عاجل لأهل النخوه والكرم والإنسانيه فى بورتسودان ..او أى واحد بره عندو اهل فى بورتسودان ...!!!

10:41 AM April, 15 2016

سودانيز اون لاين
ملهم كردفان-الإسكندريه
مكتبتى
رابط مختصر

شوفوا الحاصل ده لو صاح حلو المشكله دى وجزاكم الله خير
....................................
‫#‏ركزو‬ معاى كلكم فى القصة دى ...!

رغم انى مامن عشاق رواية قصص المستشفيات لكن حاحكى قصة تظل عالقة فى ذهنى المهنى منذ اللحظة دى وحتى الموت ...

حدث قبل ساعة من الان ...
ومن دون مصطلحات طبية ...

اليوم 14.4.2016
مستشفى بورتسودان التعليمى
حوادث الجراحة
نبطشية وحدة م.عوض
جانا طفل مضروب بى ‫#‏توكتك‬ (حاجة زى الركشة ) راسو مفتوح وخيطناهو 3غرز المشكلة انو ماواعى وجاتو تشنجات
عملنا كلو ماهو ممكن بس المشكلة محتاجين لى حاجة اسمها
‫#‏اشعة‬ مقطعية عشان نقدر نفهم الحاصل جوة الراس ده شنو فى نزيف ول مافى ..الاشعة دى تكلفتا 400ج \
ومافى فى المستشفى طبعا ...موجوده فى مركز خاص بره وبقيفو ليها بالصف ..(الرغيف ..الصراف الالى ...البنزين ..الخ)
طيب عشان هى حالة مستعجلة لازم امشى انا واكلمم انو الحالة مستعجلة عشان يعملوها هسى وقمنا ركبنا ركشة (ركشة مافى اسعاف ) انا وابو الولد
ودخلنا المركز x قمت قلت ليهو دايرين الاشعة هسى ...قال لى الدكتور تماااام ..دخلو الطفل ..ودخلناهو غرفة الاشعة ..
دقو ليهو تلفون ملخصو انو اهل العيان اللى هو ابوهو المعاى فى الركشة مادفع القروش400ج
قلت ليهو اعملا وهو حيمشى يدفع وبدء يعملا وانتهت وطلعت واتختت فى ظرف
ولسى ابو العيان مادفع ...قلت للدكتور اه الاشعة وينا قال لى مادفعو القروش ...مشيت للدكتور yالاخصائى الكبير ..
اتكلم معاهو قام د.x دق تلفون لى د.y ورد y.بى انو لو جاتنى الصور بشخصا وبطلعا ليكم (فهمتو حاجة .) يعنى ماتجيبا لى يا x لو مادفعو ..
مشيت لى x قلت ليهو انا مامن اهل الطفل انا الطبيب النبطشى ورينى بس فى نزيف ول لا ...
قال لى :الفايده شنووو
ماانت الحتعالجو ...
هى الصورة شنو ماده غرضا ...
حنست والله ابى يورينى ...
قلت ليهو ورينى وانا بجبرم يدفعو ومابوريهم بس عشان نبدء العلاج ....برضو رفض يورينى ...
وهى طالعة وجاهزة وماسكا فى ظرف ...

‫#‏يحدث‬ الان ..
طفل فى حادث غائب عن الوعى يتشنج
ولا يمتلك 400ج

ماالحكمة من ذلك ...؟
اشعر بانى موسى مع الخضر
ولم اعد اطيق صبرا ...

كم خجلت اليوم من كونى طبيبا .....

د/ فائز وداعة الله

من نبهنى لهذه الحاله دكتور أسامه الإمام
لو أى واحد من ناس بورتسودان عندو إمكانيه إنو يدفع الأربعميه دى
فقد إلتزم أسامه الإمام بتحوليها فورا بعد أن يحلو هذه المشكله الطارئه
..............
صوره لصفحة الموضوع فى الفيس بوك ناشر الخبر

صديقى المسرحى الاديب
محمد عبد الله حرسم

شوف الحاصل ده بالله ..اجرى اتصالاتك وورينا الحاصل

وإن شاء الله مانعدمك ياحبيبنا

https://www.facebook.com/naffagnews/؟fref=tsصفحة ناشر الخبر فى الفيس بوك أضغط هنا

كتر خيرك يا ملهم ياخ
ولا عدمناك

والله حاجة تكسف وتعر ان صح ما ذكر

لا حول ولا قوة الا بالله العلي العظيم

يديك العافيه يا دكتور أسامه ..وانا منتظر من مدير الصفحه يدينى المعلومات دى

لم يوافينى صاحب الصفحه بأى معلومات الى الآن

وسيتم قفل هذا البوست مع أسفى للجميع عن التسبب فى توترهم

ولو فى مستجدات أكيد حاجيبها ....

احترامى