Post: #1 Title: يا جماعة هوي شنو قصة النسوان البيسوقوا الطيارات ديل ؟؟ Author: محمد عبدالله مختار Date: 09-30-2016, 06:41 AM Parent: #0
كلو يوم العدد ماشي زايد .. مصر للطيران كم وعشرين كابتن من العنصر النسائي .. الخطوط الاثيوبية قربوا يفوتوا عدد الكباتن الرجال .. والحال من بعضو في بقية الخطوط .. والعداد ماااااشي !! يا ناس ما تفهموني غلط ، أنا ما بشكك في مقدرات المرأة في عمل حاجات معقدة بل أحياناً تركيزها ممكن يكون أعلى من الراجل المرأة الآن في الفضاء شغالة في المحطة الفضائية الدولية وشاركت في صيانة تلسكوب هابل (اعقد عملية صيانة في التاريخ). لكن أنا كزول راكب في الطيارة لو عرفت إنو الكابتن إمرأة بكون مهجس من حاجة واااااااحدة بس .. تخيلوا دخل السيد (الصرصار) الى كبينة القيادة وظهر حضرتو في لحظات مصيرية زي الإقلاع أو الهبوط والعجب لو بقا النوع البطير داك أها الدبارة كيف ؟؟؟ اقنعونا يا ناس والله القصصة دي أبت تخش لي في راسي كلو كلو
Post: #2 Title: Re: يا جماعة هوي شنو قصة النسوان البيسوقوا ال� Author: محمد عبدالله مختار Date: 09-30-2016, 06:52 AM Parent: #1
Quote: رهاب الصراصير أو ما يصطلح عليه بالسراقزيتوفوبيا La SirikzitoPhobie مرض نفسي (بسيكولوجي) خطير منتشر بشكل كبير عند العنصر النسوي خصوصا اللائي تقل أعمارهن عن 40 سنة،يصيب بالدرجة الأولى ذوي المنظومة السيكولوجية الحساسة و الضعيفة، و تتمثل أعراضه في كون المريض غير قادر على الاحتكاك أو التماس مع الصراصير نظرا لخوفه الشديد و العفوي منها ،و النابع من اللاوعي. كما تمثل بالنسبة إليه هذه الحشرة رعبا حقيقيا و عدوا لذودا لا يقوى حتى على التفكير فيه أو تأمله لما يحس به من قشعريرة تسري في جسده،فما بالك بمقابلته وجها لوجه التي تؤدي غالبا إلى رهبة شديدة مرفقة بصراخ لا إرادي أو حدوث نوع من الهستيريا عند بعض الحالات المستعصية ما يطرح انعكاسات غير مرغوب فيها، كفقدان الوعي و الوقوع في غيبوبة دون إغفال خطر الموت .
Post: #3 Title: Re: يا جماعة هوي شنو قصة النسوان البيسوقوا ال� Author: حيدر حسن ميرغني Date: 09-30-2016, 07:05 AM Parent: #2
محمد سلامات انا سافرت عدة مرات في رحلات جوية كان فيها قائد الطائرة امرأة صدقني احساس عظيم جدا وانت تعرف جنس الكابتن (ذكر/ انثى) بعدين الحساسية بتاعة الصراصير مابالضرورة تكون لدى كل النساء - اهديك صورة الكابتن اولويل بول ألوينج من جنوب السودان قائد درجة اولى في طيران فلاي دبي [url=[/url]
Post: #4 Title: Re: يا جماعة هوي شنو قصة النسوان البيسوقوا ال� Author: محمد عبدالله مختار Date: 09-30-2016, 07:20 AM Parent: #3
Quote: انا سافرت عدة مرات في رحلات جوية كان فيها قائد الطائرة امرأة
