هل يخق لي ان أقاضي الخطوط القطرية بالسودان بموجب هذا؟

01:11 PM April, 12 2016

سودانيز اون لاين
احمد الشيخ-الدوحة - قطر
مكتبتى
رابط مختصر

كان لدي جواز اخضر قديم
قمت بالسفارة السودانية بالدوحة باصدار جواز الكتروني جديد في شهر يناير الماضي
سافرت في شهر مارس الماضي الى اثيوبيا ومنها الى الخرطوم
عندما اردت العودة من الخرطوم للدوحة قمت بشراء تذكرة من الخطوط القطرية بالخرطوم للدوحة
طالبتني موظفة الخطوط بالجواز والبطاقة الشخصية القطرية
قمت بابراز المطلوب وبناء عليه تم اصدار التذكرة
في اليوم المحدد قمت بتوديع الاهل والتوجه للمطار
في مطار الخرطوم وامام موظفة الخطوط القطرية طالبتني بابراز الجواز والبطاقة
قمت بابرازهما
فرفضت موظفة الخطوط منحي بطاقة الصعود
بحجة ان رقم الجواز في البطاقة الشخصية مخالف لرقم الجواز الجديد
وطالبتني بابراز الجواز القديم والذي كان حينها في الدوحة
قلت لها ان هذا هو الجواز الذي خرجت به من الدوحة وبه تأشيرة الخروج القطرية
وهو نفس الجواز الذي يخولني الدخول للدوحة ما دمت احمل البطاقة الشخصية القطرية
لم تقتنع الموظفة بكلامي وطلبت مني التوجه لمشرفة الشفت
توجهت لها بعد ان نادتها الموظفة المعنية واخبرتها بالكيس
رفضت المشرفة ايضا اصدار البطاقة الا بعد ابراز الجواز القديم
بعد حجة ويلة معها رفضت رفضا باتا اصدار بطاقة الصعود الا بعد ابراز الجواز القديم
كما رفضت الختم على التذكرة بأني حضرت للمطار وهي التي منعتني
بناء عليه ومكره اخاك لا بطل رجعت من المطار مرة اخرى
وقمت بالتواصل مع الاسرة بالدوحة لارسال الجواز القديم للخرطوم على الرحلة القادمة
وصل الجواز القديم في اليوم التالي وتوجهت للخطوط مرة اخرى لتغيير الحجز
وتم تغريمي مبلغ 450 جنيه نظير تغغير الحجز بسبب عدم موافقة الوظفة في المطار على ختم التذكرة
دفعت الغرامة وغيرت الحجز لليوم التالي
في اليوم التالي ذهبت للمطار ومعي الجوازين القديم والجديد
قمت باخفاء الجواز القديم وابرزت الجديد فقط دون الاشارة للكيس
كانت المفاجأة ان الموظفة اصدرت بطاقة الصعود دون ان تطالني بالجواز القديم
المشكلة ان الشفت كان مختلفا ولم اجد الموظفة ولا المشرفة التي منعتني في المرة السابقة
سافرت ووصلت للدوحة ولم يطالبني موظف الجوازات القطري باي جواز سابق
هل يحق لي بموجب ما سبق مقاضاة الخطوط القطرية بسبب تأخيري يومين ودفعي للغرامة ام لا

.
الأخ احمد الشيخ .. سلامات
حتما سيأتيك الإخوة القانونيين بالرأي القانوني ,, ومع
ذلك أرجو أن تعمل على نشر الحالة في الصحف ( السودانية )
لإحداث رأي عام حول فوضى شركات الطيران دون رقيب
أو حسيب..
توكيل محامي مهم .. ولكن أخشى أن تتضامن الأخيرة مع الأولى
لتقول إنها طالبتك بإبراز الجواز القديم أيضاً وقد اطلعت عليه قبل
أن تمنحك بطاقة الصعود ..... ممكن يكذبوا لحماية بعضهن .
.
عموما حمدلله على السلامة

Quote: .Øرحلة الخطوط الجوية القطرية القادمة من الدوحة ... الاحد 10/4/2016

وهذا ما جاء في بوست محمد الحسن محمد ( طب العصب ) وما حوى
من فضيحة في عملية إنزال مريضة من الطائرة .
هنالك استهتار من القطرية برحلة الخرطوم .. وإثارة ذلك في الصحف
سيردعها حتما .
،
الود كله ود الشيخ

سلام،

غالباً المسألة لها علاقة بسلطات مطار الخرطوم، فلي زميل تعرض لموقف مشابه غير بسببه تذكرته إلى فلاي دبي فلم يشفع له ذلك.
المختلف في الحالة التي ذكرتها أن هناك اختلاف في تاريخ الميلاد بين الموجود في الجواز الجديد والبطاقة القطرية لأن البطاقة صدرت حسب المعلومات الموجودة بالجواز القديم.

