة دي .. سياحة شنو ياخ ، والله لو شفت الضبان تستغرب ! ياخي انت ماقادر تبيد ضبان حتعمل نهضة سياحية ؟ الضبان من كترتو والله بحوم في الشوارع مش الضبان المنزلي الظريف داك ، ضبان صايع بتاع شوارع ..
ده زول بتاع شو ما اكتر .. مصيبتو انو جابوهو لولاية امورا معقدة ومتطلباتا اكتر بكتير ، ولاية في يوم من الايام كانت شايلة السودان كلو ما حترضى بشوية شوارع وكيربستون ..

سلامات يا منى
الانقاذ مافي زول بستدرجها، هم افلسوا و ما عاد لديهم اي حيل متبقية
و هم الآن يقفون عراة امام الشعب الا من مخازيهم و جرائمهم.