Post: #1 Title: من معارف البادية (1): القشة أم شِريي .. شر مستطير لو قعت فيها .. ما العلاج؟ Author: بريمة محمد Date: 03-04-2016, 05:32 AM Parent: #0
04:32 AM March, 04 2016 سودانيز اون لاين بريمة محمد-الولايات المتحدة، ولاية فرجينيا مكتبتى رابط مختصرفى بعض الأحيان يأكل الأنسان شطة حارة .. وبكثرة .. لزوم الشية والمرارة النية وغيرها .. فالشطة هنا جزء من المشهيات السودانية المعروفة .. مثلاً الشطة بالدكوة تضفي مذاقاً مغايراً للطعام .. والشطة بالليمون تسيل لعاب الجائع والشبعان علي السواء .. والشطة "دنقابة" .. شطة صغار الحجم .. ومن شدة حرارتها "تمعط" رموش من يحصدها من أهل جنوب كردفان .. والشطة "أم زنباق" شطة كبار الحجم .. وقليلة الحرارة فهي تطفي نكهة حلوة علي الطعام .. وغيرها من أنواع الشطوط ..
لكن المصيبة الكبيرة ليس فى لذة وشهية الأكل التى تجلبها الشطة .. المشكلة حينما تأتى ساعة الأخراج ..!
-------
الباقي تموه خيال .. كما دأب يداعبنا ول أبا الأمين البشاري ..
بريمة
Post: #2 Title: Re: معارف البادية: القشة أم شِريي .. شر مستطير � Author: بريمة محمد Date: 03-04-2016, 05:43 AM Parent: #1
ومشكلة الشطة لو طارت لك فى عينيك .. أو قولوا لو عايزين تشوفوا الهول حينما تقع لإحد الأطفال فى أعينه .. يقوم الشافع الدنيا ولن يقعدها ..
فى البادية هنا قشة تعرف بأسم "أم شريي" .. أي القشة أم شرا .. وربما صيغة "شيريي" هى من المبالغة فى الشرى.
هذه القشة تنبت خضراء وزاهية مع الأعشاب فى جنوب كردفان وجنوب شمال كردفان .. وبطبع إنسان البادية الخلوي حين يذهب الخلاء يستعمل الأعواد الجافة للنظافة أو ما يسمى "الأستنجاء" .. قليل جداً ما يستعملون الحجارة، علماً هى الأفضل دينياً فى مسألة الأستنجاء .. لكن فى بداية الرشاش يميل الناس إلي إستعمال الأعشاب النامية نسبة لنعومة ملمسها وكثرتها وسهولة تناولها .. ومن بين تلك الأعشاب ربما هنا قشة واحدة يتمة من قش أم شريي ..
فإن حظك الأعثر أوقعت فى المشمشة بالقشة أم شريي فإن يومك قد ضاع .. تصيبك حكة فى مخارجك يستحيل معها فعل أي شيئ غير أن كل أهتمامك ينصب فى ذلك الموقع .. القشة أم شريي تأكلك أكل !
بريمة
Post: #3 Title: Re: معارف البادية: القشة أم شِريي .. شر مستطير � Author: بريمة محمد Date: 03-04-2016, 05:53 AM Parent: #2
ذذات مرة فى قريتنا فى شمال شرق كادقلي قبل أن يهجّرنا التمرد إلي قرانا فى شمال كردفان، خرج أمام مسجدنا للزراعة ومعروف عنه يحمل أبريقه معه طوال اليوم .. ولحكمة يعلمها الله نسي الفكي .. وهو لقبه "الفكي" أي الأمام .. أبريقه .. وأراد الخلاء .. فوقع فى شر القشة أم شريي .. وللعلم الفكي رجل مدينة فى الأساس وليس رجل رعوي ..
ظل الفكي يكرش عرنونه .. طوال اليوم .. ثم لم يلبس أن دخل أضاة ماء .. وأغتسل فيها أكثر مما يغتسل من الجنابة لكن النافع الله .. ليس هناك حل منها إلا حل وحيد يعرفه البقارة .. فى صلاة العصر والمغرب والعشاء لم يحضر الفكي فظن الناس مكروها ألم به .. فقيل لهم أصاب القشة أم شريي حينما ذهب إلي الخلاء .. فلعن الحضور القشة كالعادة.
