عكس التيار

02:32 PM March, 08 2016

سودانيز اون لاين
عباس الدسيس-Saudia
مكتبتى
رابط مختصر

يحكي لينا زميلنا بالبنك له الرحمة فاروق ((ودالنقاش)) ايام مايو كان هنالك سباق سباحة وفاروق عندو اخو اسمو محمد ودالنقاش سباح ويعتبر من اميز سباحين مدني

السياق كان في الخرطوم علي النيل الابيض وفيهو ناس كيجاب وسارة جادالله وممدوح ومجموعة من السباحين نزلو النيل الابيض ومعروف عن النيل الابيض التيار ميت انطلق السباق.

محمد ود النقاش كان الطيش اخوهو فاروق متابع السباق ببوكس الجماعه لما فاتو ود النقاش فاروق طلعو من النيل وركبو في البوكس وجري بيهو كم كيلو ونزلو النيل ومشي نهاية السياق منتظر محمد ود النقاش اول السباق.

المفاجأة كيجاب كان الاول قالو ممكن التاني طلعت سارة أها لما جاء طيش السباق ود النقاش ما جاء في توزيع الجوائز ظهر ليهم جاي جاري بي رجلينو بالبر.

اتضح انو ود النقاش لما نزلوهو البحر تاني راسو ضرب وعام عكس التيار وقت الجماعه وصلوهو لقوهو منتهي لا قدر اواصل معاهم عشان اكون الطيش تاني لا قدر اواصل السباحة بالنيل.

نواصل

عكس الريح

ههههههههههههههههه ..

والتأويل ظاهر ..

فالنهر نهر الحياة ..

والبوكس انقلاب 30 يونيو ..

واخو ود النقاش الحركة الاسلامية ..

ود النقاش اللأخ المرحوم ..

عملتها ظاهرة يا دسيس ..

بداية عملنا بالخدمة المدنية وبعد المعاينات والاجراءات البقولو عليها تم توزيعنا لاقصي غرب السودان وين مدينة زالنجي كما خطر بخيالي القصد من التوزيع البعيد عشان نقول ما دايرين نمشي . وبما إننا ما صدقنا لقينا لينا وظيفة لمينا عفشنا واستعدينا للسفر العفش كان جلابية وعراقي وبنطلون وقميصين كل ما نمتلك من هذه الدنيا الفانيه بقينا في حكاية السفر كيف سألنا لقينا في ناس بجيبو ليهم تذاكر طيران لي نيالا او الفاشر ومنها فرع البنك بقوم باتمام الباقي الي مدينة زالنجي الحال معانا اختلف ادونا نثرية ((قروش)) وقالو لينا اتصرفو امشو بي بصات بي طيارة بي رجليكم علي كيفكم وكما يقول صاحبنا احنا ناس الضهاري لقينا لينا قروش في الخرطوم وهاك يا بعزقه كافتريات وقاعة صداقة وحاجات تانية حامياني القروش انقرضت بعد ما فكت السكرة جات الفكرة زميلنا سألني السفر حسي كيف والقروش انتهت.

سمعت قالو ممكن تسافر لي نيلا بالقطر بدون قروش شلنا الهاند باك وتوجهنا لمحطة القطر يوم الاحد قالو القطر بقوم يوم الاثنين والناس مفترشه الارض حجزنا لينا ركن للمبيت تاني يوم لقينا لينا حاجة طيبه معاها ولدا مسكناها الشنط الناس زمان ما بتخاف لو حسي مافي زول بمسك ليك شنطة احتمالية فيها بنقو او ممنوعات الزمن والحكومات تجي وتغور والحوجة فسدت اخلاقيات الناس .

حجزنا في الممر محل تخت فيها صلبك وقام بينا القطر احنا خاشين علي كوستي عمنا بتاع التذاكر من بعيد لمحناهو زميلنا قال لي الدبارة كيف لو نزلنا في كوستي تاني الا نبيع كجيك .

توجهنا للسطح بعد كوستي بقينا ننوم بالتناوب عشان واحد ما تشيلو نومة وإقع من القطر في نوبة نومي صحيت علي عكاز عسكري الكذ في ضهري والشمطه حاصله بين زميلي والعسكري ((من وين جيتو وماشين وين والظاهر انتو الحرامية بتاعين القطر...الخ)) .

صحيت والاجابة في طرف لساني ..... يا دفعه احنا عساكر !!!

