Post: #1
Title: توسع التعليم بالسودان أضرّ بالإقتصاد
Author: أبوبكر عباس
Date: 06-14-2016, 05:10 PM
Parent: #0
04:10 PM June, 14 2016 سودانيز اون لاين
أبوبكر عباس-الإمارات
مكتبتى
رابط مختصر كنت داير أعنون البوست دا ب:
تعليم أبناء الهامش أضرّ بالإقتصاد
لكن خفت من العكاكيز!
سلاطين باشا بعد العبابدة هربوهو من أم در، فضل ينق ينق في الإنجليز عشان يرجعوا يحتلوا السودان، ويزين ليهم في الراكوبة في الخريف.
الإنجليز يقولوا ليهو: إتّا عندك بس مغصة مع ود تورشين داير تفشها، إحتلال السودان دا من ناحية إقتصادية غير مُجدي، فشنو؟ ما تقد لينا أضانا ساكت!
ربك وكرمو، الفرنسيين يزحفوا ناحية فشودا، طوالي نادوا سلاطين وقالوا ليهو: قلت شنو يا كديس؟
لسع المقدمة لزوم تبريد العكازيز ما خلصت
|
Post: #2
Title: Re: توسع التعليم بالسودان أضرّ بالإقتصاد
Author: أبوبكر عباس
Date: 06-14-2016, 05:19 PM
Parent: #1
وكان له دور كبير في علو القبلية وتمرد دارفور
|
Post: #3
Title: Re: توسع التعليم بالسودان أضرّ بالإقتصاد
Author: أبوبكر عباس
Date: 06-14-2016, 05:27 PM
Parent: #2
التنمية التي حصلت زمن الإنجليز في "مثلث حمدي" ثم تواصلت بعد خروجهم هي تنمية منطقية من ناحية إقتصادية، ولم يكن مقصود بها تفضيل إثنية على أخرى إنما فرضتها الجغرافيا.
اليوم لو أصبحت مسؤول عن البرامج التنموية بالسودان؛ فلن تكون شمال دارفور والشمالية القصوى أولوية تنموية بالنسبة لي
برجع للمقدمة وتبرير ما ذهبت إليه من قول في عنوان البوست
سووا صبر
|
Post: #4
Title: Re: توسع التعليم بالسودان أضرّ بالإقتصاد
Author: محمد البشرى الخضر
Date: 06-14-2016, 05:57 PM
Parent: #3
هههههه تحب العوة و الآكشن زي عيونك يا بكور
شككت في القرآن ما نفع (قلبت) الظن في الاسلام في رقبتو وطلعتو حركات من عبدالملك ما نفع
قلت تجرب ثيمة التهميش وبتدردق في الغالي و مين بابكر و عيال ابا وبتاع
يمكن تزبط
الله يغتي عليه من منتصر غايتو :)
|
Post: #5
Title: Re: توسع التعليم بالسودان أضرّ بالإقتصاد
Author: أبوبكر عباس
Date: 06-14-2016, 06:05 PM
Parent: #4
لما شفتك رفعت البوست؛ هميت قلت:
الله يستر ما يكون عندي غلطة إملائية؟!
ولو ما غلطة، معقول ود البشرى عندو مشاركة حقيقية في هكذا مواضيع؟!
|
Post: #6
Title: Re: توسع التعليم بالسودان أضرّ بالإقتصاد
Author: أبوبكر عباس
Date: 06-14-2016, 06:07 PM
Parent: #5
ود البشرى، هل بتعرف ال
Critical thinking
القالتو فردوس جامع في بوست "فلانة ليست طبيبة"؟
|
Post: #8
Title: Re: توسع التعليم بالسودان أضرّ بالإقتصاد
Author: حيدر حسن ميرغني
Date: 06-14-2016, 06:21 PM
Parent: #6
يامستنير اجاوب ؟؟؟
ال critical thinking هو البتمارس فيهو انت في البوست ده
موعودين ببوست كارب فيه عصف ذهني تاريخي :) :)
|
Post: #7
Title: Re: توسع التعليم بالسودان أضرّ بالإقتصاد
Author: sadig mirghani
Date: 06-14-2016, 06:20 PM
Parent: #1
كلامك دا زي كلام المسخوتة بت الغلفا ميركل حسبما اذكر
قالت الازمة المالية سببها انوا الصينيين بقوا
ياكلوا وجبتين،والهنود بقوا يشربوا حليب
واولاد الهامش ديل منو
الجو الخرتوم بعد ١٩٩٠
ولا الناس اللسا قاعدين هناك للان
مابننكر انوا التعليم الصناعي والمعاهد الفنية رفدت البلاد
في فترة بالعمال المهرة والذين هم عماد النهضة في اي بلد
وكما قامت المانيا بالعمال السودان مطالب بتحسين الصورة
النمطية عن التلمذة الصناعية والفنية السائدة والتشجيع علي
الدبلرمات الوسيطة والعملية وتحسين فرص عملها ورفع اجورها
لانها يمكن ان تغلق باب كبير للاستيراد للمنتجات الصينية الرخيصة
والتي لاتخضع للمواصفات القياسية المعمول بها في الدول المحترمة
فالكثير والكثير جدا من قطع الغيار والاسبيرات يمكن ان يتم تصنيعها
في السودان وبمواصفات وكان ياما كان في قديم الزمان،كان في مخارط
وكان في ورش وكان في مصانع وكان في مكن.
