Post: #1 Title: مجمع النور الصلاه حسب الطبقة حكومة / شعب !!!!!!!!! توجد صور Author: Mahamed Eltaze Date: 04-23-2016, 08:17 AM
السلام عليكم دأبت بالصلاه في مجمع النور الإسلامي لمجموعة من الأسباب أولها هو قرب الجامع للمنزل و الثاني هو وجود عصام احمد البشير و بالرغم من اختلافاتي معه في ارائه إلا ان الرجل قامة في العلم وله اسلوب جميل في خطابة الجمعه بالرغم من هناك نحو 3 جوامع اخري الا ان معظمها ذا خطبه معادة ومحفوظة عادة ما يقوم عمال مسجد النور بعمل كردون داخل المسجد حينما يكون ضيوف للبلاد أو ان يكون هناك من ذوات الدقون من يصلون لأي سبب داخل المسجد ولكن عند صعود الإمام المنبر حتي يسارعو في سحب ذلك الكردون - للجامع باب يدخل من جانب الصف الأول - ويتسوي الناس في الصفوف وتسد كل المساحات الفارغة بالأمس ف22/4/2016 ذهب كعادتي لأداء الصلاه وبوجود الكردون وهو أمر عادي كما أسلفت ولكني تفاجأة بوجود واحد من ناس الهدف يقف علي الكردون وهو ما ادي لإندهاشي ودخل مجموعة من الأشخاص ذوي الطغمة السياسية من الذين يحكومننا وعلي رئسهم سيد ود الباوقه ووزير الخارجيه غندور وبعض الشخصيات وبعدهم دخل عصام البشير ليصعد المنبر ولكن وقف رجل الهدف ورفض فك تلك الحواجز واستمرت الخطبة الناس في الخلف و المسجد مليان حد التدفق و الصفوف الخمسه الأول فارغة إلا من التغمه السياسية والحارسة الخاصة بهم كانت دهشتي وانخلاعي حين فرغ الإمام من الخطبه ونزل واسطف الناس حينها حدثت مشادات كلاميه مع ناس الهدف ادت في النهايه الي تقليص وانفلات بعض المصلين لي الصفين الأول و الثاني ووضع الكردون بين الصف الثاني و الثالث بعد انتهاء الصلاه حدثت بعض المشادات الكلامية مع كم من التلكيم لي وجوه احد - لا ادري اهو من الحراسه ام من التغمة السياسية - حينها تدخل عندور واحد من اتباع التغمه بالكلمات الطيبه و الحميدة و تسوية و الضع ليفرغ المأذون - اقصد رئيس الجمهورية - لبدأ إجراءات عقد قران - مايفعله كل جمعه - لإبنة غندور وانصرفت قبل بدء تلك الإجراءات من المسجد اليس هذا يعتبر تفريق عنصري داخل المسجد ياناس العاملين فيها سلفيه ما حكم الدين في هذا الأمر وفي الختام اترك لكم بعض الفيديهوات مع بعض الصور وللأسف الشديد موقعي لايسمح بتوصير الرئيس ولا كل التغمة وهذا لأنني لم اتوقع ان تكون التفرقة حتي في الصلاه علي قول عمنا في اثناء المشادة الكلامية ودمتم
Post: #2 Title: Re: مجمع النور والصلاه حسب الطبقة !!!!!!!!! توجد ص Author: Mahamed Eltaze Date: 04-23-2016, 08:54 AM Parent: #1
Post: #3 Title: Re: مجمع النور والصلاه حسب الطبقة !!!!!!!!! توجد ص Author: muntasir Date: 04-23-2016, 09:13 AM Parent: #2
مسجد الضرار
Post: #4 Title: Re: مجمع النور والصلاه حسب الطبقة !!!!!!!!! توجد ص Author: مني عمسيب Date: 04-23-2016, 10:58 AM Parent: #3
تازي سلام واحترام ..