وقامت الشمطه عساكر ديش و ل بوليس ولو ديش في ياتو حامية ولا تبع منو ؟؟

اها لي درجة سمعت ليهو الجلالات...

ياهوي يا ميري .... سمبله ماهية مافي

دا الواسطة خرب الدولة .... يا سمبله ماهية مافي

بين الجبلين فقدنا رجال .... طابورنا الحار ما بندار

انا ماشي نيالا .. هو ..هو.. انا ماشي نيالا هو ..هو..

عاجبني جمال سمبلا .... يومنا ماجاء .. يومنا ماجاء

انا ماشي نيالا .. هو ..هو.. انا ماشي نيالا هو ..هو..

السونكي ركب هي ها.. هي ها ..

يومنا ما جاء ... يومنا ما جاء

صبيان صبيان فزيتو السونكي ركب فزيتو

السونكي ركب فزيتو.....

كنت مفتكر حكاية عساكر بتكون مراقة وما انتبهت لي انو شعري مخنفس ومع النوم وعدم الحمام الشعر بقي ملفلف ختا فيهو العسكري العكاز وقال بي ضحكه شماته وعيونو بتقول يا مستهبلين قبضكم ((يلا يا عساكر بوب ماري معاي سجن القطر مفتكرين بتلعبو علي انا في عسكري خنفس)) طبعا ما ممكن نقول ليهو بعد كدا عساكر في الامن هو في زول عاقل بنتسب لي جهاز الامن.

نزلنا سجن القطر يااااااااااااه دا مريح بشكل تنوم وانت مطمئن لا إنقلبت وقعت لا زح لي النمشي الحمام وانتو المقعدكم في الممر شنو وهاك يا نومه طلعت تعب السنين...

تعب السنين لي معاها ذكري..... زول صديقنا شالو الصالح العام لملم قروش وباع الموتر حقو اشتري فيزا وجاء السعودية معانا في بيت العذابة اخوهو عندو غرفة سكن معاهو الراجل كم يوم الموية غيرت معاهو لسانو جفا وبقي ما بقدر ابلع بعد شوية جاتو حمه وشكلو اتغيير اخوهو قال ليهو لازم نوديك الدكتور الراجل رفض وقال ما تتعبو روحكم دا تعب السنين في السودان.

بعد فترة اكتشفنا اخوهو غتيت مرقدو في السرير الضارب فيهو المكيف الاسبلت.

اها قعدنا في سجن القطر مرتاحين فندق خمسة نجوم من محطه لي محطه نسمع ليك كركبة العواميد رئيس الوردية صول راجل طيبان تأبي نفسه أن ياكل لوحده .. يا اولادي اتفضلو معانا... وقت هم اجيبو الموية واغسلو يديهم احنا بنقطع نص المشوار.

اكتشفنا انو العساكر ديل العن مخاليق الله في التبادل في المحطات كل زول عندو عشيقه ترفع العامود وبه الطيبات في واحدين منهم مصبنين قزازة العرقي وخاصة الصول القلنا طيب واقف لط ما قلت ليكم فندق خمسة نجوم.

وقت فتنا الرهد وابزيد احنا نايمين ماكلين ولو عايزين ممكن مسنسنين...

العسكري الجابنا حاول استجوبنا تاني.

يا اولاد انتو حقيقتا من وين وماشين وين ومسطحين لي شنو ؟؟؟؟ انت يا ابخنفس اسكت خلي التاني اتكلم.

شعرت زميلنا ممكن اورطني قلت اجوطا.....

يا جنابو احنا كذبنا عليك حقيقتا حقيقتا احنا طلبة!!!!!

نط عمنا الصول واقف لط كبس دين للعسكري الجابنا ودين لي الجامعات ودين للطلبة وقال ليهو طلع الناس ديل امشو السطح اموتو اتحرقو ما عندنا شغله بيهم ديل كملو اكلنا وفيهم واحد لقيتو بشرب من قزازتي لما سالتو قال قايلها موية الله لا كسبك يا عسكري غير المصائب ما يتجيب لينا حاجة.

نزاصل..........