اللهم حوالينا ولا علينا .. سلام يا حيدر .. والله من طفل عمري 5 سنة ولغاية الآن سافرت كتير جداً وبستمتع بالطيران ، اها الفترة الأخيرة بعد النسوان الكباتن ديل ما كترن بقيت اتخوف من حتة نجاح الصرصار في التسلل الى كابينة القيادة والعجب السيد (جيري) لو نجح في إقتحام قمرة القيادة وبصراحة الموضوع ده بقى بيخرب لي مزاجي وخايفو يتحول لي فوبيا.. ما عارف لكن حقو يدخلوا معايير جديدة وإختبارات في تدريب الكباتن من العنصر النسائي .. يعني مثلا إختبار قدرات وتحمل : - إختبار الصرصار (الزاحف والطائر) - إختبار الفار (أم سيسي والجقر) - إختبار الضب
Post: #5 Title: Re: يا جماعة هوي شنو قصة النسوان البيسوقوا ال� Author: محمد عبدالله مختار Date: 09-30-2016, 07:40 AM Parent: #4
Quote: بعدين الحساسية بتاعة الصراصير مابالضرورة تكون لدى كل النساء
لغاية هسي ما لاقتني امرأة ما بتخاف من السيد الصرصار .. وكلمة خوف دي بسيطة جداً الأسبوع الفات المدام أطلقت صرخة مدوية قلت لا سمح الله الولد يكون حصل ليهو حاجة ، طلع كل القصة إنو حضرتو شرف .. لقيتو هو قاعد في الواطة في أمان الله وهي متشعلقة في حاجة وبترجف كلها تقول شافت ليها أسد
يوم في موظفة حكومية وأثناء تقليبها للملفات في كرتونة موضوعة على الأرض ظهر السيد الصرصار وفي لمح البصر كانت فوق الطربيزة والورق إتشتت وكان بتصرخ بهستريا مبالغ فيها ، أرعبت الناس كلهم والناس بتكورك ليها في شنو ؟؟ وهي بتصرخ وبتأشر على الكرتونة الفيها الملفات ، اها واحد قلب الكرتونة ووجد سعادتو قاعد ههههههه مستحضر مواقف كتيرة للصرصار أما السيد جيري فممكن أحكي ليك مواقف من الليلة لي بكرة ..
كان الله في عوننا ..
Post: #6 Title: Re: يا جماعة هوي شنو قصة النسوان البيسوقوا ال� Author: فردوس جامع Date: 09-30-2016, 02:26 PM Parent: #5
الأخ محمد مختار السلام عليكم بوستك ده ذكرني حكمة وين للفار... قيل " في شخص أعمى و وُهب البصر لثوانٍ فكان أن رأى فأرا و من ثم أُخذ بصره"... أها كل ما الناس تتناقش في آي شي فيل مثلاً زولنا ده بيسأل " وين للفار" حسى إنت بتتكلم عن محيطك و إنه ما لاقتك إمرأة لا تخشى الصرصار! بعدين ده فيه " كرنره" للمرأة ... يعني تخت المرأة في كورنر لو قالت ما بتخاف تبقى تنقصها الأنوثة لو قالت بتخاف تقول أها مش قلت ليكم... أحكي ليك قصة تانية (بقيت حكاية في بوستك ده فاضل لي أقول ليك سنة تلاته و تمانين هههه) قضينا ما يقارب السنتين كده في مناخ تروبيكال... أها بناتي آي حشرة لينه طايرة آي شيء بالنسبة ليهم Toy حكوة أخيرة... جات سيرة السواقة و صديقتي في السودان متذمرة من قصة إنه آي مصيبة حاصلة في باركينق, شتارة في السواقة بيقولوا أكيد دي بنت... قلت ليها ده مثال حي لي وين للفار لأنه في دول كثيرة في العالم البنت و الولد بيسوقوا من سن 16 سنة! أخيراً ... إذا لم تخني الذاكرة قرأت ليك بوست بتناقش فيه علوم هندسية بمعرفة... فصنفتك إنك فيك رقشة و ما زول ساي فمافي داعي للإحباط :)
