بخصوص مغامرة العبور لأوربا وتسليم الأرتري

07:36 AM June, 09 2016

سودانيز اون لاين
أبوبكر عباس-الإمارات
مكتبتى
رابط مختصر

مسألة انو الزول الأرتري السلموهو لإيطاليا يكون هو الشخص الخطأ، تبدو لي بعيدة!
بالتأكيد أجهزة الأمن الأوربية كان لها دور كبير في عملية الإعتقال وترصد المكالمات.

هل الإيطاليين بهذه السذاجة، يرسلوا طائرة للخرطوم بس لانو الخرطوم قالت ليهم مسكنا الزول الدايرنو؟!

أعتقد المنتدى كلو ماسك ضنب الككو وما في زول سأل السؤال المهم:

هل مغامرة العبور لأوربا من جحيم أفريقيا جريمة؟

قعدت بأرتريا زي ثلاثة شهور، وأعتقد أنو أي زول يساهم في تهريب الأرتريين خارج أرتريا هو بطل يستحق وسام.

Quote: يستحق وسام

-
واصل

قبر حرب بمكان قفر و ليس قرب قبر حرب قبر
قالت العرب هذا البيت أقبح بيت شعر قيل ، إذ يكاد يكون مستحيلا أن يقرأه أحد ما دون أن يخطيء...
وكذلك الجغرافيا الأرترية
وبعد دا كلو، العساكر معسكرين البلد كلها، تجنيد إجباري يستمر لأكثر من عشرة سنوات
والشباب والشابات كلهم لابسبن شدد البلاستيك السوداء وشايلين الكلاشنكوفات ومدورين دوريات!!
ما في حاجة يحرسوها أرض قفراء باهت لونها تحبط الناظرين.

تحاول تشرد؛ يدوك طلقة في نص راسك

الأوريين المعفنين ديل شالوا الأراضي التي تصلح للحياة في الدنيا كلها وخلونا نتلفت.

هسع عليكم الله، الأمريكان، الأستراليين، الكنديين، البيوزيلنديين، يسوروا الخير دا كلو ويخلونا نتلفت، ويجرمونا لمان نغامر بحياتنا

أريكا واستراليا وكندا ممكن يستوعبن ليهن مليار نسمة دون أدنى تأثير هلى رفاهية الغولف للخواجة أب شعر زي قندول عيش الريف دا!!!

التعديل: تعديل كلمة المعفنين كانت ناقصة عين، عينم بالتقدها ليهم يا بركة سيدي الحسن

أفضل لي مية مرّة آخد مخاطرة العبور لأوربا من الإنتظار بأرتريا، أو أي حتّة تكون مستك فيها في أفريقيا المعفنة دي.

قول رضيت تعيش في القفار داك، بعد دا يلم فيك واحد يخت ليك مسدس في راسك ويقول ليك: أحرس الجبال دي
يا عمي أحرس أيه؟! دي مجروسة بالجن
الجن اليركبك يا بعيد

القرد يحسدوهو علي حُمرّة طيزو

نصيحة تخدرك أخ أبو بكر

أسباب الحياة متوفرة والناس تغامر بحياتها وبالملايين للالتحاق بقطار الحياة في الديار الاوروبية

وكمان معاها أسباب السلامة والحرية

ومعاها التقدم الطبي والعناية الفائقة والانسانية الحنونـة

وتلاقي ناس تديك فتاوي ... وتقول ليك خليك مكانك الطاهر دا

ال ما فيهو شبكات (صرف صحي) ولا (موية شراب نظيفة)

اشرح لبعد بكره ... مافي حد حيفهمك

أحمد الشايقي

صرف صحي يا شايقي؟!
ما في حاجة تأكلها عشان تهرها توديها الصرف الصحي.
لو لقيت حاجة أكلتها، فضلتك بتطلع ناشفة زي بعرة الجمل، تلمها تولع بيها النار يمكن تلقى ليك فار ميت تنجضو

Quote: ما في حاجة تأكلها عشان تهرها توديها الصرف الصحي. لو لقيت حاجة أكلتها، فضلتك بتطلع ناشفة زي بعرة الجمل، تلمها تولع بيها النار يمكن تلقى ليك فار ميت تنجضو

أبو بكر سلام
غايتو يا أبو بكر لو صايم ... مفروض تصوم السنة كلها ....

