قصيدة بعنوان ( أمل مرتقب )

10:52 AM February, 25 2016

سودانيز اون لاين
محمد الرفيع-تبوك السعوديه
مكتبتى
رابط مختصر

أمل مرتقب


بتكبر بكرة يا حبي
زينة تضوي لي دربي
وبتعرف قلبي ليك بريد

******
بتكسر بكرة حاجز الخـــــــوف
وأحجيك الأماني حروف
علاقتي معاك تزيد توطيد

******
معاك تكبر رؤى الإبـــــــــداع
نبض قلبي بيكون إيقاع
وأغنيك في الأماسي نشيد

******
صغير إنت وقليبي هــــــــواك
وعاش من بدري في دنياك
ملاك يا بلبلي الغريد

******
رسمتك لوحــــــــــة في دارنا
شرحت أنا فيها آمالنا
يوم الإيد تكون في الإيد

******
غرامك في سماي مســــــــكن
قليبي أنا في هواك أدمن
بريدك يا صباح العيد

******
قالوا الناس علي مغـــــــــرور
معاك بنسى وبكون مسرور
أعانق عالم التجديد
******


تباشيرك هي بادية تلـــــــــوح
تحد من أنة المجروح
ضماد صدقني شافي مفيد

******

سنين الفرقة محســــــوبة
قدر في أيامنا مكتوبة
نواجهة بالصبر ونزيد

******
نموذج حبي ليك مثــــــــال
درس تتعلموا الأجيال
ثمارو بيحصدوه أكيد

******
فوارق في العمر وسنيــــــــن
معاك ليه ما أكسر الروتين
وعزول اليوم مصيرو يشيد

*******
غرستك بدري وإنت شتيـــــــــل
بديت بالخطوة داير الميل
مساحات قابلة للتمديد

*******
صبرت عليك صبر أيــــــــوب
عشان عينيك عبرت دروب
عشان عينيك أذبت جليد

*******
طبيب اليوم وجد منظــــــــار
حروب اليوم بدون إنذار
غرامي أنا ليك عصرو وليد
******


بتكبر وبكرة لي تبقـــــــــــى
نهر عذب وأفاض وأسقى
وبيبتل فيني أي وريد

******
بجيك باكر تكــــــــــــون إنت
في هجع الليل هلال بنت
قراءاتي بتكون تجويد

******

بتمتزج القلوب واقــــــــــع
برؤيا مداها للواسع
نعاود الماضي ماضي تليد

********
دعاك نكشف نقاب اليـــــــــوم
ونفطر من بعد طول صوم
نقاوم لو نهارو عنيد

*****

ختام ليك يا حبيبي ســـــــــــلام
مناي تتحقق الأحلام
أمل عند ربي ما هو بعيد
******


كلمات – الرفيع – تبوك 6/مايو 2000م