تهليل بالريقي: الفا بلوندي (لآ اله الإ الله ،محمد رسول الله)..!

10:25 AM Feb, 12 2016

سودانيز اون لاين
Kabar-كـــندا
مكتبتى
رابط مختصر

لعناية السلفيين ، الجمهوريين ، داعش..

والمستنير ابكر الطويل..

كبر

أي سيك ميك ،بنجيب ليكم ترتيل سورة الفاتحة بالجيتارات والبيز والنقاقير..

و الإ ح نجيب ليكم فضيحة اليهودي البيغني مدحة في المصطفى عليه السلام ، وقعد يقطع من قولة (محمد)..والغريبة ادى المدحة زي الترتيب..!!


هسع عليك الله يا المستنير غنية الفا بلوندي ، بالمناسبة اسمها (سبحان الله ، تسبيح شديد ياااااااااااااااااخ) ما اخير من النياصة بتاعة (أيا نفسي مالي تكرهين الجنة)؟...


كبر

الاخى كبر سلام ومحبة
(وان من شئ الا يسبح بحمده)
ظريفة جدا تسلم. جيب لينا الفاتحة بالجيتار

سبقو عليها راي تشارلز

أدى بعض من أغانيهو على استايل الإنشاد الكنسي (gospel)، بعض الأغني اشتملت على أجزاء منه.

في تسجيل قديم لالفا برضو ورد في احد اغانيه ذكر النبي محمد (ص)
_
ياحبيب الزول ده اكيد صوفي :)

استاذنا وصديقنا دكتور احمد الحسين..حبابك
كتر خيرك على الحضور ..والمطايبة هنا..
الفاتحة بالجيتارات ، هي عمل للمغنية من مالي ، الليجند امو سنغراي ، ولقد استشهدنا بالعمل اكثر من كذا مرة في هذا المنبر..وسوف نعمل جهدنا لإحضاره هنا,.
وهناك اعمال كثيرة فيها مدح المصطفى عليه السلام ..وهي برضك بالجيتارات يا احمد..
والى ان نحضر مثل تلك النماذج ، اهديك نموذج خاص وبرضك من مالي..
وفيه التعوذ الواحد ده يا احمد.. بتاع (اعوذ بالله من الشيطان الرجيم)..!!





حاجات زي دي ما قاعدين نشوفها في محيطنا نوهائي..
اهديك المغني سيالي عربي من مالي..
ودمت..
كبر

حاتم..حباك يا صديق
كتر خيرك على المرور..


الليجند ري شارلس ، تقاطعت معه في زمن غريب وعجيب يا حاتم ،

اذكرحينما كنا في المرحلة المتوسطة ، كان استاذنا احمد الزين علي (عليه السلام ، وربنا يمد في ايام عمره) كان يدرسنا اللغة الإنجليزية ، و قد استشهد باحد اغنيات ري شارلس ..وهي الرائعة (هت ذا رود جاك ، دونت كم باك نو مور نو مور)
Hit the road Jack, don’t come back no more no more


احمد الزين هذا ، شقيقه اخونا الأستاذ ايوب الزين في اريزونا او تكساس لآ ادري..!

فحينما كانت الناس مفتونة باستيف وندر و وتينا شارلس و بوب مارلي ودونا سمر ، والبوني اٍم ، نحن كنا مفتونين بري شارلس ، مارفن قي ، وتمتيشن ..الخ..ولا ندري هل كنا على صواب ام لأ..!!

صحيح ري شارلس غنى الحان على تقاسيم الإنشاد الديني الكنسي ، وواجه مصاعب حيث استعدته الكنيسة في ذلك ، اما الفا بلوندي ، فهو محظوظ لأن الإسلام الرسمي لم ينتبه بعد لأعماله التي تتعرض لترميز الدين الأسلامي ، مثل هذا العمل أو عمل جيروسلايم ( سلاما القدس الشريف)..!!

ونهديك هت ذا رود جاك بضبانتها..!




ودمت..


كبر

حلوة يا استاذ كبر وفن راقى
استمتعت بيها متعك الله بالعافية
منتظر المزيد
مع محبتى

Quote: حاجات زي دي ما قاعدين نشوفها في محيطنا نوهائي..

ول ابا كبر،
كدي اسمع زيدان في رائعة ابراهيم عوض
يا خاين ...

