ناس زمان والاسطوانة المشروخة

07:37 AM March, 27 2016

سودانيز اون لاين
ابراهيم عبد الوهاب-
مكتبتى
رابط مختصر

السلام عليكم ورحمه الله وبركاته

انا عاوز اتكلم من حاجة غياظة (قادننا ) بيها اعمامنا الكبار
زمان كنا بنعمل وزمان الدولار كان بتلاتة جنية
وزمان كنا بنشرب لبن كافوري وزمان جامعة الخرطوم الصفوة
كنا كل يوم اكل شكل وزمان وزمان ، تحسر علي اللبن المسكوب
ياخ طيب الحاضر الوصلن ليهو دا ما بسبب الماضي
وافاعيل ناس الماضي ، اكلتو حقنا نحنا ناس الحاضر
وعملوها لينا ديون نحنا بدفع في الديون دي
سواء كانت اقتصادية او سياسية ، عملتو شنو انتو يا ناس زمان
غيرت ورثتونا الفشل الاقتصادي والفشل السياسي وسلمتو البلاد
والعباد للحكومات العسكرية ، فشل في فشل
وبعد دا كلو بدون خجل شابكننا زمان وزمان كان سمح وزمان كنا مجدعين
انا ما حضرت زمان ولكن اجزم بان الشباب الموجود الان احسن
من ناس زمان بميه مرة ،

وين ناس زمان الاكلو مجاني وبحقنا ومشو بعثات بحقنا
وين هم الان عملوا شنو للاجيال الجات من بعدهم
دكاترة فطاحلة في مستشفيات لندن وامريكا وفي ارقى الجامعات
وما في واحد فيهم عمل ليهو كتاب في مجالو عشان يتسفيد منو
الاجيال البعديهم ، مافي زول واحد ترجم ليهو كتاب واحد من اي لغة
الى اللغة العربية (اي صاح في كتاب كتابين )لكن دي مشاركة خجولة
بالنسبة للاكل الاكلوهو (المجاني) والدراسة المجانية الاستفادو منها
والبعثات المجانية
ما هي مساهمة ناس زمان في السودان ؟؟؟
واحد من ناس زمان يجي يجاوبني

سلام،
شفت مداخلتك في بوست الأخ يحي قباني ... لكن الرد هنا أفضل لأنو هناك كانت خارج الموضوع.

مافي زول بيقول شباب اليوم أسوأ من شباب زمان.
كل البيتقال - حسب مشاهداتي - إنو الحال كان أفضل ولا توجد مقارنة.
هل الغير الحال من ممتاز إلى سئ هم شباب اليوم؟ بالتأكيد لا ... ولا ذنب لهم في ذلك
التاريخ موجود والتدهور مسئولة عنه حكوماتنا بنسبة 100%

واحد من ناس زمان يجيك يقول ليك والله زمان البلد كانت بخير
في البيت يكون شغال واحد وبصرف على ناس البيت كلهم
وهسه البيت كلو شغال وما مغطيه
كيفن ما تكون مغطيه وانتم كسالي ركلستو وعملتوها نوم
والمشاريع الخلوها لينا الانجليزي انتو انتهيتو منها بركلستكم
ونومكم

الولد اللسه واحد ونفس صوت الاسطوانة

الماعاش زمان يا ابراهيم ماعاش

لكن وجه احسن توجه سؤالك لناس الانقاذ ، لانهم قروا مجاني وباعو المدارس

والجامعات وباعوا كل الحتات زي ماقال عبدالرحيم حسين خليفة الخضر خليفة واحد كوز تاني

وهكذا دلاليك ههههههه

احسن حاجة في جيلكم دا لما يموت زول تلقاهم كميات فجاة كانهم لابدين ورا شجر ههههههههه

كلامك فيهو اتهام وتحامل على (ناس زمان)
يا ريت لو تزور البوست ده:

