طرشمية سنة ونحن نبحت غالبنا نمرق من الحفرة دي غالبنا ان نسد رمقنا ورمق اطفالنا ثم نجد وقتا سعيدا لنحضن حبيباتنا او نستمتع بما تجود به الحياة علي استحياء كرهنا كرهت ان اتحول لشهيد يمشي بين الاحياء عجزت ان ادفن نفسي ثم انهض كطائر السمندل من رماد رفاتي عجزت تلك الكلمات السحرية للشعراء وقصص الابطال ان تزودني بالصلابة كل الاشياء تتداعي تتداعي من حولي ومن خلفي ومن امامي
تلك الصفات سهل جدا اطلاقها علي الاخرين .. ولكن من الصعوبة ان تغوص في حياة احدهم اليومة لفهم تعقيداتها لتحكم عليه نحن هنا يا سادتي نعيش لتحيا السلطة غنية سعيدة تتزوج مثني وسباع زاتو لذا كأننا كثور الساقية ندور وندور ونبذل مجهودا خارقا ولكنه داخل دائرة صغيرة لا نقدر علي الخروج غلبنا ياخ فتساوي الموت والحياة عندنا
محبط جد يا ايمن محبط لل.... ماممكن كل يوم من الصباح تشوف الناس تسير بلا هدي .. عيونهم فارغة تحدق في اللاشئ .. يسيرون دون ان يهمهم ان تقودهم خطاهم .. الوجوه لاتحمل تعبيرا .. وليس في الوجه مزعة لحم من الفقر ونقص اللحمة والاكل النضيف .. والهم قاتل الله الهم هم انو الليلة شلتو بكرة امكن يغلبك يغلبك لانو زايد يوماتي تسد بي هنا يظهرن عشرة قدود بي هناك محبط اني اشوف اطفال صغار في السوق بفتشو لي شغل .. معرضين لكل انواع الانتهاكات وبطلت انتقد الاسر والاباء في خروج الاطفال فإني لا اعلم من جحيم خرجوا بحثا عن الرزق
تماما |حس بآلامك وأوجاعك وهمومك وإحباطاتك.. أصبح كل أهل السودان من غير أهل الولاء الذين يدورون خارج دائرة النظام ومنظومة الإنتهازية بهذا الوصف البليغ الموجع المؤلم
Quote: ماممكن كل يوم من الصباح تشوف الناس تسير بلا هدي .. عيونهم فارغة تحدق في اللاشئ .. يسيرون دون ان يهمهم ان تقودهم خطاهم .. الوجوه لاتحمل تعبيرا .. وليس في الوجه مزعة لحم من الفقر ونقص اللحمة والاكل النضيف .. والهم قاتل الله الهم هم انو الليلة شلتو بكرة امكن يغلبك يغلبك لانو زايد يوماتي تسد بي هنا يظهرن عشرة قدود بي هناك محبط اني اشوف اطفال صغار في السوق بفتشو لي شغل .. معرضين لكل انواع الانتهاكات
يعافرون الحياة ويصارعون الأيام من أجل البقاء,, معظمهم تولدت لديه قناعة أن أصل حياة الإنسان معاناة ورهق وتعب وكبد,, إفتقدوا أمنهم وسلامهم الإجتماعى وإحساس الوجع هو الإحساس الوحيد غير المعطل لديهم...
وهؤلاء أحسن حالا من إخوان لهم واهل يقضون أيامهم هربا من جحيم يرسله لهم الحاكم بأمره من السماء ومن على الأرض,, موات يومى للضمير والروح و معانى الحياة!!
أمتحان طويل وصعب بالحيل,, لكن ماعندنا خيار غير نأمل أن يكون القادم أفضل,, وأن ينتهى ليل الكوابيس والرعب دا بشكل ما,,
مرتين ! يلتحفان السماء وثيابهم البالية ويفترشان الارض دون ظل . يجسدان معني التعايش الطبيعي بين البشر . احداهما من الغرب والاخري من يظن الناس انها عربية ! يفترشان الارض ليل نهار . يتغطي اطفالهم بالرمال .. حقيقة دون رمزية .. والداير يشوفهم من كوستي سهل جدا غرب سوداتل ! شمال الاشارة الضوئية .. رؤيتهما تمسخ ليك الحياة .. هما في مقتبل العمر .. يلعب اطفالهما بالرمال والتفرس في العربات والمارة ولا يحسون عمق المأساة خليت الشارع عشانهم .. عجزت مشاعري السلبية علي تحمل رؤيتهما
: بندفع 73 رسوم تشجير فى ترخيص العربيه : ورسوم كربون 52 جنيه : هسي كان سالتكم الكربون ده ... بعملو ليهو شنو: والعربيه ماله ومال التشجير عشان تدفع 73 جنيه : انا اقول ليك شئ بندفع 185 جنيه ما معروفة حقة شنو .... بدوك بيها ايصال ولمن يدوك شهادة البحث ... بقلعوهو منك: ياخ اقول ليك كلام اغرب من الخيال ناس المويه دايرين يفرضو رسوم على الصهاريج الفي البيوت دي ونسة هسة مع صديق عزيز في الواتس تقول لي الزول صباح الخير يديك تقرير
حتى الكربون العاصرنو للناس الطيبين ديل مدفعنهم تمنو!!!
