مقترح منبر : فش الغبايــــن

12:17 PM February, 25 2016

سودانيز اون لاين
محمد درار-
مكتبتى
رابط مختصر

مقترح لمنبر فش الغباين :

- أن يكون منبر موازي للمنبر العام مثله مثل منبر الشعبية و منبر ناس الزقازيق ( في الشكل طبعا وليس المضمون).
- فكرته الاساسية انو تفش غبينتك من الاخر وتكتب الفي قلبك (عنصرية , إساءة , نبز , تحقير ...إلخ) .
- تنظيف المنبر العام من الحاجات الكريهة الفوق دي.
- مافيهو تعب و تحايل على التشفير (ما يمسكك الا كيبوردك).

- المشاركات والاطلاع فقط محصور على الاعضاء (ما في داعي ننشر غسيلنا على الملأ)
- ونسبة لمحتوى الكلمات ونوعها يتثنى من المشاركة والاطلاع من الاعضاء من هم دون الــ 18 (إن وجد)

- فوق القانون : مفروض قبل ما تخش البوست دا تظهر ليك رسالة " مشاركتك او اطلاعك على هذا المنبر يعني قبولك بما ستراه ... الخ (yes) (no)"
- لا يمكن مشاركة الاقتباسات من هذا البوست الا داخله فقط (يحول لناس الــ IT)
- بكري له الحق يحول شخص أو اشخاص إلى البوست دا بدلا عن الايقاف (منها كيلكات زيادة والزول يكون فش غبينته ويرجع كيوم ولدته امه)

- في المنبر العام - البوستات العادية يعني - لو زول حرق روحك شديد بعد تكتب كلامك المنطقي له اكتب ملحوظة صغيرة -------------------- ((عايزك بهناك))
- كمقترح داخل المقترح ممكن بوستات "عاجل" , "انبهلت" و "شوفتوني" تتحول تلقائيا الى هناك
- عادي لو عايز تكتب بإحترام (لكن على مسؤليتك)

- يتم إستخدام (الصفحة العريضة) عشان الناس ما ترص بوستاتها في الصفحة الاولى (طبعا انا ما عارف الصفحة العريضة دي شنو اصلا لكن نستخدمها).
- ممكن يتم تعين أطباء نفسانيين و إجتماعيين للإشراف على هذا المنبر.
- تتم الارشفة (الخورنة) تلقائيا كل شهر.

- أي عضو تستمر مشاركاته وما فش غبينته خلال ارشفة كاملة فدا يمشي الخور بذاته لانه حالة مستعصية.
- ممكن بكري يختار أسم جذاب للمنبر بدلا عن "منبر فش الغباين" مثال منبر "واحة الاعضاء" .

تحية .....يا محمد درار يا خي قالوا ....الفشا غبينتو...خرب مدينتو.... بعدين جماعة الغباين ما مقصرين....محاولات حصارهم بالحسني يحدث كيلا ينفرد مهاجميهم بمرمي كالذي تقترح... عنئذ قد لا يشفع ايقيانوس الأطباء النفسانوين ولا شفاعة ناس(باركوها) ...



لك الاحترام..

ما بنفع يا أبو حميد
جزء أساسي من آلية المشاكل هنا هو انها في العلن و قدام الناس مما يؤدي للحماقة و كبر الرأس و الإصرار على رد الإساءة العلنية و أخذ الحق وزيادة قدام نفس الناس التمت أمامهم الشتيمة
لو أخذ بكري باقتراحك ح يبقى البورد داك بورد ونسات شخصية و علاقات خاصة و المشاكل الليها ضل بتدور هنا في محل الكيتة و النقارة ضاربة دا :)

اخي محمد الكامل
تحية و سلاما

Quote: قالوا ....الفشا غبينتو...خرب مدينتو

ودا بالضبط الحاصل للمنبر العام
عشان كدا احسن نعمل لينا خرابة كدا تنفع للكلام دا
وبعدين الغباين دي ذاتها بتمتص الطاقة الإيجابية العند بقية الاعضاء
يعني بدل يتفرغوا لي كتابة مايفيد ويمتع
نلقاهم في معمعة ... "باركوها يا اخوانا"
دا طبعا إذا ما حردوا المنبر ذاتو

اشكرك على المرور والتعليق

ود البشرى
لك التحية
تعرف كانت كاميرات التلفزة تنقل جميع لقطات إقتحام "طالبي الشهرة " للملاعب أثناء المباريات
و لكن قبل فترة صدر توجيه بعدم تصوير أي لقطات لهؤلاء وتوجيه الكاميرات بعيدا عنهم ..... فاصبح من النادر مشاهدة تلك اللقطات.
ونفس الشيء حاصل هنا عشان نحصر الاساءات دي ... عايزين نعزلها
فكون خفتت الاضواء حولهم ... فدي حلاوة العسكرية ذااااتها.
لكن لو المنبر بقى كله ونسات شخصية وميت حنضطر ننزل لينا اتنين محترفين يحرروا لينا البورد

تسلم على المداخلة يا حبيب

- ممكن نعتبر أول 3 أشهر للأعضاء الجدد - و لست منهم :) - فترة سماح يعوسوا عواستهم لحدي ما يلقوا الدرب بتاعهم والمقتبس التالي دليل على ذلك:

Quote: انا استنتجت من ردود ونصائح بعض الاخوة والاخوات الافاضل طريقة واسلوب المنبر دى دايره ليها خبرة واقترح ان يكون هناك دليل ومرشد يستفيد منه الاعضاء الجدد حتى لا يتورطو الاعضاء الجدد مثلى

من بوست http://sudaneseonline.com/msg/board/490/msg/1451618973/rn/91.html