مبدئيا كدة يا صلاح تشكر والله شديد وممتن ليك انني في ذاكرتك .. مما يسعدني بالجد فلايتذكرك بود الا ما يحمل الود عجزت عن شكرك و سأحاول الاستماع لما اوردته وانا اعاني فقر تقني .. الموبايل وسوء شبكة .. سأنتظر الليل او هبايب الصباح ولي حين ذلك ارجو انك تفتش صلاح كوستي اغنية كوستي وجيبها لينا هنا
02-26-2016, 07:45 PM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
ياخي مفروض بعدما تهدي الاغنية الأولى لود ابوسن عشان هو من كوستي والفنان بدأ بمدينة كوستي، تهدي لي كمان الاغنية لانه وصف عطبرة بعطبرة الحلوة...
اما الاغنية الثانية فصحي، زي ما قلت اغنية شينة شينة...يعني شنو مرة متزوجة بتحب .. اذا بتحب زوجها معليش .. لكن تحب رجل ثاني.... تبقى دي جريمة يعاقب عليها القانون الإلهي والقانون الوضعي.... .. لكن ما دام الفنان عمر صديق وصف عطبرة بعطبرة الحلوة.. فدي سماح ..المرة دي . لكن يعتذر وما يغني أغاني زي الاغنية الثانية ابدا... وبس يكتر لينا من نوع الاغنية الأولى دي ودمت بالف خير وصحة وعافية وعبرك التحيات موصولة لود كوستي ود أبو سن ، وقريبتنا وصديقتنا بت كوستي سلافة..
02-26-2016, 08:57 PM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
نسايم عطبره الحلوه تهدينا و ترسينا نقابل فيها ناس طيبين فراقهم كان مبكينا
يا قطار الشوق متين توصل حبيبنا هناك راجينا متين نحضن عويناتو لـ متين يسرع يحيينا
يا قطار الشوق ده ليل الغربه فيهو ودار متين تسرع متين تكمل المشوار عشان ما نلقى سيد الناس و نطفي البينا من النار نشوف عينيهو نعسانه و لونو الزاهي كل نضار
يا قطار الشوق حبيبنا هناك يحسب في مسافاتك لو تعرف غلاوة الريد أكنت نسيت محطاتك وكان بدرت في الميعاد و كان قللت ساعاتك و كان حنيت علي مره وكان حركت عجلاتك
02-27-2016, 03:37 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
تشكر صلاح والشكر للاعزاء عمر وبسمات وسلافة بتنا تعرف الاغنية الاولي جميلة والله . سمعتها كتير سابقا ..منتشرة جدا في الركشات ومحلات الموبايلات .. اهم حاجة في اكشاك تصليح الموبايلات يكون خاتي ليهو امبريفير ومشغل الغناء وبالصباح بشتركو في تشغيل القرآن . دة حسب مالاحظت . برضو ناس المواصلات بشغلو القرآن من الصباح .. ويجو يقول ليك الحاصل لينا دة لاننا بعدنا عن طريق الله !! الاغنية حقت العشيق ما عجبتني والله كمستمع .. تفتقد للتماسك الموضوعي .. هي بتحب عشيقها عشان مالو ولا عشان بتحبو ! ولكل عشيقة عشيق ممكن يكون معرس برضو ! وحكاية غشاها دي ما قاعدة تعجبني عموما . بتصادر حق المرأة في خياراتها وبتحولها لي كائن لا يملك قراره ومن السهولة التغرير به وموضع علاقات المتزوجين خارج اطار الزواج .من الحكاوي القاعد اسمعها بي قصص وهي من حكاوي النساء .. قصص تنفع مسلسلات . حبكات درامية ذكية ومثيرة الاغنية غير متماسكة ووعظ فطير العلاقات خارج اطار الزواج قطعا مقززة وغير مقبولة .. وفي المدن الصغيرة والقري تؤثر في سمعة ومستقبل الابناء اشكرك جدا والله الغناء البرتقي بالحس الفني او الثوري او العاطفي يضيف للناس ويطوره .. يطور حسه الانساني ويرتقي به فالاغاني الجيدة والاصوات العذبة تحلق بالانسان فوق سماوات من العذوبة والاسترخاء والطرب اغنية صلاح كوستي .. بتعجبني جدا وصلاح ذو صوت جميل ومطرب ولكنه عجز عن الاستفادة منه بأن نظر لنفسه كفنان حفلات مناسبات فمال للتقليد دون ان يختط لنفسه طريقا لكن اغنية كوستي مش حلوة
02-27-2016, 09:14 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
ياخي زكرتنا أياما" مضت ,,,, ناس البكاسي الشعبية - الخرطوم من الصباح تكابس لتظفر بمقعد ,, وعند الإنطلاق إذا كنت محظوظ بتكون مواجه ليك وجها" صبوح و بتستمتع بالنور الجيلاني والزكرى المنسية و مندلين سليمان ,,, ياخي بتكون وصلت المحطة الوسطي - الخرطوم ناقص وزن.
بعدين حكاوي الخيانة الزوجية دي موجودة في كل المجتمعات و إن كان نصيب الرجال هو الأعلي بكتير ,,, و الزوجات الخاينات كان من الصعب جدا" الإعتراف بوجودن لأنو لو عرفوها لن تصبح أو تمسي إسمها زوجة و بعد وصولها بيت أبوها الموضوع بكون مغتغت. الغنية دي بتعلن و بتأسس لي دمار و نسف كل الجمال في الحياة الزوجية (الموضوع يبقي عادي) ,,,, من الأفضل و الأحسن أن يتم علاج موضوع خيانة الزوجة في أضيق دائرة لإنقاذ ما يمكن إنقاذه.
كوسثي و صلاح كوستي إبداع مفتخر ,,,, إنت قايل أنا ما كتلتا في كوستي دي قبل كدي ,,,, مطلع التمنينات أجبرت لتغطية زميل إغترب فجأة ,,, أجبرت لأنو قلعوني قلع من دار الهاتف بكل زخمه إلي كوستي الما عارف عنها حاجة ,,,, لأنو أولاد بحرى مقرميين كانت ال 3 شهور بتاعت كوستي من أجمل فترات حياتي.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Salah Zubeir
عبدالحفيظ ابوسن
عمر عثمان
فيس بوك
تويتر
انستقرام
يوتيوب
بنتيريست