باركوا لي أصبحت كاتب راتب بصحيفة سودانايل الإلكترونية سبق أن تم نشر أتنين من أعمالي هناك؛ استاربكس وصداقة دافوري إذا وقعنا الإتفاق النهائي قد أتحول نهائيا من هنا هذا الأسبوع سوف يتم نشر:
جك الفول: نص أدبي قصير بقلم المستنير أبوبكر عباس/ دبي سنة أربعة وتزعين كنت شغال في شمبات المرسى، ومؤجر في شمبات الأراضي مع صديق صيدلي اسمو عماد عبد العزيز عندو هايلكس موديل تزعة وتمنين. تقريباً تقريباً، كل يوم بعد المغرب ما عدا الخميس والجمعة، كنا بنمشي نزور صيدلي تاني بأبي روف اسمو نادر حُسين إبراهيم، بيتم فاتح على البحر. بمجرد وصولنا لبيت نادر قاعدين نلقى الكراسي مطلعة قدام البيت، والواطة مرشوشة، والشاي باللبن جاهز. أول ما باب الهايلكس بتاع السائق ينقفل؛ صوتو بجيب حسين الصغير ود أخت نادر لبرا البيت ومعاهو ألعابو وبطلع ضهر البوكس يلعب. حسين دا، كان عندو ميزة في كلامو وهي إدخال كلمة "جنّكم" في أي جملة يقولها، مثلا: أول ما نكب الشاي يقول بنص إنتباه وهو بلعب في ضهر البوكس: جنّكم تشفطوا الشاي باللبن! أو أول ما نكورك لعمك بانقا بتاع الدكان عشان يصلح الفتة، يقول: جنّكم تضربوا الفتة بالزيت! أو أول ما نبدأ الونسة، يقول: جنّكم تتونسوا بالدويات (الأدوية)! استمرّ هذا البرنامج بنفس هذه التفاصيل لثلاثة شهور إلا انو كان في تفصيل آخر شال ملل التكرار وساعد على إدماني للروتين دا، وخلى الأحداث دي ممكن تبقى موضوع ونسة تتحكي، وهو خروج رحاب عصام العاقب بت جيران ناس نادر متلفحة بتوب الصلاة وشايلة جك بلاستيك أصفر تجيب فوقو فول من بانقا. كان حسين الصغير ينبهنا بمرورها بقوله: جنّكم تشتروا الفول فوق الجكاكة! طبعا الزمن داك، الصعلكة لسع ما كانت إتمكنت، وكونك تشوف ليك بنوتة بهذا المشهد الرومانسي المتكرر؛ بتحبا بتحبا... واحد ح يقول لي ما دام عشتوا زمن قبل التمكين، كيف عرفت اسمها بالكامل؟ مرة، بعد فتات كتيرة، أصريت أدفع، وأنا بحاسب في عمك بانقا خليت ليهو الباقي وسألتو عنها حتى كمان قال لي باقي ليها شهر تتخرج من كلية الآداب. خر أربعاء جينا فيها راجعين من أبي روف كانت باردة وتخيلت نفسي حزينا، لا أدري بسبب كآبة البرد ولّ غياب رحلة رحاب من البرنامج لأكثر من أسبوعين؟؟ يوم الخميس العصر عماد جدع لي مفتاح البوكس وقال لي: عليك الله، يا بلبل* قبل تمشي السينما أغشى بيت ناس نادر رجع لعبات حسين الصغير النساهن في ضهر البوكس أمس، لانو لو إنتظرن للسبت؛ بجننا، وأخوك عارفو جبان ما بقدر يتخلف عن خميس بيت الخالة وبتّها بالصافية!! قلت ليهو: جنّكم تلخبطوا للناس سينماتم بحبكم! وقفت العربية قدام بيت ناس نادر ويجي حسين من بعيد قاشر ومعاهو أصحابو شايلين قزاز الببسي، وطلع نزّل لعباتو وهو جاري قال لي: جنّكم تشيلوا لعبات الاولاد الصغار! قلت ليهو: حسين، أقيف، دا، عرس منو؟ قال لي أسأل بانقا. مشيت الدكان وقبل أسألو قال لي: صاحبتك قلت ليهو: جنّهن يعرسن بدون يكلمننا! اليوم داك بدل السينما قعدت في كبري شمبات أُراقب إنعكاس أنوار الزينة على شاطئ أبروف. ــــــــــــــــــــــــــــــ * اسم الرآوي في القصة نبيل