لقيت كتير من مشاهير زمان الليلة في الخرطوم سايقين ركشات وأمجادات


ولو ما عندك وقت، شوف المداخلة دي، يمكن تجاوب بعض أسئلتك:

Quote: عزيزنا الأخ الطيب عباس سلامات مشيت يا الطيب أديت الفاتحة في عمنا سعد ود الخليفة . صورة عمك سعد عليه الرحمة محكرة في الديوان . وتحت الصورة شهادة كبيرة عملها عمك في ال RAIL TRNSPORT في لندن سنة 1959 . عمك بعد رجع عطبرة قام بي تدريب وتعليم وتخريج 40 سايق قطار ديزل . الليلة ال 40 ماتوا منهم 13 وأتنين ضربوا ليبيا والباقين بين الفارش دكوة والمكرفس في العنقريب . . .. عمك يا الطيب قبال يرجع السودان ساق 3 شهور بين لندن وبرايتون .

..كاتب البوست وضيوفه الأكارم
مشكلة تدخل هذا البوست الجماعة يعتبروك من مواليد الخمسينات
ولكنني احد الذين نهلوا تعليمهم المتواضع في فترة المرحوم جعفر نميري
والثانوي داخلي والكلية داخلي
وكنت احد الذين يحملون صواني الطعام
لنمر بها في صف مهذب جدا
وناخذ مالذ وطاب من اصناف الطعام
أما صباحاً فقد كنا نحن اهل العوض نحرس { حلة } اللبن الضخمة
لنغرف الحليب بالجك
وتذهب للمحاضرة وشنبك ينز لبنا وسمناً


قبل يومين أجرت قناة {mbc} وبالتحديد في برنامج صدى الملاعب
لقاءا مع الكابتن عزالدين الدحيش
تحدث فيه باسهاب عن احراز السودان لبطولة الأمم الأفريقية اليتمة عام 1970
ولم تكن الرياضة بهذا التطور الذي نشهد اليوم
خاصة فيما يتعلق بالتكنولوجيا واساليب التدريب والبنية التحتية
واليوم 50 جريدة رياضية و200 استاد ولم يتم تكرار البطولة
بل لم يتنفس الناس الصعداء الا حينما اعاد الأمل اطفال صغار مثلوا السودان بكل وطنية
هذه اسطوانة قديمة تزامنت مع ردي

ولكن ساتحدث عن اسطوانة أخرى هي مؤسسة الرهد الزراعية وهيئة البحوث الزراعية بمدني
وكنت اعمل بمؤسسة الرهد الزراعية
ولم تكن التقانات الحديثة آنذاك بهذا الكم الهائل
ولكن رغم شح الامكانات التقنية فقد ..
كانت ادارة اكثار البذور بمؤسسة الرهد الزراعية هي المسئولة عن انتاج التقاوي للمزارعين
وهيئة البحوث الزراعية مدني هي المسئولة في الجزيرة بتوفير التقاوي
وكان من النادر استيراد التقاوي {seeds}من الصين او استراليا
بل كانت تنتج محليا ويتم تجربتها في المعمل
ومن ثم يتم تجربتها في حقول معدة خصيصا لذلك
وان لم تصل نسبة الانبات الحقلي اكثر من 90% فلا يتم توزيعها للمزارعين !!!!
واذا توفرت التقنية الزراعية آنذاك لوصل انتاج الفدان لأكثر من 50 جوالا
الآن يتم استيراد بذور من الخارج
وحتى حينما تدخل لايتم اجراء الفحوصات المخبرية عليها
ويتم تسليمها للمزارعين وتبذر في ملائيين الأفدنة لتطلع ماسووورة في النهاية
ويضيع موسم كامل وتنهار الكثير من البيوت بسبب هذا الخطأ الفادح

اعترف الآن انه توجد تقانة زراعية عالية ومتقدمة
ولكن تنقصها الكفاءات المدربة اضافة لسوء التخطيط