اشكى عطشك للبحر

07:46 PM August, 21 2016

سودانيز اون لاين
أبوذر بابكر-
مكتبتى
رابط مختصر

العطش المشمر توبو
وواقف ليكا سد
مضمضة النويح
الماليه خشم القيف
وفايته الحد
وهرولة العيون اليابسه من الضو
وحارسه دروبو
فارشات الجروح للريح
مادات الرقاب للسيف
عامتات برعم الفرح الفتح يا دوبو
داساتنو فى ليلات الشتا
اللابسات تياب الصيف
شايلات ذنوبو
رافعه رايات السراب
وليكا جايبات الخبر
شمر لهاتك للشراب
واشكى عطشك للبحر

ابقى مارق شوف وعاين
تلقى غنواتك جحيم
فى جنتك منصوب
عجّل مشيك واقيف حداهن
تلقى حسراتك نعيم
فى لوح شقاك مكتوب
مدسوسه فى الليل القديم
محروسه فى الجرح الأليم
ممغوسه فى القلب الكليم
والشاهد على عتمة صباك
ضو القمر

ولامن يحين وقت الوصال
إتوضا بى موية سرابك
وصلى وقت الرجعة حاضر
ركعة لى ميعاد ديارك
وركعة شان خاطر المطر
بِل ريق مسافاتك تعال
قبل الظما يسرق شرابك
ولامن يقوم
جوع روحك الشبع ودارك
دخل ايدك فى جرابك
خت مواجعك جوه فيك
واتسند على الحيل الفتر
وما تشكى عطشك للبحر

عاد تمشى وين من الدرادر
من البشاتن ومن مكازاة السهر
من المحطات المكتفه بالعجاج
بحر البلد عذبُ فرات
طعم السفر ملح اجاج
عنوان شقاك مكتوب
على ظرف السفر

ما تشكى عطشك للبحر