Post: #2 Title: Re: برنامج استديو 5 بقناة النيل الازرق Author: Haytham Ghaly Date: 06-19-2016, 06:24 AM Parent: #1
أسئلة سطحية وسازجة
أحيانا محرجة لضيوف الحلقة
تحس انو مافي أي إعداد للأسئلة ولا لموضوع الحلقة
كأن الأسئلة بتجي وليدة اللحظة او من خلال الحوار الشغال
دا كلو ملاحظ في لعثمة طه سليمان والتمتمة ولخبطة الكلام
ودا كلو مع ضحكات هستيريا حتى انك تضطر لتخفيض صوت التلفاز
هو فكرة منو البرنامج دا ؟
Post: #3 Title: Re: برنامج استديو 5 بقناة النيل الازرق Author: Haytham Ghaly Date: 06-19-2016, 06:34 AM Parent: #2
غايتو رايي الشخصي
طه سليمان ما كان في داعي يورط نفسو ورطة زي دي
والكلام بالصوت العااااالي دا لي شنو؟
Post: #4 Title: Re: برنامج استديو 5 بقناة النيل الازرق Author: Haytham Ghaly Date: 06-19-2016, 08:05 AM Parent: #3
Quote: Nizar Mubarak Ahmed · Translator في MOI UAE
البرنامج يفتقر لمقومات أساسية منها طريقة التقديم وتجهيزات الاستديو .... طه سليمان رغم نجوميته الكبيرة إلا أنه لم يفلح في استغلالها في مجال التقديم البرامجي فهذا تخصص له أدواته ...
فنجده يكثر من القهقهة غير المبررة ومقاطعة الضيف بغرض استعراض مهارات غير موجودة أصلاً ، هذا فضلاً عن ضيق مساحة الاستديو وتكدس الضيوف والحاضيرين والموسيقيين.....
هذا من جهة، ومن جهة أخرى فإن المادة الحوارية نفسها ضعيفة وغير متجانسة أكثر فيها الضيوف من المطاعنات الشخصية وصلت إلى بعض الفحش الذي لا يتناسب مع قدسية الشهر الكريم....
عموماً البرنامج يمكن إعادة تأهيله بمزيد من التدريب لمقدمه وتطوير مادته ودقة اختيار ضيوفه ...
مرحبتين حباب الأخ نزار من الفيسبوك
ومشكور كتير على هذه الملاحظات العميقة واتفق معك تماماً بان الاعداد بصورة كاملة ضعيف جداً
لدرجة الشعور بانو دي لمة ونسة حصلت بالصدفة .
طه سليمان فنان موهوب ومطرب ناجح في جيله ولكنه كما تفضلت لا يملك أدوات المزيع النبيه
ومقدم البرامج له مواصفاته بالذات البرامج الحوارية التي يكون فيها اخذ ورد بين المضيف والضيف والجمهور
تحياتي مرة اخرى
Post: #5 Title: Re: برنامج استديو 5 بقناة النيل الازرق Author: Haytham Ghaly Date: 06-19-2016, 10:23 AM Parent: #4
اخليكم مع فيديو الحلقة الفضيحة
مخجلة ومخزية وانصاف لو ادوها فرصة زيادة شوية كان نشرت غسيل الوسط الفني عينك يا تاجر
Post: #6 Title: Re: برنامج استديو 5 بقناة النيل الازرق Author: Dr.Elsadig Abdalla Date: 06-19-2016, 10:25 AM Parent: #4
سلامات شكرا لفتح هذا البوست فعلا البرنامج تعبان جدا من وجهة نظري .. هل نجومية طه سليمان المطرب فقط تجعل منه مقدم برامج ناجح ؟ فعلا يبدو أن طه نفسه مندهش ومخلوع من هذه الوظيفه الكبيره عليه.. حلقة الفنانات والكانت فيها إنصاف مدني لاتصلح أن تبث في أي قناة تلفزيونيه ولا راديو ..بل تصلح كجلسة ونسه في واحد من محلات الشيه أو قعدة شاي في شارع النيل .. اتفق من الراي القائل إنو يبدو إنو البرنامج لا إعداد له أصلا وان الاسئله تاتي من ضمن الحوار..زي ماتجي تجي ... اتمنى أن تتدارك قناة النيل الأزرق هذا الخلل وان تنقذ مايمكن انقاذه حتى لو تستعين بثورة الانقاذ الوطني ...
