أحيانا الأطباء العموميين

07:17 AM April, 20 2016

سودانيز اون لاين
حمد عبد الغفار عمر-
مكتبتى
رابط مختصر

احترام للجميع لكن أحيانا الأطباء العموميين بتعبوا معاك وبوصلوك لنتيجة ربما لن تخطر على الاستشاري
هل من متفق

سوف أحكي تجربتي بعد حين

أولا أنا علماني جدا ( أي على قناعة إنو من يزيد عليك بقراءة حرف فهو أعلم منك ) وفي نفس الوقت اعتقد جازما بدور الممارسة (الخبرة) في الحفاظ على العلم النظري وسبر أغواره وتنزيلها على أرض الواقع .

المهم
لي زي شهر كدا أعاني من إرهاق وألم في العضلات (شد) مصحوب بعدم تركيز يتزايد يوما بعد يوم (بذلت مجهود كبير في ذلك الشهر)
ذهبت لإستشاري اكتفى فقط بعمل أشعة للنخاع الشوكي والأيدي (الرسغ) وأعطاني بعض المسكنات.

اختفت آلام العضلات بعض الشيء مع عدم تحسن ملموس في التركيز (بيني وبين نفسي قلت دا زهايمر مبكر ول شنو) .

قبل أسبوع تفاقم عدم التركيز حتى صار النسيان صفة مميزة وبدأت أحس بضغوط .
في مستوصف مغمور قريب من البيت قلت أشوف الحاصل عندهم ، مشيت سألت بتاع الاستقبال قلت ليهو عندكم شنو من دكاترة (ضحك) قال في طبيب عمومي شاطر (مصري) ورغم تحفظي أحيانا على الكادر الطبي المصري إلا أني استبشرت خيرا وقلت أشوفو لو زول في سن معقولة بواصل معاه
أول حاجة عملها قاس الضغط لقاه مرتفع قليلا ( لاول مرة من الشد) طمني شوية وبعد 20 دقيقه قاسو تاني لقاه في المعدل الطبيعي - عمل صورة للدم لقاه كلو في المعدل الأمثل ما عدا انزيمات الكبد مرتفعة هنا توقف وقال لي لازم تعمل صورة أشعة للبطن وفحص وظائف الكبد - طلع في ارتفاع كبير في واحد من انزيمات الكبد ووجود دهون على الكبد
صرف لي حبوب تحسن وظائف الكبد لمدة شهر لحدي الآن بلعت 4 حبات، الشبكة رجعت وعاد التركيز في التحسن كل يوم أكثر من التاني وبدأت الآلام تختفي وعاد النشاط.
من الاسئلة المهمة قال لي بتستخدم شنو في زيوت الطبخ قلت ليهو ما ملتزم بزيت معين ، قال لي هل تستخدم زيت النخيل قلت ليهو دا آخر زيت بستخدم فيهو لمدة شهر وأول مرة استخدمو - قال لي بس تمشي تكبو في الزبالة وتتوقف نهائيا عنو وقد كان وحلفت تاني مافي غير زيت مازولا .
ما يستفاد إنو مرات الطبيب العمومي لو كانت عندو الفراسة مع الممارسة المهنية المكثفة ممكن يكون مفيد أكثر من استشاري وممكن ينفذ للب المشكلة بسبب عمله العمومي في حالات مختلفة تشمل جميع التخصصات. وهو في الحقيقة كفوء علميا لممارسة المهنة لا ينقصه شيئا.
تانيا لا بد من التخلص من العقد فالطبيب الكويس ممكن يكون من أي جنسية والمسألة توفيق من عند الله والحمد لله.

اخيرا أي زول شارب بلح (أو بلحين)
لو شعر بأي من الأعراض دي أنا بنصحو يمشي يعمل فحص وظائف الكبد
ونسأل الله الصحة للجميع

الأخوة أطباء المنبر

هل من إضافة أو احتمالات أخرى على كلام الطبيب دا

أنا صنديد جدا مع الأمراض فأي كلام مفيد ما بخوفني

كلامك سليم وبعدين مرات الاستشاريين بكونوا مزحوميين شديد وما بدوا المريض زمن كافي, في واحدين بركزوا على القروش شديد. أي شغل في الدنيا بحتاج إلي تركيز.