تعال المنطقة الصناعية الان تجد منتجات مستوردة ومكلفة البلد مبالغ
خرافية وتجد المواطن قاعد وخاتي كرسيه وفاتح المكيف وعامل رجل اعمال
يزيد الدولار يزيد سعر البضاعة وكان الله يحب المحسنين.
تعال شوف شبابنا الالاف المؤلفة ممن له شهادات جامعية استشهادا بقولك
من جامعات تافهه لاتشترى بثمن الحبر الذي كتبت به هذه الشهادات وكل واحد
عامل بترينة وخاتي كم موبايل وكم اي باد وكرسي منشتح بجي المحل الساعة
عشرة عشرة ونص وكأنوا ستيف جوبز مع انوا ستيف جوبز اكيد بصحى بدري
ومن ما يجي محاسن كبي حرجل محاسن كبي شاي احمر!!!!
وين الشباب؟؟؟؟؟
ديل من المفترض استيعابهم في مؤسسات عمل،انا اعطف عليهم،ومقدر لحالهم
وعارف معاناتهم.
الحكومة هي المسؤول الاول والاخير عما يحدث فكونوا يتم رصد 70% من ميزانية
دولة فقيرة في الامن والدفاع ناهيك عن الوزارات صاحبة الميزانيات المفتوحة والصرف
البذخي فأكيد سوف يخرب بيت الاقتصاد.
عشان كدا لو كان عنوان البوست
(توسع الانقاذ في التعليم أضر بالاقتصاد) بكون more specific
والسلام ختام
|
Post: #9
Title: Re: توسع التعليم بالسودان أضرّ بالإقتصاد
Author: حمد عبد الغفار عمر
Date: 06-14-2016, 09:19 PM
سلام يا أبوبكر
التعليم حق أصيل لكل مواطن تماما مثل الأكل والشرب والصحة
بس لا بد من تحديد أهداف التعليم حتى يفي بالغرض
نحن عندنا التعليم لا يتعدى الوجاهات والتوظيف في الوظائف المريحة والنضيفة
أديك مثال أنا اليوم استلمت 7 سير ذاتية لسائقين من الفلبين لاختيار أفضل 4 منها
4 منهم عندهم بكالريوس إدارة أعمال غير إجادة الحاسب الآلي والخبرة العملية كلها بمهنة سائق
3 منهم عندهم دبلوم مختلف التخصص غير إجادة الحاسب الآلي والخبرة العملية كلها بمهنة سائق
ومن وصفهم لخبراتهم تحس إنهم مفتنعين وفخورين تماما بمهنتهم
السودانيين بعملوا كدا؟
|
Post: #10
Title: Re: توسع التعليم بالسودان أضرّ بالإقتصاد
Author: علي محمد الفكي
Date: 06-14-2016, 09:29 PM
Parent: #9
Quote: موعودين ببوست كارب فيه عصف ذهني تاريخي :) :)
|
دا اذا بطلت عادتو وواصل في البوست ما وقفو في النص
يا ابوبكر لك قدرة فنان على اثارة المواضيع المهمة واضاءة الجانب المعتم من الصورة وكمان بلغة سلسة وتجبر على متابعتك
لكن فيك قلق عجيب ما بخليك تكمل اللوحة وبتخليها مجوبكة ما بتتقري
|
Post: #11
Title: Re: توسع التعليم بالسودان أضرّ بالإقتصاد
Author: الامين موسى البشاري
Date: 06-14-2016, 09:35 PM
Parent: #10
Quote: كنت داير أعنون البوست دا ب:
تعليم أبناء الهامش أضرّ بالإقتصاد
لكن خفت من العكاكيز! |
افااااااا... بكور المستنير بخاف من العكاكييييز ( )
|
Post: #12
Title: Re: توسع التعليم بالسودان أضرّ بالإقتصاد
Author: وضاح عبدالرحمن جابر
Date: 06-14-2016, 09:40 PM
Parent: #10
طبعا العنوان ده ممكن يتناقش بي عشره الى عشرين موضوع مختلف وكل موضوع فيهم بكون مليان وسمين
وطبعا ما عندنا زمن نقعد ننتظر مطاولات ورميات وحقن ودبابيس الدكتور .. فشنو اى واحد يملا ما عونو
.............
