Post: #1
Title: وزير الاعلام راتبي 9الف جنيه وخمسة جاولين بنزين أسبوعيا -الف مبروك يا خي
Author: زهير عثمان حمد
Date: 06-15-2016, 01:24 PM
Parent: #0
12:24 PM June, 15 2016 سودانيز اون لاين
زهير عثمان حمد-السودان الخرطوم
مكتبتى
رابط مختصر
أقر وزير الإعلام الدكتور احمد بلال عثمان أنه يتقاضى مبلغ 9 آلاف جنيه كراتب شهري بالإضافة إلى “5” جوالين بنزين أسبوعياً لعربته، ودافع بلال
عن محاربة الحكومة للفساد وشدد طبقاً للصيحة على أن المعارضة تعمل على تضخيمه في حربها على الحكومة.
|
Post: #2
Title: Re: وزير الاعلام راتبي 9الف جنيه وخمسة جاولين
Author: امجد الجميعابى
Date: 06-15-2016, 03:03 PM
كذاب
الحكومة ادتك بيت في حي المطار يرمح فيهو الخيل لا عليك موية و لا كهرباء
سيارة للبيت
و طبعا دي المرة التانية الساكنة في حي المطار
المرة الاولانية ما عارف ساكنة وين و دا ما بهمنا كتير لكن عشان الشغلة تكون واضحة
يعني البيت حق حي المطار دا ايجارو بالميت 45 مليون بالقديم زائد السيارة و السواق قول
5 مليون بالقديم
45+ 5+9 = 59 مليون بالقديم
يلا تعال التسعة مليون دي راتب اساسي وين البدلات ناس بدل لبس و بدل مراجع و بدل و بدل و بدل
علاوة على عربية الحكومة الراكبا انمت و السواق السايق ليك و العلاج بالخارج و التذاكر بتاعات الاجازة
انت وجوز الحريم و الذراري المباركة.
احمد بلال انت عوير و لا بتتعاور
|
Post: #3
Title: Re: وزير الاعلام راتبي 9الف جنيه وخمسة جاولين
Author: جمال ود القوز
Date: 06-15-2016, 04:27 PM
Parent: #2
ههههه والله يا جميعابي مرقتو كيت ساااي
قال 9 مليون قال
هسه 9 مليون دي قروش بالله لامن يشتغلوا بيها وزير
والله دي راتب حرس للوزير نفسه لن يقبل بها احد
الراجل ده شكلو عوير هههههه
اظنو قاصد مصروف يد واحده من جوز الحريم العندو
حقا هانت زلابيا الوطن
|
Post: #4
Title: Re: وزير الاعلام راتبي 9الف جنيه وخمسة جاولين
Author: السنجك عثمان
Date: 06-15-2016, 06:06 PM
Parent: #3
لالا الزول ده ما عوير ده متملق وحرامى من الدرجه الاولى وكسار تلج
ده اوطى انسان اشوفو فى حياتى والله العارفو كتير لكن تتخيلو بس خلوها
لمان رمضان ده يفوت نتكلم ليكم عنو بالواضح المافاضح ده بتاع تعاونيات
من الدرجة الاولى تفو عليهو راجل كذاب وسابق ل مسيلمه زاتو
|
Post: #5
Title: Re: وزير الاعلام راتبي 9الف جنيه وخمسة جاولين
Author: عبدالله عثمان
Date: 06-16-2016, 06:52 AM
Parent: #4
هل تصدقوا:وزير الاعلام يتقاضي راتب شهري اعلي من رئيس الجمهورية؟!!
هل تصدقوا:وزير الاعلام يتقاضي راتب شهري اعلي من رئيس الجمهورية؟!!
06-15-2016 11:45 PM
١-
اولآ:
عودة الي خبر قديم نشر بجريدة (الأهرام اليوم) المحلية،
واعادت نشره صحيفة (الراكوبة) في يوم ٢ فبراير ٢٠١٢-
علي عثمان:
إجمالي راتب البشير دون الـ(9) آلاف جنيه
وراتبي (7) آلاف جنيه
**************
لفت طه لدي مخاطبته جلسة الانعقاد الثانية للمجلس الأعلى للحكم المحلي الأمركزي التي يرأس بدايتها رئيس الجمهورية المشير عمر حسن أحمد البشير بقاعه الصداقة أمس الاثنين ، لفت الي راتب رئيس الجمهورية دون الـ(9) آلاف جنية وان راتبه هو – علي عثمان محمد طه -( 7) آلاف جنية وقال (ده إجمالي المرتب البتمشي بيهو بيتك ولا توجد (شراشف) أو حوافز ثابتة تضاف إليه.
