هو المضحك المبكي ...

03:14 PM May, 04 2016 سودانيز اون لاين
هشام عباس-
مكتبتى
رابط مختصر

انا اكتر حاجة بتضحكنى وانا بقرا بعض بوستات مؤيدى البشير ان الواحد فيهم بكل قوة عين وبلا ادني خجل يقول ليك يا جماعة بلاش نخرب البلد انتو ما شايفين الحاصل فى سوريا والعراق ومصر وليبيا ؟؟؟
صراحة انا ما سعيد انى حقول الكلام دا لانو فى النهاية دى بلدى ولا احد يكون سعيدا ان يقول ما يحزن عن بلده لكن نتوكل على الله ونقول لعل وعسي الناس تفهم ...
بالنسبة لخراب البلد لمجرد ان الناس تنادى بالتغيير ...
اولا .. السؤال : هو شنو اللى حيتخرب فى السودان ؟؟ يعني انا اقدر اتفهم الكلام عن خراب سوريا لانها كانت احد اجمل دول الارض عمرانا وجمالا ونظافة وطبيعة .. السودان الحالى القدامنا دا شنو اللى حيتخرب فيه ؟؟ واحد يأشر لى على معلم او مكان او منطقة كدا نتحسر عليها انها حتتخرب ؟؟ هو اساسا احنا ما عندنا الا مدينة واحدة ممكن نقول عليها مدينة وهى العاصمة الخرطوم وهذه العاصمة مقارنة باى خرابة فى اى دولة من دول العالم الثالث تعتبر كارثة .. هل نقصد بالخراب شوية بيوت الطين دى ؟؟ دا ما معناه انى بدعو لخراب او ما فارقة معاى الخراب لا العكس بيأثر معاى لو خسر احدهم عشة فى خلاء لانه بالنسبة له غالية جدا بقدر غلاوة برج ناطحة سحاب لمن يملكه .. لكن معنى ما اقوله ان اصلا البلد خرابة فحجة اننا خايفين على الخرابة تخرب دى حجة بليدة جدا ومضحكة جدا . ثانيا ..
السؤال ؟؟ هو الحاصل فى سوريا والعراق شنو وانت خايف تصل لحالهم ؟؟ الحرب تقصد ؟؟ الموت والضحايا ؟؟ الدمار ؟؟ اللجوء والنزوح ؟؟ ان كنت تقصد هذا فاما انك تعيش فى دنيا غير دنيانا او انك تضحك على نفسك .. يا ابنى انت بلدك فيها اطول حرب اهلية شهدها التاريخ منذ فجر الخمسينات وانتو بتحاربو بعض وسقوط الضحايا لم تتوقف وحين فكرت ان تحلها قسمت البلد وعندما قسمت البلد فتحت جبهات اخرى اكثر شراسة فى كردفان ودارفور والنيل الازرق طيب هل تدرى ان عدد ضحايا حروبك الاهلية تقريبا تفوق عدد ضحايا الحرب العالمية الاولى ؟؟ وهل تعلم ان عدد ضحايا دارفور وحدها تعادل عشرات المرات عدد ضحايا العراق وسوريا واليمن وليبيا مجتمعة ولو استمرت مشاكلهم سنين اخرى ؟؟ طيب هل تعلم انه فى الساعة التى تقرا فيها كلامى هذا هناك طائرات تقصف مناطق فى كردفان ودارفور وان هناك قرى تحترق واطفال تقتل ونساء تترمل ؟؟ اى عراق واى سوريا هذه التى لا تريد ان تصل لحالهم وانت اصلا سبقتهم الى ذلك .. الا اذا كنت تعتقد فعلا انه طالما انت واهلك فى امان فى الخرطوم او اى جزء من الشمال فاليحترق اهل الغرب والشرق والجنوب , طيب وشفقان على سوريا ليه ؟؟نفس الامر اهل دمشق واللاذقية وغيرها يعيشون افضل منك وفى امان اكثر منك فلماذا تهتم بباقى سوريا ..يا سيدى سيبك من سوريا والعراق انت تعرف ان غزة التى تحت رحمة الصهاينة لو رأيتها ستتمنى لو كنت فى حالهم ..
ثالثا .. السؤال : لماذا تعتقد ان من ينادى بالتغيير هو من يريد الخراب ؟؟؟ اذا حدث الخراب الذى تتحدث عنه ,,,,,, ولماذا اكون انا المسؤول ؟؟ولماذا اصلا يحدث خراب لماذا لا يذهب من يحكمنا 27 سنة بالقوة والجبر ليه يصر ويتمسك كأن البلد ملك لابوه او ورثه عن جدته طيب انت بتلوم بشار ليه على خراب سوريا ؟؟ماهى نفس الفكرة بشار دكتاتور يحكم من سنوات (وهذه السنوات بالمناسبة اقل من سنوات حكم البشير ), الناس خرجت ضد بشار تطالب بالتغيير بشار اصر ورفض ان يذهب مثلما ذهب مبارك حقنا للدماء وحفاظا على البلد انت هنا بتقول الغلطان بشار لانه لم ينزل عند رغبة الناس طيب بالنسبة لخراب السودان لماذا يكون من يطالبون بالتغيير هم المخربين وليس البشير وجماعته ؟؟ حتقولى البشير لديه مؤيدين ومين قالك ان بشار ليس له مؤيدين ؟؟ حتقولى البشير جا بانتخابات هههههههه حاضر نمشيها ليك لكن تصدق نسبة نجاح بشار فى انتخاباته الصورية هى اكتر من نسبة نجاح البشير ؟؟؟؟.
رابعا .. السؤال .. انت خايف من شنو بالضبط ؟؟ ان كان على الخراب فدولتنا مع الاسف الكبير مجرد خرابة كبيرة تحمل اسم دولة ان كنت خايف على الامن فدولتك لم تشهد مثلها دولة فى التاريخ القريب عدد ضحايا ونزوح وتشرد بسبب سياسات الحكومة التى تخاف من فاتورة تغييرها ان كنت خايف على حياتك وهو انت بالجد مصدق انك عايش ؟؟ هى العيشة دى شن جنسها بالله ماهى النعاج عايشة برضها جوا زريبة بتاكل وتشرب هل هدفنا ان نأكل ونشرب فقط وحريقة فى باقى الناس ؟؟
الخوف من التغيير ربما هى سياسة زرعت فى داخلنا بسبب ديكتاتوريات شوهت عقلية المجتمع طويلا لكن الحقيقة اننا امام امر واحد ..اما ان نتغير ونصل الى حرية حقيقية وديمقراطية حقيقية ومستقبل حقيقى مكفول فيه الحقوق ومحفوظ فيه الواجبات او ان نعيش الى الابد مثل النعاج .