Quote: عكس الريح

احمد الشايقي يا حبيبنا اخبارك

المهم ما نقبضو

وتلك الأيام نداولها بين الناس

الناس بقت عايزة تصل النهاية السعيدة باي طريقه

وما عارفه النهايات العظيمه يصحبها الحزن

تحياتي وتقديري

هههههههههههههههههه

والله يا عبس أنت الفيها

أنا مرافقك سبعة سنوات وقايل حكاويك كملت خلاص

أتريك لسع مليان

واصل يا زول يا نيل

Quote: نط عمنا الصول واقف لط كبس دين للعسكري الجابنا ودين لي الجامعات ودين للطلبة وقال ليهو طلع الناس ديل امشو السطح اموتو اتحرقو ما عندنا شغله بيهم ديل كملو اكلنا وفيهم واحد لقيتو بشرب من قزازتي لما سالتو قال قايلها موية الله لا كسبك يا عسكري غير المصائب ما يتجيب لينا حاجة.

يا ريكس ...

بختكم ... راكبين ...ماكلين .. شاربين ... .

عالم بطااله ..

هههههههههههه

الله يجازي محنك جهجهتو حضرة الصول

واصل يا اخي ...

Quote: ههههههههههههههههه .. والتأويل ظاهر .. فالنهر نهر الحياة .. والبوكس انقلاب 30 يونيو .. واخو ود النقاش الحركة الاسلامية .. ود النقاش اللأخ المرحوم .. عملتها ظاهرة يا دسيس ..

ودالمشرف سلام يا حبيبنا

ياخ انت فقري وبتنوم بدري

الفات ..... الفات

فى دينو سبعة لفات

الجبه وقعت فى البير

وصاحبها واحد خنزير

الصول ضرب التلفون

والعسكر واقف طابور

Quote: وقال ليهو طلع الناس ديل امشو السطح اموتو اتحرقو ما عندنا شغله بيهم ديل كملو اكلنا وفيهم واحد لقيتو بشرب من قزازتي لما سالتو قال قايلها موية الله لا كسبك يا عسكري غير المصائب ما يتجيب لينا حاجة

الشرك قبض يا دسيس

يلا واصل الحكي الطاعم

أحمد الشايقي

جني وجن الــــ ـكلاب

صديق لينا من المحاميين الله اطرا بالخير بالليل والمحلات المضلمة ما بباريني الجماعه سألوهو ليه ؟؟؟

قال ليهم الزول دا فيهو عرق فلاته انت ماشي معاهو الكــــــــــ ـلاب تقول جووووووووووو ...وساكاك

يعني لو في زول بنبذ في ناس الامن وقال ((كــــــ ـلاب الامن)) بتجيني حالة.

الحكاية جاية من مرة عضاني كلـــ ــب والكراع عادية مافيها حاجة خير اثار سنون انتشر الخبر....

بعد كدا تعال شوف المنظراتية ، يازول امشي اخذ الحقن بطريقتك دي يومين وتقعد تهوهو وجماعه اعتزلو الجلوس او حتي المقابلة معاي قالو ممكن تجيني الحالة واعضي واحد إقعد اهوهو زي وفي جماعه قالو الحكاية دي باللعاب بتعادي الزول دا لو كنت بتاكل معاهو في صحن فته وطارت حاجة منو ولا اتلخبت لعاب خشمو بي الفته بعاديك.

اها البسلم عليهو من بعيد بفك لي الشارع لسؤ حظي جاتني قحه بالله في دكان في السودان زمان ما كان ببيع ساعوط.

وقفت في شباك الدكان قلت ليهو اديني ساعوط وبين اديني والساعوط قحه وبين الكلام الباقي سلسلة قحات.

الراجل قال لي مافي ساعوط !!!

كيف مافي ساعوط وانا شايف الحقه قدامي؟؟؟

قال لي فاضيه خلصنا شطبنا ما بتفهم

قلت ليهو: شايف بواقي ساعوط مرمية في التربيزة ... والقحه شغالة معاي

قال لي: اقول ليك عندي ساعوط وما ببيع ليك انا ما حر بالله زح لينا من الشباك بي هوهوتك دي يعني عايزين ارمي ليك لحمة هناك في الفسحه عشان تزح اختانا والله اقوم عليك بالعكاز المضبب دا اخليك حسي بدل تهوهو تعوعي.

دخلت في حالة نفسية شبيه بي حالات ناس الامن لما الواحد الناس تتهرب منو في الحي وإعاملوهو زي النكره.

مشيت المركز الصحي الظاهر المساعد الطبي عندو خبر من بعيد وقفني وكلم الفراش قال ليهو هاك اديهو الورقه دي امشي المستشفي طوالي.

