المواطنين الشرفاء إحذروا هذه الدعوة، فإنما هي إستدرآج...

00:09 AM November, 28 2016

سودانيز اون لاين
معاوية المدير-بكندا محافظة البرتا
مكتبتى
رابط مختصر

ايهم اخطر أثرا يا ود المدير؟ التظاهر أم العصيان و المكوث في البيوت بكل هدوء؟
اجابة السؤال دا بتوازن و عقلانية هي الح تحدد من الدجاج الإلكتروني: صاحب الدعوة للتظاهر ام صاحب الحساب أعلاه

انا هسة كنت بتناقش مع عشرات الشباب فى واحدة من قروبات العصيان في الفيس بووك. وجدتهم فى حالة اجماع على عدم الخروج للشوارع لتفويت الفرصة على الكيزان لقتل الناس. حتي انا زاتي لم قلت ليهم نفكر فى الخروج بعضهم اعتبرني دجاجة الكترونية و اشتغلوني بالغمر و اللمز. المهم انهم مصرين على مواصلة العصيان فقط دون اعطاء العصابة الاجرامية فرصة قتل الناس. انا راي كان مختلف قلت ليهم العصابة دي خايفة و لو الناس نزلت باعداد كبيرة بالاستفادة من التعبئة الحاصلة دي ما ح يقدروا يعملو ليكم حاجة. اعداد كبيرة و في وقت واحد فى كل انحاء البلاد. الشباب معصلجين و مصرين على العصيان و تكراره كل اسبوع فى ذلك ايضا خير. قلت خلاص طولوا نفسكم للمسالة، لو قدروا يحشدوا كده 3 ايام من كل اسبوع الحكومة ح ترقد سلطة!

تلاتة ايام من كل اسبوع هههههه بتاعين ترطيبة

ود المدير سلام :
الاعصام نهارا والتظاهر ليلا يدعم الاعتصام ولا يتعارض معه
ونشرنا هنا وفي بعض القروبات ان علي الناس ان تتظاهر ليلا ولو علي سبيل الاحتفال بنجاح الاعتصام
- التظاهر لابد منه
والنظام مرعوب من ان يتحول العصيان الي تظاهر
http://sudaneseonline.com/board/490/msg/%d8%a7%d9%84%d9%8a%d9%88%d9%85-%d8%a7%d9%84%d8%ab%d8%a7%d9%86%d9%8a-%d9%84%d9%84%d8%b9%d8%b5%d9%8a%d...-%29-1480332982.html

Quote: حتي انا زاتي لم قلت ليهم نفكر فى الخروج بعضهم اعتبرني دجاجة الكترونية

أعمل حسابك يا بكور ..
اليومين ديل الناس معدل الحذر عندهم عالي جدا ..
اي شوشرة أو كاني ماني طوالي بيقولوا ليك ..
وكان بقيت منو ومنو..
برضو انت جدادة الكترونية ..

ود المدير سلام مربع

نعم تنبيه مهم جداًً


تنبيه هام جداً جداً

الناس تنتبه للبيانات التي يقال أنها منشورة من قبل تنظيمات المعارضة ويكونوا حذرين تجاهها لأنه الأمن شغال فبركة وبحاولوا يستدرجوا الناس للتظاهر في الشارع عشان يندسوا عناصرهم ويقوموا بأعمال تخريبية وينسبوها للمتظاهرين وبالتالي يمتلكوا تبريرا لإستخدام العنف


هذا هو المخرج الوحيد لهم الآن .. لا تعطوهم فرصة كهذه أبداً

عصيان مدني فقط .. لا تظاهر ولا خروج

مع تحياتي

عاصم فقيري

والله حيرتونا زاتواعتصام براه كدة بعمل شنو؟
يعني الناس تقعد تموت كمد كده ساكت في البيوت
طيب ما في ناس ميتين ليهم 27 سنة في بيوتهم مافي زول اشتغل بيهم
والامنجية لو عايزين يصلوكم في البيوت بغلبهم؟ ياخ ديل وصلوكم ووصلوا غيركم بره البلد
وبعدين ..
الحكومة اصلا دولاب عملها معطل ، المصالح العليا خامنها الكيزان وسافنها، وبغياب الناس والاعلام حايتمكنوا منها زيادة
والمؤسسات الدنيا (الفتات) اصلا مافيها شغل ، مكاتب كلها زحمة في الفارغة ويادوبها حلت للشغل المنظم والقروش الزيادة
صدقوني .. تطويل الاعتصام في البيوت مالصالح الثورة ، وقصة التلاتة يوم صيام وتلاتة فطور دي ما جايبة حقها ولا فيها منطق
الاعتصام لو استمر سنة في البيوت الحكومة دي ما حا بتسقط ، الحكومة لاسع كايسة مخارجات للشعب عشان يغور في ستين اغتراب وتفضى ليهم البلد ، وكمان الناس لو اعتصمت شهر بتكل وتمل وتبدا تتسلل، والعايزو النظام بالاغراء بالتهديد بطول الزمن بجيبه،
ياخ ده قلب الحكومة على المهدي والميرغني وفي النهاية جابهم كمبارس في حكومته.
الكلام الجد حار .. والحكومة بدون خروج للشارع مابتسقط ، سموه أي حاجة ، تجمعات، جلسات، عطالة، اعتصام سلمي ، المهم العالم يشوف ملايين في الشارع .
حسني مبارك ده لو ما الشعب قعد ليهو في الساحات بالملايين ماكان رحل ليوم الليلة،
والقذافي لو الناس قعدت ليهو في البيوت كانت لا اسع قاعدة
حديثي هذا يجب ألا يعتبر دعوة للتظاهر والعنف، ولكن للتخطيط السليم لاستغلال الاستجابة الشعبية في الخروج للشارع في الوقت المناسب، وبأعجل ما يمكن ، فالمثقف واعي ، والراعي الشعب والشاهد العالم باعلامه والحامي الله.