كتبت بوست اسمو تراكتر جون دير
كنت بحلم فوقو بحل للدول الثلاثة وشعوبها

http://sudaneseonline.com/board/480/msg/%D8%AA%D8%B1%D8%A7%D9%83%D8%AA%D8%B1-%D8%AC%D9%88%D9%86-%D8%AF%D9%8A%D8%B1-1421214960.html

بكلامك ده .. جيرانا ديل انتهيت منهم عديل يامان
هم زاتم بقولو عن بلدنا كده .. تصدق

يا أبو حسين، المفروض الله يعفيني من الصوم
متين واحد من عبيدو إحتج ليهو بالوضوح دا عن القسمة الضيزى دي؟!
وبعدين الاوربيين ديل يسكنم في اوربا وامريكا وكندا ويديهم الخير دا كلو وبعد دا يعفيهم من رمضان!
ويقول لزول في جبيت صوم
وهو يقول ليهو: أصوم شنو؟ أصلا صائم!!

يا حيدر والله، تشوف حالم؛ تجي تعملوا لنافع مزار

سلام يا أبو بكر

عندما قرأت بوستك هذا عرفت السر في حصول كثير جدا من الأريتريين على حق البقاء في ألمانيا، ومعظمهم كمان جاي من السودان. أنا أعرف منهم المولودين في السودان نساء ورجال. مش كدا وبس: بعضهم يخطط للعودة إلى السودان بعد أن يحصل على تعليم وتدريب أو بعد أن يجمع ثروة.

ياسر

Quote: قعدت بأرتريا زي ثلاثة شهور، وأعتقد أنو أي زول يساهم في تهريب الأرتريين خارج أرتريا هو بطل يستحق وسام.

نعم اللاجئون الأرتريون مساكين ويستحقون أن يخرجوا من الجحيم، ولكن المهربين مجرمون يجمعون الثروات ولا يأبهون لسلامة ترحيل هؤلاء المساكين عبر البحر.

أبكر سلام

Quote: صرف صحي يا شايقي؟! ما في حاجة تأكلها عشان تهرها توديها الصرف الصحي. لو لقيت حاجة أكلتها، فضلتك بتطلع ناشفة زي بعرة الجمل، تلمها تولع بيها النار يمكن تلقى ليك فار ميت تنجضو

ممسوخ انتى ياخي........ شيخي محمد صادق ما شايف شغلو

مشتاقون يا شاب اغشانا في طريقك وانت ماشي البلد

سلام لأم عمر والشباب

ياخ بالغت اريتريا دي بلد سمحة
وجوها بديع ، ياخ ديل لو دوروا رخام ساكت البلد بتغني
مصوع ديك كمان بلد براها. البلد مافيها عوجة الا العوجة في
السياسيين الحاكمين البلد.
الناس دي لو مابتحب بلدا ماكانت ناضلت وحاربت قدر دا
علي العموم ناسنا ديل ببيعوا ليك الجنرال واتخن تخين
والامن الايطالي مع الانجليزي بكونوا جابوا الزيت بتاعوا
وال DNA بتاعوا قبال يرفعوا

سلام يا ياسر،
على المستوى الإنساني ممتازين ويعشقوا السودان عشق كبير.
أسمرا الجو فيها ممتاز ومدينة نضيفة، والحياة فيها معقولة وأن كان معظم شبابها عاطل.
الأطراف فقر شديد بما فيها مصوع، البلد مواردها محدودة جدا،عساكر الثورة معتقلين كل البلد في سجن كبير.
لا يمكن ان تصبح دولة لحالها؟؟
إما تتحد مع السودان أو أثيوبيا
والامثل الإتحاد الثلاثي.

لدكتور النور حمد سلسلة مقالات عن الهضبة والسهل توضح الورطة الواقين نحن الثلاثة فيها!!
إما أن نكون الثلاثة معا أو لا نكون
حتى ذلك الوقت، أشجع الشباب على مغامرة العبور

دكتور المشرف، مشتاقين
قبل أيام كنت بتمعن في صورة محمد المشرف، لقيتو بشبهك شديد، طبعا من الاسم عارفو بكون قريبك
لكن تصدق لديكم نفس الإبتسامة
تحياتي للآرية والعيال

Quote: بصراحة ابوبكر عباس بلومك في شيئ واحد:انت عارف انو اوروبا وكندا واستراليا وامريكا بقو جنة كده كيف .. وهو العمل يا ابوبكر عباس يعني اشتغلو زي المجانين ليل على نهار أبو عمر فيسبوك

الموارد الضخمة هي كانت الحافز للعمل المجنون البتكلم عليهو يا مكاشفي القوم.
أن بعتقد أنو أكبر الموارد التي تصنع الدول هي المطر والسهول
غير كدا إلا الصدفة الجغرافية تطلع ليك بترول زي دول الخليج