وإذا أصاب شافع هذه القشة حين المشمشة .. فأنت لا تري هول فى الدنيا أكبر من هول ذلك اليوم .. فالشافع يصرخ بأعلي صوته ويملص ملابسه عريان نجل، ويفتح مؤخرته للهواء الطلق .. وأيضاً النافع الله.
قشة لعينة بكل المقاييس ..
بريمة
Post: #4 Title: Re: معارف البادية: القشة أم شِريي .. شر مستطير � Author: بريمة محمد Date: 03-04-2016, 05:56 AM Parent: #3
الماء .. ليس حل مع القشة أم شريي ..
مع ذلك البقارة يعرفون كيف يتخلصون من القشة وبأسرع وقت ..
نترككم لكي تفكروا قليلاً فى الحل .. وهو من معارف البادية النادرة.
بريمة
Post: #5 Title: Re: معارف البادية: القشة أم شِريي .. شر مستطير � Author: بريمة محمد Date: 03-04-2016, 06:06 AM Parent: #4
أنا اليومين ديل قاعد أكتب فى حاجة أسمها Baggara life Survival Guide فهو عبارة عن موجز أو مختصر لكيف تعيش الحياة البقارية .. مازلت أجمّع فى مادته ..
وهنا أستشارتى لكم أبناء المدن وزوار البادية أو الذين يأتون للعمل فى المناطق النائية فى تلك الأصقاع، عليكم بالأستنجاء بالحجارة أو التراب .. وبالعدم الأعواد الجافة .. ويجب نزع قشرة العود .. لكن هناك أيضاً الشجرة أم شريي .. لكنها معروفة لأهل البادية ويسهل تفاديها حتى للذي لا يعرفها .. ويقع الأنسان فيها بالخط حينما يتناول عود جاف منها ..
حزاركم حزاركم من الأعشاب الكردفانية .. وكون أشد حزر لو جايين فى شكل نزهة أو مجموعة دراسية .. حتى لا تصبح مضحكة أمام زملائك ..
ولا عذر لمن أنذر .. والله المستعان لو حصل وقعت فى الأمر .. الحل قادم.
كتر خيرك على الإثنوغرافية الطريفة دي..و بندعمك بقدر ما تيسر لينا..!
غايتو الفكي بتاعكم.. محظوظ.. لأنو لو صابتو في موسم الدرت وحراية الدرت البتنجض الحاجات ديك..يكون لغاية الليلة قاطع الحوحوة في حنانو..!!
طبعا يا ولد ابوك..حتى ناسك البقارة بيكونوا مسطحين.. لأنو ام شريي دي الإ ناس الخلا حتى يجيبوا ليك خبرها..ولكن..!
الناس بتعرف المثل البيقول (الحسنة في الملعون ، زي الشرا في القندول)..وفي نفس الوكت بيجيبوا تصريف عجيب..كما ظهر في غنا حكامات البندر (جاياك يا اب شرا ، جاية افتو معاك يا اب شرا)..لكن نوهائي ما ح تربط ليك الشغلانة دي باسم القشة الإنتا جبت اسمها ، ومن عجب ياها القشة ست الإسم..يعني نظام (الخيل تقلب والشكر لي حماد) ..يعني القشة تسوي فعايلها بكل بطولة..و الشكر يكون لكائنات اخرى..!!
واليومين ديل شايف الطالع في الكفر .. شيخنا يوسف اب شرا..واب شرا الكبير عندو قبة في مدينة الأبيض..!!..والناس ممكن تغني باب شرا ليل ونهار..لكن الشرا هو شنو ..مافيش حد جايب ليهو خبر..والقشة ام شريي هي شنو مافيش حد جايب خبر ولا على استعداد يربط بين الأشياء..!
ولمن انتا قلت (القشة ام شريي)..اشتغلت شغل نضيف في التفريق بين الحاجات..فهناك ايضا (الدودة ام شريي)..وهي رمادية اللون..وكن دخلت بين جسمك والملابس..الضحك شرطك..خصوصا لو كان الطقس حار زي حراية الدرت..!!
اثر (القشة ام شريي) و (الدودة ام شريي) على جسد الإنسان اشبه باثر البمبان الإيراني الكانت بتفكوا فينا قوات الإحتياطي المركزي لمن كنا زمان قاعدين نمرق في المظاهرات..!!
طبعا كنت ح اقول للفكي بتاعكم: يتمسح بالطين..!!
ولغاية الليلة.. منتظر بعض اخواننا من ناس الكيمياء يشرحوا لينا سميات ام شريي (سواءا كانت قشة أو دودة) ودور الطين في مسح اثر ســُمياتها..!!
