غنيت مع وردى

قاعدين نتونس فى سوق جبل اولياء...اشوف ليك وردى جاى من هناك لابس جلابية بيضااااااء وعمة بيضاااااءقلتا وردى وردى وقعدنا نهتف ...عاش وردى عاش وردى...السوق كلو اتلما يهتف معانا عاش وردى عاش وردى
لقتا ليهو هكر فى ....قالى ار اكا بانجى ...قلتا تمشى تتغدا معاناا...عتذر وقال انا ماشى احتفال المعلمين ....مشينا نوريهو مكان الاحتفال جنب نادى الجهاد فى الحلة الجديدة...فى الطريق بدا يصدح ...هام ذاك النهر يستلهم حسنا...واذاعبر بلادى ما تمنى طرب النيل فتثنى ...وانا اغنى معاهو كلمة كلمة ...ما قالى اسكت ولا قال لى ما تنشز...اها بس المطلع الاول دا واصحى ليك من النوم

فريدة ومتكاملة الاركان كقصة قصيرة . ما ان فرغت منها حتى وجدتني اكتب لك عنها كالمنوم يامحمد. ليتني كنت الموحى إليه حلما اوكتابة.

ياسلام ياخ
أحلامك جميلة يامحمد
ذكرتني بأغنية Ilene Woods
"A Dream Is A Wish Your Heart Makes"
في فيلم Cinderella
نوم ياخ .. والاماني العذبة تتراقص حيالك

سلام اخونا محمد سيد احمد

الصاحي ليها شنو ؟

وردي ..جلابية بيضاء ....النيل ... المعلمين ...كلها تدل على خير كبير

لكن (ما قال لي اسكت ولا قال لي ما تنشز) دي ما بقدر افسرها ليك الا تشوف شيخنا عثمان عووضة (دبل واو) فهو عندنا من الثقات

تحياتي

ابننقا تو اسمان

ياليته زارك الحلم الجميل
كنت تهدينا مثله
من يراعك الماهر

سلام يا محمد
انا ما فرحان عشان وردى
ما قال لى اسكت والله خلانى اغنى

هسا خلى وردى عثمان الفحيل لمن الواحد يغنى معاهو فى القعدة يحمر لينا

سلام قريبى حيدر

والله الحلم انعشنى واسعدنى

وبشوفو
زى قصة سيدنا محمد لمن الملائكة اخدوهو وهو صغير وفتحو قلبو وغسلوه بالماء والثلج والبرد

فرحان عشان وردى خلانى اغنى معاهو

لكن النفس ما طماعة

قلتا فى روحى والله وردى لو خلانى اقول الحتة بتاعت

حين خط المجد فى الارض دروبه

براى