Quote: ياناس العاملين فيها سلفيه ما حكم الدين في هذا الأمر
عليك الله يا تازي سلفية شنو البتسألهم ؟ هو في دين عشان يكونوا في سلفية ؟ كدي القي الدين السلفية ملحوقة ههههههه.
انت اسه شائف السلفية بحلو مشكلة ؟ هم لي نفسهم مشكلة للعالم اجمع ههههه . الله ينتقم منهم .
مشكور علي التنوير بما يحدث في جوامع الفشخرة !
Post: #14 Title: Re: مجمع النور والصلاه حسب الطبقة !!!!!!!!! توجد ص Author: Mahamed Eltaze Date: 04-24-2016, 07:24 AM Parent: #2
ده بيشهد علي حالة عدم الامان التي تعاني منها السلطه بيشهد علي العنصريه والتعالي عن الشعب
Post: #5 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-23-2016, 11:17 AM Parent: #1
السلام عليكم الاخ muntasir
Quote: مسجد الضرار
صدقت فيها
الأخت مني بت عمسيب
Quote: هو في دين عشان يكونوا في سلفية
ذكرتني زمان ابوي بحكي لي انو لمن يغلطو أمهم بتقول ليهم تقعدو ساكت وله انادي ابوكم يقيم فيكم الدين دا كان تأثير الفترة الحكم تعايشي علي البلد وارتباط الدين بالجلد و الضرب في الفترة ديك اها في زمنا الاغبر دا بقي إرتباط الدين بالفساد السياسي و الأخلاقي والخ من قبيله ======== بالجنبه كدا يامني عدلي مداخلتك دي نسيتي تختي الشهاده هههههههههههه
Post: #6 Title: Re: مجمع النور الصلاه حسب الطبقة حكومة / شعب !! Author: مني عمسيب Date: 04-23-2016, 11:22 AM Parent: #5
Post: #8 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-23-2016, 01:28 PM Parent: #1
.
Post: #9 Title: Re: مجمع النور الصلاه حسب الطبقة حكومة / شعب !! Author: علي دفع الله Date: 04-23-2016, 08:07 PM Parent: #8
هذا المسجد لمن اشوفو بديني احساس بأنو وكر كريه لممارسة الكضب والدجل والفنطظة الدينية ..وخصوصا هذا عالم السلطان المدعو عصام البشير .. حتى المساجد اصبحت علامة من علامات كضبهم انت الموديك ليهم شنو يا التازي
Post: #10 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-23-2016, 08:39 PM Parent: #9
الأخ علي دفع الله
Quote: انت الموديك ليهم شنو يا التازي
انا ساكن جنب المجمع في كوبر ما كافوري - حوش بانقا - عشان كدا بمشي اصلي هناك لكن كلامك صح 100% بعد ما خلصت الصلاه مشيت عدتها في جامع تاني
Post: #11 Title: Re: مجمع النور الصلاه حسب الطبقة حكومة / شعب !! Author: اميرة السيد Date: 04-23-2016, 09:16 PM Parent: #10
معقولة يا جماعة...مسجد للعبادة يكون فيه حاجز بين ناس الحكومة وعامة الشعب...والله هذا كلام عجيب لم يحدث في اي بلد في الدنيا ..ولن يحدث في اي بلد في الدنيا.. ..فعلا هذا مسجد ضرار.... ومفروض الناس القاعدين وراء هذا الحاجز ما يصلو في هذا المسجد....وما دام في مساجد تانية ممكن يمشوا يصلو هناك... ..عيب والله عييييييييييب.... وكل يوم نسمع جديد ما كان على البال من بلاوي هذا النظام القمئ.. ..ووين عدلت ونمت يا عمر!!!! ..والله يديك الصحة والعافية..
Post: #12 Title: Re: مجمع النور الصلاه حسب الطبقة حكومة / شعب !! Author: ولاء الدين حسن Date: 04-23-2016, 09:25 PM Parent: #1
إذا كان الرسول ذات نفسو كان بيصلى مع عامة الناس دون قيود او حواجز او كردونات .. فما بال هؤلاء المخاليق عاملين ليهم دور بتاع طبقية وكده جوة بيت الله كمان !!!!