انا من فتره طويلة ومن خلال ونساتى مع الشباب كنت بقول انه التعليم اضر بالريف شديد جدا
وده من خلال تجارب معيشية فاحنا أبناء جدود مزارعين وأصحاب حواشات ونحن سكان الجزيرة وشفنا كيف أصحاب الحواشات والبهايم هجروها
بي سبب انو أولادهم اتعلموا وبقت العمالة كلها مستاجرة ومات الجدود واتباعت الحواشات والجناين .. لانه ما في زول بخدما
ولأنه أولاد المزارعين والرواعيه بقوا افندية وقعدوا في الكراسي خلف المكاتب وشنطوا البنطلونات
طيب ده الجانب السلبي .. والجانب الإيجابي ما بعنى انه يتوقف التعليم
بيعنى انه ارضك وزراعتك وتجارتك هي حصنك وامانك وثروتك ما مفروض تتخلى عنها .. وانه فهم الوظيفه هي الأمان مفروض يختفى تماما
وانه الشهاده لاتعنى ترك الاعمال الحره .. وانه الزراعه والرعي وغيرها من مهن الريف ليست مهن وضيعه
|
Post: #13
Title: Re: توسع التعليم بالسودان أضرّ بالإقتصاد
Author: muntasir
Date: 06-14-2016, 11:00 PM
Parent: #12
يا بكة دخل السودان من ثروة زراعية وحيوانية ومعدنية كلها من الهامش تاكلوهم عضم وما دايرين تعلموا أولادهم اها الا نشرب الألمي بتاعنا ده في مثلث حمدي ونكسروا بي عرقي التمر كان الخليفة جاب ناس الغرب لي دار صباح تنقنقوا وكان انعدمت الخدمات في أقاليم السودان وكسروا عليكم يزعلوا أمراء الرايات الأربعة يعني بس زي ما قال الشاعر الجاهلي نكورك ليكم ما تجونا نجيكم تكوركوا
|
Post: #14
Title: Re: توسع التعليم بالسودان أضرّ بالإقتصاد
Author: أبوبكر عباس
Date: 06-15-2016, 05:56 AM
Parent: #13
سلام للشباب الحلوين المرّوا من هنا وبجيكم راجع واحد واحد.
يا ود الفكي، والله العظيم (قسم ما بمسحو) بحاول أتم البوست دا في رمضان دا، والبوستات التانية كلها بتمها، إتّا قائل الفورة كم؟
كتشنر بعد أم دبيكرات وعمالو بجروا في خط السكّة حديد خارج كوستي (خارج مثلث حمدي) قال للبت الشغالة معاهو في البيت:
وحات سيدي الحسن، إتورطنا ورطة ضكرة.
قالت ليهو: ذهب الملكة فكتوريا يسد عين الشمش، يعني إتّا قائل روحك ماشي تفقرها؟
قال ليها: الله يستر بس
وكورك: يا أبشرا.