مشيت العيادات الخارجيه حولوني الصيدلية لحقن السعر

الصيدلي قال ما عندهم هنا ممكن تكون بي الصيدلية الداخليه لانو بتحتاج تلاجة وبحتفظو بيها هناك

مشيت الصيدلية الداخليه قالو لازم إوقع عليها المدير الطبي

مشيت للمدير الطبي الراجل مافي في اجتماع مع ناس العون الذاتي البلقطو القروش لدخول زوار المستشفي معقوله اكون فاضي لي انا ولي حكاية زول عضاهو كلــ ــب ول نعجة لو بقيت القط العضام بالكوش ما عندو بي شغله.

رجعت الصيدلية وانا بحكي ليهم في قصة المدير الطبي جاء واحد داخل بعرف الصيدلي الظاهر من ناس الحكومة التريانيين ولدو خربشو كلـ ـب شايل ورقه تشبه ورقتي... اقول ليكم بت عمها واخوتها وممكن تقول هي ذاتا لا قالو ليهو المدير الطبي عايزين توقيعو لا ولدك الكلـــ ـــب عضاهو وين طوالي الصيدلي مشي للثلاجة وطلع كرتونة الحقن وختاها في الكاونتر عشان اسلم الزول الجرعات.

عليك امان الله ختفت الكرتونه بي حركة تقول حامد بريمة قون المريخ المستشفي كلها اتلمت الفراشين البوليس الموظفين الزوار وجميع مخاليق الله ممكن اكون فيهم البعضو ديلاك بس تعرفهم كيف بكونو لابسين ملكي والناس كلها تحنس ....

يا ولدي ما تدي الناس كرتونتهم

وانا واقف بالله التقول واحد من ناس داعش ملان متفجرات ورافع الكرتون فوق راسي قلت ليهم البقرب مني بضرب بيها الواطه واكسر الحقن.

والمفاوضات اشتغلت ولمة الناس تزيد ... يا جماعه في شنو.... والله زول عاضيهو كلـــ ـــب وختف الكرتونة زي السعران وقال يا ادوهو حقن يا بكسرها.....

في النهاية ادوني الحقن وكمان معاها الطعانات وحق المواصلات واسلم الكرتونة بعد اطلع باب المستشفي وما عايز اي زول لابس لبسه سفاري جمبي.

تكرار

Quote: هههههههههههههههههه والله يا عبس أنت الفيها أنا مرافقك سبعة سنوات وقايل حكاويك كملت خلاص أتريك لسع مليان واصل يا زول يا نيل

ابوالدر يا صديق اخبارك واخبار الاسرة الكريمة

من البوست بديك ايحاء بان المدارس في اجازة

لو ما المدارس ماسكانا وتوابعها الحكي راقد

ربك اهون

تحياتي وتقديري

Quote: يا ريكس ... بختكم ... راكبين ...ماكلين .. شاربين ... . عالم بطااله ..

يا مجيدو يا حبيبنا اخبارك

كمان نسيت الحكاية في القطر

تحياتي وتقديري

سلام يا دسيس,,

عضة الكلب هينة لكن كعبة عضة النعجة

Quote: عضاهو كلــ ــب ول نعجة

لسة راجيك في أصل رواية (اجى يا مدنى)

تحياتى

Quote: هههههههههههه الله يجازي محنك جهجهتو حضرة الصول واصل يا اخي ...

سلام ياحبينا علي دفع الله

جهجهة الباكات بترفع الكورنر

شاكر ومقدر للمتابعة

Quote: الشرك قبض يا دسيس يلا واصل الحكي الطاعم أحمد الشايقي

احمد الشايقي يا حبيبنا

ما تقراء بي ترجمة قوقل هههه

Quote: لسة راجيك في أصل رواية (اجى يا مدنى) تحياتى

ايمن الطيب يا حبيبنا سلام

انت ملح علي حكاية أجي يا مدني:

ايام السوق الشعبي زحمة والمواصلات غير متوفرة والدنيا عيد الناس كانت بتركب بصات سنار وتنزل في مدني جات زولة عمرها فات الاربعينات وحلات الشلوخ في جضموها البص بتاع سنار واقف محل الباب القدامي راكبات نسوان مدت راسا وقالت ليهم البص دا ماشي مدني قالو ليها لا ماشي سنار مشت تفتش في البصات التانية عن بص مدني ما لقت اضطرت ترجع تركب باص سنار رفعت رجلها وهي زوله في صحة تمام مع الطلعه جاتها ريح من بطنها ((ضرطه)) لما ركبت سلفا عارفه دا بص سنار ما سألت أها قالت تعدي الموضوع مافي زول عرفها نطت ليها واحده شليقه قالت ليها ((أجي يا مدني))