Post: #1
Title: مـمـنـــــــــوع
Author: د.محمد حسن
Date: 05-17-2016, 10:54 AM
Parent: #0
10:54 AM May, 17 2016 سودانيز اون لاين
د.محمد حسن-
مكتبتى
رابط مختصر لما تكوني حضور في غيابك
ليك تتبرج نافر الكلمة
شايلة معاني وجودك دوم
وابقى عليك شوقا
متوقد يوت
اعصر ضرع الليل الاعجف
واشرب منه
سهرا حارق
بدد من عيني النوم
كمين عام
وانا متوسد يدي لداية
وكمين عام
انا متمشي عليه
الجمر الوالع اقوى قضية
وكمين عام
اباري حروفي تغني محاسنك
في كل يوم
واتلقاها
غناوي الوجعة
وعدم الهجعة
بين مولود النور المارق
خيط منسل
من
رحم الليل ومشيمة هموم
وبيني بينك لسة مسافة
ليل وعساكر
واغرب حاجة
بيني وبينك
لصفة بسمك
وشهقة نفسي ولحظة خفقة قلبي
عليك بتدوم
انا غنيتك
حين اتكوم فيني حنين
ناديتك
كان الصوت مبحوح مسموم
من غبر الغربة
ومن الموية المالحة
وكلها يود
وانا متقريف لي مويتنا
وطعم النيل
طعم الالفة
ولون الضحكة الصافية
من الاصحاب
واتمنيتك
نسمة توسع صدرا صار مزموم
لمحة طيفك في الاسحار
والقيفة تنادي الموجة
تعالي اضمك
املا مسام الطين
كرفا مشموم
لحظة جيتك وانا متوقد شوقا حارق
يمرق مني قصيدي الحي
اخضر فرعه وما هو الني
فيه عيونك تبرق وهجا
ما مضيوم
وانا في بعدك جد مضيوم
اباري قوافي الجن الما بتروق
تاخد فيني تودي
ومرة تجيب القول البندي
ومرة النغم الفيه ايقاعا ديمة مشكل
من دلوكة
حس شاشاي
دليب شايقية
وصوت مردوم
يا تمتم قلبي الواله في امدرمان
وانت تساسق بين حلتنا
وشارع الدومة
وترسم خطوك
وانت بتاخد شكل الطابية
ومأساة كرري
وفيها بيكتر هذا اللوم
يا مريودة وحات عينيك
لما تميسي
بس اتذكري قلبي عليك
وكيف بيشيلك لونا واحد وثابت
ما بتغير
مهما اتغير فيه الزمن الماشي
وسطر فيه خدود الفُرقة
وعدم النوم
كم ناجيتك
واستيتك ما استيأست ولا مليت
كلما هبت من تالاك الريح الناعمة
كنت بشيل من جوفها نشوق
وكنت بدس منها في جواي
عشان
لما تجيني العاصفة سموم
كنت ببرد بيها الجوف الواقد
يابنية معاك الدنيا تجود
ترسل لينا المطر الوابل
فيه نخوض
منه نعب الفال الفارق دارنا زمان
لو في الامكان
واحلم
زي ماكنت زمانك بحلم
باليوم السعد الماهو الشوم
اني اجيك متلفح شوقي
ولابس كل قصايدي اليك عمامة
ولافح شال الكلمة
ويضوي جبيني هلال موسوم
وبس
|
Post: #2
Title: Re: مـمـنـــــــــوع
Author: أحمد الشايقي
Date: 05-17-2016, 01:45 PM
Parent: #1
Quote:
ويضــوي جبيني هــلال موســوم |
|
|