**** "زول ساي" ممكن تطلق على شخص في أعلى السلم الأكاديمي و العكس صحيح تماماً! و قديماً قيل " القلم ما بزيل بلم"
و تحياتي و تقديري لك
Post: #7 Title: Re: يا جماعة هوي شنو قصة النسوان البيسوقوا ال� Author: Basamat Alsheikh Date: 09-30-2016, 03:26 PM Parent: #6
عزيزي الفاضل محمد عبد الله
وشن قولك في خطوط الطيران الهندية Indian Airlines في رحلة ثابتة من نيودلهي إلى نيويورك كل طاقم الطيارة من النسوان، كباتن ومهندسات ومضيفات، وما في اي رجل إلا فقط المسافرين... .. إنتو من زمن المرأة قاعدة طول يومها في المطبخ وما بتدخل مدرسة وتكون جاهلة.. ولا انتو من زمن المرأة بيقتلوها حية عشان كان بيعتبروها عار على المجتمع... ولا ما سمعتو بأن المرأة قائدة مركبة فضاء ... وبعدين هي طيارة فيها صراصير بيختاروها للسفر كيفن.... وعندي ليك قائمة بأفضل خطوط الطيران في العالم من حيث النظافة والخدمات وتأهيل الكباتن وشطارتهم مثل كابتن سولين بيرغار، الذي انزل طائرته في مياه نهر هدسون في نيويورك عندما نعطلت ماكينات الطائرة.. والقائمة هي: - الخطوط السويسرية - الخطوط القطرية - الخطوط الفرنسية - اللوفتهانزا( المانية) - الخطوط السعودية - الخوط الهندية - وما تنسي ان هناك كباتن من النساء في هذه الخطوط.. وحتى الخطوط السعودية فيها إمرأة بتسوق الطائرة الجامبو الضخمة حتى نيويورك ودمت بالف خير وصحة وعافية
Post: #8 Title: Re: يا جماعة هوي شنو قصة النسوان البيسوقوا ال� Author: سيف النصر محي الدين Date: 09-30-2016, 04:21 PM Parent: #7
سلامات يا محمد و انت هسه بقى عندك رهاب رهاب المراة من الصرصار هههههههه
Post: #9 Title: Re: يا جماعة هوي شنو قصة النسوان البيسوقوا ال� Author: محمد عبدالله مختار Date: 10-14-2016, 07:18 PM Parent: #8
يا مرحباً بالأخت فردوس جامع ..
Quote: بوستك ده ذكرني حكمة وين للفار
على العكس تماماً مداخلتك البينطبق عليها قصة وين للفار دي وارجعي لتاني مداخلة في البوست وحا تفهمي إنو الموضوع ما توهم مني وما بنيت الموضوع على الحاجات الشفتها في حياتي إنما هي دراسات علمية أثبتت إنو الفوبيا بتاعة الصراصير دي منتشرة في العنصر النسائي بصورة كبيرة ، أنا إطلاقاً لم أقلل من قدرات المرأة في العمل بل ذكرت إنها ممكن تتفوق على الرجل .. الإقتباس التالي من أول مشاركة لي في البوست ده :
Quote: يا ناس ما تفهموني غلط ، أنا ما بشكك في مقدرات المرأة في عمل حاجات معقدة بل أحياناً تركيزها ممكن يكون أعلى من الراجل المرأة الآن في الفضاء شغالة في المحطة الفضائية الدولية وشاركت في صيانة تلسكوب هابل (اعقد عملية صيانة في التاريخ).
