عوووك .. المروة ... يا إخواني في دولة قطر .. إستشارة .

06:19 AM March, 13 2016

سودانيز اون لاين
علي عبدالوهاب عثمان-جدة
مكتبتى
رابط مختصر

الاخوة الكرام في قطر .. نرجو المساعدة في تقديم إستشارة

لدينا أخ كان مقيم في السعودية وتم تسفيره

لأنه كان يعمل مع غير كفيله .. وممنوع من دخوله المملكة

لمدة خمسة سنوات .. والبلد وحالتها مايلة (إستغفر الله ) ..

الاخ يريد السفر إلى قطر .. وأخبره البعض ان هناك تأشيرات

عمل متوفرة في مكاتب السفر والسياحة في السودان ..

ولديه إمكانية مادية لشراء التأشيرة

ولكن البعض شكك في هذه التأشيرات ..

ونريد منكم اخواني الاعزاء إفادتنا..

شكراً كثير .. وأنتم هل مروءة وإخوة كرام ..

هنا .. أو في الخاص .. ورقم جوالي 544068026 00966

الشكر .. والتقدير ..

مؤهلاته عادية - ثانوي - لغة انجليزية كورسات إدراية تطبيقات كمبيوتر طباعة عربي إنجليزي

أكل عيش فقط ..

**عمل متوفرة في مكاتب السفر والسياحة في السودان ..

ولديه إمكانية مادية لشراء التأشيرة **

قطر حكومـة الكترونيـة 100% ولا مجال لشراء تأشيرات.

باللاى لسـه في ناس تثق في الاحتيالات دى؟

نصيحتى أولا اعلم ان اى خدمة من داخل السودان بواسطة وكلاء سودانيين نسبة الإحتيال فيها 99% وقد تكون 100%

والـ 1% سيقوم بالأتى:

1- يشيل جواز سفرك ويعمل منه صورة سكانر - التكلفة صفر.

2- سيرسل صورة الجواز لصديقه في الدوحة الذى سيقوم بالحجز لك في فندق معتمد من الداخلية.. (الفندق هو الكفيل) - التكلفة حوالى 300 ريال

3- الفندق سيقوم بعمل التأشيرة (لاحظ تأشيرة زيارة لشهر واحد).

4- صاحبك (حسن البطل) سيتصل عليك ويبارك ليك ويعدد لك الصعوبات التي لاقاها من اجلك.. ثم يرسل لك التأشيرة بالإيميل.

كل هذه الإجراءات تستطيع عملها بنفسك.. اعمل قوقل بالفنادق المعتمدة من الدولة ثم اتصل بأى صديق لك في الدوحة، ليذهب للفندق ليوقع نيابة عنك.

الفندق هو الذى سوف يرسل لك التأشيرة.

شكراً أبو الريش .. على هذه الافادة ..

الشك كان في محله .. عشان كده أنا فتحت بوست ..

الشكر كثير ليك ..

عشانك كمان حبيت العلم في البروفايل ..

مودتي أبوريش ..

كده عرفنا حاجة مهمة جداً ..

شكراً باشمهندس نصرالدين .. عبر الهاتف ..

يا سلام زول أصيل ..

يا هو ده السودان ..

مودتي ..

السلام عليكم يا علي

.......................................

القول ما قاله أبو الريش

......................................

ثم ثانيا:

حتى اللقوا تأشيرة بصورة نظامية ما لاقين شغل .

الوضع أختلف في الستة شهور الفاتت.

............................................................

خلي زولك يتريث...

ربنا ييسر أمره و يوفقه و يحميه من النصابيين ... و ما أكثرهم..

الله يبارك فيك اخى على دى الواجب

ممكن اشتريها وسافر مالم يكن مطلوب في قضية جنائية خاصة مخدرات ودعارة وسرقه

اما الطشامه لو حظك سيء ما بتعرف زول بجلدوك وافكوك

فيز قطر قالو وصلت 20 الف ريال

Quote: ثم ثانيا: حتى اللقوا تأشيرة بصورة نظامية ما لاقين شغل . الوضع أختلف في الستة شهور الفاتت.