سلامات استاذنا ابو الريش
الامر حسب ما عللته الموظفة بانه بناء على تعليمات الجوازات القطرية
في حين انه لا في الخروج ولا في الدخول لم تطالبني الجوازات القطرية بالجواز القديم
مع علمهم بوجوده من خلال السيستم
الحالة التي ذكرتها فعلا مختلفة لان هناك اختلافا في البيانات الشخصية

الأخ أحمد الشيخ
سلام وتحايا

ماعاوز أحبطك لكن الاجراء الذي أتبعتة الموظفة في الرحلة الاولي والتي رفضت أن تعطيك
بطاقة الصعود للطائرة فهي علي حق مادام ظهر لها أي خلل ولو بسيط بين اختلاف رقم الجواز
الموجود علي البطاقة والجواز الجديد وانت في تلك اللحظة أنت لم تبرز الجواز القديم بحكم وجوده
بالدوحة . الموظفة عاوزا تحمي نفسها أي خطأ ولو بسيط سوف تفقد وظيفتها . أما موظفة الخطوط
في الرحلة الثانية ربما لم تلاحظ لهذا الاختلاف او ربما جديدة في هذا العمل . خطوط الطيران أصبحت
تشدد في كل شيء خاصة بعد ظهور الارهاب واختطاف الطائرات . أي موظف قاعد في الكاونتر بيكون
مفتح عيونو لاقصي مدي تتخيلو .

مقدر جدا حجم الضرر الذي وقعت فية وغضبك لكن اتعوض الله في القروش الدفعتها للغرامة وحاول
جاهدا أما أن يكون الجواز القديم مرفق مع الجديد في كل سفرياتك أو تغيير البطاقة برقم الجواز الجديد .

تحياتي اخي الكريم محمد
وشكرا للدعم
كان من المفترض ان اقوم بتوثيق الحالة في حينها وامام مسؤولي القطرية في الخرطوم
انا مقتنع تماما ان الامر هناك يخضع للاهواء والمزاج الشخصي للموظف/ة في حينه
عندما عدت للمنزل اخبرني احدهم اني اذا رجعت للصف وقمت بتغيير الموظفة لكنت سافرت في حينها
لان لكل موظف رايه الشخصي في الاجراءات ولا توجد لوائح حاكمة منظمة
القطرية من افضل الخطوط التي سافرت عليها
ولكن للاسف موظفوها في السودان يسيئون لسمعتها بمثل هذه التصرفات
تخيل ان مشرفة الشفت عللت رفضها با لديهم خطابا من الجوازات القطرية بذلك
في حين انه عند خروجي من الدوحة علم موظف الجوازات القطري بوجود جواز سابق لي من خلا السيستم
وقام بتعديل رقم الجواز الجديد فيه

ودالشيخ وشركاه
لا .. ما بحق ليك
وعشان احبطك لو حاولت تشتكي او ترفع دعوى .. حتخسر كتير جدا
اول شىء الموظفة قامت بواجبها على اكمل وجه
وسيتم مكافأتها او ترقيتها .. لانها انتبهت الى اختلاف الرقم ودا يحس لها
وبرضو المشرفة حيشيدوا بيها
اما انت (كعيت) 450 الف .. وبعد دا ممكن يغرموك بانك سببت ازعاج وتاخير
واشعت نوع من الفوضى والبلبلة وسط المسافرين واشانة السمعة
وماتنسى القطرية معظم القسم القانني حقهم مصريين .. يعني ختتغرم ختتغرم
وبرضو نسيانك لجوازك القديم .. دا خطأك الفادح

تحياتي اخي احمد
انا ما نسيت الجواز انا اتعمدت ما اشيله لانه ما شفت ليه حوجة
ما كويس الما شرطته؟
لانه النظام الجديد ما فيه لصق اقامة في الجواز
وفي نفس الوقت لو كان ليه حوجة ما كانوا خلوني طلعت بدونه
خصوصا اني ما كنت مسافر لبلدي في البداية

