Post: #1
Title: بووف بورجونيوون ..Boeuf Bourguignon ... القطر قام ..
Author: يحي قباني
Date: 06-24-2016, 03:27 PM
02:27 PM June, 24 2016 سودانيز اون لاين
يحي قباني-فى الدنيا العجيبة
مكتبتى
رابط مختصر عندي على الأقل ساعتين لي تلاتة ساعات بشوف فيهم قنوات الاخبار يومياً
و ذلك لمتابعة الانتخابات الامريكية و ما يدور حول العالم ... ناس Brexit و الكلامات ديك ...
اها لما ازهج من تكرار الاخبار ( خاصة لما يكون اليوم ميت ما فيهو خبرا نجيض ) ...
أقوم امشي اتفرج على برامج المسابقات في الـ Food Network
عندي ليها غرام لانه بتعلم فيها مصطلحات عن لغة الذوق في الاكل و مسميات الاكلات ...
و الحاجة دي بتنفع لما تكون حضور في حفلات عشاء عمل خاصة في المطاعم المقندفة ...
فبدل ما تكون دايش ثقافتك تدور حوا صينية غدانا ديك ... اهو نتعلم كلمتين ...
مثلاً لو مشيت lطعم و لقيت مكتوب في القائمة Tuna Ceviche or Tartare
تعرف ده سمك ني ... ما تتهور ... وهكذا ...
اها امس لقيت مسابقة ... و قالوا ليهم كل واحد يجهز اكلة بتمثل شيء مهم في حياته ...
و لازم تكون الاكلة دي كان ليها دور في تغيير مسار حياته ؟
اها قوومي يا البنية قولي انا حاعمل ( بووف بورقونيوون ) ... نطقتها كده بالضبط ...
و قالت عادة الطبخة دي محتاجة 6 ساعات ...
لكنها حتجازف ...و و كت المسابقة ساعة واحدة فقط ...
اخوكم استعدل ... و قلت اهاااا ... دي حاجة جديدة لنج ...
بدت تقطع ليها في لحمة عجالي مكعبات ...
بصل ... طماطم ... بطاطس ... موية ... شوية بقدونس و كم حاجة خدرا ...
كلو ني في ني ...
و قفلت الحلة و قالت منتظرة الحلة تنجض و ال Sauce to Reduce
أي بلغة السودانيين ... تتسبك !!!
انتهى الوكت .. و غرفت للحكام ...
و قاموا يهللوا ... كيف في ساعة واحدة تمرقي الاكلة الفرنسية الفاخرة دي !!!
اهااا ... اتاري بووف بورجونيون ... معناتها Beef Stew
طيب اللف و الدوران و فرنسا لزومها شنو ؟
أي سوداني شرب كاس شري او عرقي عملها ...
دي ما ياها القطر قام ولا حاجة تاني ؟؟؟
طيب قولوا القطر قام !!! أو قولوا المنغنغة !!!
عملناها مليون مرة و ما غيرت أي شيء في مسار حياتنا !!!
حكمته بالغة ...!!!
|
Post: #2
Title: Re: بووف بورجونيوون ..Boeuf Bourguignon ... القطر قام ..
Author: محمد المرتضى حامد
Date: 06-24-2016, 11:48 PM
Parent: #1
كويس انك شاهدتها في برنامج بيعرف يتعامل مع المشاهد بموضوعيه،
عصر الأمس مررت سريعا على القنوات السودانية فوجدت في إحداها برنامجا عن مطبخ وإعداد طعام استضيف فيه أحد المطربين
قيل أنه طبخ طبقا لزوجته وفقا لمقدمة البرنامج. وبالطبع كان تعليق زوجته أنه حائز على الإيزو..
أعاننا الله يا يحيى على ما تعرضه بعض قنواتنا..
عودا على القطر القام ، يا هندسه، لا أغالي إن قلت لك أن ( الحِلل) التي يعدها مساعد السائق في لواري الغرب والتي من شروطها أن تكون (الحلة) سوداء من خارجها
من أثر الفحم والحريق، حلة لايمكن أن تضاهيها في الطعم أرقى وأغلى أطباق المطاعم التي تستطيل قوائمها بأسماء أطباق لا بنريدا لا بناكلها إلا في حالات الهبوط الإضطراري..
