الله يسامحه ويعفو عنه .. أول مرة أصادف حاجة كدا

08:24 AM March, 06 2016

سودانيز اون لاين
طلحة عبدالله-
مكتبتى
رابط مختصر

لأول مرة في حياتي أشوف ميت يجمع الناس على كرهه وشتمه

والإحتفال بموته ..

لفيت تقريبا كل المنتديات والقروبات والتجمعات والمجالس

المتوفرة في الأسافير فما لقيت إلا كراهية منقطعة النظير

لهذا الرجل .. بل حتي في الواقع لم يتكلم عنه أحد بالخير أو يترحم

عليه إلا ما ندر ( أتكلم طبعا الناس القابلتهم أمس واليوم )

معقولة ؟؟؟

سبحان الله .. والله أول مرة أصادف حاجة كدا .

سلامات طلحة

ده حساب سياسي وحق مشروع في حق من حشر نفسه عنوة في ادارة شؤون البلاد والعباد

وقفز للسلطة عبر العسكر بعد ان انقض على نظام ديمقراطي منتخب (وامرهم شورى بينهم) لان المواطنين لفظوا حزبه وبرنامجه

الى حيث يريد الله ... لو كان الامر بأيدينا لاخترنا مايليق به

الله كفيله

العزيز .. طلحلح ..

صباح الخير .. وصباح البلاء الانجلي ..

Quote: لأول مرة في حياتي أشوف ميت يجمع الناس على كرهه وشتمه والإحتفال بموته .. لفيت تقريبا كل المنتديات والقروبات والتجمعات والمجالس

يا طلحه من احبه الله احبب الناس فيه .. والعكس تمامآ .

___________________________

بلاء وانجلي .

والله بصراحة يا حيدروف ترك سيرة مفعمة بالبغض والكراهية
ربنا يسامحه ويعفو عنه ..
السودانيين أصحاب قلوب كبيرة يترحمون على الميت ويدعون له بالمغفرة
حتي ولو كان مكروها في حياته .. لكن ما شفت هذا التسامحللترابي ..
يبدو أن الكراهية غير متناهية .لا حولااااااااااااااااا ..
والله لا أتمني أبدا أن يكرهني الناس بهذه الطريقة .

والبعض حزين لانهم كانوا يريدون محاسبته

ما طالبني حليفة

استاذ طلحة سلام

تحياتي للعزيزتين مني وإخلاص

مبالغة والله

دي حاجة مذهلة وفوق التصور .. والله أنا داخل في رعب عديل .

المنبر الصفحة الأولي كلها تنز بكراهية هذا الميت

والفيس بوك إحتفالات مدورة

والواتس شماتة لا حدود لها رغم أنه لا شماتة في الموت

وكذا في الواقع ..

لا حولاااااااااااااااااااااااااااااا

اللهم لا تميتني هكذا .

يا طلحة يا اخوي كيف حالك

يا اخوي كلامك دا ما صاح

او علي الاقل ما دقيق

اسه انا القدامك دا بتجيني رسائل في الواتس

من ناس ما عندهم اي علاقة بالحكومة وبكرهوها عمي

ونفس الشيء الشعبي

رسائل كلها ترحم علي الميت والتحدث عنه

بصورة إيجابية

والله لما انا ذات نفسي متفاجئ

ومستغرب في الشعب السوداني دا

ناهيك عن المشاهد الشفتها في التلفزيون في التشييع

وانا القدامك دا لو سألتني امبارح عن رأي فيهو

كان قلت ليك سالب

بس دلوقت

ما بحمل للرجل اي غل

ولا يجوز عليه الا الرحمة

ولو ما دائر اغرق ليك البوست

بنزل ليك الرسائل هنا دا الملت لي الواتس لما حيرتني

رحم الله الرجل

فقد ذهب عند مليك مقتدر

ان شاء غفر له وتجاوز عنه

كلامي ياتو الما صاح يا أسامة الإمام يا خوي ؟؟

بتكلم عن حاجة شفتها أنا ما أنت .. وقلتا الكلام فوق

دا .. يعني أنا ما لاقاني الكلام اللاقاك دا .. وبالطبع ما بقدر

أقول ليك كلامك دا ما صاح باعتبار انو فعلا لاقاك كلام عكس

ما لاقاني .. فما عارف الثقة الخلتك تنفي حاجة شفتها أنا شنو ؟؟

من تالاني أنا مصدقك أنت لو ما عايز تصدقني فدي حاجة بتخصك

لكن ما بتنفي مشاهداتي بأي حال من الأحوال .

أعتقد انك ما كنت موفق في المداخلة الفوق دي .

انا يا طلحة موفق ولا ما موفق دا من عند ربنا

وما توفيقي اوعدمه الا بالله العلي القدير

الشئ التاني ارجع لكلامك الفوق شوف انت عممت كيف

وانا علشان ما بحب اللولوة الفي البورد دا

يا طلحة يا اخوي

قلت ليك كلامك غير دقيق

انت كنت بتعكس في صورة

كانو في اجماع من كل السودانيين في موضوعك دا

وبرضو ربنا يرحم الرجل فهو عند مليك مقتدر

يا أسامة يا حبيب

كلامي واضح جدا أعتقد

الناس البتكلم عنهم ديل الناس الشفتهم أو قريت ليهم في المنابر

والأسافير القلتها دي .. ديل كلهم أجمعوا على كراهيته كما ذكرت فوق

ما قريت أو شفت عكس كدا .. يعني الإ‘جماع دا ياهو في الحدود الذكرتها

فوق دي .. ما قلتا ناس السودان والعالم الإسلامي .. أنا ما عارف اتا عايز

تغالطني في حاجة شفتها أنا ليي ؟؟؟

بعدين ياخ قلتا في العنوان ربنا يسامحو ويعفو عنه وما أبديت أي مشاعر

نحو كرها أم حبا لأنو بالطبع أنا ما مطالب بالإفصاح عن مشاعري ناحيتو

أكرر ليك تاني

إجماع الناس دا محصور في القروبات والواتس والمنابر الأنا شفتها

ومريت عليها لغاية لحظة كتابة البوست دا .. طيب خلاص ممكن أستبدل

مداخلة غير موفقة بمداخلة مستعجلة .. يعني بدون ما تفهم أنا قلتا شنو .. كدا كويس ؟؟

