جاتني مية رسالة من دول الخليج اهل و أصحاب و تهاني ...
رغم فرحتي بيها ... لكنها كوبي آند بيست في معظمها ... بس بقول البركة الناس اتذكرتك ...
المهم رسلت لواحد بلدياتنا هنا ... هو ورمضان اصلوا ما أصحاب ...
بصوم مع آخر دولة بتعلن صيامها متين ...
و كل سنة قبال رمضان بي شهر يقعد يفتش في الفتاوى حقة الساعات الطويلة و اقرب دولة ...
مرة قرر انو يمسك الساعة 7 صباحاً .. عشان عدد الساعات يكون موازي للدول العربية ...
وكتها الإمساك كان 4 صباحاً ...
صاحبنا يصحى يفطر و يشرب الشاي الساعة 6:30 و يتوكل يمسك ...
عملت انا زاتي كوبي اند بيست لي رسالة بتقول :
كل عام و انتم بخير ... غداً غرة رمضان في السعودية ...
و رسلتها لي صاحبنا ...
رد لي الرسالة و قال :
يعني الصيام يوم التلاتا ؟
قلت ليهو لأ بكره؟
ما قريت انو بكرة غرة رمضان ؟
قال لي و غُرة يعني بكره ؟
انت ما متأكد انو معناتها بكرة الوقفة ؟
قلت يا زول صوم صومك بس و خلي الجرسة ... باكر و لا بعدو خلاس دخل العضُم ...
Post: #2 Title: Re: قلت ليهو الاتنين ( غُرة رمضان ) .. قال لي يعن Author: سيف النصر محي الدين Date: 06-06-2016, 02:09 AM Parent: #1
الغرة دي مش حقت الصلاة يا هندسة.. الجابها للصيام شنو؟ رمضان كريم
Post: #5 Title: Re: قلت ليهو الاتنين ( غُرة رمضان ) .. قال لي يعن Author: يحي قباني Date: 06-06-2016, 04:18 AM Parent: #2
Quote: الغرة دي مش حقت الصلاة يا هندسة.. الجابها للصيام شنو؟ رمضان كريم
الله اكرم يا دكتور ...
المشكلة انو قريبي ده زول قراي و فاهم ... لكن الجرسة بتطرطشو ...
Post: #3 Title: Re: قلت ليهو الاتنين ( غُرة رمضان ) .. قال لي يعن Author: Muhamed Hassan Abdalla Date: 06-06-2016, 02:46 AM Parent: #1
كل رمضان وانت طيب استاذ قباني
كمان النصيحة طسعطاشر ساعة كتيييرة
بس نسوي شنو اهو قدر الله فينا
وبالمناسبة دي في حاجة كدا محيراني
نحن بنصلي العشاء زي الساعة اطناشر وعشرة
صباح
يعني هسي لو كان عجلو الفطور زي تلاته ساعات
كدي ما كان صلينا العشاء زينا وزي الناس بدل نصليهو
بكرة
Post: #4 Title: Re: قلت ليهو الاتنين ( غُرة رمضان ) .. قال لي يعن Author: Hamid Elsawi Date: 06-06-2016, 03:05 AM Parent: #3
با هندسة صاحبك ده احلي زولبس رسلن لينا الفتاوي بتاعتو
Quote: غرة رمضان هو أول أيام شهر رمضان وهو شهر الصيام في الإسلام وكان المسلمون في ما مضى يرجعون في تحديده إلى معاينة الهلال امتثالا لصريح قول رسول الإسلام محمد ، أما حاليا وبعد التطور الفلكي انقسمت الدول الإسلامية وانقسمت تبعا لها الأقليات الإسلامية المنتشرة في أصقاع الأرض فهناك عدد من الأمصار الإسلامية تتبع نهج الحساب الفلكي في دخول الشهر مثل عمان وليبيا وكذلك المجلس الأوروبي للإفتاء وكذلك يذهب هذا المذهب مسلمو أمريكا وهولندا وفرنسا، وهم في ذلك يعتمدون على تفاسير للنصوص الشرعية الثابتة من الكتاب والسنة، بينما في المقابل وأثناء اجتماع عقدته هيئة كبار العلماء في السعودية يوم 26 أغسطس 2008 رفض المجتمعون اعتماد الحساب الفلكي في تحديد غرة الشهر استنادا لتفسيرهم ثلاثة أحاديث صحيحة.