يا يحيى أمبارح في الفطور في عزومه سودانيه قامت إحدى السيدات السودانيات عملت تقليه بالعصيده أجمع الحضور أنها تشبه هدف ميسي free kick في أمريكا قبل يومين..
مطعم فرنسي شنو وكلام شنو... دي تقليه وعصيده لو ذاقها لوران فابيوس لتقدم بطلب لجوء سياسي لإقليم كردفان..
|
Post: #3
Title: Re: بووف بورجونيوون ..Boeuf Bourguignon ... القطر قام ..
Author: ABUHUSSEIN
Date: 06-24-2016, 11:54 PM
Parent: #2
😂😂😂😂
عمتي الله يرحمها و يغفر ليها بتقول ليها :-
ضربو رما ...
😂😂😂😂
|
Post: #4
Title: Re: بووف بورجونيوون ..Boeuf Bourguignon ... القطر قام ..
Author: يحي قباني
Date: 06-25-2016, 05:32 AM
Parent: #3
Quote: كويس انك شاهدتها في برنامج بيعرف يتعامل مع المشاهد بموضوعيه،
عصر الأمس مررت سريعا على القنوات السودانية فوجدت في إحداها برنامجا عن مطبخ وإعداد طعام استضيف فيه أحد المطربين
قيل أنه طبخ طبقا لزوجته وفقا لمقدمة البرنامج. وبالطبع كان تعليق زوجته أنه حائز على الإيزو..
أعاننا الله يا يحيى على ما تعرضه بعض قنواتنا..
عودا على القطر القام ، يا هندسه، لا أغالي إن قلت لك أن ( الحِلل) التي يعدها مساعد السائق في لواري الغرب والتي من شروطها أن تكون (الحلة) سوداء من خارجها
من أثر الفحم والحريق، حلة لايمكن أن تضاهيها في الطعم أرقى وأغلى أطباق المطاعم التي تستطيل قوائمها بأسماء أطباق لا بنريدا لا بناكلها إلا في حالات الهبوط الإضطراري..
يا يحيى أمبارح في الفطور في عزومه سودانيه قامت إحدى السيدات السودانيات عملت تقليه بالعصيده أجمع الحضور أنها تشبه هدف ميسي free kick في أمريكا قبل يومين..
مطعم فرنسي شنو وكلام شنو... دي تقليه وعصيده لو ذاقها لوران فابيوس لتقدم بطلب لجوء سياسي لإقليم كردفان.. |
سعادة المستشار يا صديقي ...
هي محطات ووجبات سودانية ... حقيقة لا تقارنها باي شيء ...
حلة البووف الامس دي ناقصها قرون شطة خدرا و تبقى القطر قام بي ( شحمها و لحمها ) ...
بالله صديقنا الأكبر رحمه الله سعادة المستشار احمد حسين ... كانت حلته لا مقادير لها ...
و العجب انها بتتخلى في النار تنغنغ ... و بعاين ليها مرتين فقط ...
مرة في النص .. وعلى شرط الناس القاعدة ما بتشعر بيهو ...
و مرة لما يغرفها للتقديم ... و عمرها ما حرقت !!!
________________________________________________________________________
برضة كان في واحدة في اخر السبعينات اول التمانينات بتقعد قدام مخازن القموسيون الطبي في المنطقة الصناعية ...
لها لقمة لو انها نظرت بها ...
و ملاح شرموط ما بتصاقع ...
و شرط ... باكل عندها 3 سنوات ... ما يوم الطعم اتغير ...
___________________________________________________
اما الحاجة فتحية عبد الباسط الله يطول عمرها والدة فردتي جلال صالح حاج احمد ...
و شقيقة اعمامنا الطاهر عبد الباسط و جعفر و إخوانهم ...
فكان لها ملاح تقلية لم تطبخه ولادة ...
و شرط ... كسرتها تنزل من صاجها عند تقديم الاكل ...
الاكل كان ليو طعم يا مولانا في البلد الأمين ...
|
|