Post: #13 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-23-2016, 10:02 PM Parent: #1
الاخت اميرة والله يا اميرة من الصدمة ومن الفضول بقيت عاوز اعرف اخرها شنو الاخ ولاء ديل كان لقو فرقه يفصلو اي شي ينفصل خلي صلاه هم بعرفو الله وله بعرفو الرسول =======
Post: #15 Title: Re: مجمع النور الصلاه حسب الطبقة حكومة / شعب !! Author: Mohd Ibrahim Date: 04-24-2016, 08:07 AM Parent: #13
الناس ديل متواضعيين ....انتو لو شفتو الملك حق السعودية ولا الرئيس المصري حتقولو شنو ...بعدين ذاتو في ناس كدا ماعندها موضوع تمشي تصلي مع ناس عاملين العمايل دي كلها في ودايرين( بكل براءه) ربنا يقبل منهم...
Post: #16 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-24-2016, 11:04 AM Parent: #15
الأخ Mohd Ibrahim تحيه طيبه
Quote: الناس ديل متواضعيين ....انتو لو شفتو الملك حق السعودية ولا الرئيس المصري حتقولو شنو
انا واحد من الناس بحكم دراستي في مصر صليت مع شيخ طنطاوي وكان بدرجة رئيس وزراء - شيخ الأزهر - وصليت مع حسني مبارك وهو في سلطته وصليت خلف شيخ حمد في قطر وكان الخطيب القرضاوي اها ديل كلهم كضااااااااااااب مابيعملو العملية دي ياخي أسوأ واحد كان حسني مبارك و السيسي اسي برسلو ناس بقعدو بي شكل كردون وبتفرشخو بي طريقه معينه لمن يجي داخل الجامع بي يضايرو يفتحو ليهو الكردون ويقعد في النص لكن يختو ليهو حواجز -هههههههههههههههههههههههههههههه معليش كضاااااااااااااااااااااااااااب حتي الناس بتضرب بيها المثل بتقول ليك الناس بتقيف في الصف الوزير جنب الغفير ووراهم الرئيس بعدين حسني مبارك أو السيسي و الملك ديل بقو قدوة المسلمين بعدين ديل مابحكمو ولابقولو هي لله ما لي سلطه ولا لي جاه اسي الجاه بقي في الصلاه كمان - مخيييييير الله في حكمو
Quote: بعدين ذاتو في ناس كدا ماعندها موضوع تمشي تصلي مع ناس عاملين العمايل دي كلها في ودايرين( بكل براءه) ربنا يقبل منهم
بعيدن يا استاذنا الفاضل انا مخير اصلي وين ما اصلي يعني المساجد لي الله وله المعلومة بقت قديمه انا ماعارف يحكي ان في عمر بن عبدالعزيز حلف طلاق مرتو ماتبيت في مملكتو اها بقو يشوفو طريقه يطلعوها كيف في النهايه بيتوها في الجامع - لي لأنو ملك لله وليس لي بشر فهمتها وله نجيب طبشيره وسبورة هو السؤال البجيبو من القيادة وبي عربات ونجده - مخير الله في حكمو لي الصلاه بيجي بي موكب - لي كافوري مربع 9 عشان يصلي شنووووووو.؟ انا الجامع جنب بيتنا لكن هو سيادة المأذووون دا البجيبو من القيادة لي كافوري شنو بعدين يقبلها الله وله يخليها دي شي لا بيدي ولا بيدك عشان تحكم وتتفاصح فيها
وعجبي!!!!!!!!!
Post: #17 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-24-2016, 12:50 PM Parent: #1
السلام عليكم مشيت لفيت في النت ولقيت ناس جيرانا في الأسافير كاتبين تعليق فإستلفته منهم وجبتو
Quote: داير واحد زينا كدة من الغبش ضارب قراصة وبصل تقيل وريحتو كلها عرق وبصل وتوم يخلوهو يقيف جنب علية القوم العطورهم تفوح من قوتشي واسكادا وبيربري وشانيل ؟؟؟
و الله صحي احنا معفنين و وسخانييين ورحيتنا طاقة نجي نقعد جنب الناس المتريحين ومستحمين ومعاهو حرس كمان و الله دنيا دا الفضل صحي مخيييير في حكمووو
وعجبي !!!!!!!!!!
