أرتِق الشَرِخ دَا/ العِصيان ناداك

فِعل الإنسانْ
الكَان مِنْ زَمَان
للآنْ
أرتِق الشَرِخ دَا
قلبَك مَليان إهانَه
خُت فِعل الإبَانَهْ
أبنَوصِّيكَ عَديل
ما تملِّس القّضيَّه
وتقول حِنيَّهْ
بالجمبه سَاكِت
لي يَوم الهَجمَهْ
ننتَفِض ننتَفِض
والأمان قريب
عِندنَا جَبخَانَهْ،
الشارع نادَاك
الشارع نَادَا
كَلِّمو نَاس حِلّتنا
المُفارِق بِنادي
أصلاً تِلكَ حُجوهْ
كُلَّما قال مُهذَّب
ما أنِحنَا الوطن
كَتلوهو كتلوهو
وهذا العَادِي
بغنِّيك يا ود فَضُل
والدَكاتره نادوك
شِدّو الحِزام
ضِد مَن يُعادِي
الشعبِ إنفزر قَام
قال يا مجَانين
إنَّا سُودانيون
واللهِ فِترنَا
وحِزنَت هُمومنَا
لا زهره في البُستان
كِكّيف نَفرتِق
هَاتِيك الحُبال
مَهجومين حُسومَا
نَجغُم في الغَدَا
مُويه وذبادِي
إنْ هَاظرنَا سَاكِت
يّدّونَا كَفْ
وإنْ ظاهرنَا موت
يا تِلك المَعانِي
الثوره الثوره
والبير في القَلِب حُبْ
ألبِلْ مرصوصَه رَصْ
بَلعوهَا قَعدوا
أولاد الأبالِسَهْ
باعُو الوطَا
والنَاس مُتآنِسَهْ
نِحنَا التَلالِيس
لَبَّسونَا الشَقَا
نَهرُب بالحُجَا
وتَبِق الزغاريت
نَتشاكَل سَاكِت
وسَايْ نطمئن
ما حرَّر شوقنَا
ظَن النَوايَا
اللائي قَعدَن
في أعتى الزوايا
شُوق قِليبَك أخيّي
وشُوفِي إخيتِي
إنّ الذي يحكمَنا
بالفَاتحَه وصُوت العَنَج
سَيضرَّنَا ياخِي
ضَرَّانا وإنتهى
مسَّح كرعينو
بالدَم الإنسكَب
يلاكُم نقوم جَت
نعمل فيهو مَقلب
ونملا بلدنا حُبْ،
إن الشَرِخ بان
وقلبنا مليان إهانَهْ
ما نملِّس القّضيَّه
ونقول حِنيَّهْ
بالجمبه سَاكِت
لي يَوم الهَجمَهْ
ننتَفِض ننتَفِض
والأمان قريب
عِندنَا جَبخَانَهْ.
عاصم الحزين
الخرطوم/ نوفمبر 2016


#العصيان_المدنی_السودانی_19ديسمير

شاعرنا الجميل و الصديق الوفى عاصم الحزين
مرحبا بك وسعيد بكتاباتك الشعرية
ما هى اخبارك و اخبار الشباب و كيف احوالك و احوال الخرطوم..... اذكر اخر مرة اتلاقينا كانت فى حليوة على ما اظن بعدها اتفارقنا بالقرب من سينما كلزيوم

الزول دا نكتو من ياتو جخنون يا بكري؟
سلامات يا عاصم، سمعنا بالحريق، الحمد لله على سلامة رويحتك دي والأسرة
الراح هين يا حبيب، ما أخذه الحريق من بيتك ما أكتر من ما أخذه المرض من جسدك
فروحك الصلدة هي رهانك وكنزك
مودتي