الخطوط القطرية في قطر محترمة جدا
مرة مشيت اوصل صاحبي المطار كان حاجز عليها
الايام ديك كان في ازمة "فضيحة بالاحرى" في وقود الطائرات في الخرطوم
وعليه كانت الطيارة بتضطر تعبي "التنك" من الدوحة
ونسبة لزيادة الوزن اضطروا يشيلوا نص الركاب بس والباقين يأجلوهم للرحلة البعدها
صاحبي كان نصيبه من المؤجلين
بدون اي كلام ولا مطالبة جابوا ليهم باصات ودوه مع زملاؤه لفندق تابع ليهم مع كوبون بقيمة ميتين ريال لكل راكب
مع انه التأخير كان لمدة تمنية ساعات بس
وفوق كدا ادو كل راكب كوبون بقيمة ميتين دولار تعويض يصرفه في الخرطوم
وقد كان
مع انه الاشكال ما منهم من مطار الخرطوم

سلامات وتحياتي اخي الكريم عادل
لا يوجد احباط ولا حاجة احنا بنحترم القانون والمنطق
والمنطق بقول انه في اللحظة القمت فيها بشراء التذكرة من الخطوط مفترض تتم مراجعة البيانات من موظف الخطوط في الوكالة
واذا في اي خلل او نقص يتم التنبيه عليه في ساعته
مش يتم تاجيل المراجعة لحين دخول المطار
لانه في الوكالة تمت مطالبتي بابراز البطاقة وفيها رقم الجواز القديم
لو حصل دا كان وفر علي كثير من الوقت والجهد والمال
لاني ما خسرت بس مبلغ الغرامة ولكن اضعاف هذا المبلغ
بالاضافة للضرر النفسي والوظيفي

اتوقع اذا في فعلا توجيه من الجوازات القطرية زي ما قالت الموظفة انه يكون
في حالة الشخص سافر بجواز قديم وغير الجواز في الخرطوم
لكن ما دام طلع بجواز وعاوز يرجع بنفس الجواز فالتوجيه ما متعلق بيه
تقديري وشكري للمداخلة

أخي أحمد... موظفة القطرية الأولى غلطانة وما فاهمة شغلها...
البطاقة الشخصية القطرية فيها صورتك و أسمك الكامل...الجواز الجديد برضو
فيها كل بياناتك مع الصورة و مذكور فيها تاريخ أصدار الجواز

يعني ما عندها أي حق لاهي و لا مشرفة الشفت يمنعوك تركب الطيارة.

مشكلة بعض موظفين القطرية في مطار الخرطوم ما فاهمين شغلهم و غير مؤهلين أصلا يشتغلو في خطوط لها سمعتها العالمية
و بيحاولو بكل الطرق تعقيد الأمور...

أنصحك أنك تكتب تقرير مفصل بلحادثة و ترفق فيها كل الأوراق الثبوتية و توديها ليهم بي نفسك في المكتب الرئيسي حقهم اللي قريب من برج التايوتا.

و أنا متأكد أن شكوتك حتصل للمسؤلين في القطرية و حيتخذ فيها أجراء.

بلتوفيق

شكرا اخي شريف
انا برضه قلت كدا
اكيد في خطأ وعدم فهم من الموظفات للاجراءات
لانهم ما حيكونوا فاهمين الاجراءات اكتر من ضباط الجوازات القطريين
كلامك سمح
معاي التذكرة الاولى والتانية حارفق معاهم تقرير مفصل بالحادثة واوديه ليهم
والله ما داير اي تعويض مع اني اتضررت ماديا ومعنويا
لكن على الاقل يتم توجيه الموظفين في الخرطوم بالاجراءات الصحيحة
عشان ما يتكرر مع مسافرين تانين
خصوصا انه الناس بترجع في آخر يوم اجازة واي تأخير قد يسبب ليهم اشكالات في عملهم
الف شكر على الدعم

Quote: أخي أحمد... موظفة القطرية الأولى غلطانة وما فاهمة شغلها... البطاقة الشخصية القطرية فيها صورتك و أسمك الكامل...الجواز الجديد برضو فيها كل بياناتك مع الصورة و مذكور فيها تاريخ أصدار الجواز يعني ما عندها أي حق لاهي و لا مشرفة الشفت يمنعوك تركب الطيارة.

الاخ احمد .. سلام ..

