تنفسو الصعداء، الجلابي بشاشا كسح!!

04:17 AM July, 23 2016

سودانيز اون لاين
Bashasha-California, Los Angeles
مكتبتى
رابط مختصر

.*.

هوووووي، يا خلق العفو والعافية.

لما اعود انشاء امون، والعمر عرية، ساعود بي مفاجاة كبيرة جدا جدا، اقلاها بالنسبة لي!

نعم لقيت طريقة اكتب بيها اسمي بالهيروغلوفية!

يا الله!!

نعم اول لغة صاغها بشر علي سطح هذا الكوكب!

نعم حاجي ارص اسمي اي Bashasha بالهيروغلوفية كاول كوشي!

عيييييييييك!

نعم منذ القرن الرابع الميلادي، لما الرومان ودواعش المسيحية جنا جنونم من الغضب تجاه عقيدة التوحيد الكوشية اي السودانية،

اي التصوف العادي بتاعنا ده اليوم والليلة في السودان الحالي ده، اللي وقف حجر عثرة في تقدير الخواجات، امام انتشار المسيحية!

بخصوص الاعزاء صديق الغالي واسماعيل عبدالله، دعوني اقول الاتي:

رغم اختلافي الجذري مع الاتنين، ولكن وجودم هنا، مهم للغاية ومفصلي لو تعلمون لانهم بمثلو الصوت ووجهة النظر الاخري المغيبة تماما في هذا الفضاء الجهوي بحق، رقم تقدمو بسنين ضوئية علي امثال "فوراوول" بتاع ناس االالفة نجاة محمد علي، الموغل في الجهوية.

شخصيا ارحب بكل حرف يخطه هؤلاء، عن الجلابة تحديدا، وهذا مهم للغاية، لانو المكاشفة والصراحة في ساحة للصراع الفكري، هو المدخل للمخرج في المدي البعيد.

ارفض بشدة محاولات القمع والتنكيل من البعض، اللي نسو سلفا كيف طريقة تفكيرم هم، مش مجرد كلام اسفيري بتنسي بعد ثواني،

هو اساس الدويلة ذات نفسها بما حملت، سياسيا، اقتصاديا واجتماعيا، اللتي اشعلت بدل معارك الكلام، محارق الابادة للملايين اللي اصواتم مغيبة من هذا الفضاء!

نعم لامعني للبصيحو عنصرية، والحق يابكري، وماشابه من ادوات الارهاب والقمع الفكري، بغرض التدجين والتركيع، وهذا غلط، فوق لي انو بعيد انتاج المشكلة.

لي روحي عندي رغبة اكيدة ادير حوار مع الاتنين لما ارجع بالسلامة.

من بكرة مفحط، لذا وجب التنويه!

شلوم.

اسعد الله مساءك استاذنا ارو بشاشا .

نقدر الظروف ارجو التواصل وبلورة Study Group

وسوف نترقب عودتك ماتطول الغياب دمتم فى كنف الرحمن .

سلام يا فقيري واتوقع مني تلفون قرييب ده عشان نطمن علي احوالك.

بالنسبة للاStudy Group ده هو الشغل الشاغل لي، وباذنه يكون في اقرب فرصة ممكنة.

اها مسافر بالجو ولا بالبحر ؟ فى الحالتين صحبتك السلامة يا بشاشا , لكن وصيتى ليك انسى الماضى وخليك مع الحاضر علك تلحق بالركب . يلا
فى رعاية الله خليناك

لك التحية و التقدير ايها الامير الكوشي ..
يا ريت الجلابة يصلوا لي فهمك ده كان السودان مشاكلو اتحلت ..