حبيبنا محمد يوسف .. صح كلامك .. حتى هنا في جدة الواحد بقى يتابع أسعار البترول قبل برشلونة ..

نفس النصحية من كل الاخوان ( عدم التورط مع النصابين ) دي بقت حقيقة ..

اما ناحية صبر بالنسبة لناسنا في البلد ( دي عملية بقت صعبة خالص ) ..

مودتي أخي محمد .. وشكراً ..

Quote: ممكن اشتريها وسافر مالم يكن مطلوب في قضية جنائية خاصة مخدرات ودعارة وسرقه اما الطشامه لو حظك سيء ما بتعرف زول بجلدوك وافكوك

حبيبنا عباس .. مودتي بلا حدود ..

عباس أخوي .. الواحد فينا رطاني من ضواحي الدنيا .. فوق الستين وزهايمر ..

(طشامي ) يعني شنو .هههه ..

صدقني ما فهمت المداخلة .. عمك ده زول تربال منتهي ..

مودتي بلا حدود ..

سلامات أخي عبدالوهاب,,

قابلته عند ست الشاي جالسا وطالب قهوه سكر زيادة,,

السلام عليكم,,

وعليكم السلام,,

رن تلفونه الحديث في جيبه ,, أخرجه وبدأ الحديث!!

أها,,

تلاتة مليون لشنو؟؟

طيب المرة الفاتت ما قال أتنين مليون مع الأوراق!!

ياخ أنتو الزول دا ضامننو!!!

طيب وأنا الضمنى شنو!!!!

ياخى الواحد بعد دا البدينو ما بلقاهو!!!!

أنا بضرب ليهو ما برد علي!!!!!!!!!!

أنتو مش قلتو هو قال عندو أربعة مشو قبل شهرين وإشتغلو هسة

واحد بألف دولار والتانى لقا شغل مع واحد شيخ بألفين ونص دولار!!!!

خلاص بحاول أدبر المبلغ وبكرة بضرب ليهو لكن عليك الله خلي يرد علي,,,

الله يديك العافية..

إنتهت المكالمة

مع القهوة إتعارفنا وبعد دقايق بدا يحكى لي في قصة غريبة جدا,,

واحدة بعرفا عن طريق الفيس بوك وقالت ليهو بتعرف واحد بجيب تاشيرات

شغل وإقامة في الإمارات وقطر,,

ومع الحاصل هو ومعاهو كم شاب تاني وشابة فنية معامل إتواصلو مع الراجل

وبدأ الإجراءأت لكن حركتو تقيلة ودفعو ليهو لحد هسة كم مليون جنيه!!!

والإتفاق أنو المبلغ كلو 22 مليون تتقسم حسب حركة الإجراءآت والراجل عنده

كمية محاذير وممنوعات طلبها من الشباب ومصر عليها جدا,,

ممنوع الكلام في الموضوع دا وممنوع إدخال أى شخص تاني لحدى ما هم يخلصوا

إجرأءآت!!!!

طيب يا أخونا زولة الفيس بوك دى معرفة قوية؟

أبدا والله ما شفتها ولا بعرفا لكن إتكلمت معاها!!!

والزول الإتكلمت معاهو هسه دا من الشباب المعاك!!

أيوه دا قريب الزول بتاع الإقامات دا ومسافر معانا

وشكلو كدا قريبو بسافر كتير وهو بتابع ليهو الأمور هنا!!!!!!؟؟؟؟؟؟

شكراً حبيبنا ايمن على هذا السيناريو الواقعي ..

المشكلة يا أيمن .. أهلنا يعتمدوا على 10% من الأمل والباقي مجازفة ..

الله يكون في العون ..

مودتي ..

في تلك اللحظة حقيقة شعرت بالحزن على هذا الشاب الغض,,

وشعرت بالغضب من وطن جعل من مثل أحلام شاب صغير بوابة

لنصاب ينصب بها ويسرق قريشات هؤلاء الشباب الذين سدت

في وجوههم أبواب الرزق في بلاد يسرح ويمرح فيها اللصوص

ويسرقون حتى أحلام الشباب!!