٢-
ثـانيآ:
عودة الي خبر حديث نشر في صحيفة (الراكوبة)، بتاريخ - الامس- الثلاثاء ١٤ يونيو ٢٠١٦، عن الدكتور احمد بلال عثمان، وجاء تحت عنوان: (يتقاضى مبلغ 9 آلاف جنيه كراتب شهري بالإضافة إلى "5" جوالين بنزين أسبوعياً).
*****************
أقر وزير الإعلام الدكتور احمد بلال عثمان أنه يتقاضى مبلغ 9 آلاف جنيه كراتب شهري بالإضافة إلى "5" جوالين بنزين أسبوعياً لعربته، ودافع بلال عن محاربة الحكومة للفساد وشدد على أن المعارضة تعمل على تضخيمه في حربها على الحكومة.
٣-
***- بناء علي تصريح الدكتور احمد بلال عثمان وزير الاعلام، نجد انه يتقاضي - بحكم منصبه كوزير- راتب شهري اعلي من رئيس الجمهورية المشـير عمر البشير، الذي راتبه الشهري اقل من ٩ الف جنيه، ولا يحصل البشير علي اي جوالين بنزين مثل وزير الاعلام !!
٤-
***- قد يكون الوزير صادقآ في كلامه، لكن هل حقآ - وبعيدأ عن تصريح علي عثمان- هل يتقاضي البشير فعلآ راتب شهري في حدود ال ٩ الف جنيه؟!!
٥-
***- هل كذب الوزير احمد بلال عثمان بخصوص وضعه المالي، وتعمد ان يتجاهل حقيقة الامتيازات والعلاوات والنثريات التي يحصل عليها شهريآ بجانب الراتب الشهري والخمسة جوالين بنزين، امتيازات بالملايين من الجنيهات السودانية وبالعملات الصعبة في حالات السفر، وهي تمامآ الامتيازات تعادل نفس تلك التي حصل عليها وزير المالية السابق علي محمود، الذي بني ثلاثة قصور لزوجاته، وارسل ابنه الي امريكا للعلاج من مرض اصابه في اذنه علي حساب سفر وفد وزاري زار امريكا؟!!
٦-
***- اذا كان البشير يتقاضي فعلآ راتب شهري اقل من ٩ الف جنيه، وعنده عائلة مكونة من زوجتين ومن يقوم باعمال خدمات المنزل، فهذا معناه انه يستدين كل مرة من وزير الاعلام!!
٧-
***- ياتري، هل اعاد التاريخ نفسه، واصبحنا نعيش في زمن مسيلمة الكذاب؟!!..والا ما معني كلام علي عثمان وتصريح احمد بلال؟!!
٨-
***- تعودنا في السودان ان نقول (بردلب) عندما يكذب شخصآ ما كذبة كبيرة لا تدخل العقل!!..غريبة،ان هذه ال(بردلب) قد كثرت في الاونة بصورة ملفتة للنظر!!
بكري الصايغ
[email protected]
|
Post: #6
Title: Re: وزير الاعلام راتبي 9الف جنيه وخمسة جاولين
Author: Hussein Mussa
Date: 06-18-2016, 09:41 AM
Parent: #5
هذا شئ جيد جدا..مادام اعترفت بان راتبك تسعة مليون وقول صدقناك بعدين المحاسبة معاك حتكون علي اساس راتبك تسعة مليون ونشوف املاكك قيمتها كم والحساب سيكون ولد..الغريبة الكيزان النجاض ممتلكاتهم وثرواتهم دي غير رب العالمين مافي زول عارفها يدسدسوا فيها بحيث لا تعلم يمناهم ما اخفته يسراهم لكن زولنا دا من الواضح انه هطله...
|
Post: #7
Title: Re: وزير الاعلام راتبي 9الف جنيه وخمسة جاولين
Author: مني عمسيب
Date: 06-18-2016, 09:47 AM
Parent: #6
التحية لك زوز وللحضور الكريم ..
يا سلام علي سرعة البديهة والكلام النجيض . حسين موسي انا بفخر بيك .
Quote:
هذا شئ جيد جدا..مادام اعترفت بان راتبك تسعة مليون وقول صدقناك
بعدين المحاسبة معاك حتكون علي اساس راتبك تسعة مليون ونشوف املاكك
قيمتها كم والحساب سيكون ولد..الغريبة الكيزان النجاض ممتلكاتهم وثرواتهم
دي غير رب العالمين مافي زول عارفها يدسدسوا فيها بحيث لا تعلم يمناهم
ما اخفته يسراهم لكن زولنا دا من الواضح انه هطله... |
ولك الاحترام يا محترم .
|
Post: #8
Title: Re: وزير الاعلام راتبي 9الف جنيه وخمسة جاولين
Author: السنجك عثمان
Date: 06-18-2016, 11:54 AM
Parent: #7
راتبك 9 مليون وعندك عمارتين وعندك مرتين ده اعتراف ولا يحتاج ل شاهد قطع راس طوالى يا حقير
|
|