وهل تصدق يا بريمة..سلاح تفريق المظاهرات في كندا بيقوم علي فكرة الشطة الدنقابة (بخاخ الشطة) ..والنساء هنا ، كل واحدة بتكون شايلة معاها (بخاخ شطة ) لزوم العوارض والآفات والمهاجمات السايبة..اها باقي ليك الخلق دي لو عرفت قيمة (القشاية ام شريي) ح تسوي شنو؟..
في تقديري ، (القشاية امشريي) سلاح كيماوي يا ولد ابا.. والله يستر ما يقع في عيون الحاقدين..!!
شريي هي تصغير شرا يا عالم هوي..!!
ليه ناس البندر بيقولوا اب شرا ، والبقارة بيقولوا: أم شريي..؟
دي جكة تانية وبعيدة المقاربات..وانا ما فاضي ليها تب..!!
في حياتي ..مريت بالأثرين.. اثر البمبان الإيراني في شوارع الخرتوم ذات مظاهرة ما ..و اثر (القشة ام شريي) في بقاع كردفان ، في موسم الدرت.. اثر القشة ام شريي اقوى على مسامات الجسم من اثر البمبان الإيراني...والله صحي..!!!
اما العرنون..!
فيبدو لي معناهو مختلف في ثقافات البقارة عن ثقافات الوسط..ففي الوسط في قصة منسوبة للشيخ فرح ود تكتوك..لمن بتو جات زعلانة من زوجها..ووصية الشيخ للزوج.. وفيها ورد ذكر العرنون..غايتو القصة ادتني انطباع عن مفهوم تاني للعرنون..وهناك هم يقولون عنه (العــُران)..!
في ثقافات البقارة ، العرنون/ العُران هو اخر عضمة في السلسلة الفقرية (في الجزء التحتاني ، مش الفوقاني بتاع الرقبة..!!)..
وبرضك اهلك البقارة عندهم مفردة (الخــُوران)..وهي مقاربة ومشابهة لكنها خارج السياق هنا..!!
Quote: سلام بريمة انت زول زراعة هل هي نفس الPOISON IVY بتاعت الخواجات
قطعاً لا .. هناك فرق بين حينما نقول قش .. أو عرق .. ال Ivy من العروق المتسلقة .. وأقول ال Ivy بتاع الخواجات أنا بدقشه ساكت .. لكن القشة أم شريي أهرب منها هروب القطيع من البعير الأجرب .. لو عرفنا إنها قامت فى درب الزرع فى الخريف إما نحرث المكان بدون زرع أو نخلي لها الدرب فى ذلك المكان .. بالتأكيد القشة فيها سم حار ويتحول إلي كاروشة وحكيكة فظيعة ..
Quote: طبعا كنت ح اقول للفكي بتاعكم: يتمسح بالطين..!!
والله يا ول أبا كبر هذا الحل وكذلك الرماد .. ! .. هذان الشيئان الوحيدان الذان يحلانك من أثر الشرا فى القشة والدودة أم شريي ..
وحسناً أنك تذكرت الدودة أم شريي .. ولما الدودة تدخل ليك تحت الفنيلة .. جسمك كله يقوم بثور .. وهي والقشة لديهما ذات مفعول الشرا .,. لكن القشة أكثر إيلاماً .. بسبب أنها تصيب مناطق حساسة .. والملاحظ أن الأستحمام ينفع مع الدودة أم شريي .. لكن لا ينفع مع القشة .. الفكي بتاعنا قضي يومه فى الوضوء .. لكن النافع الله. القشة أم شريي فى الدرت حينما تضربك فى ساقينك ممكن تمسح عليهما التراب أو الرماد ويزول أثر الشرا ..
Quote: ولغاية الليلة.. منتظر بعض اخواننا من ناس الكيمياء يشرحوا لينا سميات ام شريي (سواءا كانت قشة أو دودة) ودور الطين في مسح اثر ســُمياتها..!!
وأنا أضيف لسؤالك ما أثر التراب والرماد فى إزالة الشرا ..؟
يذكرنى يا ول لما تكب الزيت فى النار .. مش النار تشعلل .. كذلك بالنسبة للقشة أم شريي حينما يتوضأ الأنسان يكاد يكون ملابسه الداخلية ما يقدر يلبسها .. والأفظع حينما يمرر الأنسان يده فى الغسيل علي مناطق أخري تنقل معها الشرا إلي تلك المناطق .. يعنى الزول الذي لا يعرفها .. يظل يورط نفسه فى الكرش والحكيكة إلي ما لانهاية ... ربما الشرا فيه مواد لا تزوب فى الماء .. والله أعلم.
