على وين تقبل و وين تفوت من ضلك الباراك وعين الشمس مبحلقه فى الضلام الدسّ جهرات البيوت و نهارك الطار من امس كان ليك قريب و مضوى ساحات الوئام حارسك وقاعد فى ضراك فات رفقتك خلاك فوق شدر البشاتن راك و راقد مندمس نيلك مصهين لا نضم لا وصى موجات الكلام حلف بى طينو ما يطراك
فيا شيمة الوجع البحر امسكى غرق الروح عليك ما تحرشى
على وين تقبل وين تمش والبِنيه النيّه الواقفه داب ورده ما بين مسامك والشغاف وحاجزاك قيزان الهموم الوحيده القاعده منفرده بضاريك بى توب الحنان من زبفة الشوق و السَموم البنيه المارقه من تالا الجنان حيث لا زول بشتكى ولا زول بخاف
تعالى يا طعم الزمان امرقى وشيلى فانوس الأمان كوسى المودر فتشى
على وين تقبل وين تمش حلمك مكتف مرمى فى قعر السهر ليلك مستف بى غيابك و السفر دربك مرسف بى حجار الهم و بالحيل الفتر
المسافات صاره وشها فى رجاك و النيل كسيح غالبو المشى
ومن العِمير ما باقى شى
على وين تقبل وين تمش وجعك شديد فرحك بعيد ما بتهبش
همك عنيد عامِت نواحى الروح لا داير يزح لا داير يروح لا بنكسف لا بختشى
ومن العِمير ما باقى شى
Post: #2 Title: Re: و النيل كسيح غالبو المشى Author: أبوبكر عباس Date: 05-15-2016, 02:32 PM Parent: #1
أبو ذر يا أخي، نفتقدك والرقيق بله فشنو، وجودكم مهم، وبديني إحساس انو القصة ما معايش وبس صحي مشاكلنا وصداماتنا منفّرة، لكن طلّة زي كل مرّة منكم تعيد للحياة شنو كدا ما عارف
Post: #3 Title: Re: و النيل كسيح غالبو المشى Author: أبوبكر عباس Date: 05-15-2016, 02:33 PM Parent: #2
لقيت الكلمة: تعيد للحياة ألقها
Post: #4 Title: Re: و النيل كسيح غالبو المشى Author: حمد إبراهيم محمد Date: 05-16-2016, 12:13 PM Parent: #3
Quote: على وين تقبل و وين تفوت من ضلك الباراك وعين الشمس مبحلقه فى الضلام الدسّ جهرات البيوت و نهارك الطار من امس كان ليك قريب و مضوى ساحات الوئام حارسك وقاعد فى ضراك فات رفقتك خلاك فوق شدر البشاتن راك و راقد مندمس
حبيبنا ابوذر – تتبارك -------------------- متى عين الشمس تترك البحلقة
السكوت
تهتك عين الظلام عيانا
تفضح المكبوت
المسكوت
تصهل حناجر الغبن
تشرع ابواب البيوت
تشاور طفلة
تضيء وجه النهار
يتنسم النهر
يغري ضياء الشمس
وقهقهات الفجر تتهامر
يوت
يوت
يوت.
***
Post: #5 Title: Re: و النيل كسيح غالبو المشى Author: حمد إبراهيم محمد Date: 05-16-2016, 01:33 PM Parent: #4
عازة ما نسيت وطن الجمال :
Post: #7 Title: Re: و النيل كسيح غالبو المشى Author: أبوذر بابكر Date: 05-17-2016, 02:47 PM Parent: #4
و يطيب معناك يا حمد
و مشكور دائما على جيتك السمحة
و كلماتك السخية و نديه
Post: #11 Title: Re: و النيل كسيح غالبو المشى Author: أبوذر بابكر Date: 05-28-2016, 11:34 AM Parent: #7
فيا شيمة الوجع البحر امسكى غرق الروح عليك ما تحرشى
Post: #8 Title: Re: و النيل كسيح غالبو المشى Author: أبوذر بابكر Date: 05-17-2016, 02:47 PM Parent: #4
و كل الامتنان كمان أخانا حمد
على الخليل النبيل
عزة و عزة
Post: #6 Title: Re: و النيل كسيح غالبو المشى Author: أبوذر بابكر Date: 05-17-2016, 02:42 PM Parent: #2
تحية و تقدير ليك يا أبا بكر و كلنا فى الهم وطن
و كلنا بنسلك أنسب درب و ندخل من أبرح باب
و ليك سلام بطعم النيل
Post: #9 Title: Re: و النيل كسيح غالبو المشى Author: ابراهيم حموده Date: 05-17-2016, 03:18 PM Parent: #6
المسافات صاره وشها فى رجاك و النيل كسيح غالبو المشى
ومن العِمير ما باقى شى
على وين تقبل وين تمش وجعك شديد فرحك بعيد ما بتهبش ----- أبوذر تحايا وأشواق وما تطول الغيبة..
Post: #10 Title: Re: و النيل كسيح غالبو المشى Author: أبوذر بابكر Date: 05-18-2016, 05:31 PM Parent: #9
ازيك يا ابراهيم
يا خليل السماحة
وتحية عامرة مع مودة وافرة ليك
لو بالليد ما بنغيب و الله ولا بنطول لكن الاشكال انه نحن ذاتنا بقينا كسيحين و دروبنا مقفلة بالعوارض