في المتوسطة أستاذنا لمح ليهو طالب داخل وشايل ربطة سيطان طويلة بتاعة شجرة حنة نادى الولد وسالو السيطان ديل لمنو؟ قال ليك يا أستاذ!!!!!
سالو تانى ,, أنا قلت ليك داير لي سيطان؟ صاحبنا سكت!!! قال ليهو جيب السيطان!! أنبطح!!!
الأستاذ أداهو خمسة جلدات حارااات وقال ليهو شكرا ليك تاني ما تعمل كدا
Post: #11 Title: Re: كرهنا النضال !! Author: عثمان عووضة Date: 02-24-2016, 09:38 AM Parent: #10
حفيظ الحلو انا زي الجدادة برجی العشا زی فارغ الصبر لکین بصحی تلاتة او اربعة صباحا بالكتير اقسم بالله الكلام الكتبتو دا كله انا بعاين للسقف وفكرت فيهو قبل ما اشوف كلامك دا كنت عايز اجي اكتبو تاني قلت حازيد مرض وعملت نايم فنصيحتي ليك ما تفكر كتير وتحلم بي غد افضل كاتل مكاتلتك وادي وليداتك لقمة نضيفة قدر ما الله يقدرك البلد ما عندها وجيع اي زول بيسلم عليك ويعاين لي جيبك ياخي انا عندي تنكر بنقل بيهم جاز وبنزين كل مرة لمن اجي احاسب السواقين يقولوا لي كم كدة ما عارف رسوم النفايات قلت ليهم نفايات شنو يا اخوانا اصلو العربات دي قاعدة تبعر في الشارع عشان يشيلو حق النفايات قالو لي تعال سوق انت وقول ليهم الكلام دا
النظام العام ذاتو قاعد يدفع الناس اربعين مليون في جنس الشغلات دي .. اوعك تحاول
Post: #13 Title: Re: كرهنا النضال !! Author: محمد البشرى الخضر Date: 02-24-2016, 11:05 AM Parent: #12
يا ود أب سن لا تحزن و تشيل الهم قدر دا ما ضاقت إلاّ لفرج, و الحمد لله ان الضيق و البلاء جاء في الغلاء ابتهج يا عمّك الليله الزعيم سيد البلد أبو الهل عندكم منور كوستي وما جاورها :) اها شوفة ابو الهل لايف دي براها ما كفيلة تنسيك الهم وتبسطك ليوم واحد على الأقل
تعرف يا ايمن مرة مشيت مع صديق بيتو انسرق .. والسرقة كانت كبيرة فيها دهب وكاش .. وقال لي انا قنعان .. لكن احتمال ضئيل يتقبضوا الحرامية واكون حافظ حقي المهم مشينا البلاغات .. واشترينا فلسكاب لتسجيل التحري وقلم حبر ناشف وفقا لطلب عسكري البلاغات رسوم مرات ولا تقدر تقراها ولو قريتها يغلبك تعرف معناها ولامن تعرف معناها بطنك تفور هي سلطة غلبها تسقي الناس قادرة تسقي ليها شدر اما موضوع الاطفال دة .. ياخ دي حاجة تفوق تعبير مؤلم ومحزن . ديل رجالات الوطن القادمين
Post: #16 Title: Re: كرهنا النضال !! Author: عمر عثمان Date: 02-24-2016, 01:16 PM Parent: #15
Quote: لذا كأننا كثور الساقية ندور وندور ونبذل مجهودا خارقا ولكنه داخل دائرة صغيرة لا نقدر علي الخروج غلبنا ياخ فتساوي الموت والحياة عندنا
والله يا أخي عبد الحفيظ أبوسن لا أفوت أي بوست تكتبو لانو بحس انو كتابتك هي الترمومتر البنقيس بيهو حال السودان الفضل الذي ميلوهو حكامو ذوي المفارش والبطائن والمؤخرات المكتنزه
عذرا للرد الراتب انت يا ود البشري شنو حكاية فرق كرة القدم القدامهم عربات نجدة ووراهم دفار الشغب .. موكب رسمي عديل .. الموضوع دة مزعلني والله جنس زعل .. الاهتمام الرسمي بفرق كرة القدم وواحدة من واجبات الولاة حضور المباريات ودعم الفرق .. الحكاية دي لاحظتها وانا راجع البيت المغرب بغشا الفرن .. والاستاد تكلة من بيتي .. ومرقتي مع المغرب للبيت .. اها اسمع الصفافير والناس تفتح الشارع ..منو دة !؟ بكون قايلو الريس جا زيارة خاتفة ممكن تقراها خاطفة برضو .. يقولو الفريق الفلاني .. ليه !؟ بالجد ليه !؟ وبالمناسبة وصدقا لي كلامك ..ماشي وفاة في شارع المنطقة مدخل كوستي .. لاقاني موكب فريق الهلال عربيتهم سمحة وجديدة ومكتوب عليها من قدام الله .. الوطن .. الهلال .. اها ما دايرة سؤال بعد اربعة دقايق موكب والبص عادي جدا وتعبان .. سألت سواق التاكسي الطرحة ودة شنو طيب قال لي دة فريق المريخ المهم ماعندي ادني علاقة بالكورة لكن حكاية الموكب الرسمي ابوصفافير ونجدة وعربات نجدة ومواتر وعربية شغب مزعلني بقينا ناس لعب ساي تيوة !
Quote: وبالمناسبة وصدقا لي كلامك ..ماشي وفاة في شارع المنطقة مدخل كوستي .. لاقاني موكب فريق الهلال عربيتهم سمحة وجديدة ومكتوب عليها من قدام الله .. الوطن .. الهلال .. اها ما دايرة سؤال بعد اربعة دقايق موكب والبص عادي جدا وتعبان .. سألت سواق التاكسي الطرحة ودة شنو طيب قال لي دة فريق المريخ المهم ماعندي ادني علاقة بالكورة لكن حكاية الموكب الرسمي ابوصفافير ونجدة وعربات نجدة ومواتر وعربية شغب مزعلني بقينا ناس لعب ساي تيوة !
تعرف عندما ارتكب النظام جريمته النكراء باغتيال الشهيد علي فضل، وفي نفس الأيام تم اعدام شهداء رمضان، مشيت أعزي في علي فضل بالديم، الديم مقلوب عدلا قلبا، مظاهرات تقيله، اليشوفها يقول الحكومه دي ما تصبح... قام فريق المريخ في نفس الأيام، فاز بكاس سيكافا، شرارة الثورة ديك، تقول كبو فيها مويه.. ناس الحكومه، أكيد لا حظوا لعاطفيتنا وحبنا للكورة، قالوا أحسن نستخدمها، لتشتيت الكورة... فيا خي لأهل السودان، الله، وأمسك قوي في دي ودرب أخوي وأخوك أحمد أبسن: "وأمر أهلك بالصلاة واصطبر عليها لا نسألك رزقا نحن نرزقك والعاقبة للتقوى"
Post: #19 Title: Re: كرهنا النضال !! Author: خالد علي محجوب المنسي Date: 02-24-2016, 08:17 PM Parent: #18
هم مجدعين في دبي في الشقق الفندقية .. البدلة بي الشارة في كم البدلة فاكرنها من أصل البدلة ما بقطعوها من تشوف الواحد تعرفو أنتهازي واعي لكن لم يعي لشارة البدلة ويقطعها
تعرف يا عووضة الدفارات واللواري بتجي خاشة السوق .. بلمو فيها ناس الولاية للرسوم .. شايلين معاهم ورقة فيها الفئات .. الكرتونة الصغيرة كم كدة والكبيرة والطرد ووو .. مايمشو يجو ناس النفايات .. وتقوم الحجة والملاواة .. وشهدت كم سواق ودوهو الحراسة وفتش الضمانة حتي مرق ودفع حق النفايات وهو مكظوم بتكلم مع بتاع لوري في ونسة يشكو من ناس المرور قلت ليهو لو اللوري فارغ ما بسألوك قال لي لو شاحن مصاحف ما بخلوك .. حرم الواحد لو حلم بالليل جاهو ملاك لابس ابيض يجري منو يقول بوليس حركة
Post: #21 Title: Re: كرهنا النضال !! Author: حمد إبراهيم محمد Date: 02-24-2016, 11:47 PM Parent: #20
Quote: مرتين ! يلتحفان السماء وثيابهم البالية ويفترشان الارض دون ظل . يجسدان معني التعايش الطبيعي بين البشر . احداهما من الغرب والاخري من يظن الناس انها عربية ! يفترشان الارض ليل نهار . يتغطي اطفالهم بالرمال .. حقيقة دون رمزية .. والداير يشوفهم من كوستي سهل جدا غرب سوداتل ! شمال الاشارة الضوئية .. رؤيتهما تمسخ ليك الحياة .. هما في مقتبل العمر .. يلعب اطفالهما بالرمال والتفرس في العربات والمارة ولا يحسون عمق المأساة خليت الشارع عشانهم .. عجزت مشاعري السلبية علي تحمل رؤيتهما
م كتير
حفيظ - سلام كتير ..