لو كان قريتي المداخلة دي بتجرد ودون (عاطفة) ما كان احتجتي لي قصة الفار أو الكديس أو الكرنرة .. لكن ده الله ودي حكمتو ، النساء (بصورة عامة) بيتعاملوا بالعاطفة أكثر من العقل وعشان ما تجيبي لي قصة الفار والكديس أنا قلت (بصورة عامة) وبالطبع لكل قاعدة شواذ وعليك الله ما تفهمي إنو القصة دي قصور في النساء إنما هي حكمة من الله عز وجل ولولاها لضاع الأطفال مع الرجال لكن بالطبع هي أحد الأسباب التي جعلت العصمة في يد الرجل وإلا كان كل الرجال اليوم مطلقين :)
أما بشأن بناتك الكانوا بيلعبوا بالحشرات اللينة وبيعتبروها Toy سنة كم وتمانين لأنهم عاشوا في مناخ تروبيكال فبقول ليك قصة إنهم كانوا أطفال دي هدمت الإستدلال بتاعك ، عندنا كم شافع في الشمالية لدغتهم العقرب لأنهم كانوا برضوا مفتكرنها Toy وكده ، فاشنو عايزك الليلة تجيبي ليك صرصار محترم وتقدميهو لي بناتك ديل وهن (الآن) نساء وتعالي قولي لينا بأمانة وتجرد هل قدروا يتعاملوا مع الصرصار ده كـ Toy ؟؟
بالنسبة لي تصنيفك لي إنك كنتي مفتكرة فيني (رقشة) وفي النهاية طلعت (زول ساي) مع التوضح طبعاً بإنو زول ساي ده ممكن في أعلى السلم التعليمي فبقول ليك يا بت الناس أنا لا زول فيني رقشة ولا زول ساي (بتاع السلالم التعليمية) ، انا مصنف نفسي إني زول (اهالي ساي) .. مزارع وكده مع العلم إنو تصنيفات الناس لي دي ما بتهمني كتير لأني ببساطة عادي نفسي زول (أهالي ساي) ..
أصدق عبارة في مداخلتك : القلم ما بزيل بلم
لك الإحترام والتقدير
Post: #10 Title: Re: يا جماعة هوي شنو قصة النسوان البيسوقوا ال� Author: محمد عبدالله مختار Date: 10-14-2016, 07:43 PM Parent: #9
حياك الله يا أخت بسمات ...
Quote: ولا ما سمعتو بأن المرأة قائدة مركبة فضاء
ما عارف هل المقصود بالكلام ده أنا ولا منو بالضبط .. يا بسمات إنتي قريتي العنوان وبنفس العاطفة الجياشة بتاعة الأخت فردوس طوالي جيتي رديتي ولا قريتي كلامي ؟ معقولة ما مرا عليك الكلام ده في أول مشاركة لي في البوست :
Quote: أنا ما بشكك في مقدرات المرأة في عمل حاجات معقدة بل أحياناً تركيزها ممكن يكون أعلى من الراجل المرأة الآن في الفضاء شغالة في المحطة الفضائية الدولية وشاركت في صيانة تلسكوب هابل (اعقد عملية صيانة في التاريخ).
Quote: وبعدين هي طيارة فيها صراصير بيختاروها للسفر كيفن
عادي جداً إنو السيد الصرصار يكون متواجد في الطائرات ولولا المكافحة المستمرة لكان له وجوداً مكثفاً ، المخلوق ده روحو طويلة خلاص أهديك الفيديو التالي للسيد الصرصار وهو يصول ويجول بإحدى الطائرات وجايبنو في الأخبار كمان :) مشاهدة طيبة أتمناها لك ..
Post: #11 Title: Re: يا جماعة هوي شنو قصة النسوان البيسوقوا ال� Author: Basamat Alsheikh Date: 10-14-2016, 07:59 PM Parent: #10
لا يا محمد عبد الله الكلام ده ما انت المقصود بيه ..وانا فهمت المقدمة التي كتبتها,,, ولكن كلام عام لاظهار مقدرة المرأة في مجالات كانت محصورة زمان للرجال فقط\ ودمت بألف خير وصحة وعافية
Post: #12 Title: Re: يا جماعة هوي شنو قصة النسوان البيسوقوا ال� Author: محمد عبدالله مختار Date: 10-14-2016, 08:04 PM Parent: #10
Quote: سلامات يا محمد و انت هسه بقى عندك رهاب رهاب المراة من الصرصار هههههههه
يا مرحباً يا دكتور والله ده الحاصل والبوست ده اصلا فتحتو عشان القا معلومة تطمني إحتمال بيعملوا للجماعة ديل إختبارات خوف وكده بالمناسبة قالوا في أعطال فنية ممكن تحصل للطائرة تحتاج قوة بدنية للتعامل معاها ، الكلام ده شفتو قبل كده في وثائقي في ناشيونال جيوغرافيك يا ريت المتخصصين يجوا يورونا الكلام ده أعتقد الفرق واضح في القوة البدنية بين الرجال والنساء الموضوع ده ما محتاج مغالطة مع الإستثناءات طبعاً (لكل قاعدة شواذ) .. اها ما دام جبنا سيرة الإستثناءات دي زماااااان في تلفزيون السودان جابوا 3 نسوان ما شاء الله عليهم أي واحدة لو أدتك هوك بتركبك التونسية النسوان ديل كانوا بيناقشوا في قضية ضرب بعض الأزواج لي زوجاتهم ، واحد ظريف كده علق قال والله ديل الواحدة فيهم لو نهرت راجلا ساي بيخش في غيبوبة خليك من انو يفكر يمد يدو عليها
Post: #13 Title: Re: يا جماعة هوي شنو قصة النسوان البيسوقوا ال� Author: عبدالعزيز الفاضلابى Date: 10-14-2016, 08:42 PM Parent: #12
ود اختى كان شغال فى مصنع فى الخرطوم قصفته طيارة بدون طيار اها الولد بحكى لى شابكنى ,, ضربتو طيارة بدون سَوَّاق.
