Post: #1
Title: المقصص وشفوت الخليج
Author: أبوبكر عباس
Date: 06-30-2016, 08:32 AM
Parent: #0
07:32 AM June, 30 2016 سودانيز اون لاين
أبوبكر عباس-الإمارات
مكتبتى
رابط مختصر يقال انو الناظر محمد صديق طلحة يرحمه الله، ناظر البطاحين أهدى البعير المقصص لأحد شيوخ الإمارات، تم نقل المقصص بطائرة خاصة من السودان، ركب مع المقصص عشرين بطحاني من غير جوازات، وبالطبع بدون تاشيرة...
حقق المقصص أرقام قياسية في السباقات لم يحققها بعيرفي ذلك الزمن.
كان الشيخ يرسل المقصص بطائرة خاصة عشان يُقيّط* في البطانة و في الشتا يعود المقصص و معه عدد جديد من البطاحين.
ما زال البطاحين و معظم الذين يعملون في مجال الإبل (شكرية و جعليين و لحويين و كواهلة و أهل الرهد...)، ما زال هؤلاء الناس لا يتقيدون بقوانين الهجرة بدول الخليج، يكاد يكونوا الوحيدين البقدروا يتنقلوا بين دول الخليج بدون تأشيرة و في حالات كثيرة بدون جوازات بالرغم من بصمة العين.
قُصرو:
الناس ديل بالرغم من مؤهلاتهم البسيطة، لكنهم ناجحين نجاح شديد و ممكن نقول عليهم: مبدعون
هامش:
يُقيّط = يُصيّف
|
Post: #2
Title: Re: المقصص وشفوت الخليج
Author: أبوبكر عباس
Date: 06-30-2016, 08:39 AM
Parent: #1
عبد الله القصير:
جعلي من شرق شندي من العالياب، قبل جعليتو هو أبالي قال حافظ القرآن بأكثر من قراءة، ويسرق الكحل من عينك عمرو حوالي 22 سنة.
قال لي: جيت الأمارات دي وإشتغلت لي مع واحد سعودي، وعمل لي إقامة وكان بديني ألف درهم،
قبل تلاتة سنوات جيتو في مجلسو وكان ربعو (أهلو وأصحابو) قاعدين معاهو، وقفت ليهو في نص المجلس وقلت ليهو:
هوي يا ريال (رجال)، المعاش بتاعك دا شوية وماهو مقضيني، زيدو ولّ بهج منك...
قال لي ما بزيدك آ الخايص، وكدي أقدر هج عشان أسلمك الشرطة
قال لي: بكرة من الصباح هجيت و سويتلو تلفون قلت ليهو يا ريال أنا هجيت خليك انت والشرطة تلمو فوقي.
عبد الله دا ليهو أكثر تلاتة سنوات قاعد بدون جواز و مطلوب من الشرطة و بسوي في بزينس جيد في مجالو و أنا مرات بشتغل معاهو.
يوم الصباح دق لي تلفون قال لي: تعرف أخوك وين؟
قلت ليهو: أها وين آ الخايس؟
أنا يا سيد أبوك قاعد مع مدير الجوازات، والله العظيم، أول ما دخلت المكتب و قعدت قلت للولد: صب القهوة آ وليد.
المدير شال التعميم والحرمان و ح يعملو لي إقامة حرة على واحد من ناس مكتبو
أها شنو ليك؟
أخوك خطير ولّ ما خطير؟
|
Post: #3
Title: Re: المقصص وشفوت الخليج
Author: أبوبكر عباس
Date: 06-30-2016, 08:43 AM
Parent: #2
عبد الباقي القلول:
عندو مقدره خرافية على نسج الكضب و دا يا هو الزول المثل لينا المهدي في الفيلم العظيم بتاعنا داك
بكرة بجيب ليكم حكاية:
عبد الباقي ود الصديق ود مُحمد ود عبد الباقي ود الصديق ود حاج عمر حسب تقديم نفسه في المجالس، و الشهير بالقلول
|
Post: #4
Title: Re: المقصص وشفوت الخليج
Author: محمد البشرى الخضر
Date: 06-30-2016, 10:43 AM
يوم راجع من ابوظبي قصاد تقاطع سويحان ركب معاي واحد من الجماعة ديل, قال جا البلد عمره 10 سنة أيام الركوب بعد كبر اشتغل في البوش صراحة الظروف العايشنا الحكاها لي صعبة بالنسبة لينا لكن شكلهم مستمتعين و الدخل جيد - كن ماشي العين يحول قريب العشرين الف - قال لي كفيله شيخ فلان عادي يوم تلد ناقة او يفوز في سباق يقطع فيهم من العشرين و التلاتين الف
|
Post: #5
Title: Re: المقصص وشفوت الخليج
Author: sadig mirghani
Date: 06-30-2016, 10:58 AM
Parent: #1
والله البطاحين ديل شفوت
وبايعين الدنيا دي
ومكملين، الرجالة تب
لكن شغل الهجن دا لو اتظبط بعمل دعاية للسودان
وبدخل ملايين الدولارات وبحفظ حقوقنا كرعاة محترفين ومربي ابل للهجن
علي مستوي الوطن العربي والخليج بصفة خاصة.
|
Post: #6
Title: Re: المقصص وشفوت الخليج
Author: الصادق صديق سلمان
Date: 06-30-2016, 01:08 PM
Parent: #5
يا ودالبشرى تحياتي
انت الناس ديل بجوا عمرة وين ---- في السعودية ولا عندكم هناك
|
|