02:50 PM April, 07 2016 سودانيز اون لاين
أبوذر بابكر-
مكتبتى
رابط مختصر
تتذكرى ؟
لما بينى وبينك
بيناتنا
اتلونت ارض الأمانى
كل لون راسمك جمال
لما الكلام فرهد اغانى
كل نغمة شغف وصال
طعم الريد
الفى كلماتنا
تتذكرى ؟
لما بينى وبينك
بيناتنا
لما اشتاقك واكون مستف بالحنين
اغمض عيونى عشان اشوفك
اختصر درب السنين
تبقى عينى كايسه عينك
وبينى بينك
وبينا احلامنا وظروفك
تعب الخطاوى
والمشاوير
طرب الحكاوى
والمسادير
شوق الغناوى
والطنابير
كله كان ما بينى بينك
الا خوفك
قفل مداخل المويه
لى خضرة جروفك
نشف ندى الضحكة وكتب
اسم الغياب
شال بسمتك يبس قطوفك
وانشر درب الشوق صراط
ممدود صعب
تتذكرى ؟
بينى وبينكِ
بيناتنا
زهو الندى
رجع الصدى
قصيدةُ الليل المطرزة بالنجوم
صندل الألفة الدفق عطر المحبة
دعاش مطرتك
وكرنفال البهجة فى حضن الغيوم
تتذكرى ؟
حروف رسائلنا الحميمة
وعد لحظاتنا الضنينة
لما كنت ادوبى ريدك
يا وريفه
يا اليفه
يا مضويه زى سنا الناس الحنينة
يا بديعه
يا وديعه
يا مهندمه زى تفاصيل المدينة
تتذكرى ؟
لامن خلاص
صعب الوصول ليك والإياب
ومشت بعيد سفن الخلاص
شهقت ملامح ريدى ليك
نزفت شرايين الحنين
وبحر الريده ديك اصبح سراب
الدهشة وقفت خايفه
ماليها الأنين
تسال عليك
تنده عينيك
تتوسل الأسى والغياب
تتذكرى ؟