Post: #2 Title: Re: باركوا لي أصبحت كاتب راتب بصحيفة سودانايل Author: محمد البشرى الخضر Date: 06-28-2016, 03:24 PM Parent: #1
مبروك يا مستنير عقبال الفور أول
Quote: قد أتحول نهائيا من هنا
ما بتقدر.. المنقة اللقيتها هني ما بتلقاها في محل تاني استقلت زي سبعة مرّات لا اسي غير مشيات رمضان البتعلنهن مع تصفيد الجماعة و تنط :)
Post: #3 Title: Re: باركوا لي أصبحت كاتب راتب بصحيفة سودانايل Author: Hani Arabi Mohamed Date: 06-28-2016, 03:31 PM Parent: #1
مليار تليرايار مبروك وعقبال تصدر صحيفتك الخاصة بنسخ مرئية وورقية ومسموعة وعبر الأون لاين
Post: #4 Title: Re: باركوا لي أصبحت كاتب راتب بصحيفة سودانايل Author: حيدر حسن ميرغني Date: 06-28-2016, 03:37 PM Parent: #3
بختك مشيت لناس المعاشات:)) يعني بتاع مذكرات ناقصك كم جكس كده وتلحق السر قدور
Post: #5 Title: Re: باركوا لي أصبحت كاتب راتب بصحيفة سودانايل Author: sadig mirghani Date: 06-28-2016, 04:16 PM Parent: #1
راتب بي راتب ولا بدون
Post: #6 Title: Re: باركوا لي أصبحت كاتب راتب بصحيفة سودانايل Author: زهير عثمان حمد Date: 06-28-2016, 04:31 PM Parent: #5
نبارك لك بكل فرح أنها مساحة سودانية جديرة بالاحترام بالتوفيق
Post: #7 Title: Re: باركوا لي أصبحت كاتب راتب بصحيفة سودانايل Author: أبوبكر عباس Date: 06-28-2016, 04:43 PM Parent: #6
شكرا الزميل زهير والأصدقاء بشرى، هاني، حيدر وصديق
أكيد براتب يا صديق، وعقبال الجزيرة نت دي الفيها الصفق الكبار لكن كيف معاوية الزبير يقتنع ويختني في درجة (الزميل) كمال الجزولي
Post: #8 Title: Re: باركوا لي أصبحت كاتب راتب بصحيفة سودانايل Author: حيدر حسن ميرغني Date: 06-28-2016, 04:43 PM Parent: #6
تحية لسودانايل وكتابها الاجلاء
Post: #9 Title: Re: باركوا لي أصبحت كاتب راتب بصحيفة سودانايل Author: عبدالعزيز الفاضلابى Date: 06-28-2016, 06:48 PM Parent: #8
Quote: أصبحت كاتب راتب بصحيفة سودانايل الإلكترونية
سلام يابكور راتب الامام ولا راتب الختمية؟ ربنا يلقنك حجتك كل سنة وانت طيب ,,
سلَّم لى على خالى معاكم فى النورث
Post: #10 Title: Re: باركوا لي أصبحت كاتب راتب بصحيفة سودانايل Author: فيصل محمد خليل Date: 06-28-2016, 06:59 PM Parent: #9
جنكم تقبضو الجو بصحيفة سودانايل
Post: #11 Title: Re: باركوا لي أصبحت كاتب راتب بصحيفة سودانايل Author: عثمان الأمام Date: 06-28-2016, 08:06 PM Parent: #10
سير سير يا مستنير :)
Post: #12 Title: Re: باركوا لي أصبحت كاتب راتب بصحيفة سودانايل Author: معاوية الزبير Date: 06-28-2016, 11:34 PM Parent: #11
تلاته مطالب: يحيى قباني، بالله نزّل لينا أغنية (كيف يهون) المستنير، لو سمحت صورتك مع الأستاذ كابلي بكري أبوبكر، ممكن تسوِّد المنبر وتعلِّق البوست دا فوق؟ فهو لا يقل فجيعة عن بوستات النعي
Post: #13 Title: Re: باركوا لي أصبحت كاتب راتب بصحيفة سودانايل Author: محمد جمعه الخير Date: 06-29-2016, 00:08 AM Parent: #12
الف الف مبروك سركم باتع يابياطرة الف رحمة ومغفرة للراحل دكتور عادل الصادق .