سالته يا حبيب متين حا تقابل الراجل دا ؟؟

قال لي والله عندى أخوى في امريكا منتظر

منو قروش أول ما تجي بمشي ليهو!!!

قلت ليه ياخ تسمع كلام زول ما بتعرفو وأول

مرة تشوفو أو تتكلم معاهو زى ما سمعت

كلام صاحبتك الفى لفيس بوك ؟؟؟

إبتسم إبتسامة عدم الفهم!!

تمشى تتكلم مع أصحابك المسافرين معاك ديل كلهم

وسريع جدا تمشو تقابلو الراجل دا كلكم ويا ريت لو

ما قلت ليهو إنكم جايين تقابلوه كلكم,,,,

وهو حا يكون طلب بسيط جدا!!!

لو ما أقنعكم بأي شكل من الأشكال بإنو الأمور ماشة

تمام وعندو ما يثبت وأطمأنيتو لصدقه (ولن يحدث)

ما تفكو الزول دا من يدكم لأنو بالنسبة لي القصة

دى نصبة وسرقة وكذب وإستهبال وإنت ياخ شكلك زول

فاهم والقصة دى لو حصلت حا تضربك في أى حاجة عندك!!!

وإذا أقنعكم ووراكم ما يثبت فأنتو دا حقكم وما حا تخسروا حاجة

وأظنك سامع قصص كتيرة زى دى وكل الحاصل إنك مستبعدا تحصل ليك!!!

أول كلمة قالا لي (تصدق أنا زاتى قلبى ماكلنى)!!!

تمام يا حبيب دا تلفوني أعمل لي مس كول عشان أتكلم معاك

وفرصة سعيدة وربنا يوفقك,,

بعد يوم واحد إتكلمنا ومزيدا من الونسة والشاب دارس

هندسة كمبيوتر!!!!!!!!

وحسب كلامه ماشين يلاقو الراجل في الخرطوم!!

آخر النهار اتصل بي وحكى ما حصل,,,

مشى هو ومعه الشابة وأحد الشباب والآخر مشغول شوية ومتابع معاهم!!

ومفروض إنو الزول الحايلاقوه دا هو زاااتو مسافر معاهم

حسب ما هم فاهمين!!!!

قال لي ياخ أنا المرة دي التقول عرفت القصة فيها ماسورة,,

وبعد حق الله بق الله أول سؤال بقى يتراجف ويعرق ويشرب ما يروى!!!!

قال ليهم طيب أدونى دقيقة أتصل بالزول دا وهو يفهمكم الحاصل!!!

وحاول الخروج لإجراء المكالمة!!!!!!

طلبوا منه إنو يتصل بيهو وهم معاهو !!! وين المشكلة!!!

إتلجلج وإتراجف وبدأ في محاولة الزوغان!!!

والمفاجأة كانت إنو التلفون التاني معاهو !! تلفون قريبو بتاع الإقامات!!!!

والحكاية كلللها طلعت إنو الزول دا قرر إنو الناس ديل مغفلين وطيبين

ومخنوقين وشاف فيهم كدّة مضمونه..!!!!

والقصة دى بتكرر كل يوم عشرات المرات والناس ما ببتعظ,,

تحياتى ..

كفيت و وفيت يا أخي أيمن الطيب..

بصفتي عايش هنا في الدوحة أنصح كل الشباب يخلو بالهم من النصابين و من مكاتب السفريا الل بتبيع الوهم

يا ما شفنا كيسات هنا في الدوحة ل شباب يملوهم الأمل لمستقبل مشرق و قعو ضحية مكاتب السفريات

المشكلة.. تمشي المكتب في الخرطوم يقولو ليك حنعمل ليك تأشيرة تصل الدوحة و بعد الشغل مضمون...التأشيرة ممكن

تكون سياحية عن طريق الفنادق أو تأشيرة رجال أعمال..في كل الأحوال هذي النوعيات من التأشيرات ليست أقامة

و تسمح لك بلمكوث في الدوحة لمدة شهر واحد فقط.. عشان كده الناس تخلي بالها

و أتمنى التوفيق للجميع

حبيبنا شريف .. جزاك الله خيراً ..

