أغنية عصير القصب أنا براي بفتكر أنها من أجمل الشغل الاتعمل في العشرين سنة الأخيرة . لي زمن طويل من البلد . و في حوامتي من فرح لي ترح الصدفة جابتني لي ده الهايس خط موقف أستاد الهلال مدينة النيل .. والله أنا وزي ما وأضح كل الركاب طربانين و مند مجين مع الكلمات الجديدة . والا . فجأة رأحوا الركاب ناطين لحظة نطة المواطن المتز مت من آخر كنبة وهاج في السواق . يازول أقفل التسجيل ده الغناء حرام . حولا .
Post: #2 Title: Re: المتزمت ضيع علينا فرصة سماع أغنية عصير ال� Author: علي دفع الله Date: 04-02-2016, 04:41 PM Parent: #1
ههههههههههههه انت حا تكون في حالة انشداه لمن ترجع .... قلت لي المتزمت هرشكم هههههه ... البلد اتملت متزمتين ... ----'-----'--- احكي ليك واحدة عالماشي ...قبل كم يوم جايي من الخرطوم لسنار ركبت البص قوم يا المضيف شغل دعاء السفر . انتهينا منو واستلمنا محمد سيد حاج عن عيد الام وتعال يا نقة لمن قلنا الروب يطلع من عيد الام بخش في عيد الحب بطلع من عيد الحب يخش في عيد الميلاد وكلهن من وجهة نظروا حرام وتقليد للنصاري واليهود الخ الخ عندهم حساسية من اي مناسبة فرح ..المهم في منطقة فداسي في بريك فطور ..المهم اول ما طلعنا تاني اتخيل شغل اوديو وبرضو محمد سيد حاج .... ولو شفت المضيف بنطلونو ناصل وكل شعرة واقفة ورابط سماعات في اضانو يعني ولا بسمع كلام الشيخ النقاق دا .. المهم ناديتو وقلت ليه انا ما داير اسمع اي حاجة ممكن توقف البتاع دا..طلبت طلبي دا بصوت منخفض وفجاءة لقيت ناس كتار قرفانين لكن هارشين من امثال المتزمت الهرشكم دا .. مودتي عثمان موسى واصل يا اخيى
Post: #3 Title: Re: المتزمت ضيع علينا فرصة سماع أغنية عصير ال� Author: عبد المنعم سيد احمد Date: 04-02-2016, 04:59 PM Parent: #2
Post: #4 Title: Re: المتزمت ضيع علينا فرصة سماع أغنية عصير ال� Author: Osman Musa Date: 04-02-2016, 06:42 PM Parent: #3
عزيزي أستاذ علي دفع الله سلامات سارح لحظة طلوع الهايس من الموقف في نقاش شباب مثقفين في الليلة القبل نهار هرجة متزمت الهايس . كنت سارح جد في نقاش الشباب عن كتاب الكاتب جورج الطرابيشي وكتاباتو النقدية . الظاهر الرجل كتب عن المفاهيم الحضارية في موسم الهجرة الي الشمال . الفول كان كارب > و حديث الشباب كان يرحمن من شفقة تاني ما يطلع كاتب يتلتل . كنت سارح وسرحاني ما أنقطع الا بعد ما شغل سايق الهايس أغنية عصير القصب . وفي نص البيت البقول ( فوق الدم والعصب ) نبل المتزمت وقمز وطربق الدنيا ومسخ عليهن العصير .
Post: #5 Title: Re: المتزمت ضيع علينا فرصة سماع أغنية عصير ال� Author: Osman Musa Date: 04-02-2016, 07:43 PM Parent: #4
عزيزنا الفنان عبدالمنعم سلامات وألف شكر علي صب العصير أب سكر تقيل لي ناس المنبر . الله يطراهو بالخير مدير مدرستنا وأستاذ اللغة الانجليزية أتذكر عشرين دقيقة من زمن الحصة عداهو يشرح في الكلمة الخطيرة DIACRITICS البتعني المتزمت . عشرين دقيقة يشرح و تاني يمشي ويجي لي التزمت . زي الكان حاسي أنو الزمن حيتقلب وينبل منو زول زي ده يلخبت مزاج الناس . الزول يا عبدالمنعم لابس سكين في ضراعو التقول داير يضبح .