Quote: برضو من النبتات الغريبة عندنا شجرة صغيرة ما عارف اسمها بالعربي ..
لو لمست صفقتا تلقى الشجرة كلها هبطت كأنها ماتت ..
تزح منها بعد عشرة دقائق تفرهد تاني .
هذه الشجرة تسمى المستحية .. وهى من فصيلة نباتات الميموسا .. والشجرة التالية هى Mimosa pudica لديها أنواع كثيرة.
بجييك للنباتات الأخري التى ذكرتها ..
بريمة
Post: #17 Title: Re: معارف البادية: القشة أم شِريي .. شر مستطير � Author: بريمة محمد Date: 03-05-2016, 00:03 AM Parent: #16
ول ابا محمد المك
شكراً علي الأطراء ..
الشجرة التى تشبه الجرجير هى ال Ivy التى ذكرها الأخ منتصر .. وهى أنواع منها الزاحف والمتسلق ..
الحسكنيت متواجد بكثرة فى كردفان .. وهناك أيضاً شجيرة تعمل نفس عمل الحسكنيت تتلصق فى ملابسك ولو شلتها من ملابسك تمسك أصابعك .. يعنى مهما تفعل لا تتملص منك والحل الوحيد أنك
تجد لها جسم أخر .. سواء كان شجرة أو عود أو قطنه .. أو خرقة ملابس تشبكها فيها .. هذه الشجيرة يسميها البقارة "أم عبكة" .. نباتات الحسكنيت وأم عبكة كيفت نفسها للأنتشار عن طريق الحيونات ..
أما بخصوص دودة الصرف .. نحن لدينا حشرة غيرها نسميها "أم صرفة" .. فهى من فصيلة أم أربع وأربعين رجل ولها سم أقل من الدودة "أم شريي" وليس بها شرا .. الدودة أم شريي لونها رمادي .. نحن سمي لونها أغبش .. وتغطيها شعيرات كثيفة .. ولديها نقطة شبه سوداء أو بنفسجية فى مؤخرة رأسها وتنمو من تلك البقعة حزمة شعيرات .. نحن نعتقد أن تلك المنطقة هي بيت السم فى الحشرة.
فى أمريكا وجدت أدوية كثيرة لسم الحشرات والنباتات .. الغريبة لم يفتح الله للسودانين بالبحث فى هذا الجانب وتطويره .. حتى النحل لليوم نحن نداوسه ونطلع منه العسل دون مضادات .. هنا فى أمريكا يوجد بخاخ بتاع بعوضة .. لو تمسحت به يهرب منك البعوض مثل الحاجة العفنة ..
بريمة
Post: #18 Title: Re: معارف البادية: القشة أم شِريي .. شر مستطير � Author: محمد جبره Date: 03-05-2016, 00:25 AM Parent: #17
غايتو .... نقراء و ننكرش
تحياتي
Post: #19 Title: Re: معارف البادية: القشة أم شِريي .. شر مستطير � Author: بريمة محمد Date: 03-05-2016, 00:26 AM Parent: #17
الأخ حمد عبد الغفار
سلامات ومرحب بمرورك فى بوست تراث البادية ..
Quote:
كيفك يا بريمة
الضريسة كيف ؟ ياخ دي زمان طيرت لينا الكورة في رأسنا مطرة واحدة تلقى الميدان اتملى
ثم ثانيا إنت وكبر لو خليتو هجائص البورد دا وكونتو جمعية لحماية شجر التبلدي ما أفيد للمسلمين
دي شجرة أم عديل كدا سمعت عنها تقرير قبل كم يوم مبالغة
فكروا في الموضوع دا كويس ما نقوم فجأة كدا نلقى قونقليز مافي في البلد
هل تصدق شجرة التبلدي لها سر عظيم .. ثمرة التبلدي هى أكثر ثمرة بها نسبة كالسيوم .. أضعاف أضعاف الكالسيوم الموجود فى أي ثمرة أخري .. وأكثر من الكالسيوم فى اللبن .. ربما تدانيها شجرة المورينقا .. ومعروف عن الكالسيوم هو لبناء العظام .. لذلك أهلنا فى كردفان عظامهم وأسنانهم قوية ومتينة جداً بسبب القنقليس .. ومنذ أكثر من حوالي 5 أعوام يبحث البريطانيون لمكان آمن لزراعة شجرة التبلدي الكردفانية لأستخراج الكالسيوم بصورة تجارية .. ونحن أهل الرأس والجلد قاعدين ساكت لا نحرك ساكن ..