Post: #18 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-24-2016, 02:58 PM Parent: #1
فوق ================= عشان ناس الفيس يقدرو يقرو وخسوسا عاطف يقول الله عز وجل - فَمَثَلُهُ كَمَثَلِ الْكَلْبِ إِن تَحْمِلْ عَلَيْهِ يَلْهَثْ أَوْ تَتْرُكْهُ يَلْهَث - هههههههههههههههههههههههههه
Post: #19 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-24-2016, 04:03 PM Parent: #1
فوق
Post: #20 Title: Re: مجمع النور الصلاه حسب الطبقة حكومة / شعب !! Author: Muna Khugali Date: 04-24-2016, 05:48 PM Parent: #19
بيكونوا خايفين من السكاكين
Post: #21 Title: Re: مجمع النور الصلاه حسب الطبقة حكومة / شعب !! Author: ولياب Date: 04-25-2016, 07:30 AM Parent: #20
صليت بجانب ياسر عرفات صلاة جمعة بمسجد 14 رمضان في بغداد في زمن مضى ولم نرى حواجز ولا متاريس ، وهذه الحواجز تدل على :-1/ علوهم وتكبرهم على بقية الخلق .2/ تميزهم بوظائفهم العليا .3/الإحساس بعدم الأمان.4/ حبهم لأنفسهم وحجزهم للصفوف الأمامية حتى أن اتى منهم بعد صعود الامام للمنبر .رأي :-حركة ما ظريفة .فتوى :لا أفتي بل لله الأمر .
Post: #22 Title: Re: مجمع النور الصلاه حسب الطبقة حكومة / شعب !! Author: Hatim Alhwary Date: 04-26-2016, 06:41 AM Parent: #21
Quote: بيكونوا خايفين من السكاكين
بالظبط كده هم خايفين من أبو لؤلؤة السوداني
......
في شاهد على العصر الحلقة (2) الترابي قال بان السودانيين فيهم بداوة ولم يخضعوا لفرعون وجنوده قالها بخبث لاحمد منصور...عندما جاءت الانقاذ وجدث السودانيين سواسية لافرق بين ابن الوزير وابن الغفير كلهم يدرسون في نفس المدرسة ويصلون في نفس المسجد . الحركة الاسلامية درست الشعب السوداني جيدا وجاءت بمخططاتها ودراساتها جاهزة عند الانقلاب...ارتكبوا مجزرة في الاجتماعي السوداني.
الترابي عاش ومات وهو يظن انه عبقري زمانه في السودان...ولا تمر فرصة حتى يذكرنا هازئا بانه كان "اول" الشهادة السودانية...عندما يكون "الذكاء" مصحوبا بغرور وخيلاء...تكون النتائج وخيمة...مات "اول" السودان حسرة وكمد...وسلطانه المرتجى تربع عليه" طيش" العساكر
Post: #24 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-26-2016, 09:03 AM Parent: #21
الأخ ولياب تحيه طيبه ليك
Quote: رأي :-
حركة ما ظريفة .
فتوى :
لا أفتي بل لله الأمر .
