كذب لؤى وان صدق .. ولا يهمك يا موصلي

\استغربت جدا للطريقة التي اتبعها الأستاذ لؤى ( المحترم) وهو يستميت
لتجريد الفنان الموصلي من جمالو وإبداعو لمجرد أن الأخير حظرو
من صفحتو في العفريت الإسمو فيسبوك واللا زفت الطين دا ..
أيوة نعم استغربت شديد لانو الحبيب مصر على انو نقلو للدشمان الكان
هناك إلى سودانيز أون لاين بهدف تمليك حقائق تاريخية لانصاف الموسيقار
وردي الذي يري لؤى أن الموصلي نام بحقو وهو لا يرضي في باباه
ولن يدع أحد ينال منو ..
لغاية هنا احتمال يكون كويس بغض النظر عن صدق المزاعم أو كذبها
ودا شهر ما عندنا فيهو نفقة زي سيد البوست المعني وبطله الموصلي
لكن الما ممكن يكون كويس وعندنا فيهو نفقة ونص وخمسة محاولة
الأستاذ لؤى اقناعنا انو نقلو للحوار إلى هنا لا يعني شخصنة القضية
ولا يحتمل أبدا سوء الغرض ومحاولة النيل من أستاذو الموصلي مع انو
( الجواب يكفيك عنوانو) وعنوان البوست فيهو (بول) وفي وبدايتو
(حيتان تبلع) مرورا ب( إدعاءات كاذبة) و( بوابة جحيم)، و (كوابيس)
و..و..و.. الخ الكواريك والأوووووف التي لا تستقيم أبدا وإدعاءات لؤى
التي تلت بعد ذلك والتي يؤكد فيهو أنه يحبه ويحترمه وهو أستاذه وما عارف شنو ..
لا لا يا لؤى انت نقلت الحوار هنا عشان تنتقم من الموصلي وترشو رش تقيل انتصارا
لنفسك بعد حظرك هناك .. فلا تقنعنا لأننا لن نكذب ما قرأناه ونصدق شعاراتك.
قول عديل حرقني الحظر هناك وعايز أشيل حقي هنا عشان الناس تتفاهم معاك على هذا
الأساس لكن ترش الراجل بالمدفعية بالأسلحة القانونية والمحرمة وتقول أنا بحبو وبحترمو..
دا كلام ما احترمتنا فيهو بصراحة .

معليش لكل زول اعتقد انو العبد لله سيدلي بدلوه في عضمة
الجدال الدائر بخصوص حق الموصلي في التوزيع الموسيقي وما شابه.
أبدا.. دا ما بعرفو والله لكن البعرفو الكلام النجيض المو ني
لؤى يمكن يكون صادق في كلامو وعندو حق والعكس الموصلي
برضو ممكن يكون سيد حق .. لكن لؤى ما يقنعنا انو غضبتو دي
بسبب إرجاع الحقوق لاصحابا .. أبدا ..كما هو واضج جدا الراجل
زعل جدا من استاذو وحبيبو لأنو حظرو وجاء هنا يفرغ شحنة الزعل
بدليل الكلمات داخل القوسين عاليه ..وقبل ذلك عنوان البول أقصد البوست
..معقول زول يقول لزول بحترمو وبحبو وبعتبرو استاذو كوابيسك وبوابة الجحيم
ومضلالاتي وما عارف شنو ؟؟
يا الموصلي يا فنان أسلم طريقة تشيل عدتك وتغادر
المكان الما فيهو أدب الكلام مع المبدعين دا ..
أي والله وجودك هنا تواضع منك لكن منو البقيم الأخلاق دي ؟
ياخ عادي جدا ممكن بعد شوية يلم فيك تهريف أو جرجير أو المستجير
ويتعاملوا معاك ند لند .. بس عشان اتواضعت معاهم هنا .
أطلع ياخ

عليك الله يا لؤى ما تتعامل مع كلامي دا بانفعال زي
إنفعالك مع حظرك في الفيسبوك .. كدا قارن طريقتك
وطريقة زميلك في الحظر الأخ الليندي ..
الليندي خظروهو وبرضو يحمل نفس قضيتك
ومع ذلك كان وظل رزينا متأدبا في الكتابة لأستاذه
الموصلي مع تمسكو بوجهة نظرو كاملة غير منقوصة
لكن انت قلبت هوبا عديل ياخ ..
الموصلي ما بستحق منك كل دا ..