Quote: بخصوص الاعزاء صديق الغالي واسماعيل عبدالله، دعوني اقول الاتي: رغم اختلافي الجذري مع الاتنين، ولكن وجودم هنا، مهم للغاية ومفصلي لو تعلمون لانهم بمثلو الصوت ووجهة النظر الاخري المغيبة تماما في هذا الفضاء الجهوي بحق، رقم تقدمو بسنين ضوئية علي امثال "فوراوول" بتاع ناس االالفة نجاة محمد علي، الموغل في الجهوية. شخصيا ارحب بكل حرف يخطه هؤلاء، عن الجلابة تحديدا، وهذا مهم للغاية، لانو المكاشفة والصراحة في ساحة للصراع الفكري، هو المدخل للمخرج في المدي البعيد. ارفض بشدة محاولات القمع والتنكيل من البعض، اللي نسو سلفا كيف طريقة تفكيرم هم، مش مجرد كلام اسفيري بتنسي بعد ثواني، هو اساس الدويلة ذات نفسها بما حملت، سياسيا، اقتصاديا واجتماعيا، اللتي اشعلت بدل معارك الكلام، محارق الابادة للملايين اللي اصواتم مغيبة من هذا الفضاء! نعم لامعني للبصيحو عنصرية، والحق يابكري، وماشابه من ادوات الارهاب والقمع الفكري، بغرض التدجين والتركيع، وهذا غلط، فوق لي انو بعيد انتاج المشكلة. لي روحي عندي رغبة اكيدة ادير حوار مع الاتنين لما ارجع بالسلامة.

تمشي وتعود بالسلامة ياحبيب
لاتطول الغيبة

العزيز العقيد الاممى بشاشة القذافى
اقسم بالله العظيم .. اكن لك من الاحترام و التقدير الكثير الذى يضّج مودة و اجلالا
يا زول اكسح بى راحتك بس ما تطّول علينا الغيبة
و ربنّا يحفظك فى حلّك و ترحالك
و كان اتلومنا معاك فى كلام
اكيد غلطاتنا عندك مغفورة
و العفو لله و الرسول

Quote: هوووووي، يا خلق العفو والعافية.

ياسلاااام ياأميّر ياعجوز بالجّد You make my day..رغم أنك بتدينا بالشلوت ولكن تظل فاكهة هذا البورد..... تمشي وتجي بالسّلامه ياصديقي الحميّم.
.

اسماعيل سلامات وعوافي
اصلاً يا اسماعيل بشاشا واقف في نفس الخط الانتو واقغين فيهو ويضرب في نفس الاتجاه
لكن بفهم تاني خالص هو ضد الدولة الانتقامية القاعد يدعو لها البعض هنا وربما انت وصديق مصنفين منهم
عموماً انا من خلال متابعتي ما لقيت شخص واقف ضد العنصرية وضد فكرة جلابة وزرقة وعرب وشنو كدا ما عارف
قدر اخونا كمال بشاشا
ولكن يجب على الذي يريد استقراء هذه المبادئ في مداخلات بشاشا ان يعرف كيفية تعبيره عنها ويفهمه ويضعه في مكانه

اتمنى ان لا تطول غيبته

تحياتي يا بشاشا
رجائنا الا تكتر غيابك ومستنين البوست الذي وعدتنا به

دمتم جميعاً بخير

سلام يابشاشة.

أكثر مالفت نظري في جملة اقوالك هنا هو تحرشك غير المبرر بناس سودانفور اول وهم الابعد عن وصفك إياهم بالجهوية.

تحياتي بشاشاأتمني مخلصاً أن تأجل هذا القرار حتى نكمل الحوار الذي وعدتني به
أو لو ما عندك مانع ممكن ننظم مناظرة على الهواء في أي وقت يناسبك
أنا من جانبي جاهز

الأخ بشاشا
هو إنت متين جيت؟
و نحن ما صدقنا إنك بي جلالك جينا زاير.‏
بعدين جيّتك احدثت كثير من الحراك في المنبر و اثارت كثير من النقاش ‏
و كنت مثير للجدل و كنت مثير للغبار ....بس مش للاتربة.هههههه
المهم وجودك كان قد حرك كثير من المياه الراكدة و بث الحياة في الجانب الفكري
‏ و الجدلي و كذلك الخلافات. و ادخلت إلى قاموس النقاش : الكوشية و الكوشي
و الجلابة ‏و المستعربينن و عبارات من شاكلة عيييك ..و....إلخ.‏
و بينما نحن لسه ما اتهنينا بوجودك و لسه ما هضمنا كلامك
‏ إذا بك تفاجئنا بإعلانك الرحيل.‏
معقولة بس؟
المهم نشكرك على هذه الفترة القصيرة التي اثرت فيها لدينا شهوة النقاش
و رفعت درجة حرارة النقاش.‏
و في الختام نتمنى لك التوفيق و عودا حميدا. ‏