منقول من قوقل دي كمان غرة الشعر
Post: #6 Title: Re: قلت ليهو الاتنين ( غُرة رمضان ) .. قال لي يعن Author: يحي قباني Date: 06-06-2016, 04:30 AM Parent: #3
Quote: كل رمضان وانت طيب استاذ قباني
كمان النصيحة طسعطاشر ساعة كتيييرة
بس نسوي شنو اهو قدر الله فينا
وبالمناسبة دي في حاجة كدا محيراني
نحن بنصلي العشاء زي الساعة اطناشر وعشرة
صباح
يعني هسي لو كان عجلو الفطور زي تلاته ساعات
كدي ما كان صلينا العشاء زينا وزي الناس بدل نصليهو
بكرة
عاين دي يا محمد ...
الليلة اتغدينا سوا انا و قريبي ...
قال لي سمعت الفتوى العجيبة دي؟
قلت اها ان شاء الله خير ... السنة دي جايب لينا شنو ؟
قال لأ ... هي فتوى موجودة ... لكن في شيخ .. ( رجل فاهم ) ... " طبعا رجل فاهم لأنه الكلام على هواهو "
قال الفتوى انو نصوم حسب صيام ناس مكة ...
قلت ليهو و الجديد شنو .؟ يعني نفطر العصر ... ما قلنا ليك زمان الفتوى دي ما عندها أساس ...
قال اصبر ...
الشيخ قال انو فكرة رمضان انها مسألة Symbolic
فليه انحنا ما نصوم مع مكة تماما و نفطر معاهم تماما ...!!!
قلت كيف يعني ؟
قال مراعاة فروق الوقت ؟
يعني لو الإمساك عندهم 5 صباحا ... فرقنا 8 ساعات ... نقوم هنا نمسك الساعة 9 مساء ...
و فطورهم 7 مساء ... نفطر هنا الساعة 11 صباحاً ...
و نكون ما عطلنا اعمالنا و ما اتضايقنا في أي شي .. و اسمنا صُمنا مع مكة و فطرنا مع مكة ...
قلت ليهو غايتو يوم الحساب كان بقيت قدامنا في الصف ... يانا الإتلطعنا شهرين ...
Post: #7 Title: Re: قلت ليهو الاتنين ( غُرة رمضان ) .. قال لي يعن Author: يحي قباني Date: 06-06-2016, 04:36 AM Parent: #6
Quote: با هندسة صاحبك ده احلي زولبس رسلن لينا الفتاوي بتاعتو
الحساب جمع يا صاوي ...
تتذكر اول أيامنا في كندا ... اول التسعينات ...
الإمساك الساعة 7 و شوية و الفطور أربعة و حتة العصر ...
تصحى 6 تفطر و تشرب شاي حتين تصلي الفجر ... و ممكن لو بدرت كمان تلحق ليك كباية قهوة من تيم هورتنز
كانت ميغة يا صاحبي ...
صاحبي غايتو تعبان تعب ...
بالله من اول شعبان و هو ايميلات و تلفونات و دسكشن بوردز ...
كلو لعل و عسى يجلد ...
Post: #8 Title: Re: قلت ليهو الاتنين ( غُرة رمضان ) .. قال لي يعن Author: Hani Arabi Mohamed Date: 06-06-2016, 04:46 AM Parent: #1
زولك دا من أندينا ولا إيه ؟
يبقى زي قريبنا التاني القالو ليه "ارمدان السنة دي جاي سخن" رد وقال: "مش في صالحو"