قيل فى المدح والذَّم

09:20 PM October, 06 2016 سودانيز اون لاين
عبدالعزيز الفاضلابى-Brooklyn, NY
مكتبتى
رابط مختصر
عكير الدامر
ضوَّ الهَجعَة للتَّايِهْ غريب يِتلَفَّـت
إكْسِير الضَّرا اللِّيهو الشوارِع لَـفَّت
بَاهِل رِزقو رحمان القلــــوب الـخَــفَّت
إيــدو بَشَــاير الطَّــــرْفة اُم بــروقاً رَفَّـتْ
عريس اُمَّات لبوس الهَرْبَسَت وِاتصَفَّت
الخير الدَّفَر لبـــن البيــــــــوت الـحَــــــــفَّت
عسل عيش الجوار زمن السنين الجَّفَّت
مابِحسِبلَها إن جـــاتْ والله باكِر قَفَّــــــــــــت
******
كُـــــــــوع الدنــــــدر المابْتِنقَطِــــــــــــع زُوَّارو
بيتــــــــو تَمَلِّى للبَيَّاح تلــــــــوح انـــــــوارو
خريف كاجا الفَتَقْ نَالو وضِحِك نُوَّارو
نِعِم الصاحَبو ونِعِم السَّكَن فى جوارو
عَدُو مالو ابسوالِف كُلْ مَخلوق دارو
باهِــــــل رزقو ساااااهِل للبِيَدْخُل دارو
طالِع نجمو كوكب نور ادور فى مدارو
من بـــــــرج اللَّسد جات عِزَّتو ومِقدارو

من بـــــــرج اللَّسد جات عِزَّتو ومِقدارو ..
ـــــــــــــــــــ
قالوا في واحد مابيعرف كوعو من بوعو في الأبراج..
قام سألوهو :برجك شنو؟
قال:أوووو،اللسد ياخ..

Quote: قال:أوووو،اللسد ياخ..

هلا بولدنا العليش ,, ياخ جيتنى فى جرح انت زول كتَّاب
دحين البيت بيتك واصل ,, وافتل فوق راس الحبل ده.
*******
من روائع التراث ,, جزء من حوار بين ريا وود دكين
كما صوَّرها العَبَّادى ,, رحمه الله
قال شيخ العرب ود دكين يخاطب ريا بعد ان عرَّفته
بانها بنت عبدالله ابكِبِس:

عبد الله ابكبس عز البطانه وفخري
في راس العرب بنعد ماهو الوخري
كريم وهميم كان للقبائل دخري
بت شيخ العرب هيلك صحيح تفتخري
توقد ناره ديمه الما بكوس الجمره
وفي الضيفان يهوش سكينو دايما حمره
بي كاس ما عبر لبنو بيجيك بالعمره
هيلو الشكرة هيلو الرئاسه هيلو الامره
المرحوم ابوك كان للقبيله غطاها
عزك قديم عمك حسين ابو طه
ان شاء الله اخوك دي السكه ما تخطاها