Post: #7 Title: Re: برنامج استديو 5 بقناة النيل الازرق Author: Haytham Ghaly Date: 06-19-2016, 05:26 PM Parent: #6
مرحبتين دكتور الصادق
ساعود للرد والتعقيب على مداخلتك
مشكووور
Post: #8 Title: Re: برنامج استديو 5 بقناة النيل الازرق Author: mohmmed said ahmed Date: 06-19-2016, 07:31 PM Parent: #7
حلقة انصاف مدنى ضعيفة جدا ولا تصلح للبث
الحلقة مع اطفال الاحتياجات الخاصة رائعة جدا
حلقة حسين شندى معقولة
Post: #9 Title: Re: برنامج استديو 5 بقناة النيل الازرق Author: جلالدونا Date: 06-19-2016, 08:09 PM Parent: #8
غايتو الناس الفرضت علينا الزول ده كمغنّى ثم مقدّم برنامج و اخيرا كممثّل ما بعيد بكرة يسجلوهو لاعب فى الهلال او المريخ و بى كل بساطة يجينا واحد يقول الزول ده لاعب حريف اى حلقة عن ذوى الاحتياجات الخاصّة بتكون ناحجة حتى لو كان مقدمها محسوبك هيثم غالى هذا الذى لا يعرف كوعو من بوعو فى تقديم البرامج و ذلك لخصوصية الحالة و التعاطف معها و ارتباطها فى اذهان الناس ببرنامج الصلات الطيبة
Post: #10 Title: Re: برنامج استديو 5 بقناة النيل الازرق Author: Haytham Ghaly Date: 06-19-2016, 08:27 PM Parent: #9
يا جماعة معليش اسمحو لي ارد على ابو الجل دا
يا جلي ياخ هيثم لا عندو برنامج يقدمو لا اتشوبر وعمل برنامج
ولا حتى دردشة رمضانية ما عملا 😂😂😂😂
عرفتو كيف لا يعرف كوعو من بوعو في التقديم😀😀
شكلو كلام ود البشرى ماكل معاك جنبة وحازيها شديد
هههههههههههههه
Post: #13 Title: Re: برنامج استديو 5 بقناة النيل الازرق Author: Haytham Ghaly Date: 06-20-2016, 05:36 PM Parent: #8
الخ المحترم محمد سيد احمد لك التحية
لم احضر حلقة اصحاب الاحتياجات الخاصة ولكن عموماً البرنامج
سئ الاعداد ربما الفكرة جيدة ولكن التنفيذ كان ضعيف
مشكور على المرور
Post: #11 Title: Re: برنامج استديو 5 بقناة النيل الازرق Author: Haytham Ghaly Date: 06-20-2016, 05:59 AM Parent: #6
Quote: سلامات شكرا لفتح هذا البوست فعلا البرنامج تعبان جدا من وجهة نظري .. هل نجومية طه سليمان المطرب فقط تجعل منه مقدم برامج ناجح ؟ فعلا يبدو أن طه نفسه مندهش ومخلوع من هذه الوظيفه الكبيره عليه.. حلقة الفنانات والكانت فيها إنصاف مدني لاتصلح أن تبث في أي قناة تلفزيونيه ولا راديو ..بل تصلح كجلسة ونسه في واحد من محلات الشيه أو قعدة شاي في شارع النيل .. اتفق من الراي القائل إنو يبدو إنو البرنامج لا إعداد له أصلا وان الاسئله تاتي من ضمن الحوار..زي ماتجي تجي ... اتمنى أن تتدارك قناة النيل الأزرق هذا الخلل وان تنقذ مايمكن انقاذه حتى لو تستعين بثورة الانقاذ الوطني ...
تحياتي دكتور الصادق ومشكور على المرور والتعليق
فعلاً يا دكتور البرنامج لا يعدو كونه قعدات ونسة تتخللها ضحكات هستيرية مزعجة
ولا اظن ان هناك اعداد وإن كان فانه ضعيف جداً
عموماً البرنامج مخجل جداً وفي رأيي انه لا يليق بقناة محترمة بثه ابداً
تحياتي
Post: #12 Title: Re: برنامج استديو 5 بقناة النيل الازرق Author: Moawia Mohammed Date: 06-20-2016, 06:25 AM Parent: #11
يا هيثم رمضان كريم
إنتوا قلتوا الضحكات العالية المجلجلة و الكواريك و الاحساس انو الزول دا فرحان و ما مصدق بالإضافة للأسئلة السطحية و المحرجة .
و أديك من عندي اللبس الغريب و تسريحات الشعر و الإصرار إنو يغني كل حلقة و أكتر حاجة تزهج الصفقة بتاعتو ( زي البيصفق بي كبك ) و الله ما صفقة فنان أبدا عالية و طويلة و مشاترة و تفرزها من باقي الصفقات كلها تقول دي صفقة طه
غايتو أنا إتفرجت في مسلسل وتر حساس التمثيل أحسن ليهو من الغناء و التقديم
Post: #14 Title: Re: برنامج استديو 5 بقناة النيل الازرق Author: Haytham Ghaly Date: 06-20-2016, 05:42 PM
هههههههههه
الصديق معاوية تحياتي
ضحكتني صفقة الكبك دي
والله فعلاً يا معاوية انفعالات طه سليمان
في الرنامج كلها تحس بيها مفتعلة وشترا
وما جاية مع بعضها وبوظت البرنامج كلو
لك الشكر والتقدير
Post: #15 Title: Re: برنامج استديو 5 بقناة النيل الازرق Author: زهير عثمان حمد Date: 06-21-2016, 12:20 PM Parent: #14
تعرف يا صديقي معاوية في البداية تحياتي ورمضانك كريم أنا كان عندي بوست حايم صحيت يوم الصباح لقيتو مشي الخور القصة شنو ما عارف المهم بالتوفيق والله كلامك كل صح عن البرنامج تحياتي
Post: #16 Title: Re: برنامج استديو 5 بقناة النيل الازرق Author: عزيز Date: 06-22-2016, 12:20 PM Parent: #15
الأخ العزيز هيثم وكل الرفاق المشاركين رمضان كريم وتحية طيبة
أحببت أن أجلب الحلقات التي بثت حتى الآن عسى أن تجدوا فيها ما يستحق