Post: #6 Title: Re: المتزمت ضيع علينا فرصة سماع أغنية عصير ال� Author: Osman Musa Date: 04-02-2016, 08:33 PM Parent: #5
عصير القصب البشوفني مشيت بيت ابوه م كضب الله لي من ريدو السميح جاري فوق الدم والعصب الله لي ريد الصغير الحنانو بذيد العمير كن ابو وامو قالو خير ما بخلي انا كن يطير في دريبو حلات التعب الله من ريد الخضار والسبيبه واصل القصاا غير سعايتو انا لي عمار والبقول حقي م غلب الله لي من ريم البدو والحنان الما بشحدو البسوو في غوناي بقصدو ريدي م تشمت في العدو شرو لي ل الريح في المهب و شغاوتي بريدو وصاد كلمو يسيبو العناد باقي لي ذي شجر الدليب بسقي في والضل للبعاد عصير القصب البشوفني مشيت بيت ابو م كضب
Post: #7 Title: Re: المتزمت ضيع علينا فرصة سماع أغنية عصير ال� Author: Osman Musa Date: 04-02-2016, 11:26 PM Parent: #6
أتمنيت أقابل شاعر الأغنية و أقابل الفنان حسين الصادق وأهنيهم علي التوفيق في كتابة الأغنية و التلحين والغناء . اللحن طلع خلطة ذكية شوية من طريقة شرق السودان في الالحان وشوية من جابودي حسانية جبال الحسانية . وبالمناسبة ألحان عرب الحسانية الرحل تختلف أختلاف كبير من ألحان حسانية النيل الأبيض . وعصير القصب فيها كتير من لحن جابودي أهلنا عرب جبال الحسانية .. وده سبب جمال وأختلاف الأغنية .
Post: #8 Title: Re: المتزمت ضيع علينا فرصة سماع أغنية عصير ال� Author: Osman Musa Date: 04-03-2016, 03:44 PM Parent: #7
المتزمت في ضراعو سكين . بس شكلو كحيان وسكينو ما حتخوف ولا حتي الطفلة الحلوة البين ال 11 رأكب . أنا حاولت أتكلم معاو وأهدي عيونو الشكلها جن جن بس الزول مواصل في كلمة حرام الغناء حرام . الهايس في ديك الساعة كان قريب للمقابر وكانت صورة الفنان خوجلي عثمان الراح في فيلم زي ده معلقة جمب السواق .
Post: #9 Title: Re: المتزمت ضيع علينا فرصة سماع أغنية عصير ال� Author: على عبدالله بشير Date: 04-03-2016, 04:04 PM Parent: #8
Quote: أتمنيت أقابل شاعر الأغنية و أقابل الفنان حسين الصتدق وأهنيهم علي التوفيق في كتابة الأغنية و التلحين والغناء .
الأخ عثمان موسى من أجمل ما سمعت فى الفترة الأخيرة حضرت لقاء فى قناة النيل الأزرق مع شاعر الأغنية و حكى عن المناسبة يقول : أنه كان جالس فى محل لعصير القصب فى السوق العربي الخرطوم و صاحب المحل رجل هادئ و كان يسوق عصيره بصوت منخفض و هو يردد ( عصير القصب ... عصير القصب ... عصير القصب ) و كان مطلع ألهم الشاعر بنظم أغنية عصير القصب ...
Post: #10 Title: Re: المتزمت ضيع علينا فرصة سماع أغنية عصير ال� Author: Osman Musa Date: 04-03-2016, 07:38 PM Parent: #9
عزيزي الأخ علي عبدالله سلامات دندنة مسوق القصب لي عصير قصبو صادفت لحظة ألهام الشاعر الجميل .. فخرجت الكلمات بدون رتوش وبدون تكلف . كلام عديل وساهل وسمح . ألف شكر علي المداخلة الجميلة تحياتي
Post: #12 Title: Re: المتزمت ضيع علينا فرصة سماع أغنية عصير ال� Author: Osman Musa Date: 04-04-2016, 04:02 PM Parent: #4
نواصل الاستماع
Post: #11 Title: Re: المتزمت ضيع علينا فرصة سماع أغنية عصير ال� Author: Osman Musa Date: 04-03-2016, 09:35 PM Parent: #1