إذا جاء زيارة لمدة شهر .. وبحث في قطر عن عمل

هل يمكن يجد شخص يستخرج له تأشيرة عمل ليرجع الوطن ثم يعود مرة أخرى لقطر ..

في جماعة قالوا في الجيش والبوليس ولكن صاحبنا عمره شوية أكبر ..

مودتي ..

والتحية لإخواننا وأبناءنا في قطر الخير ..

في سعودية عندنا الأمر أكثر يسر وسهولة .. بس هو في قائمة الممنوع ..

ربنا ييسر أمره .. ويرزقنا جمعياً الخير ..

مثل هذه الفيز المطروحة فى السوق و الوكالات بتكون كفالة شخصية

بمعنى سائق ، راعى ، و ما شابه ذلك ، دى حتى لو لقى عمل يصعب

نقل الكفالة . إذا معه مبلغ عشرين الف ريال ، نصيحة لوجه الله يشغلها فى اى

حاجة حتى ولو ركشة.

يعنى قرابة ست الف دولار ، ممكن يمشى بيها حالو ، ممكن تعمل ليهو

مطعم صغير بقالة ، و كده.

هو كمان ياجماعة قطر داير ليهو تأشيرة.......ما يمشى السكة حديد......يقطع ليهو تذكرة ويسافر......انتو ياجماعة تعقدو المشكلة ساكت.

حبيبنا أيمن .. مودتي يا جميل ..

حليل زمن السكة الحديد ..

تحياتي ..

حبيبنا هجو .. تحياتي ..

اخي العزيز كما تعرف بعض الناس ليس لديهم عقلية تجارية أو إرادة

حكمة الله في خلقه .. في لو لقوا ربع المبلغ ده ممكن يقوموا مشروع ..

مودتي .. ولك التحية ،،

حبيبنا ود النعيم .. شكراً على الرسالة ..

نصائحك مفيدة جداً .. وشكراً كمان على التواصل ..

تعرف يا النعيم .. رغم كل هذه الظروف .. عزاءنا في هذه الاخوة ومروءة ..

مودتي .. يا سلام .. مهما قالوا عننا السودان ده غير

أزيدك على ما قاله الاخ ابو الريش بالتالي:

1- القانون القطري يجرم الاتجار بالتاشيرات ويحاكم المتعامل بها وتمنع شركته من الاستقدام لفترة بالاضافة الى وضعها على القائمة السوداء.

2-يمنع القانون القطري العمل عند الغير ويمنع نقل الكفالة الخاصة نهائيا ويمنع نقل الكفالة العامة قبل مرور عام وفي كل الاحوال يجب موافقة 4 جهات هي صاحب العمل وزارة العمل والداخلية والمعلومات الجنائية.

3- التقديم للوظائف الكترونيا ولا تقبل المستندات الورقية في كل الوظائف الحكومية

4- لا يوجد مقابل مادي في قطر للتاشيرات سوى الرسوم الرسمية التي لا تزيد على 200 دولار كاقصى حد.

5- لا وجود لشيء اسمه اقامة حرة ولا يستطيع اي شخص ضمان استخراج تاشيرة او ضمان استمرارها غير العامل نفسه وفقا لاهمية العمل الذي يقوم به.

6-تهتم وزارة العمل بتمهين المهن بمعنى ان لجنة الاستقدام قد ترفض منح تاشيرة الاقامة اذا كان تخصص الشخص غير ملائم للوظيفة.

لذلك الحصول على مهنة في قطر لا يحتاج الى واسطة بل الى استعداد من طالب الوظيفة لان الشروط اعلاه لا يستطيع اي مكتب عمل في السودان تجاوزها .

الحل الامثل هو الاستعانة بصديق لتجاوز الصعوبات

شكراً حبيبنا دكتور عبدالمطلب ..

شكراً على هذا التنوير ..

الحمدلله الواحد فتح البوست ده قبل ما يتورط ..

ما شاء الله الأمور مرتبة خالص في قطر ..

لا مناورة لا زوغة ..

مودتي لكم وتدوم الاخوة