ناس الضللة الباردة ... يجدهم بخير!

Post: #1
Title: ناس الضللة الباردة ... يجدهم بخير!
Author: الامين موسى البشاري
Date: 03-22-2016, 06:32 PM

06:32 PM March, 22 2016
سودانيز اون لاين
الامين موسى البشاري- المملكة العربية السعودية
مكتبتى
رابط مختصر
ناس اوربا وامريكا ومن لفه لفهم .. من اصحاب الضللة الباردة
كرهتونا السعودية والخليج العربي
........................ يتبع

Post: #2
Title: Re: ناس الضللة الباردة ... يجدهم بخير!
Author: الامين موسى البشاري
Date: 03-22-2016, 06:35 PM
Parent: #1

هل يوجد احتقار للانسان والانسانية بمثل ما ستشاهدونه في هذا الفيديو
___
يقال والعهدة على مرسل الفيديو بأنه للاجئين سوريين في اوربا
وقد نقلت الفيديو كما هو

Post: #3
Title: Re: ناس الضللة الباردة ... يجدهم بخير!
Author: الامين موسى البشاري
Date: 03-22-2016, 08:59 PM
Parent: #2

الناس دي ماله عملت غمرانه من البوست
يوميا بوست عن السعودية والخلايجة
السعودية فعلت وتركت ...ووو ... ووو... الخ الخ
اها وين انتوا يا ناس؟
يجدعوا ليهم في الاكل زي الجداد (بفتح الجيم)

Post: #4
Title: Re: ناس الضللة الباردة ... يجدهم بخير!
Author: اسامة الامام
Date: 03-22-2016, 09:35 PM
Parent: #3

يقال انها لمشجعي نادي ايندهوفن الهولندي
يلقون بالعملة المعدنية ليلتقطها اللاجئين وسط الاستهزاء بهم
....
ايا كان...شيء مقرف ومقزز
تحياتي يا بشاري

Post: #5
Title: Re: ناس الضللة الباردة ... يجدهم بخير!
Author: عادل الباهي عبدالرازق
Date: 03-22-2016, 10:23 PM
Parent: #4

البشاري الهولنديين ديل اكتر شعب انساني
مشجعي كورة القدم بيدخلو الاستاد واقفين لمبة لط
والسكران في ذمة الواعي
أكيد لو في وعيهم مابيعملو كدة
أي سؤال ؟

Post: #7
Title: Re: ناس الضللة الباردة ... يجدهم بخير!
Author: الامين موسى البشاري
Date: 03-22-2016, 11:17 PM
Parent: #5

Quote: البشاري الهولنديين ديل اكتر شعب انساني
مشجعي كورة القدم بيدخلو الاستاد واقفين لمبة لط
والسكران في ذمة الواعي
أكيد لو في وعيهم مابيعملو كدة
هلا ابو ..............
حالتهم اكتر شعب انساني يا عادل!
عارف ذكرتني نكته المصري القبضوه بحشش
قالوا المصري قبضوه بحشش فقاموا ودوهو القسم
واخدوا اقواله ...
المحقق : كان معاك حشيش؟
المحشش: ايوا يا بيه
المحقق: كنته بتحشش مع الجماعة ديل؟
المحشش : ايوا يا بيه
المهم كل اجاباتو كانت ايوا يا بيه
بكرة عرضوه على وكيل النيابه وقعد يسأل فيه
وكيل النيابة : كان معاك حشيش؟
المحشش: لا يا بيه
وكيل النيابة: كنته بتحشش مع الجماعة ديل؟
المحشش : لا يا بيه
وعكس امبارح كلو اجاباتو كانت لا يا بيه
وكيل النيابة: طيب امبارج اعترفت بحيازتك للحشيش وتعاطيه وكل اجاباتك في محضر الشرطة كانت اعترافات
ليه امبارح اعترفته؟
المحشش: اصلي كنته مسطول امبارح يا بيه ()
هسي يا عادل الجماعة الفي الفيديو ديل كلهم طاشمين؟
يعني المهاجرين الزيكـ بس هم الواعيين وشغالين شغلة مليجي ولا شنو؟

Post: #6
Title: Re: ناس الضللة الباردة ... يجدهم بخير!
Author: الامين موسى البشاري
Date: 03-22-2016, 11:03 PM
Parent: #4

Quote: ايا كان...شيء مقرف ومقزز
تحياتي يا بشاري
هلا اسامة
بالفعل شئ مقزز ومقرف وفيه امتهان لكرامة الانسان
اوع تكون من ناس الضللة البارة بس

Post: #8
Title: Re: ناس الضللة الباردة ... يجدهم بخير!
Author: Siddig Elghali
Date: 03-22-2016, 11:42 PM
Parent: #6

ول أبا البشاري حبابكبالرغم من ذلك وضعهم الانساني أفضل مليون مرة من ناس الخرتوم ، البقع فى الواطة بشيلوه وبعالجوه مجانا ، وناس الخرتوم البقع بودوه المقابر قبل ما يموت ويتأكدوا من موته ، بعدين يا أخي ما تأخذ لك قنزب منهم لبحيرة كوندي وأنا أخذ قنزب معاك ، الموت ولا الأكل البرموه فى الواطة ، أما الناس الذين يتحدثون عن السعودية والخلايجة فنقول بارك الله في السعودية والخليج والا كان نصيب السودانيين بهذه الدول من نصيب السوريين ، مع فائق ودي لو أرسلت لى عجينة أو دشيشة أو بليلة واذا وعدتني بجيك فى أول زيارة لدياركم

