لقيتو واقف منتظر

02:14 PM March, 22 2016

سودانيز اون لاين
عباس الدسيس-Saudia
مكتبتى
رابط مختصر

يوم الخميس نفسيا الزول بكون كويس داخله عليك عطلة يومين وبتكون اجمل للعزابي أو للزول الاولادو مسافرين اما ناس الكورجة زي حالتنا غالبا بكون شغال سواق عائلة

أنا جاي علي البيت شايف صاحبنا دكتور فلان من بعيد واقف في الاشارة لو لا في بلد جنبي كان قلته الراجل يا بقي عسكري مرور أو مجنون إشارة شغال بي رقبتو مع العربات يمين شمال

قلت ندق معاهو الحنك قبل ما اخش في تفاصيل الخميس. سلام يا دكتور مالك واقف زي المحولجي في الاشارة ؟؟؟

الراجل وقعت ليهو في جرح لا حولاااااااااا ود الشريف بركة الله جابك انت زول بركة كان تحل لينا مشكلتنا الواقعين فيها

فلان جاركم شال مننا قروش امس عندنا معاهو موضوع مواعدنا نجيهو الليلة العصر الراجل عربيتو واقفه بره وباب العماره حقهم مقفول نضرب ليهو في التلفون ما برد واقفين لينا اكثر من ساعتين

يا تحل لينا المشكله نلم فيهو كيف يا تقيف تونسني لما نلقي لينا صرفه.

بنلقي ليها حل لكن ذكرتني قصة فلان داك ما بتعرفو العندو اخوهو صيدلي في السودان إشيل وارسل ليهو في القروش عشان إفتح ليهو صيدليه

ربك رب الخير فتح الصيدلية اربع ضلف والحال ماشي تمام عال العال والموضوع خلاس بقي المشروع الاستثماري للرجوع للسودان

نزل اجازة لقي ليك الناس دي كابه في الصيدلية بالردوم بالله تقول فرم رغيف ما صيدلية جاء راجع هنا مبسوط إلم في القروش وارسل لاخوهو.

اها بين ليلية وضحاها اخوهو قام اتصوف اربعة يوم في الصيدلية وثلاثة يوم في المسيد مع الشيخ شويه شويه قفل الصيدلية والشيخ اقنعو اشتغل معاهو تجارة محاصيل ومنها خشو في العربات .

اخوهو هنا جن جنونو إسب وإلعن كره الصوفيه وكره الشيعه وكل الطوائف وما فضل ليهو غير ابقي داعشي.

الايام مشت متسارعه الصيدلي بقي اطير في الشيكات مسكو ختو في السجن وخلاس اخو قنع في خيرا فيها وحلف تاني ما عندو علاقه بيهو

تقوم تضرب عمتو ... يا ولدي اخوك مرمي في السجن بالشهور وانت ما شغال بيهو ولا بتتصل عليهو حسي لو ابوك حي بتعمل كدي عيب عليك كان بتعز ابوك في قبرو تسدد ليهو الشيك دا وتطلعو من السجن وتشتري ليهو فيزا بسرعه تسوقو معاك لانو لو سددت الشيك وطلعتو باقي الديانه قاعدين تاني برجعو السجن.

اخونا راسو ضرب المشروع الاستثماري راح واخوهو في السجن عايز قروش !!!! ا

ها قال ليهم عايز اتكلم معاهو اشوف الحاصل شنو واحد إمشي ليهو في السجن واديني اكلمو.

يوم الزيارة لقو معاهو الشيخ الاقنعو بالتصوف اتصلو علي اخوهو عشان اكلمو حلف يمين لازم اول اسلم علي الشيخ بعديها إكلمو!!!

صاحبنا مغبون لقي الشيخ في الجوال قال افش غبينتو لم ليك فيهو ضيعتو لينا قروشنا بي تخلفكم والتصوف ووووووو الخ ...ما خلي للشيخ جمبه انوم عليها خط الجوال فصل.

تاني الجوال رنه اها المرة دي لقا اخوهو في الخط عايز اهجم عليهو جاهو صوت اخوهو من السودان بارد وهاديء....

كيف حالك يا اخوي وكت الخط كان قاطع الشيخ بتكلم عنك قال شافك في الحضرة انت زول مبروك وصالح وغيرك قال مافي زول بفكني من السجن وفصل الخط.

زولنا بسرعة دفع 50 مليون للشيك الاول وجاب اخوهو هنا وطلع مبروك حسب كلام الشيخ.

يلا نجي لي مشكلت انت بتاعت جاري القافل عليهو العمارة وما برد علي الجوال وشال منكم القروش العشاء قرب ياذن تمشي تلبت جمب باب العماره ساكن معاهم مولانا مصري بصلي الاوقات الخمسة في المسجد

من افتح باب العمارة توش تخش لو فوتا الفرصة دي تاني الا صلاة الصبح وخميسك بكون ضاع.

غايتو يا عباس يوم بتكون لينا سبب يرفدونا من شغلنا ده ,,,, يا راجل انا اضحك لامن قربت اقع من الكرسي ,, الله يجازي محنك آآآ عبس .. غايتو زولك ده لو المصري خارج البيت او شالتو نومة بين المغرب والعشاء ديك ياااهو الخميسو ضاع وقروشو ضاعت ...

واصل يا حبيب بس ان شاء الله الراجل ما يكون رجا صلاة الصبح في اشارتكم ديك ....

تحياتي : ياسر العيلفون .....

Quote: غايتو يا عباس يوم بتكون لينا سبب يرفدونا من شغلنا ده ,,,, يا راجل انا اضحك لامن قربت اقع من الكرسي ,, الله يجازي محنك آآآ عبس .. غايتو زولك ده لو المصري خارج البيت او شالتو نومة بين المغرب والعشاء ديك ياااهو الخميسو ضاع وقروشو ضاعت ... واصل يا حبيب بس ان شاء الله الراجل ما يكون رجا صلاة الصبح في اشارتكم ديك .... تحياتي : ياسر العيلفون .....

أووووووو حبينا ياسر الفنان

اخبارك والاسرة الكريمة

تصدق كلامي طلع صاح دخلو توشك العماره ودقو الباب

زولك فتح ليهم قايل دا اخوهو جاهو عندو المفتاح التحت بتاع باب العماره

اها قعد اعتذر ليهم والله كنت خاتيهو في الصامت ونايم وواقف لط

قالو ليهو دي حالت زول نايم بتلعب علينا

الموضوع ضرب معاهم .

مشتاقين والله

.