اخي حمد
سلام

الثابت علميا و من خلال دراسات اجراها استشاريون و اساتذة ان المستوى الادنى من الخدمة الطبية
القائم عليها اطباء عموميون يمكنهم ان يتوصلوا للتشخيص السليم لاكثر الحالات التي تمر عليهم باخذ التاريخ المرضي و الكشف السريري
مع فحوصات روتينية
الحوجة لمستوى الاستشاري في الحالات المعقدة و كثير منها لا يوجد لها علاج شافي او في اجراء عمليات جراحية
او فحوصات معقدة مثل المناظير
معظم الحالات التي يعاينونها هي رزق ساهل يسوقه الله لهم و لا تحتاج لخبراته (اللهم لا حسد)
بصراحة مجرد قلق كبكبة ساي بتخلينا نمشي للاستشاري او الاخصائي فنضيع وقتهم و فلوسنا و كان يمكن في المركز الصحي المجاور للبيت
انهاء الامر مجانا او بتراب فلوس و كمان مرات نفتري عليهو شوية
عندما اسافر فان وصيتي لناس البيت انه في حالة اي شكوى فان وجهتهم للمركز الصحي لا غيره

اذن فلتكن القاعدة: ليس احيانا بل دائما للطبيب العمومي
و هو لن يقصر في توجيهنا للمستوى الاعلى و اي مستوى و لماذا و متى
الطبيب العمومي كما يتم تدريبه على تشخيص و معالجة ما يليه من حالات فانه يتم تدريبه ايضا على اي الحالات تحتاج للتحويل
و سوف يقصر عليكم المشوار فانه يحولكم بتقرير يضئ الحالة امام الاخصائي و يوفر الوقت

مرحب عثمان

Quote: لامك سليم وبعدين مرات الاستشاريين بكونوا مزحوميين شديد وما بدوا المريض زمن كافي, في واحدين بركزوا على القروش شديد. أي شغل في الدنيا بحتاج إلي تركيز.

هي دي المشكلة

هل صدق لو قلت ليك مرة مشيت لإستشاري مصري مع بتي الصغيرة أثناء ما بحكي ليهو في حالتها كان شغال بالواتسب لما انتبهت لحكايتو وقفت وقعدت أعاين فيهو قال لي ليه وقفت قلت ليهو انت ما شغال بي انا ما بحكي ليك في نكتة أنا بحكي ليك عن حالة مرضية ولازم تكون مركز قال لي أنا سامعك قلت ليهو أنا خلصت قال لي قول تاني من جديد
حكيت ليهو بس بعد ما انتهيت كان لازم ألصق ليهو قلت ليهو لوما بتحترم الناس على الأقل احترم مهنتك

هلا بيك د. عوض

Quote: اذن فلتكن القاعدة: ليس احيانا بل دائما للطبيب العمومي و هو لن يقصر في توجيهنا للمستوى الاعلى و اي مستوى و لماذا و متى الطبيب العمومي كما يتم تدريبه على تشخيص و معالجة ما يليه من حالات فانه يتم تدريبه ايضا على اي الحالات تحتاج للتحويل و سوف يقصر عليكم المشوار فانه يحولكم بتقرير يضئ الحالة امام الاخصائي و يوفر الوقت

فعلا دا المفروض يحصل ما أعتقد كل الأمراض محتاجة لإستشاري وصدقا لكلامك دا الراجل دا قال لي بعد أسبوع - 10 أيام لو ما شعرت بتحسن واضح تعال أحولك لإستشاري وشكلي ما حأحتاج الحمد لله

أنا دي التجربة الرابعة لي مع الإطباء في السعودية 2 عموميين و2 استشاريين النتائج مع العموميين كانت كافية جدا للعلاج . مشكلة تانية الإستشاري لما يشوف بطاقة التأمين بطلب منك كل الكشوفات ذات العلاقة أو غير ذات العلاقة واحينا يسبب ليك مشاكل نفسية.