Post: #9
Title: Re: ناس الضللة الباردة ... يجدهم بخير!
Author: اخلاص عبدالرحمن المشرف
Date: 03-23-2016, 00:45 AM
Parent: #8

من يكتب باسم صديق الغالي
ازيك يا صديق

Post: #10
Title: Re: ناس الضللة الباردة ... يجدهم بخير!
Author: الامين موسى البشاري
Date: 03-23-2016, 06:05 PM
Parent: #9

**

Post: #11
Title: Re: ناس الضللة الباردة ... يجدهم بخير!
Author: Siddig Elghali
Date: 03-24-2016, 00:25 AM
Parent: #9

حبابك يا اخلاص بنت المشرف

لك عاطر التحايا وللاسرة

Post: #12
Title: Re: ناس الضللة الباردة ... يجدهم بخير!
Author: الامين موسى البشاري
Date: 03-24-2016, 08:22 PM
Parent: #8

Quote: أما الناس الذين يتحدثون عن السعودية والخلايجة فنقول بارك الله في السعودية والخليج والا كان نصيب السودانيين بهذه الدول من نصيب السوريين

ول ابا صديق الغالي

حبابك .... بصراحة موقف مخزي

وطبعا انا قاصد ناس الضللة الباردة لانهم كرهونا السعودية

وصوروا لنا الغرب كجنة الله في الارض

العجينة نرسلها ليك بال DHL

Post: #13
Title: Re: ناس الضللة الباردة ... يجدهم بخير!
Author: تبارك شيخ الدين جبريل
Date: 03-24-2016, 09:12 PM
Parent: #12

ناس بيجدعوا قروش لى ناس محتاجين قروش ... لا ضرب لا شتيمة لا ارهاب لا تفجير ... خليهم يكوركوا ويشجعوا ويضحكوا لى بكرة ... برضو كتّر خيرهم البيأووا ويدفعوا ويهزروا ...

أما انكم ناس معقدين صحيح ... روح ضحك وهزار ما فضلت فيكم ...

.

.

.

.

.

.

... المهم ....

Post: #14
Title: Re: ناس الضللة الباردة ... يجدهم بخير!
Author: ABDALLAH ABDALLAH
Date: 03-24-2016, 11:51 PM
Parent: #13

Quote: ناس بيجدعوا قروش لى ناس محتاجين قروش ... لا ضرب لا شتيمة لا ارهاب لا تفجير ...
خليهم يكوركوا ويشجعوا ويضحكوا لى بكرة ... برضو كتّر خيرهم البيأووا ويدفعوا ويهزروا ...

حبيبنا تبارك
سبقتنى إلى ما كنت أود أن أكتبه وإن كان بصيغه لا تختلف عن مضمون ما كتبت
وبالطبع دفع نقود هم لها فى أشد الحوجه أفضل لهم من براميل بشار المتفجره .
حبيبنا البشارى , تحياتى لكم .

Post: #15
Title: Re: ناس الضللة الباردة ... يجدهم بخير!
Author: محمد على طه الملك
Date: 03-25-2016, 00:47 AM
Parent: #14

سلامات يا شيخ العرب وزواره الأكارم ..
فعلا ده سلوك مقزز ..
مداخلة ود الإمام لفتت إنتباهي واستغرابي في آن لإنو هولندا صارمة جدا في احترام مظهر سكناها حتى لو كانوا اجانب ..
لذلك لا يسمحون بظهور متسولين أو أي مظهر غير إنساني أو حتى القيام باعمال هامشية ..
حسب المعلومة الوصلتني من جهة هولندية مختصة بخصوص الفيديو ..
الفيديو جرى حوله تحقيق ورفع لجهات الاختصاص في أسبانيا ..
لإنو الحدث وقع هناك وليس في هولندا ..
طالعت قبل دقائق على شريط اخباري بقناة فوكس 3 الرياصية ..
أن خمسة من مشجعي فريق ايندهوفن تعرضو للمساءلة واستكتبوا تعهدات ..
ذلك لما بدر منهم من سوء تصرف في مدريد .

Post: #16
Title: Re: ناس الضللة الباردة ... يجدهم بخير!
Author: تبارك شيخ الدين جبريل
Date: 03-25-2016, 10:05 AM
Parent: #15

سوء تصرف ... عليك نوووووور ...

في الآخر كتر خيرهم الدفعوا ... لاكين هزارهم خشن ... انا غايتو عندي مقبول ... ما مستحسن لاكين مقبول ...

... المهم ....

Post: #17
Title: Re: ناس الضللة الباردة ... يجدهم بخير!
Author: تبارك شيخ الدين جبريل
Date: 03-25-2016, 10:08 AM
Parent: #16

أصلاً صعب تقنع ليك كوز انو دي حاجة مقبولة ... وليس برهان على فسوق المجتمع الغربي الكافر

... المهم ....

Post: #18
Title: Re: ناس الضللة الباردة ... يجدهم بخير!
Author: الامين موسى البشاري
Date: 03-26-2016, 04:25 AM
Parent: #17

Quote: أصلاً صعب تقنع ليك كوز انو دي حاجة مقبولة ... وليس برهان على فسوق المجتمع الغربي الكافر

زي ما هو صعب انك تقنع ليك مسطول .. بأن ما حدث معيب ومهين

وطبعا ليس عليكـ حرج ... والله صحي( )