يا طلحة يا اخوي

والله ماني مستعجل

كلامك دا يبقي صاح

لو استثنينا

منبر بكري دا

من حسبتك دي

ودا طبعا ما ممكن

لسببين

الأول انو اكبر موقع للتواصل يتم فيهو التفاعل والتلاقح بين الآراء المختلفة

الشئ التاني

هو الحكم البيني وبينك

اسه بالله عليك

شوف الاصوات النشاز ياتا

البترحموا عليهو ولا البشتموا ويسبوا ويلعنوا

وربنا يرحم الرجل فقد ذهب لربه

وربنا يديم الود ويصفي القلوب يا حبيب

Quote: كلامك دا يبقي صاحلو استثنينامنبر بكري دا

؟؟؟غايتو يا أسامة إلا تكون شايف منبر تاني غير المنبر الشايفو أنا دا
ياخ أكتر من عشرة عناوين في صدر الصفحة الأولي تؤكد على كلامي ..
كدا طالع الصفحة الأولي دي ..
بالنسبة للواتس والفيس والقروبات الفيهم فدي لو غالطتني فيها تكون عايز تغالط بس
لأنو المعلوم انو البشوفو أنا ما بتشوفو انت والعكس لسبب بسيط انك ما مضاف عندي هناك .

ولعلمك يا أسامة البوست دا فتحتو أنا قبل ما أتصفح المبنر دا

كتبتو بناء على ما شفتو وقريتو في الواتس والفيس بوك وبعض

المشاهد الواقعية .. يعني المنبر وما فيهو من كراهية غالبة

زيادة للشفتو .

جيب العشرة عناوين ديل

وادخل جوة شوف الناس رادين ليهم شنو

هم كم واحد بتنطط من هنا لهنا

ومعروفين بالاسم

وغلبم البسو

ولو داير اشخصن المواضيع كنت جبتهم ليك بالاسامي

ثم ثانيا وحات الخلقني وخلقك ما داير اغالطك

اها واسه دي

هادي قفلة للموضوع دا وبالضبة والمفتاح

اها كدا كيف معاك

لما يجيك ابوحسين اسه دي

ههههههههه

يا أسامة والله أنا ما مع ديل ولا ديلك

رأيي انو دا زول ميت ينبغي الترحم عليه والدعاء له لا عليه

مهما أبتلاه الله من موبقات ..

البوست بتاعي دا عكس لواقع بس ما أكتر من كدا

وللتعبير عن دهشتي .

سلامات ياطلحة ..

ردود الفعل تقريباً متساوية بين شامت ومترحِّم ـــ على الأقل فى المنبر ده ـــ .. ولكن طبعاً إنطباعك ربما نتيجة تفاعلك فى صفحات وقروبات معادية للترابى ..

المهم فى موضوعك ده إنو عاوز أقول أن مبلغ الخصومة فى بلدنا وصلت مرحلة الفجور وسفك الدماء .. ويمكن معظم من قرأتَ لهم وصلوا مرحلة من فجور الخصومة مدىً بعيد ..

ولو أصلو كراهية الناس تُقاس بالصوت العالى لتقييم المقامات أنظر لكراهية الشيعة للصحابة الكرام وأم المؤمنين .. وهم الذين يسبونهم ليل نهار منذ فجر التاريخ .. أو كدى أقنِع الجمهوريين بأن أستاذهم لا يُذكر بالخير عند كثير من السودانيين

الله يرحم الترابى .. ربما اجتهد فأخطأ .. ولكنه كان ذو مشروع طموح .. كان يريد توحيد كل الحركات الإسلامية فى العالم لتكوين كيان إسلامى كبير كقطب عالمى يوازن القوى الكبرى.. لكن إجتهاده فشل لأنه وتلاميذه ليسوا قدر االتحدى .. بل إن المتحمسين المخلصين للمشروع منهم رحلوا من بدرى وتبقى الإنتهازيون الفاسدون .. والنتيجة أن المشروع جاب لينا الهوا ..

على أسوأ تقدير/ أحسن تقدير (حسب وقوف القارئ من مداخلتي)، ده أظنه أول متوفى يختلف الناس حول الدعاء له أم عليه.

انا مشترك في عشر قروبات سياسية واتسية يا طلحة غير المنتديات

ورب الكعبة كل الاعضاء .. اقول كل الاعضاء باستثناء اثنين او ثلاث

كلهم بنتقدو - ما داير اقول بشتموعشان الامام ما يبقا لي في رقبتي - بنتقدو

الترابي والمتداولة بكثرة هي ( اذكرو محاسن موتاكم )

نسأل الله له المغفرة والرحمة.

وأسأل الله أن لا يجيب يوم يشمت أحد على موتكم.