تذكرت حكاية أحد موظفي هيئة إغاثية زار إحدى الدول الأفريقية نكبت بجفاف وتصحر توالى سنتين أو أكثر وهو في طريقه لحدى القرى رأى على البعد من الطريق إمرأة حرف سيارته حتى وصلها وبعد السلام سألها : إنتي بتعملي في أيه ؟ قالت : في نبات هنا في الصحراء له جزور نحصل عليها لنقتات بها ؟ قال لها : كلكم يبحث عن هذا النبات ؟ قالت : نعم ؟ قال لها : طيب لو النبات ده كملتوه في المنطقة كلها بتعملوا أيه ؟ قالت ليه : الله في ؟!! في تلك اللحظة ، ذكر هذا الموظف : لقد أنهمرت دموعي وأحسست بضعفي أمام إيمان هذه المرأة البسيطة !!!
أخوي حفيظ ... ما نقلته انت و ما نقله موظف الإغاثة صور تضج بمأساة الإنسان في زمن النزوح والإبتلاءات ... أوجعتني حقا ..
---------------
بارك الله في فيديو الأخ معاوية المدير ، لولحني يمنى ويسرى .. لكن صورة المرأتين وأطفالهن لم تبرح مخيلتي .. !
تحياتي عمر عثمان وشكرا لتشجيعك الشعب السوداني كله يناضل ويعافر يوماتي من اجل توفير لقمة العيش كل الشعب السوداني ! يعاني يوماتي ويناضل ويكابس وان انكر الاخرين نضاله وسخروا منه النضال دة الا الزول يشيل ليهو بندقية يعني!!
مرحبا خالد المهدي وكتر خيرك مصطبرين عليها والاستغفار وبنساعدها بحث الذات علي ان لا نسقط في حفرة السبهللية واللاجدوي رغما عن احساسي كثيرا بعبثية الكتابة وسط كم من المطاعنات والهمز واللمز ف للسودان ربنا ولنا ربا كريما عطوفا بنا و سندفن موتانا وننهض
Post: #28 Title: Re: كرهنا النضال !! Author: راشد سيد أحمد الشيخ Date: 02-25-2016, 05:05 PM Parent: #27
( سندفن موتانا وننهض )عبد الحفيظ .... لا فض فوكوياها المحريةلا تنمو الحبة إن لم تأكلها الأرضلذلك تفدي بعض الأجيال البعضلكم السبق أيها القابضون على الجمر في خُنّ الذئابولكم العرفان على على توهج الإنسانية الذي يمنحنا - نحن البعيدين - الأمل
مرحبا حمد نحن بنستلف من بنك الله كريم تعرف السوق قريب للمستشفي .. ف عادي بتلاقي زول ولا زولة مركب ليهو فراشة في يدو وشايل ورشتة جديدة يشحد في حق الدواء
تشكر راشد سيداحمد وكتر خيرك مجبر اخاك لابطل مافي سكة غير الصمود.. فأنت تصمد من اجلك نفسك ..لابد ان تجد طريقا لفك هذا الالتباس او تنحرف او تجن الجن الواحد دة وبالتبسيط المخل دة للتحليل.. قاعدين نشهد ميلاد المجانين والله .. تصدق شباب ومتوسطي اعمار .. وبقينا نعرف المجنون الجديد .. لابس نضيف ولاتبدو عليهو علامة الجنون الا ان نظرت لعينيه الساهمة والفارغة ..تنظر داخل عينية فتفزع لرؤيتك تلك المغارة السوداء المظلمة .. تفزع لرؤية الضياع وتلمح بعض حزن اختلط بالذهول والاندهاش.. الزول ما بكون مصدق ما يحصل عجز عقله عن ادراك مايحدث . فهرب العقل وستراه بعد شهور وتكاد تتذكره ! ف عادي في السوق واحد يقول ليك دة مجنون جديد ولا تموت بغتة . وبشكل ملاحظ .. دون علة ظاهرة .. الناس كبدتها انهردت ولم تتحمل تلك الاجساد الاحباط المتصل والظلم الزايد ..والهوان علي السلطة والناس لابد من الصمود ستصمد من اجل نفسك اولا من اجل غيرك ستصمد من ان لا تجن او تموت بغتة موتا عبثيا سنصمد ونغري غيرنا بالصمود والكتابة هنا هو تحايل علي الصمود وسيلة لافراغ الشحنات السالبة
