عوداً حميداً عبدالوهاب المليك ومبروك زواج الدكتورة

08:26 PM June, 07 2016

سودانيز اون لاين
علي عبدالوهاب عثمان-جدة
مكتبتى
رابط مختصر

عاد الزول الجميل الحبيب عبدالوهاب المليك نصير الكادحين ناس ( قريعتي راحت )
بعد قضاء اجازته في الوطن .. وزواج ابنته الدكتورة

عودا حميدا .. وألف مبروك
نورت ليالي جدة وإفطارات رمضان

مودتي اخي المليك

الف مبروك و حياة زوجية سعيدة للدكتورة

و حمدا لله على سلامة ابو الدكتورة

تحياتي و احترامي حبيبنا علي

مودتي الحبيب ابوحسين
نورت البوست .. المليك رقم مهم مجتمع جدة
مودتي

Quote: بعد قضاء اجازته في الوطن .. وزواج ابنته الدكتورة

أخي العزيز علي
رمضان كريم وتصوموا وتفطروا على خير
وعقبال أولادك وبناتك واولاد وبنات كل البورداب والأحباب
لم تكن إجازة بمفهوم الإجازة التي من بعدها العودة للعمل ولكنها كانت بمثابة استطلاع تمهيداً للعودة لأرض الوطن بعد غربة امتدت لأربعة عقود حيث استمتعت بقضاء خمسة أشهر وأيام في ربوع الوطن الحبيب
أشكر لك سؤالك عني وترحيبك بي
ويا مثتب العقل والدين

الحبيب علي عبدالوهاب عثمان مسكاجرو
ورينا يجعلنا واياكم من عتقاء هذا الشهر
الكريم . ومبارك زواج الدكتورة وحمدلله
علي سلامة اخونا شيخ العرب عبدالوهاب
المليك ومرحبًا به اضافة حقيقية هنا وفي
كل مكان

الحبيب المليك ده الواحب
عودة شنو يا الحبيب .. صحيح نحن بقينا في الزمن الضائع ..
لكن وين مع الكهرباء والحاجات دي ..
المهم إن شاء الله نازل ضواحي الدنيا .. عشان أجرب الموسم الزراعي الشتوي
بعد داك نشوف ..
عملت لي نت في البيت .. السلام عليكم من التراويح جري للبيت
لكن حرمني من الجمعية والقهوة وونسة الكادحين ..

بس كمان راحة من زحمة شوارع جدة والمواقف


مودتي رمضان كريم

أخوي علي
سأل أحدهم عن معني (متقاعد) فأجاب آخر يعني (مِت) (قاعد) وأخوك أصبح من المتقاعدين .. والمعاشيين .. ومن أولئك النفر الذين يمسكون بخرطوش الموية بعد صلاة الفجر ويرشوا قدام البيت قبل تقطع الموية
خمسة أشهر مضت كلمح البصر .. شاطرنا الأهل والمعارف في السراء والضراء وذهبت لأكثر من ولاية في السودان ِوكانت زيارتي لمدينة السوكي التي درست فيها رابعة أولية عام 1966 ولم أجد من ملامح تلك المدينة إلا مخزن السكة حديد ومكتب البريد ..
وعدت بعد انتهت الخروج والعودة وحتى الآن (ما لاقي راس الخيط) وبعد رمضان إن شاء الله سوف أرجع للوطِن رغم المعاناة التي يعانيها الأهل مع الموية والكهرباء وباقي عمرنا نقضيه معاهم ..
ويا مثبت العقل والدين ..

Quote: عملت لي نت في البيت .. السلام عليكم من التراويح جري للبيت لكن حرمني من الجمعية والقهوة وونسة الكادحين ..

ههههههههههههه اضحك الله سنك ياابوالنسب ولو ربنا هون ان شاء الله بعد العيد نجي نسلم عليك والاسرة الكريمة الله يحفظك ياخ

الحبيب المسلمي
يكون العيد عيدين

مودتي

الأخوة الأفاضل أبو حسين ومحمد المسلمي
جزاكم الله خير ورمضان كريم وتصوموا وتفطروا على خير وعقبال بناتكم وأولادكم وربنا يجعل أيامنا كلها أفراح

حبيبنا المليك ..
لازم تعمل لينا محاضرة في منتدى الاربعائية
عن العودة النهائية والترتيبات لها ..
نتواصل معاك والاخ حرسم أمين المنتدى
مودتي ..

Quote: لازم تعمل لينا محاضرة في منتدى الاربعائية عن العودة النهائية والترتيبات لها .

على العين والرأس وطلبك أمر وسوف أتواصل مع الأخ حرسم في هذا الخصوص إن شاء الله
ويا مثبت العقل والدين

الاخ عبد الوهاب المليك
تحياتي وتقبل الله صيامكم وقيامكم لشهر رمضان
خالص التهاني والتبريكات بزواج كريمتكم الدكتوره الف مليون مبرووك