يا جماعة والله حيرتونا !.


كدي نشوّف مزيد من الأراء...

.

ما عجبني إلا تعليق ( زي عصيدة العزابة )...

العزابة بقوا بتاعين هوت دوغ ... ومخلل

ههههههههههه

العصيان المدني والتظاهر ليلا في الأحياء في كل المدن سوف يشل النظام

لا مركزية المقاومة والابتعاد عن التخريب

Quote: الابتعاد عن التخريب

دي صعبة شويّة يا ياسر،
لأنوا الحاجات دي أصبحت تُفتعل من قِبل
أفراد العصابة...

سلامات ود المدير
عصيان مدني فقط .. لا تظاهر ولا خروج فى الميادين العامة والساحات

تكوين لجان الاحياء

الامتناع عن دفع الجبايات

كل ناس حى يشوفوا شكل تظاهراتهم الليلية او الوقوف جميعا خارج دورهم بلافتات احتجاجية متفق عليها
ياناس الخارج, بعد المظاهرات رسلوا كروت الشحن للداخل والدعم المالى لنشطاء الداخل. كل واحد للناس البعرفهم وبثق فيهم

الناس ما تستعجل دي مرحلة بناء تيار شعبي عريض و مرحلة غسيل
الخوف ..........وزي ما نجح الاعتصام حينجح برنامج الخطوة التالية فقط
الناس تركز وتعمل كتلة شعبية موحدة ..............

لتخطيط_لليوم_الثالث
#العصيان_المدني_السوداني_في_يومه_الثالث

يا جماعة اليوم الاول و التاني انتهي النتائج حنعرفها بعدين ( امتحانين و خلصنا منهم )،،، خلينا نعد لامتحان يوم باكر ،،، اليوم التالت ودا المهم،،،،،،
الحديث عن الفشل و النجاح سابق لاوانه،، القضية قضية تخطيط مستمر بناءا علي المستجدات في الارض والواقع،،،،، يعني المرونة في تغيير الخطة و استباق الاحداث بالافعال،،،، و بث الرسائل الايجابية و التفكير في المستقبل معتمدين علي نجاح الفكرة و قوة ارادتنا و اهم شي وحدتنا كلنا كشعب سوداني،،، عشان نحقق حلم واحد و نعمل مع بعض عشان رسالة واحدة،،،، وطن جديد.. تحكمه حكومة بارادة الشعب و من الشعب عشان مصلحة الشعب ،، و نحاسبها احنا.
ما تنساقو في نقاشات غير جوهرية و تفاصيل فرعية ده ما وقتها و ما مكانها،،، و نختلف قبل ما نصل شط الامان و غايتنا،، انشالله بعد ما نصل شط الامان اكيد بكل سهولة حنقدر نصل لحلول بطريقة حضارية لكل اهدافنا،،،، و نضع في الاعتبار رؤية كل زول و مصلحة كل زول في السودان،،، من اصغر قرية،،، لاكبر مدينة،،، خلو تنوعنا الاثني و الفكري مصدر لقوتنا ما لضعفنا.
بلندنا ملتقي حضارات و تمازج اعراق ،،،، ربنا جعل ملتقي النيلين فيها دلالة علي حتمية التمازج و تعانق الحضارات و الاعراق.
تحت الرسالة دي خطوات توعوية ساهم بنشرها و العب دورك في تحقيق حلمك :
محتاجين توعية اكتر بالعصيان فاذا تكرم الجميع بارسل هذه الكلمات في كل القروبات واتس وفيس
- المرحلة تحتاج لانضباط عالي جدا. وعلي كل فرد ان يلتزم بضبط ذاته و نشر الوعي الانضباطي للمحيطين.
- العصيان المدني ليس حظرا للتجول ,ولكن خلو الشوارع من المارة دليل نجاح العصيان.. ما العمل؟
- لا تخرج الا للضرورة القصوي
- عندما تخرج لتري مدي نجاح العصيان فتأكد ان غيرك يفعل هذا وهكذا سيمتلئ الشارع بالمتفرجين وتعود انت والاخرين الي منازلكم يتملككم الاحباط؟؟الزم دارك وبلغ 10 من معارفك
- اتصل بالمحيطين بك وحثهم علي عدم الخروج
- ينشط جهاز الامن في نشر الاشاعات , لا تساهم في نشرها والترويج لها
- لا تساهم الا في نشر الحقائق وهي كثيرة جدا.
- ساهم في رصد اي حالة اعتقال او انتهاك او محاولة اثارة للقلاقل في محيطك.
- وحدوا هاشتاقات حملة العصيان.
- لا تساهم بنشر البوستات المحبطة..
- تجربة العصيان جديدة علي الكثيرين من ابناء الشعب السوداني.
- لا تستعجل النتائج و دع العصيان ينضج علي نار هادئة حتي يصل درجة الغليان.
- الاحزاب السياسية والمنظمات المجتمعية قوامها افراد مثلي ومثلك فلا تجعل كل همك في السؤال الجدلي: وين الاحزاب السياسية؟
- هذه مرحلة تتطلب وحدة كل قطاعات الشعب وعلينا البعد عن النقاشات عبر الوسائط وتفضيل حزب او كيان علي اخر.
- السودان كبير ويسع كل الاحزاب والكيانات والافراد فلا تقلقوا.
- اجعل همك ذهاب النظام ومن بعد ذلك فنجلس سويا ونقرر مصير هذا الوطن.
- كن انت التغيير والبديل