على حسب البيان المنسوب للثلاثي (السودان وبريطانيا وايطاليا) شكبة الاريتري تقوم بتسفير مئات اللاجئين شهريا
نسبة الذين يلقون حتفهم هي 1 من كل 10 يعني البيوصلو سالمين تسعة وهي نسبة جيدة جدا اذا نظرنا للظروف التي يقوم فيها بعمله
كما قلت هذا الرجل يجب اعتباره بطلا قوميا
وعلى اوروبا وشرطيها الجديد في المنطقة ان يضربوا راسهم في اتخن حيطة

صباح الخير يا شباب
الحاصل شنو ؟

سلام يا شباب
يا ابو بكر انت تخلط بين اسباب الهجرة للشباب الارترى ولهم الف حق
وبين مخاطر الهجرة و عصابات تخصصت فى بيع الموت باسم الهجره وخيانه لعهود وابتزاز اهل لايمكلون مالا ولاحيله يضطرون لبيع كل شي لدفع فديه مقابلة حريه أبناءهم وكثيرا ما ينتهي بهم الحال إلى موت قاسى ليباعوا مقطع غيار بشرية
الموضوع معقد ومشربك
يحتاج لتفصيل وترتيب

مواصله لبعض الملاحظات

بعيدا عن الجدل الدائر هنا بين اطراف النزاع الكلاسيكية فى سودانيزونلاين التى صنعت بدون وعى علاقه من الشد والجذب فى ما بينها افقدتها حقيقه الصراع واكتفت بما يحرز من انتصارات صغيره فى حلبه اونلاين تحشد لها المؤيدين والمناوين فى طقوس احتفالية عبثيه
هويه الشخص المعتقل فى ايطاليا مثار الجدل ربما يكون هناك خطاء متعمد ارتكب من النظام فى السودان حول هويه هذا الشخص لكن هذا الامر لن يقلل من الاقدام على تلك الخطوه فى تعقب مجرمين احترفوا تجاره البشر وبيع احلام تنتهى بالموت
النظام فى السودان يسعى أن يعيد علاقته بالمجتمع الدولى وتحديدا القوى المؤثرة وفى سبيل ذلك سيفعل كل شى
والتجارب السابقه من ملفات امنيه قدمت للامريكان أو تسليم كارلوس كل هذه الأشياء تقف شاهد على انتهازيه النظام وافتقاره لقيم النخوه والجساره الإنسانيه خارج إطار الايدلوجيه واخلاق الدين الذى حمل فى عهدهم لفظا وقولا يهزمه سلوك طبعوا عليه افراد و مؤسسات
كل ما ذكر عن النظام معروف للجميع لذلك استغرب من استعار الجدل فقط حول نقطه هويه الشخص المعتقل دون التطرق إلى تعاون دولى فى تعقب المجرمين وهذه زبده الموضوع
اذا اتضح أن المعتقل شخص لا علاقه له بالتهريب فلاخوف عليه بل سيكون من حقه رفع قضيه مدفوعة الأجر ضد الحكومه الإيطالية وسينال حقوقه كامله فى دوله دستورية تعلى رايه القانون

مشكله التهريب مزقت أسر وخلفت ماسى مؤلمه ورغم ارتباطها بالسودان كدولة عبور أو إستقرار للاستيطان مؤقت تحت إشراف الأمم المتحدة إلا أن الاهتمام بهذه المعضله ضعيف
وكما ذكرت من قبل فى واقع جيوسياسى مضطرب كما فى شرق السودان والمنطقة عموم
ستكون مشكله تهريب البشر مرتبطه بالسلاح والتفلتات الامنيه على رقعه واسعه و صعبه التحكم وربما تغرى بعض المغامربن لخلق كيانات اشبه بدوله داخل دوله
التعاون الدولى سيكشف حجم المشكله وابعادها وتلقائيا ستبرز اسئله جوهريا حول اسباب تلك الهجره وكيفية حمايه المهاجرين من عصابات التهريب وسلطات الحدود
سأعود كلما سنحت الفرصه للمتابعه

إنا لله وإنا إليه راجعون!
يا زول علي بالطلاق إنتا زول clueless !
بعدين ياخي الناس ديل جيران وأهل فما تقعد تفلت ساي، يعني إنت هسع حليت قضية السودان؟