تذكرت أعنية لي ماذن حامد لأقاضيهم ذهبت أشكو لقاضيهم، فوجدت أني خاسر، ورجعت حائر الدين لعبتهم فهم تجاره هذا الدين
Post: #23 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-26-2016, 08:04 AM Parent: #20
الأخت مني خوجلي لعلك بخير
Quote: بيكونوا خايفين من السكاكين
اكيد خايفين وعلي قول رسول قيصر لي عمر حكمت وعدلت فنمت يا عمر وحكمنا وظلمنا فسهرنا اها دا الحال الهم فيهو اسي
Post: #25 Title: Re: مجمع النور الصلاه حسب الطبقة حكومة / شعب !! Author: أحمد طراوه Date: 04-26-2016, 09:24 AM Parent: #23
UP
.. اخي محمد التازي
ادعوا لهم ، و اعفو عنهم ، واهجر مسجدهم هذا هجرا جميلا ، ثق بأنك ستعود و تصلي فيهو يوم يرجع و يبقى مسجد اهل الفطرة السليمة و كمان برضو تعمل فيهو عقد و لدك و بنتك و كفى بالله وكيلا
بالله عصام البشير ، ساب الدفاع عن فطرة الدين السليمة ، و بقى environmentalist بدافع عن البيئة .. ما سمع بالإمام سعيد بن جبير كان بقول شنو في وش الحجاج بن يوسف
* المعازل الطبقية - الامنية داخل المساجد .. حقا ماتت التقوى و التواضع ، و مات الدين القويم يوم موت سفيان الثوري ، و يوم موت محمد النفس الذكية حفيد الامام علي
.. طيب لو البشير و غندور خايفين هكذا على سلامتهم الشخصية ، شنو الدخلم عاصفة الحزم لن يغفر الحوثيين القحطانيبن لحكام الخرطوم
Post: #26 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-26-2016, 10:29 AM Parent: #25
الأخ أحمد طراوه
Quote: ادعوا لهم ، و اعفو عنهم ، واهجر مسجدهم هذا هجرا جميلا
بالطريقة دي حنخلي ليهم البلد كلها وده يستحيل نحنا قاعدين في البلد دي زي مابيقولو لحدي مانطفي النور ونطلع
Quote: حقا ماتت التقوى و التواضع ، و مات الدين القويم يوم موت سفيان الثوري ، و يوم موت محمد النفس الذكية حفيد الامام علي
لايمكن المقارنة بين ناس في مثل هذه القمم وبين عصام احمد البشير لاتوجد حتي ادني مقارنة الفرق الوحيد هو جيد في الإلقاء وله اسلوب خطابة جميل
Quote: طيب لو البشير و غندور خايفين هكذا على سلامتهم الشخصية ، شنو الدخلم عاصفة الحزم لن يغفر الحوثيين القحطانيبن لحكام الخرطوم
الخوف كل الخوف من تحول الأخوة اليمنين من كره لي الحكومة لي كره لي السودانين عموما وتبقي هنا المشكله كما حصلت في ليبيا في بعض المناطق الليبيه ولك وافر التقدير
Post: #27 Title: Re: مجمع النور الصلاه حسب الطبقة حكومة / شعب !! Author: اميرة السيد Date: 04-26-2016, 10:37 AM Parent: #26
انا اظن ولا اجزم...بان الناس ديل الماكلين قراصة وبصل وتوم وريحتهم ريحة عرق هم اليكونوا متريحين بالقوتشي والاسكادا والشانيل يوم تدنو الشمس من الرؤوس ويوم لا ظل الا ظله...اما هؤلاء المنافقين الذين يتاجرون بالدين ويعملون الحواجز في المساجد فهم ان يستغيثو في ذلك اليوم الساخن فان يغاثو الا بماء كالمهل يشوي الزجوه ....
Post: #29 Title: Re: مجمع النور الصلاه حسب الطبقة حكومة / شعب !! Author: ابوحراز Date: 04-26-2016, 12:01 PM Parent: #27
صليت مرة في المدينة المنورة بجوار باكستاني ولم اعرفه بعد شوية قام واحد باكستاني بعد نهاية الصلاة بيهتف ضد جاري في الصلاة فجأة تدخلت الشرطة وابعدوا الرجل الذي يهتف ليتضح لي انني اصلي بجوار نواز شريف رئيس اقليم البنجاب سابقا ورئيس الوزراء الباكستاني لاحقاً
لكن ظريفة حكاية الصلاة حسب الطبقة يعني حكومة تصلي قداااام ناس قريعتي راحت يصلون في الخلف
اها السؤال الذي يفرض نفسه جماعة الصفوف الأمامية صلوا ركعتين انتوا برضو صليتوا ركعتين ؟؟؟؟
أكيد بيكون في واحد من شركة الهدف حارس الجزم والمراكيب !!!!