هشام .. كيفك يا صاحب

فعلاً دا المضحك المبكي .. أو العكس

يمكن يكونوا قاصدين بالخراب دا كافوري .. وما جاورها

فهي بلا شك جنتهم في الدنيا والتي صنعوها وبنوا طوبها من أشلاء الغلابة

دم بخير

كلام موزون ومنطقي
ودي حجة العاجز

كلام مية مية
نستأذنك نشيره

Quote: هشام .. كيفك يا صاحب فعلاً دا المضحك المبكي .. أو العكس يمكن يكونوا قاصدين بالخراب دا كافوري .. وما جاورها فهي بلا شك جنتهم في الدنيا والتي صنعوها وبنوا طوبها من أشلاء الغلابة دم بخير

هلا عمر منور والله
لا حقيقة انا بستغرب لما يقولوا ليك الخراب .. لما تسمع كلمة خراب دى بيتهيئ ليك كدا انو اققتصادنا فل وخايفين ينهار وعملتنا القوية تضعف وسبعة الف مصنع اللى شغالين انتاجهم يتوقف وصادراتنا تتعطل وووو
فى النهاية تجى تكتشف ان الخراب المقصود هى عاصمة ليست بها مجارى لتصريف المطر

Quote: كلام موزون ومنطقي ودي حجة العاجز

تحياتى صادق

Quote: كلام مية مية نستأذنك نشيره

بالتاكيد لا تحتاج الى اذن
تحياتى احمد

ابن وطني الحبيب ..

تحياتي ,,

تصدق عندي كلام كتييير دايرة اكتبو بخصوص البوست
دا وانزل بعض الصور عشان اكتفي شر الدايرين ادلة وبراهين
هههههههه .


ولي عودة .



**************
حرية سلام وعدالة
والثورة خيار الشعب .

Quote: تصدق عندي كلام كتييير دايرة اكتبو بخصوص البوست دا وانزل بعض الصور عشان اكتفي شر الدايرين ادلة وبراهين هههههههه .

ست الكل ازيك
يا ريت والله ممكن الصور تحكى لينا حاجات كتيرة جدا ما قدرنا نقولها

Quote: واحد يأشر لى على معلم او مكان او منطقة كدا نتحسر عليها انها حتتخرب

سد مروي .
إنت ناسي إننا حا نصدّر كهرباء لدول الجوار ؟...

Quote: سد مروي . إنت ناسي إننا حا نصدّر كهرباء لدول الجوار ؟...

طبعا يا معاوية الناس حاسدننا على سد مروى والحمد لله الكهرباء مستقرة والناس مبسوطة
والله بصراحة انا كل ما اقعد افكر واشوف حجم القروش اللى اتصرفت فى سد مروى دى والكوارث اللى حلت على الناس هناك بقول كان افضل يجيبوا وابروات زى بتاعت السعودية دى كانت افيد بكتير ههههههههه

Quote: عبدالوهاب علي حسب الله · 6 من الأصدقاء المشتركين 2500 ميقاواط هي كمية كهرباء كل السودان في حين أن كمية الكهرباء في مدينة الجبيل بالمملكة العربية السعودية تبلغ 20000 ميقاواط أي 8 أضعاف كهربة السودان الحبيب !!