Post: #14 Title: Re: يا جماعة هوي شنو قصة النسوان البيسوقوا ال� Author: محمد عبدالله مختار Date: 10-14-2016, 09:20 PM Parent: #13
Quote: ود اختى كان شغال فى مصنع فى الخرطوم قصفته طيارة بدون طيار
يا هلا بي الفاضلابي حسب معلوماتي في تاريخ السودان كلو مافي مصنع قصفته طيارة بدون طيار .. لو قاصد مصنع الشفاء ده إتضرب بي صواريخ Tomahawk
Post: #15 Title: Re: يا جماعة هوي شنو قصة النسوان البيسوقوا ال� Author: اميرة السيد Date: 10-14-2016, 11:03 PM Parent: #14
ود عبد الله مختارصحيح مصنع الشفا ضربوه الامريكان بصاروخلكن في مصنع تاني جنب الشجرةضربوه الاسرايليين بطيارة بدون سواق والله يديك الصحة والعافية
Post: #16 Title: Re: يا جماعة هوي شنو قصة النسوان البيسوقوا ال� Author: محمد عبدالله مختار Date: 10-14-2016, 11:20 PM Parent: #15
Quote: ود عبد الله مختار صحيح مصنع الشفا ضربوه الامريكان بصاروخ لكن في نصنع تاني جنب الشجرة ضربوه الاسرايليين بطيارة بدون سواق والله يديك الصحة والعافية
مرحب بيك تاني يا بسمات .. إنتي قاصدة المجمع العسكري بتاع اليرموك وفيهو تصنيع حربي أولاً المجمع ده ما اتضرب مباشرة كل الحاصل إنو إتضرر من آثار القصف الهدف كان عدد من الحاويات (أكثر من 40 حاوية) وبسبب ضخامة القنابل المستخدمة تأثرت الجملونات المجاورة والموجود بها أنواع مختلفة من الذخيرة عندي الصور بتاعة الأقمار الصناعية قبل وبعد القصف لو عايزاها قولي عوك اليرموك تم قصفه (الحاويات تحديداً) بأربع طائرات تحمل كل منها قنبلتين وزن الواحدة الف كيلو ، 8 قنابل .. 8 طن والطيارات كانوا بي سواقنها :) وكانت في 4 طيارات جات في المقدمة شايلة صواريخ جو - جو لصد اي محاولات دفاعية من سلاح الجو السوداني الذي لم يحرك ساكنا وقبليهم كانت في طيارة بوينغ حاملة للوقود دخلت السودان وتم التزود بالوقود في الجو في منطقة البطانة وقبل الجماعة ديل كلهم كانت في طيارة سغيرونة اسمها قلف استريم جي 500 مزودة بأجهزة تشويش للرادارات دخلت الأجواء السودانية الهيلمانة دي كلها وطيارة بدون سواق ؟ جدير بالذكر إنو أكبر طيارة إسرائيلية (بدون سواق) إسمها إيتان وحمولتها القصوى 1 طن يعني قنبلة واحدة من القنابل القصفو بيها الحاويات الفي اليرموك دي
شكراً على الدعوة الجميلة التي تذيل جميع مشاركاتك .. ولك مثلها
Post: #17 Title: Re: يا جماعة هوي شنو قصة النسوان البيسوقوا ال� Author: محمد عبدالله مختار Date: 10-14-2016, 11:23 PM Parent: #16
نأسف للخطأ يا اميرة السيد ومرحب بيك شرفتي البوست المخستك ده والواحد دايما بيلخبط بينك وبين الأخت بسمات لأنكم ما شاء الله دايماً معا بعض في البورد الله يديكم الصحة والعافية ويسعدكم ..