وانا اوافق راي الاخ سيف المقتبس اعلاه ..
كما ان الجواز الجديد ... يجب ان توجد به ملاحظة انك كنت تحمل جواز سفر قديم برقم كذا ...
ومختوم بختم السفارة ( وهذا المفترض ) ... ولا داعي لحمل الجواز القديم ...
ولو كان جوازك الالكتروني به اشارة لجوازك القديم ورقمه ما كنت وقعت في هذا الاشكال ..

تحياتي

عالم بطااله ...

اخى أحمد السلام عليكم وألف حمداً لله على السلامة..وربنا يعوضك.....

Quote: ماعاوز أحبطك لكن الاجراء الذي أتبعتة الموظفة في الرحلة الاولي والتي رفضت أن تعطيك بطاقة الصعود للطائرة فهي علي حق مادام ظهر لها أي خلل ولو بسيط بين اختلاف رقم الجواز الموجود علي البطاقة والجواز الجديد وانت في تلك اللحظة أنت لم تبرز الجواز القديم بحكم وجوده بالدوحة . الموظفة عاوزا تحمي نفسها أي خطأ ولو بسيط سوف تفقد وظيفتها . أما موظفة الخطوط في الرحلة الثانية ربما لم تلاحظ لهذا الاختلاف او ربما جديدة في هذا العمل . خطوط الطيران أصبحت تشدد في كل شيء خاصة بعد ظهور الارهاب واختطاف الطائرات . أي موظف قاعد في الكاونتر بيكون مفتح عيونو لاقصي مدي تتخيلو .

كلام ألأخ/عادل صحيح الموظفة حاولت تحمى نفسها وشكلها دقيقة فى عملها..وخافت من أن يرجعوك من قطر وتدفع هى الغرامة..لأن هناك غرامة بدفعه الموظف لو تسبب فى أى خطأ من جانبه.

والشىء العايز أضيفو إن هذا ألأجراء إجراء الجوازات وليس موظف الكاونتر بنسبة كبيرة....يعنى هى مادام تأكدت إنك مقيم نظامى وجوازك سارى المفعول وتذكرتك سليمة يفترض على طول تعطيك كرت صعود الطائرة.....وتخلى الباقى لموظف الجوازات.....تقديرى وإحترامى..الشكوى مابتفيدك لأنها لم توقع لك فى التذكرة وممكن تنكر عادى.

تحاتي اخي مجيدو
كلامك عن كتابة رقم الجواز القديم في الجديد مهم
الا اراجع الجواز اتأكد من الحتة دي
ولو مافي حاضيفها في السفارة عشان ارتاح من الهم دا
او اطلع بطاقة جديدة
شكرا جزيلا

سلام صاحب البوست

للموظفة الحق التام في مطالبتك بالجواز طالما تغادر بها لاول مرة من داخل السودان( حتى وان دخلت به)
وهذا يعود لاجراءات ادارية متبعة

انا تعرضت لذات الموقف وكنت مسافر عبر السعودية، وهذا الاجراء لا علاقة له بالخطوط الجوية، هو أجراء ادراي يتبع للسلطات السودانية للتأكد من وجود تاشيرة عمل والسفر لغرض العمل
وتتم المطالبة بالجواز القديم والاقامة او رقمها فقط يكفي

واحيانا حسب ما علمت يمكن الاستعلام برقم الاقامة فقط

اخ ناصر تحياتي
نظام الجوازات في السعودية ربما يختلف عنه في قطر
في الفترة الاخيرة تغير النظام في قطر بحيث اصبح لا يتم الختم في الجواز
بأي اشارة لرقم الاقمة او الرقم الشخصي
وتم الاستعاضة عنه ببطاقة يحملها المقيم فقط
وعليه اذا كانت اي جهة تريد التأكد من اني مقيم في قطر يكفيها المطالبة ببطاقة قطرية سارية المفعول
والجواز القديم او حتى الجديد اصبح ليس له اي صلة بهذا الموضوع
تقديري وشكري

تحياتي اخي اسماعيل
فعلا كل كلام الموظفة انها خايفة تتعرض لمشكلة
وكسرت قلبي بكلمة بترضى لي اتفصل من الشغل لو حصلت حاجة؟

ونفس كلامك قلته ليها خلي الموضوع دا لناس الجوازات لكن برضه رفضت
الشكوى ما قاصد منها اضر زول او احصل على مقابل بقدر ما داير تكون الامور واضحة للناس
خصوصا انه معظم اامغتربين غيروا جوازاتهم في الفترة الأخيرة
وعسى يكون البوست دا منبها ومحذرا لهم
تقديري وشكري

ابو حميد .. صباح الفل ..