اذا الاوربيين عايزين يوقفوا الهجرة من افريقيا و دول الشرق الاوسط و الامريكان عايزين يمنعوا
اللاتين اميركان من دخول بلدهم لابد من التفكير في نظام اقتصادي عالمي اكثر عدلا من القائم الآن
و الشروع في اقامة تعاون دولي يحقق شيئا من النمو في دول العالم الثالث بحيث تتوفر ابسط مقومات
الحياة لساكنيه. و على دول العالم الثالث و اليسار الدولي مواصلة النضال للحد من تمدد الرأسمالية المتوحشة
و لتحقيق شروط عادلة تحكم التبادل التجاري و النمو الصناعي و الزراعي و النشاط الاستثماري.
و من المهم جدا مواصلة النضال ضد الانظمة الديكتاتورية و القضاء عليها مرة و إلى الأبد.

سلم محمد ابراهيم، هاني، صديق وعبد الرحيم،
المهربون بجوا منأخرين في تحليل جذر المشكلة الوضحو دكتور سيف.
الناس دي تعرف جيد نسبة المخاطرة في خيارم دا، مؤسف انو النس تخار الموت على البقاء في جحيم الفقر، ود يصبح سوق مغري للمهربين.
موش كدا وبس، عاين للناس البتفتكر عندها كلو معرفي ممكن يصنع حل زي قيادات اليسار ناس مصطفى مدثر ديل، أول حاجة عملوها استغلال المعرفة والشهادات للعبور بطريقة أقل مخاطرة وعمل ساتر!
حتى الناس كلها تبدأ في وضع حلول عالمية زي ما قال دكتور سيف، تظل مخاطرة العبور قائمة

الحل يا سيف لازم يجي بتعاون كبير من الدول الغربية واستثمار أموال ضخمة لتحسين استغلال الموارد المحدودة أصلا.
شنو البمنعهم هسع تمويل سد القرن باثيوبيا وحفر القنوات الضخمة لري سهول السودان، وكذلك عشرات السدود بارتريا للمساهمة في حل مشكلة الطاقة والغذاء.
تنمية ذاتية تقريبا مستحيلة بالمنطقة

متين يا مصطفى أنا تحدثت عن مشكلة الفقر بالمنطقة منفردة، بالنسبة لي دائما السودان وارتريا واثيوبيا كيان واحد.
ما داير أقول ليك اتا "الكلو" بتاعك وينو؟ عارفو ما في، لكن ورينا محلو وين؟
هسع جبيت الضربتا بيها مثل دي، قاعدة في كندا؟!

Quote: على حسب البيان المنسوب للثلاثي (السودان وبريطانيا وايطاليا) شكبة الاريتري تقوم بتسفير مئات اللاجئين شهريا نسبة الذين يلقون حتفهم هي 1 من كل 10 يعني البيوصلو سالمين تسعة وهي نسبة جيدة جدا اذا نظرنا للظروف التي يقوم فيها بعمله كما قلت هذا الرجل يجب اعتباره بطلا قوميا وعلى اوروبا وشرطيها الجديد في المنطقة ان يضربوا راسهم في اتخن حيطة

شكرا أبو بكر

وبرافو للمهندس محمد ابراهيم علي,

كمان من وجهة نظر (شرعية) أنا شايف (محظورات) شرعية في قبض الزول دا .. بس اوصيكم (اخــتـــو) اي نصيحة من هيئة علماء السودان والمكنات السنجر بتاعتهم

المهم يا عزيزي الهجرة دي امر شرعي لما تضيق عليك الدنيا (ومن يهاجر في سبيل الله يجد في الأرض مراغماً كثيراً وسعة) .. الآية ... سبحان الله الهجرة الأولى في الاسلام كانت بأمر الرسول الكريم عليه الصلاة والسلام إلى أرض الحبشة وأريتريا الحالية جزء منها ...

والهجرة إلى الله مصطلح شرعي سياسي عندنا في حكمة الحزب الحاكمنا من 27 سنة

انا لا افهم كيف يتعاون هؤلاء القوم ضد شخص يسهل الهجرة للأريتريين ومعظمهم ..... من اخواننا واخواتنا المسلمين ... والارض الاوروبية مشهورة جدا بالمراغم والسعة المذكورة في الآية وأريتريا يحكمها ... نصراني... يضيق على المسلمين ويجند بناتهم في الجيش بالقوة

الجيش الاريتري طبعا لا يرفع ... شعارات ... إسلامية وهي لله وما إلى ذلك ...

المفروض يساعدوهم بدلاً عن قبض الذي يسهل لهم الهجرة ... وين الطيارات التركية ؟؟؟؟

أحمد الشايقي