Post: #18 Title: Re: يا جماعة هوي شنو قصة النسوان البيسوقوا ال� Author: احمد عمر محمد Date: 10-15-2016, 07:36 AM Parent: #17
ذات مرة ان احداهن اعرف انها تصاب بإغماء اذا شاهدت ( الضب) وكنا في ال class وفجاءة ظهر من خلف الصبورة ( ضب) صغير الحجم فقلت لها انظري هناك وخلال ثانية واحدةعاد الضب خلف الصبورة ثم ظهر مجدداً خلال ثانية واحدة وحين ظهر الـ (ضب) للمرة الثانية كان بصرها قد وقع على الضب ووقعت هي ( مغمياً) عليها وعندها تيقنت انهن يعانين من فوبيا حقيقية من الضب والصراصار بكل تأكيد تحياتي
Post: #19 Title: Re: يا جماعة هوي شنو قصة النسوان البيسوقوا ال� Author: فردوس جامع Date: 10-26-2016, 05:00 AM Parent: #18
السلام و التحية الاخ محمد أعتقد إنه مداخلتي الفوق دي ما واضحة و عاوزه شرح (كتبتها بإقتضاب و في البال أشياء أُخر) أها قامت جات مُقعرة , مُطلسمة و قعدتني في بُرُج عاجي... برجع ليك لو ربنا مد في الآجال... إلى ذلكم الحين العفو و العافية و لك كل التقدير و الإحترام
Post: #20 Title: Re: يا جماعة هوي شنو قصة النسوان البيسوقوا ال� Author: walid taha Date: 10-26-2016, 07:07 AM Parent: #1
محمد إزاى الحال أنا شايف إنو المهنة دى بالذات يفترض يخلوها (للنسوان) . المراة لها دور قيادى فى بيتها فهى من يبحث وينقب فى الأشياء ومن يرتب ومن يتفقد حاجيات الأبناء وهم ذاهبون الى المدارس ومن يتتم فى كل صباح على كل صغيرة وكبيرة ولربما ذهبت للعمل بعد ذلك. مهنة (الطيارة) أو مهندسة الطيران وكل المهام المتعلقة بهذه المهنة الحساسة تتطلب بالضبط كل ما ورد أعلاه . حتى مهنة المضيفة لا أبالغ غن قلت إنهاء مهمة أصعب بكثير من من تولى قمرة القيادة فإدارة أمور المسافرين والمحافظة على الشعور بالأمان لديهم لهو امر يتطلب صبر ولباقة وشجاعة . أضيف ان أنامل المراة مناسبة جدا للتحكم فى الأزرار فاللوحة تضج بكمية من الأزرار الحساسة المتقاربة التى لا تقبل الخطأ :) تحياتي ،،
Post: #21 Title: Re: يا جماعة هوي شنو قصة النسوان البيسوقوا ال� Author: فردوس جامع Date: 11-16-2016, 05:45 PM
السلام مجدداً محمد عبدالله و ضيوف البوست الكرام....
أثرت نقاط كتيرة جديرة بالتأمل و الرد ....