التعديل: حذف ألف واو الجماعة من الفرد قبل ان يأتي ود البشرى بجحافله
|
Post: #15
Title: Re: توسع التعليم بالسودان أضرّ بالإقتصاد
Author: محمد البشرى الخضر
Date: 06-15-2016, 06:31 AM
Parent: #14
ههه
لا ياخ الف واو الجماعة الزائدة و الناقصة ما بقيف فيها بقدر ما بتضرسني قلبة الحروف التي تغيّر معنى الكلمة
| Quote: والله العظيم (قسم ما بمسحو) |
|
Post: #16
Title: Re: إنتقلت إلى رحاب ربها شقيقة معاويه المدير
Author: احمد التجانى احمد
Date: 06-15-2016, 09:41 AM
Parent: #15
| Quote: تعليم أبناء الهامش أضرّ بالإقتصاد |
بكون اضر بالاقتصاد يا ابكر لو جماعتكم ناس طيبة الخواض وما جاورها هجروا شغلة الكناتين فى احياء المدن
يا ود البشرى الضفر ما بمرق من اللحم , المستنير من اسرة تمتهن التجارة بالجملة والقطاعى الا هو واخوانه خرتوا يدهم من كار الاسرة وبقوا افندية
تتذكر يا بكور قصة الفاتح حبشى مع حامد سيد الدكان لما لقاه فاتح يوم العيد , لو ما عارفها غازى بحكيها ليك لو ما ضربوا زهايمر
|
Post: #17
Title: Re: إنتقلت إلى رحاب ربها شقيقة معاويه المدير
Author: أبوبكر عباس
Date: 06-15-2016, 10:15 AM
Parent: #16
فكرتي يا صديق، نفس فكرتك
تعليم من غير خطة وقف حال الإنتاج
| Quote: التعليم حق أصيل لكل مواطن تماما مثل الأكل والشرب والصحة |
يا حمد، التعليم ليس بحق أصيل؟؟
الحق الأصيل هو الاكل والشرب والعلاج
التعليم حق تفرضه الرفاهية
والرفاهيه هذه درجات
حاليا أساتذة الجامعات أصبحوا عَبء على الدولة
الصورة أصبحت مقلوبة
الإعتماد على هامش إقتصاديات الدول الأخرى زي السعودية والخليج ليس حلا
مجرد مسكن
|
Post: #18
Title: Re: إنتقلت إلى رحاب ربها شقيقة معاويه المدير
Author: أبوبكر عباس
Date: 06-15-2016, 10:20 AM
Parent: #17
يا حيدروف، سلام
فكرتي في كثير من البوستات فتح نفاج للتفكير حول مسألة
مشكلتي مه ناس المنتدى هي تعودهم على الرد على المداخلات بالترتيب
ودي قاعد أشوفها غير ضرورية لمواصلة المشاركة
يعني تعقيبي ليس ضروريا في كل الحالات
|
Post: #19
Title: Re: إنتقلت إلى رحاب ربها شقيقة معاويه المدير
Author: Abdelrahim Mohmed Salih
Date: 06-15-2016, 11:23 PM
Parent: #18
سلامات يا ابوبكر
التعليم حق اصيل يشارك الطعام والامان فى اهميته
ولك الامان يا ابوبكر أن تطرح فكرتك الاولى قبل أن ترعبك عكاكيز اهل الهامش
وحينها سيكون الرد على فكرتك الاقطاعبه اوضح
نسيت ان اذكر لك اتهامى لك بمناصره الاقطاع متلبسا برداء تمويه اسميته الاستناره:)
مع العلم ان لك اشراقات فى تناولك لبعض المواضيع من زاويه توسع الرؤية وتزيل احتقان جبل عليه المنبر وتوارثته اجيال فى حوار مكتوم مغلق الاركان
دعواتك الاقطاعيه بوعى منك أو بدونه لعزل أبناء الهامش من التعليم العالي ستخلق طبقه من البارونات تستعبد الناس والارض
طبعا اذا اتفقنا على مصطلحات هامش ومركز ومقابلاتها من حضر وريف
فى مجتمع يعيش ريفه فى حاضره الدوله فى تؤام فريد لا تناقض فيه أفسد انسجامه (المثقفين)حمله الاقلام رمز السلطه المعنوية وهم فى معاناتهم الفكرية يجربون فينا قوالب فكر لاتصلح لنا اولى بها بطون الكتب و مناقشات منتصف الليل
|
Post: #20
Title: Re: إنتقلت إلى رحاب ربها شقيقة معاويه المدير
Author: MOHAMMED ELSHEIKH
Date: 06-16-2016, 08:02 AM
Parent: #19
Quote: يا حمد، التعليم ليس بحق أصيل؟؟
الحق الأصيل هو الاكل والشرب والعلاج
التعليم حق تفرضه الرفاهية
والرفاهيه هذه درجات
|
اصلا يا بكور اذا كان الموضوع درجات
يبقى تبدأ بي درجة حق الحياة
بعدين نمشي للحقوق التانية
في ناس في السودان دا بفتشوا لي حق الحياة
بعدين الاكل والشراب بدبروه براهم
تسلم ياخي من ناس ود البشرى
|
|