تقديري واحترامي

الف مبروك
بالتاكيد وانت تمسك بالخرطوش وترش الحوش
تكون في تلك اللحظات قد مرت بك آلاف الذكريات الجميلة
والأهم من كل ذلك انفاس الحرية
تلك الأنفاس النابعة من رئيتي الوطن
والتي تاتيك على شكل رذاذ
وتصافح وجهك بين كل لحظة واخرى
ليس الحديث هنا للعاطفة ودغدغة المشاعر
ولكن يحتاج الانسان ليرتاح قليلا في حياته
خاصة بعد هذه المعاناة الطويلة في الغربة
وبعد كل تلك التضحيات الجسام
أخي المليك .. ان تشارك الناس افراحهم واتراحهم
هنا تشعر بقيمتك الحقيقة كانسان
ان تسافر الى حيث دفنت ذكرياتك الجميلة
وحتى ان وجدت بقاياها واندثر الباقي منها
هذا لعمري يعادل ملايين الريالات المريرة التي اخذناها في الغربة من فك التمساح
آباؤنا ماتوا فحملهم آخرون على اكتافهم
اصدقاؤنا رحلوا دون حتى ان نحظى بوضع التراب عليهم
أخواتنا تم زفافهن ولم نحظ حتى ولو بلحظة فرح
او لففنا عمائمنا لنحضر العقد في الجامع
اصبحنا غرباء في الوطن
كما نحن غرباء في الغربة
أذكر في احدى مناسبات الزواج ان شاركت بمساهمتي في هذا الزواج
وكانت مساهمة دسمة جداً
وسالني الشاب الذي يكتب { عمو عمو اسمك منو } ؟؟؟
فقلت له عمك اسمه { أوكامبو } !!!
وقسمت المساهمة على اثنين احتفظت بالباقي في جيبي !!!
متعك الله بالصحة
ورد غربتك
فانت واخي علي عبد الوهاب وجيلكم الذهبي حقا مفخرة للجميع
جميلة هي ذكرياتكم
وطاعمة لدرجة الدهشة
ياليتك تحكي لنا عن قرار العودة
فلازلت مثلك في محطة الانتظار
عسى ان ياتي بص العودة لأكون من ضمن ركابه
حتى لو كان مكتوبا عليه العفش داخل البص على مسئولية صاحبه !!


هجمة مرتدة
طبعا انا لسه 23 سنة غربة
ماقدركم انت وعم علي عثمان عبد الوهاب
لسه انا في مرحلة { الحمار }
يعني لحد اللحظة لم ندخل الى مراحل { الكلب والقرد والتلفزيون } !

Quote: ياليتك تحكي لنا عن قرار العودة فلازلت مثلك في محطة الانتظار عسى ان ياتي بص العودة لأكون من ضمن ركابه حتى لو كان مكتوبا عليه العفش داخل البص على مسئولية صاحبه !!

الابن أبو حراز
حديثك ذوي شجون وكلماتك تقطر شجن لكن قل لي أي محطة الانت منتظر فيها وأنت في عمر الزهور ؟ لسه بدري عليك .. هناك عودتان العودة الطوعية والعودة القسرية .. ومعظمنا تُفرض عليه العودة القسرية
وبمشيئة الله أعود وأحكي عن الخمس شهور التي مضت وكأنها خمسة أسابيع ..

شكراً دكتور محمد وعقبال بناتك وأولادك

مودتي للجميع ..
المليك كالعادة جبت لينا ناس رائعين
والبوست حلالك للرد على التهاني والمداخلات ..
وأنا علي بالعتالة .. هههه

مودتي واصل يا جميل ..

Quote: مودتي للجميع .. المليك كالعادة جبت لينا ناس رائعين والبوست حلالك للرد على التهاني والمداخلات .. وأنا علي بالعتالة .. هههه مودتي واصل يا جميل ..

بمناسبة { العتالة } دي
قبل سنتين شحنت طقم كنب للسودان واصل الحصاحيصا
وقمت بتأجير بوكسي من السوق
وفي كافتيريا سكينة حيث مقر شركة { الأسكلا } الخاصة بشحن العفش
يوجد مجموعة من العتالة المفتولي العضلات
اها ياجماعة ترفعوا لينا الكنب في البكسي
وتركبوا معاي في السيارة عشان ننزله في البيت
واحد الظاهر مسؤول منهم نظر لي نظرة حادة جداً
وقال لي ياعمك الكلام دا بكلفك 900 الف بالقديم !!!!
طبعاً نظرت له نظرة حادة برضو
هو احسن مننا وللا احسن مننا وصمت مسافة ولم ارد
فرد احدهم ياعمك قلت شنو ؟؟؟
قلت ليهو انا عندي ثلاثة خيارات
الخيار الأول تشتري انت الكنب بـ 900 الف
وبرجع ليك منها 200 الف
الجماعة قعدوا يضحكوا
اها ياعمك والخيار التاني شنو ؟؟
الخيار التاني تشيل انت جوازي دا وانا شغال مهندس في البلدية
وتمشي انت وبكامل قواك العقلية تشتغل في مكاني
وانا تخلي لي محلك ابو 900 دا ؟؟؟؟ !!!!!!
الجماعة قرررررر قعدوا يضحكوا
وسواق البوكسي كاد يسقط على الأرض من السخرية
اها ياعمك والخيار الثالث شنو ؟؟؟
الخيار الثالث امشي اجيب اولادي ومرتي ونرفع الكنب !!!!
خلاص ياعمك بي 100 معاك كويس ؟؟؟
اخيرا وصلنا الى 80 الف بالقديم !!!!!!
وكنت امر بطريقهم يوميا فاسمعهم يقولون :
داك عمك بتاع جواز السعودية القال عاوز يشتغل عتالي

حبيبنا أبو حراز .. أبهجتنا في نهار رمضان القائظ ..
أبهج الله أيامك ..
دائما ناس العتالة ديل فيهم طمع ..
ما هو البلد كلها سمسرة وعمولة ..

لكن إنت عندك مقدرة في التعامل مع الصنف ده

مودتي ..