Post: #14 Title: Re: باركوا لي أصبحت كاتب راتب بصحيفة سودانايل Author: محمد حمزة الحسين Date: 06-29-2016, 00:13 AM Parent: #12
رمضان كريم يا مستنير إنت راجل مبدع وتستاهل بث الله يستر ما تبقي كوز : : : : : : : : مع التحيات لله الزاكيات
Post: #15 Title: Re: باركوا لي أصبحت كاتب راتب بصحيفة سودانايل Author: عبدالحفيظ ابوسن Date: 06-29-2016, 00:17 AM Parent: #14
الف مبروك اول مرة اعرف الكتابة فيها بالتعين صحبي كل مرة مرة بكتب فيها . سألتو قال لي برسل ليهم المقال وبنشرو بس
Post: #16 Title: Re: باركوا لي أصبحت كاتب راتب بصحيفة سودانايل Author: محمد حيدر المشرف Date: 06-29-2016, 00:19 AM Parent: #1
ما تبقى عليك قصتي مع سودان فور اول .. شاتوني للصالح العام مع اول مداخلتين
.... والله حركتم دي الانقاذ ما عملتها معاي قال فور اول قال !!!
Post: #17 Title: Re: باركوا لي أصبحت كاتب راتب بصحيفة سودانايل Author: أبوبكر عباس Date: 06-29-2016, 04:32 AM Parent: #16
Post: #18 Title: Re: باركوا لي أصبحت كاتب راتب بصحيفة سودانايل Author: معاوية الزبير Date: 06-29-2016, 05:01 AM Parent: #17
Quote: تلاته مطالب: يحيى قباني، بالله نزّل لينا أغنية (كيف يهون) المستنير، لو سمحت صورتك مع الأستاذ كابلي بكري أبوبكر، ممكن تسوِّد المنبر وتعلِّق البوست دا فوق؟ فهو لا يقل فجيعة عن بوستات النعي
تمام يا مستنير وشكرا على سرعة الاستجابة (والله انت بي أدبك دا، جيت مكاناً ما مكانك) يللا يا حبيبنا قباني يا ريت رائعة الكابلي (كيف يهون) أو بالعدم أغنية (مكاناً ما مكانك) بتاعت وردي دي ومن ثم يعلن إسماعيل حسن، أقصد بكري الحداد
Post: #19 Title: Re: باركوا لي أصبحت كاتب راتب بصحيفة سودانايل Author: يحي قباني Date: 06-29-2016, 05:34 AM Parent: #18
Quote: تلاته مطالب: يحيى قباني، بالله نزّل لينا أغنية (كيف يهون) المستنير، لو سمحت صورتك مع الأستاذ كابلي بكري أبوبكر، ممكن تسوِّد المنبر وتعلِّق البوست دا فوق؟ فهو لا يقل فجيعة عن بوستات النعي
تسجيل للحبايب بس و الله معاوية ... و انت أكتر من حبيب ...
كمان ود امبارونا ده يستاهل و الله ...
Post: #20 Title: Re: باركوا لي أصبحت كاتب راتب بصحيفة سودانايل Author: أبوبكر عباس Date: 06-29-2016, 07:55 AM Parent: #19
خالك منو يا فاضلابي؟
يا فيصل خليل، شنو وينك؟ جنّكم تحنسونا عشان نقعد تاني وتضيعوا علينا العداد الكبير
Post: #21 Title: Re: باركوا لي أصبحت كاتب راتب بصحيفة سودانايل Author: MOHAMMED ELSHEIKH Date: 06-29-2016, 08:17 AM Parent: #18
غايتو يا مستنير ماشاء الله كمان جهزت جيبين للراتب 20x20 سم مربع؟
Post: #22 Title: Re: باركوا لي أصبحت كاتب راتب بصحيفة سودانايل Author: مني عمسيب Date: 06-29-2016, 08:29 AM Parent: #21
مبروك .
Post: #23 Title: Re: باركوا لي أصبحت كاتب راتب بصحيفة سودانايل Author: Dr.Mohammed Ali Elmusharaf Date: 06-29-2016, 01:43 PM Parent: #22
أبكر مبروك
لكن الأصح نبارك لـسودانايل
Post: #24 Title: Re: باركوا لي أصبحت كاتب راتب بصحيفة سودانايل Author: معاوية الزبير Date: 06-30-2016, 06:47 AM Parent: #23
