سوداني يتخيل وفاة الرئيس “البشير” ويكتب قصيدة في نعيه

09:39 PM December, 03 2016

سودانيز اون لاين
زهير عثمان حمد-السودان الخرطوم
مكتبتى
رابط مختصر

منو الغير البشير غير الخلق جوعنا
منو الرقدنا في كوشة الفقر كوعنا
منو الغير البشير متل الفشل روعنا
منو الشبعنا في الزل لما جت توعنا

منو الغير البشير نزل لنا الاخلاق
منو الغير البشير مرمطنا في العولاق
منو الباع الارض سكنا في الاشلاق
منو العلم شبابنا ضياع وقولا لاق
***

وين المتلو زل شعبو واهانو اهانه
وين المتلو لي الخير والنعيم شهانه
وين المتلو من واجب الفريضه نهانه
وين المتلو خرب اخلاق ربيع وبهانه
***

وين المتلو بشتن حالة السودان
وين المتلو باع الصحه بي الفدان
وين المتلو نزل علمو دنكسو دان
وين المتلو (سما يقطع الوردان)
***

يا حليلو النزل في عهدو الجنيه والصحه
حليلو الخله شعبو ينين وطابق الوحه
حليل عمر البشير الشال عصايتو رفحه
يهز في شعبو ميت من لدغة الفحه
***

يا حليلو الرئيس الارعن الهنبول
حليلو الانخبل وخله الجميع مخبول
مو التدري المصع في الياسره راشح البول
يا حليلو الفدن فدنة جمال تمبول
***

وين المتلو نغس شعبو اسم العافيه
وداهو الكوش وصنقر براو في الصافيه
وين المتلو سرق الحرف وسرق القافيه
وين المتلو خله الناس ترح متحافيه
***

قراحة المرض العضال عمر البشير
الخله شعبو سقيم وضال عمر البشير
من جورو عاشو الناس نضال عمر البشير
عيشن كفاف كرته وفضال عمر البشير
***

العلم الناس الفسوق عمر البشير
دينا الحنيف سواهو سوق عمر البشير
قيدنا بي الجوع من رسوق عمر البشير
يسوقنا كيف مايدور يسوق عمر البشير
***

الاسقي شعبو السم نقيع عمر البشير
الما عشم يوم في البقيع عمر البشير
خلانا طاشين بي الصقيع عمر البشير
جراحو مابلقن رقيع عمر البشير
***

في عهدو كم عشنا الفساد عمر البشير
ماخله صمغ لي اقتصاد عمر البشير
ياريتو طش ماجانا صاد عمر البشير
الحاصد الاموال حصاد عمر البشير
***

خلالنا كل الوضع مخيف عمر البشير
خلانا بين هاويه ورصيف عمر البشير
ماعافنا ماكل شعبو جيف عمر البشير
كان مات بقابل ربو كيف عمر البشير