الاجازة والسفر الى السودان وتستيف الشنط (توجد دكوة و بصلة محمرة)

02:51 PM July, 24 2016

سودانيز اون لاين
محمد جبره- UK
مكتبتى
رابط مختصر

اي الى السودان ما من السودان

.......
زمان المغتربين بجيبوا معاهم معجون سغنل و صابون زست وشاي لبتون ..
لاحقا ظهرت بعض انواع الشعيرية المسخت علينا شعيريتنا حقت السمبرية اللبنية

بدينا التجهيز لاجازة الاولاد في السودان امهم قالت لي ما حنشيل هدوم كتيرة شنطتين بس لكن عايزة ثلاث شنط تانية اشيل فيها الاكل قلت ليها انت مودية شيلة !! اكل شنو كمان !قالت لي يا زول انت ما قاعد تمشي معانا و ما عارف الحاصل ...حنشيل مكرونة و تونة و صلصة ورز ودكوة دكوة دي خلعتني صراحة قلت ليها عايزة تشيلي فول سوداني ترجعي السودان !! دي ما ياها اكون بيلو ذاتها ( للماعرفين بيلو دا شحن ملح لبورتسودان ) لكن اتذكرت جبال الدكوة المكشوفة في سوق بحري قلت ليها خلاص شيلي الدكوة قالت لي في حاجة تانية حنشيلها بس ما تتخلع ... قلت ليها بعد الدكوة دي ما في شيئ بخلع قالت حنشيل بصلة محمرة جاهزة لانها انضف و ارخص من بتاعة السودان ارخص دي سكتتني شوية قلت ليها خلاص و انتو راجعين من السودان جيبو معاكم طين بحر مافي شيئ غيره يجي من السودان

في المطار لاقينا زوجة صديقي و اولادها مسافرين السودان سألتها شايلة معاك دكوة ؟ (قلت اشوف الفهم دا عام ولا فلهمة من مرتي )
قالت لي للاسف ما شلتها لكن خميت الصلصة و لبن البدرة و المكرونة والكورنفلكس .... ارخص لينا من السودان

حزنت على حال البلد و غنيت ..

الربة ...الربة ... الربة ..... الدكوة الجاتنا معبا

العزيز محمد جبرة تحياتي نفس الحال يتطبق علي الأسر المسافرة من بريطانيا إلي السودان وتقريباً نفس المواد الغذائية لكنها أرخص سعراً وأفضل جودة من السلع الغذائية المعروضة في السودان وهو أمر محزن فعلاً