سلامات ياطلحة ..
لؤى هين .. حاتم والدسيس كيف؟؟ ..
الموصلى موقفه ضعيف فى تلك القضية صراحة ..
الإقتباس المصور الجابو الليندى يمثل كعب أخيل النازف للموصلى .. حاولت أباصر ليهو الجرح ما اشتغل بى .. ..

لكن بالمقابل
الحظر ما بشبهك يا فنان
انت مبدع ويفترض أن تكون كذلك في تعامل مع الجمهور
مش تبقي زي طيب الذكر أخونا طارق اللمين بتاع الهيلا هوب
والذي ما أن هبشناهو حتي طلب مننا الإبتعاد منو قائلا :
( يا زول هو خليك في كورتك) خخخخخخ
او سمعت نصيحة أخوك الصغير يا موصلي ما تحظر
لكن رش .. ههههههه

يا منير بصراحة أنا تابعت مداخلات أصحاب الشأن بس
مع اتنين أو تلاتة من الناس المقنعين و عارفم عندهم
حاجة لكن صعب جدا اتابع لي 415 مداخلة أقل واحدة
فيها خرتمية سطر وديلشيون كلمة ..
لكن عضمة البوست نفسو والغالب منو دي ما بقدر أفتي
ليك فيها بصراحة رغم مداخلة ( 2003) البقت للموصلي
في رقبتو دي ..
عموما يمكن اعتبار البوست دا مخارجة ليهو خخخخخخخ.
واذا اعتبرتو كدا بالمقابل ينبغي أن تكذب ادعاءات لؤى بانو
فتح البوست لأجل الحقائق التاريخية ما عشان عايز ينتقم
من حظرو . هههههههه

نحن ماعارفين نقاش الفيسبوك كان ماشى كيف.. لكين لو كان هناك إدعاء من الموصلى بأنه وزّع ولؤى عنده رأى معاكس يبقى ليهو حق يفتح البوست طالما تم حظره فى الفيسبوك ..

كلام عديل يا منبر
ما قلنا حاجة
لكن مشكلتي تكمن في مزاعم لؤى كونو قال
فتحو للبوست عشان يؤكد حقيقة وانو الموصلي
استاذو وبحبو ومستحيل يكون عندو معاهو شىء شخصي
ودا كلام تفندو لهجة البوست نفسو بداية من عنوانو
قبل تغييرو

العزيز الاستاذ طلحة
الحقيقة انا عندي تلاته صفحات في الفيس
كلهن بلغن الحد المسموح به من الاصدقاء ٥٠٠٠ الف
وانتظار المئات وطبعا معظمهم من المعجبين
جا لؤي ليس يناقش ولكنه بدأ يهدد ويحذر من الويل والثبور في صفحتي يعني احرجني مع المعجبين
وانا ما داير لساني يطلع كلام فيه عنف لفظي امامهم فقررت أن اتفاداه
ولكنه غضب غضبته تلك وارتحل الى هنا ظانا أنه يخيفني وكانت هذه غلطة عمره
وانت تعرف التاريخ وصحفي مرموق كم من الصراعات الفنية
حدثت بين وبين الراحل وجمعة جابر والراحل وردي وغيرهم ولكن كلها كانت في حدود الاحترام المتبادل
لك التقدير
ونصيحتك محل احترامي

الحبيب منير
ارجو ان تراجع البوست المعني حتى النهاية
لتعرف الحقيقة
مع التقدير

بالتوفيق يا مبدع
ليك السلام أوله وآخره .

تسلم استاذ طلحة وك التقدير كله

طلحة سلامات،

Quote: وانت تعرف التاريخ وصحفي مرموق كم من الصراعات الفنية

كلمات والحان وعزف وتوزيع وغناء الموصلي ؛)
---
يا مرموق ليك وحشة والله، الليلة دورتموند كيف؟

حباب الحبيب ود طيفور
سلامات يا كلس ووين الغيبة ياخ ..
لا الموصلي فنان شديد خخخخخخخ