طيب سؤال ؟

ليه اختلف رقم الجواز لما اتغيير ؟

ولكم الشكر .

Quote: وكسرت قلبي بكلمة بترضى لي اتفصل من الشغل لو حصلت حاجة؟

انا زاااتو يا ود الشيخ ( كسرت ) قليبي البنية دي ... رسل لينا رقم الكاونتر بالله

ديل الناس المحترمين والراقين ناس القطرية
اما انا حصل معاي العكس تماماً
الرحلة : جدة ــ الخرطوم .. الزمان السبت 3 / 8 / 2013
وانا حاجز ودافع كاش قبل تلاتة اشهر من الرحلة ...
الناقل : طبعا الخطوط السودانية وهو في غيرها بعمل كدة؟
يشهد الله دافع قيمة (6) تذاكر.. قلت اشجع الناقل الوطني
الاقلاع يوم السبت والدنيا اواخر رمضان نص المنهار
يرن التلفون وش الصباح .. الو ؟ مين؟ معاك الخطوط السودانية .. هو في خطوط اربعة صباحا؟
المهم قال المتصل ان الرحلة (الغيت) ومعليش صوم معانا يوم هنا .. زعلت جدا لان عندي مناسبة عائلية مهمة جدا
قربت ابكي ... المهم دعيت عليهم .. قمت يوم الاحد بطائرة كانها (دفار) اسمها بدر للطيران اقلعت حوالي العصر يوم الاحد
وصلنا الخرطوم .. والشنط ماوصلت .. جات شنطة واحدة من مجموع 9 شنط ...
كل يوم انا في المطار .. اللليلة بكرة والشنطة في اديس لالالا في القاهرة
وعقيد في الجمارك يقول لاحد العساكر .. اعملوا حسابكم (قالوا) في سرقات تقيلة .....
انتهى العيد .. وهدايا الناس والامانات معيدة جوة الشنط وين ماعارف؟
لقيت واحد برضو بفتش على شنطو .. عرفت منو انه جاء من جدة يوم السبت على الرحلة (الملغية) !!!
وعرفت منه انه ماكان عنده حجز ودفع لى (واحد) عمل ليهو حجز فوري
يعني الرحلة القالوا ملغية طلعونا منها (ستة مقاعد) وباعوها عشان زحمة العيد
يشهد الله نسيت اقول ليك يوم الاحد دفعوني وزن زايد

سلام صاحب البوست
سلام للجميع

لدي موقف مغاير مع القطرية

يتعلق في تاخر شنطة لي قرابة 20 يوم في اجازة لي في شهر اكتوبر الماضي

لكني قمت بعمل شكوى في حينها وتابعت وخاطبت القطرية في الدوحة حتى استلمت شنطتي في الخرطوم بعد ثلاثة اسابيع

بعدها قدمت شكوى ومطالبة بالتعويض عن التأخير

رفضت المبلغ الزهيد الذي قدموه لي هناك وطالبت بأخذ تعويض بالعملة 150 دولار هنا في السعودية بما أنني مقيم فيها من فترة وليس حسب صرف سعر الدولار في السودان

واشتكيت من قلة التعويض كونه عن تاخير 3 أيام فقط - 50 دولار لكل يوم لكنهم ماطلوني وظللت أراسلهم في الدوحة

وحضرت هنا وبما أنني ماطلت كثيرا زادو المبلغ قليلا وتم رفعه ل 200 دولار

وبعد كل هذا أخذت التعويض في شكل تذكرة بمبلغ 200 دولار يتم خصمها من أي تذكرة لي على القطرية


الناس دي لو ما سلو روحك ما بيدوك شي

تقريبا زي شهر ونص انا جاري ورا الموضوع دا

تحياتي

ليس لدي ادنى فكرة هل اتبعت الموظفة في الخطوط القطرية الاجراء الصحيح ام لا.
ولكن حدسي يقول بان طالما وافقتها المشرفه على الاجراء فموقفها في الغالب صحيح.
المهم
اقترح عليك بتقديم شكوى في الخطوط القطرية او الشركة الام نفسها بقطر بدل رفع قضية في المحاكم السودانية.
اعتقد بان الشركه الام لو استشعروا بان ممثليهم في الخرطوم مخطئين سيقومون بتعويضك بطريقة المناسبة وسيحققون مع الموظفه والمشرفة في حالة ثبوت الخطأ او التقصير.