أقر الكلام دا-الغبار قايم

01:02 PM May, 22 2016

سودانيز اون لاين
زهير عثمان حمد-السودان الخرطوم
مكتبتى
رابط مختصر

* كتب الزميل مقداد خالد

الغبار قايم
والشكلة لي رب السما بين (زين) و (بنك الخرطوم)
منو الـ يشتري أسهم (كنار)
..
أنت يا أغبش ما تعمل لي إنك من حملة الأسهم
وإنك مقّطع الاقتصاد
وتجي تشجع لي طرف على حساب التاني
القصة ما هلال – مريخ
..
وما تتلوم .. ما تتلوم .. ثم ما تتلوم
وتقول لي إنه عوائد الصراع بين الطرفين
ح تنزل علينا برداً وسلاماً
والأمور ح تكون عسل
كأن تضرب الرخسة (باقات) الانترنت
أو تكون أرباح الحساب البنكي دولارية تكفيك أنت وتقعد لأحفادك
..
ما سيحدث إن سيجمع الطرف الشاري لكنار
تيم الماركتيغ بتاعو (اسم الدلع للجبايات واستحلاب القروش من العدم)
لتغطية الصفقة من دمي ودمك
هكذا تقول التجارب المعملية
..
لو فازت زين قطع شك ح يقترح واحد عبقري
باقات ما حصلت
ضرب مثل باقة (جناح الباعوضة)
دا طبعاً بعد خسارة مقترح باقة (الكترون الذرة)
والقول لصاحبه : ما تنسى خلق الله ياخ !!
..
أما إن فاز بنك الخرطوم
ح يكون الاقتراح بدخول الصرافات الآلية
بدفع واحد جنيه (حديد) فقط لا غير
مع اضافة جهنمية بعدم تغذية الصرافات بمبالغ كبيرة
أو تجويعها بالكلية
ودا عشان تخش كم صرافة باحثاً عن مالك
والفكة الحديد تكتر
..
من الأخر
ما في شي اتغير
عندما تتصارع الأفيال .. تموت الحشائش
عشان كدا ابقى ختمي وكتر من (واشغل اعدائي بانفسهم)
وكان قدرت تعمل (المديدة حرقتني) تكون ما قصرت
لأنه الأكيدة الجماعة ديل لو فضوا ليك
ح تشوف شعاع
مقداد خالد - خبير اقتصادي

😂😂😂👌