فى بوست سابق منذ أعوام كتبت عن شجرة تبلدي تسمى "تبلدية الناظر" .. تقع فى جنوب غرب الأبيض فى منطقة تسمى أضاي خديجة .. فى تلك الشجرة مسجل أسماء نظار كل قبائل الحوازمة منذ عهد الأنجليز والأتراك .. كل سنة يأت الأتراك أو الأنجليز للضرائب يقومون بنحت أسماء النظار الذين جمعوا ضرائبهم في ساق الشجرة .. لزوم شوا باش .. وتقوم الأسماء المنحوته ترتفع إلي أعلي قليلاً كل عام مع نمو جزع الشجرة .. فى العام المقبل ينحتوا الأسماء الجديدة تحت التى نحتوها العام الماضي .. وهكذا حفظت الشجرة أسماء أهلنا متسلسلة فى القدم .. الأقدم إلي أعلي فى الجزع وأنت نازل .. تأريخ محفوظ فى جزع شجرة التبلدي والأغرب أن الأهالي حافظين تأريخهم شفاهياً .. وليس هناك أي لبس حينما قارنت معرفتهم بما هو مدون فى جزع الشجرة .. الله غالب الجفاف الذي ضرب كردفان عام 1985م .. أوقع "تبلدية الناظر" بطولها ..
والشجرة أيضاً لها ميزة أخري، فأن نموها السنوي يكون فى شكل حلقات بعضها فوق بعض .. مما سهل علينا حساب عمرة الشجرة .. ومعرفة فترات حكم النظار بصورة تقريبية .. تأريخ يعيش فى ساق الشجرة لا موجود فى كتب ولا كراسات ..
بريمة
Post: #20 Title: Re: معارف البادية: القشة أم شِريي .. شر مستطير � Author: بريمة محمد Date: 03-05-2016, 00:45 AM Parent: #19
أبوبكرسلامات ..
Quote: الشرا انواع٠ شرا الويكة بختلف من العيش وخاصة البلصق فيك مع العرق٠ تقعد تنكرش
هل تصدق شرا الويكة والعيش .. كما يقول الخواجات piece of cake بالنسبة للقشة أم شريي ..
هل تصدق شرا الويكة والعيش .. كما يقول الخواجات piece of cake بالنسبة للقشة أم شريي ..
بخصوص قصة الفكي بتاعنا .. والله أخواك حافظها صم .. والفكي حذرنا منها تحذير قوي وقال لينا أستنجوا بالحجارة إن لم تجدوا الماء .. وقال أصابه أذي منها ..
أنا بعرف هذه القشة منذ عمر 7 سنوات .. تورطت فيها مرات كثيرة، لكن فى يوم من الأيام دقشت حقل ألغام كامل منها .. والله شلفطت ليك سيقانى شلفطة عجيبة .. قعدت فى الوطا وكبيت مويتى السارح بيها كلها فى التراب وبلطت سيقانى بالطين حتى الركب .. ومع ذلك أكلتنى كاروشة صعبة خلاص ..
بريمة
Post: #21 Title: Re: معارف البادية: القشة أم شِريي .. شر مستطير � Author: بريمة محمد Date: 03-05-2016, 00:48 AM Parent: #20
ول أبا محمد جبرة
جيداً جيت ..
Quote:
غايتو .... نقراء و ننكرش
تحياتي
ههههاي .. تحذيرنا دا كله لأهل الحضر .. عشان ما يقعوا فى شر البلاوي العندنا فى البادية .. كل زول يجينا يكون شايل له حزمة مناديل ورق.
تسلم
بريمة
Post: #22 Title: Re: معارف البادية: القشة أم شِريي .. شر مستطير � Author: اسامة الامام Date: 03-05-2016, 06:43 AM Parent: #21
Quote: فى صلاة العصر والمغرب والعشاء لم يحضر الفكي فظن الناس مكروها ألم به .. فقيل لهم أصاب القشة أم شريي حينما ذهب إلي الخلاء .. فلعن الحضور القشة كالعادة.