Post: #30 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-26-2016, 12:06 PM Parent: #29
الأخ ابو حراز
Quote: أكيد بيكون في واحد من شركة الهدف حارس الجزم والمراكيب !!!!
يا راجل هم فرزو الصلاه مراكيب شنو وجزم شنو دي بقي قدام بتكون في المدخل حقهم براهم من غير باب الناس الوري البيدخلو بيهو الرجرجه و الدهماء - ناس الشعب ساكت ناس اللوج ديل - اللوج دي لي الناس الحضرو السنما في البلد دي زمان كان فيها لوج وشعب اكيد لي جزمهم و وضاياتهم براهم عشان ما يعادوهم ناس قريعتي راحت الزينا ديل
Post: #28 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-26-2016, 11:55 AM Parent: #1
الأخت أميرة السيد
Quote: الناس ديل الماكلين قراصة وبصل وتوم وريحتهم ريحة عرق هم اليكونوا متريحين بالقوتشي والاسكادا والشانيل يوم تدنو الشمس من الرؤوس
أكيد يا استاذة اميرة ديل لا أكلو حق زول ولا ظلمو زول ولا في زمتهم كانت بلد بي حاله
Post: #31 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-26-2016, 07:42 PM Parent: #1
Up
Post: #32 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-27-2016, 07:43 AM Parent: #1
كتب الأخ Ahmad Beatley من نافذة الفيس
Quote: السودانيين يستاهلوا أكثر من كدة.... ديل بيصلوا وراء شواذ رافعين راية...يعني بقت على الدرابزين
و الله يا أحمد السودانين ما بستاهلو إلا كل خير فينا الشهامة و الرجالة و الخلق الجميل بس الله غالب
Post: #33 Title: Re: مجمع النور الصلاه حسب الطبقة حكومة / شعب !! Author: اميرة السيد Date: 04-27-2016, 04:05 PM Parent: #32
مش كان يا التازي تخطف رجلك وتمشي المسجد احتمال يكون في واحد من علية القوم وكبرائه ومن الذين يجلسون في اللوج ، يكون قرأ الكلام ده وشعر بالخجل وامر بازالة هذا الحاجز المشين الذي لا يشبه السودانيين في أي شئ.. والله يديك الصحة والعافية
Post: #34 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-27-2016, 07:22 PM Parent: #33
استاذة اميرة المسجد لايقيم هذا الامر غير في صلاة الجمعه وكما اوضحت سابقا حين يصعد الامام المنبر تزال هذه الحواجز وتصف الصفوف فاللمسجد باب من قبل الصف الاول يدخل به ناس اللوج وهذا ما تعود عليه الناس ولكن ان تظل الحواجز حتي انتهاء الخطبه واقامة الصلاه هو ما ادي لحدوث مشادات كلاميه معهم حتي بعد انتهاء الصلاه
Post: #35 Title: Re: مجمع النور الصلاه حسب الطبقة حكومة / شعب !! Author: اميرة السيد Date: 04-27-2016, 07:30 PM Parent: #34
شكرا للتوضيح.. ولكن برضه ما مفروض يكون في باب مخصص لناس اللوج والصفوف الامامية فهذا المسجد ليس بيت احدهم ولكن بيت الله ويجب ان تكون جميع الابواب مفتوحة للجميع .... والله يديك الصحة والعافية
Post: #36 Title: Re: مجمع النور الصلاه حسب الطبقة حكومة / شعب !! Author: Mahamed Eltaze Date: 04-27-2016, 07:40 PM Parent: #35
الأخت اميرة زيادة للتوضيح هو ليس باب وحسب وانما خلف الباب توجد استراحه وتوجد بها حمامات خاصه و وضايات خاصه و اشياء اخري