بشاشا ما بكسح
قل استراحة محارب
رافقتك السلامة ونتمني عودتك قريبآ
تحياتي

الصعداء: تعني المشقة والإرهاق والضيق
والصعدة: هي العقبة
تنفس الصعداء يعني تنفس بضيق وصعوية ومشقة

﴿فَمَن يُرِدِ اللّهُ أَن يَهْدِيَهُ يَشْرَحْ صَدْرَهُ لِلإِسْلاَمِ وَمَن يُرِدْ أَن يُضِلَّهُ يَجْعَلْ صَدْرَهُ ضَيِّقاً حَرَجاً كَأَنَّمَا يَصَّعَّدُ فِي السَّمَاءِ) أي يضيق صدره مثل الذي يرتفع إلى أعلى
(كَلَّا إِنَّهُ كَانَ لِآَيَاتِنَا عَنِيدًا، سَأُرْهِقُهُ صَعُودًا) أي سأرهقه إرهاقا
والله أعلم

فيا بشاشا، الناس في ضيق وحرج من ذهابك، فقد كنت متنفسا لهم
(الحرج هو أضيق الضيق) أو هكذا تحدث أجداد السودانيين العرب

والله كنت جايي ابستفك في نجرتك القطعتها من رأسك حول هلاك تلتين الشعب السوداني على يد الغزاة الغرب .. لكن آمون مرقك مني

فلنؤجل البستفة وحتى تعود ..
كن بخير يا زول آ جميل.

الأخ الكريم بشاشا
لقد تداخلت بمفردات الشتم القاموسية في برنامج الأيدلوجية الكوشية الذي تتبناه بشكل خاص انت
رغم أنّي لم أعتب على أي بوست من بوستاتك
ووعدتك بإني قادر على تعريتك فكرياً
كل ذلك كان في هذا البوست
حنّا ارِند بين النازية و الشيوعية حنّا ارِند بين النازية و الشيوعية
وخيرتك بين أن نفرد بوستاً للحوار الذي إقترحت انت عنواناً له المرجعية أو نواصل في نفس البوست أعلاه
فإخترت انت بوستاً منفصلاً كما في المداخلة المكوتة أدناه

Quote: ˆسناري شلوم، اتفقنا! نعم حافتح بوست حــــــــــــــــــــوار هـــــــــــــــادئ معاك، وتقديري حيكون مفيد، لاننا نمثل طرفي نقيض بمعني الكلمة. نموذج لي سلسلة حوار هادئ: حوار "هــــــــــــــادئ" مع الصديق، عثمان محمد صالح.حوار "هــــــــــــــادئ" مع الصديق، عثمان محمد صالح. خلينا نتفق علي الموضوع والعنوان والوكت. بالنسبة لي بقترح مفهوم مرجعية. محمد عبدالله تحياتي ومشكور مقدم. ماعايزين نطلع برا موضوع بوستك.

فتركت من جانبي لك أمر فتح البوست.
فكيف تودع هكذا دون أن تكلف نفسك حتى مجرد ماسنجر تشرح الأمر لم قطعت له وعد بحق الرد على تبخيسك لما كتب

ولعت النيران وهارب وووين يا جلابي
أركز

(الفارس) أو الأرو أو أى من الألقاب التى تُفرحك فأنا حتماً ممن سينتظرون عودتك ليس محبة فيما تكتب لكن حتى أرد على بعض مما قلت من شتم وتنكيل .
أكبر خدمة يمكن أن تقدمها للانسانية أن تعرض (أفكارك) باللغة (الهيروغلوفية) لأنه من المؤكد أن ما سينال الناس من أذى سيكون محصوراً فى علماء اللغات..
عموماً منتظرنك يا بشبش بس ما فى استعجال على مهلتك وما تصدق حكاية ما تطول الغيبه دى وأُخد وقتك فى موضوع ال(Study Group) ده لأنه مهم جدا... ما تستعجل