قلت
Quote: أما بشأن بناتك الكانوا بيلعبوا بالحشرات اللينة وبيعتبروها Toy سنة كم وتمانين لأنهم عاشوا في مناخ تروبيكال فبقول ليك قصة إنهم كانوا أطفال دي هدمت الإستدلال بتاعك
على العكس تماماً .... قصة إنهم أطفال دي جبتها ليك عشان أدلل ليك إنه القصة كلها راجعة لنظرية السيكولوجي المعروفة Nature vs Nurture ! يعني قصة خوف البنات من الصراصير ما encoded في الجين بتاعهم ... ترجع للتربية و التربية فقط!
لي عودة إن شاء الله
Post: #22 Title: Re: يا جماعة هوي شنو قصة النسوان البيسوقوا ال� Author: فردوس جامع Date: 11-16-2016, 06:03 PM Parent: #21
الشيء الآخر ... المداخلة دي المفروض تكون سابقة للمداخلة السابقة...
لازم أبدا بقصة... قبل يومين شفت لي فيديو بيتكلم فيه دكتور ( ما عارفة الدكتوراة بتاعته في شنو) قال إنه الرجال في الغرب ديوثين عشان بياكلوا لحم الخنزير!
اليوم ال دخلت فيه البوست ده كنت "واقعة تحت تأثير" بوست بي فهم مشابه ل دكتور هنا في البورد...لحسن الحظ إني ما متذكراهُ! أها قام اللاوعي بتاعي إستحضر إحباطي في البوست ده... و كتبت القلم ما بيزيل بلم على غرار ذاك البوست لكن كونه يكون مقرون ببوستك ده من غير إزالة تشفير ما " فير"...خطأ أعتذر عنه...كنت مستعجلة ! صراحة كان عشم في قلمك لا غير! أها ال دكتور الهنا كما حال ال دكتور ال قال رجال الغرب ديوثين لا ألقي لهم بالاً ... خسارة علمهم اللي ما بيفيد! و قولي إنه العكس صحيح ... قصدت إنه أنا بتعلم من ناس هنا في البورد و في الحياة عامة ما بتحمل آي درجة علمية.. لهم كل الود و التقدير!
لي عودة إن شاء الله
Post: #23 Title: Re: يا جماعة هوي شنو قصة النسوان البيسوقوا ال� Author: فردوس جامع Date: 11-16-2016, 06:11 PM Parent: #22
Quote: هي أحد الأسباب التي جعلت العصمة في يد الرجل وإلا كان كل الرجال اليوم مطلقين :)
أسمح لي هنا أقول ليك وين للفار طبعاً شكلك بتقصد الثقافة العربوإسلامية !
صحصح معاي شوية كده العالم فيه تقريباً 7 بليون نسمة و المسلمين تعدادهم تقريباً 1.6 بليون نسمة!!!!
Post: #24 Title: Re: يا جماعة هوي شنو قصة النسوان البيسوقوا ال� Author: فردوس جامع Date: 11-16-2016, 06:24 PM Parent: #23
Quote: لو كان قريتي المداخلة دي بتجرد ودون (عاطفة) ما كان احتجتي لي قصة الفار أو الكديس أو الكرنرة .. لكن ده الله ودي حكمتو ، النساء (بصورة عامة) بيتعاملوا بالعاطفة أكثر من العقل وعشان ما تجيبي لي قصة الفار والكديس أنا قلت (بصورة عامة) وبالطبع لكل قاعدة شواذ وعليك الله ما تفهمي إنو القصة دي قصور في النساء إنما هي حكمة من الله عز وجل ولولاها لضاع الأطفال مع الرجال لكن بالطبع هي أحد الأسباب التي جعلت العصمة في يد الرجل وإلا كان كل الرجال اليوم مطلقين :)
المداخلة دي كلها علي بعضها ذكرتني أخي الكريم محمود الزبير ( الوهابي ) ذات نقاش... و لما احتدم... و في محاولات لإخراسنا جاب لينا نوع مداخلتك دي....
بس ما فضل ليك إلا تجيب لي الحديث المفبرك بتاع " النساء ناقصات عقل و دين" ! بكل تأكيد No hard feelings... و ستظل زميل عزيز بهذا المنبر! تحياتي و تقديري.
[/url]
طبعاً شكلك بتقصد الثقافة العربوإسلامية !