ما ضاقت الا لتفرج يا حفيض على ايام نميرى قالو فى خبير اقتصادى من البنك الدولى زار السودان عشان يرفع تقرير عن حال الاقتصاد السودانى قال ليهم دخل المواطى بالنسبة لى مصروفاتو الضرورية فيهو عجز كبير بيغطوهو بى بند اسمو الله كريم ما مدرج فى الميزانية و بى أذن الله التغيير آت و الزمن الطيّب آت
تحياتي نصر صدقت حركة التاريخ حركة صاعدة من اشكال دنيا الي اشكال عليا وغصبا عنا ! محاولات فرملة التقدم والتاريخ وارجاع المجتمعات لعهود الظلام والعبودية ستنجح ولكن الي حين .. لن تكون سوي عثرة يتجاوزها المجتمع.. ف تخيل انك تقود عربة قوية واعترضك حجر صخرة . ولا كثيب رمل .. وراء وقدام .. وراء قدام بتمرق ولا استعملت ترس القوة
مرحبا عمر دهب صدقت لا تنمية لا صناعة لاغيرو الاستثمار بقا ياهو المواطن داخل السودان .. محاط و مقبقب من كل الجهات الرسمية وغير الرسمية ! ولا وجيع تاكل نارك براك . وكل يوم في زيادة .. الموية والغاز والكهرباء في السكة واي معاملة ليك في مكتب حكومي تلقا الناس سانة سكينها وراجينك للضبح .. ومافي زول بقول مواطن مسكين ارفعو منو وللاسف الاسف المرير لو مالك دة بمشي الخدمات ولا التعليم ولا الطرق البطن مافيها مغسة .. يبعزقو فيهو شمال ويمين .. شي كورة وشي استقبالات وشي عربات معفاة من الجمارك للسادة المرضي عنهو الليلة دي سألت من حبوب الملاريا كوارتيم قالوا بي مية جنية يعني واحد علي تسعة من الحد الادني للاجور
Quote: كم سنة سنرفع للغموض العذب موتانا مرايا ؟ كم مرة سنحمل الجرحى جبال الملح كي نجد الوصايا ؟ عادة إلينا من رسالتنا رسالتنا .هنا وهناك خط واضح – للظل . كم بحراً سنقطع داخل الصحراء؟ كم لوحاً سننسى ؟ كم نبياً سوف نقتل في ظهيرتنا ؟ وكم شعباً سنشبه كي نكون – قبيلة؟ هذا الطريق – طريقنا قصب على الكلمات يرفو طرف العباءة بين وحشتنا وبين الأرض إذ تنأى ، وتغفو في زعفران غروبنا . فلننبسط كيد لنرفع وقتنا للآلهة .. محمود درويش
مرحبا جلالدونا قال رسول الله (ص) حين عودته من احد الغزوات عدنا من الجهاد الاصغر إلي الجهاد الاكبر صدق رسول الله الكريم فها نحن في جهاد اكبر ! في ان لا ننهزم ولا ننكسر ولانموت حتف انوفنا قال شكسبير علي لسان هاملت To be or not to be .. this is a question ورحم الله حميد سني علي النضال ايدي وسوكي بالهتاف فمي شوارعك لي دويها علي اذا ما اخر العلاج الكي مراوديك حمر يا امي و هردت لهاتي بالغنوات