صديقي حيدر حسن..حبابك

كتر خيرك على المرور..

لأ استبعدها في تجربة الفا بلوندي ،

وهو رجل قاسى كثيرا في حياته الشخصية ، فلقد كان نزيل مستشفى الأمراض العصبية في نيويورك لردح من الزمن ، ثم عاد الى السنغال ، موطنه ، وانطلق..

صوفية الفا بلوندي واضحة للغاية ، وهو من اصول مسلمة ، حكي كثيرا عن معاناته في التعرف على ألإسلام الحقيقي ، واخيرا اخذ يعمل بتصور حبوبته للإسلام ، وهو تصور التسامح والمحبة والشفافية والصدق تجاه النفس ثم تجاه الأخرين..!
لذلك تجده في افق اخر تماما ، افق يغني فيه للإسلام والمسيحية واليهودية (الزول ده موحد يا حيدر)..

اهديك هذه المدحة من جمهورية النيجر.. وبلغة اهلنا الهوسا..




البنية ، يا حيدر ، لمن تقول (أيا ري..يا ري..فهي بتقول أيا رحيم ، يارحيم..!!!)..
حصل شفت ليك مغني/ة باللغة العربية بيجيب اسم (الرحيم) بصورة حنينة زي كده؟..
تجانية يا رسول الله..!!!



ودمت..
كبر

استاذنا احمد الحسين اعفى لينا يااااااااااااااخ ،


ول ابا معاوية ..
ياخي ما كنت قايلك زول مضر قدر ده ياعم..!!
ليه كده ياخي؟..
الجلالة دي ما حايمة في ستماية الف غنية.. اشمعنا دي؟..

عالم حاقدة بشكل..!!!

اخر جواب ،يا ول ابا ، من سبأ..كان ياهو الغنية دي.. واخرو نفس الجلالة.. وانا قلت من بتين سبأ بت اللذين بقت تنجر قدر ده..؟

الغريبة ، لمن مشيت امسودان ، في اغسطس 2015 ، سمعت لي الغنية (بعد سبعطاشر سنة ، ومعاها الجلالة بتاعة الخاتمة.. ثم دمعت..وادارت وجهها ، وانا بكل طفاسة اشفط في الجبنة ، الحكاية ما لحقت علي الإ بعد ما وصلت كندا..!!)..
شفت الحنين الصوفي ده عميق ككيف..!


وبرضك لابد ليك ـ اليوم اليقوم علي جن واشتت ليك مصطفي مضوي وخوجلي هاشم وعيسى بروي في المنبر ده الإ تشوف ليك حفرة تغطس فيها..!

فشنو ، ما تلعب بالنار ياااااااااااااااااااااااخ..

ولا حولا ولا قوة الإ بالله..!





خلينا في حالنا يا عم..

مطر الفهود ما ونى ، نبعن سروف الجنة ..ياااااااااااااااخ..!!

البلد دي الواحد ما يعمل فيها زايغ ولا شنو يعني..!!

كل المحبة يا صاحب..!


كبر

Quote: فهو محظوظ لأن الإسلام الرسمي لم ينتبه بعد لأعماله التي تتعرض لترميز الدين الأسلامي +++ نحن كنا مفتونين بري شارلس ، مارفن قي ، وتمتيشن ..الخ..ولا ندري هل كنا على صواب ام لأ..!!

حتاك الحين ليس عليه حرج

فالاسلام "الرسمي" لا يضع لشخصه قيمة ابتداء. ليس الموضوع صواب أو خطأ، توجهتم للموسيقى الأقرب وجدانياً، (R and B) وهي التي اشتهر بها ري تشارلس، لونية أفريقية، انظر للمؤديات، ما ياهن بناتنا في الستينات في الخرطوم الواحدة دي؟ أدى له جيمي فوكس فيلم رائع لقصة حياته باسمه (Ray)، مؤثر لدرجة البكاء.

استاذنا احمد الحسين ..حبابك يا صديقي
كتر خيرك على المطايبة هنا..
اها دي بمزيكا الراب..!!
(الله وين..!!)
أي والله الراب الواحد ده ، ونحن بنعاين ليهو بانو مزيكا شباب..ولكن أي شباب؟..



استحضر معك ، وانت تشاهد هذا النموذج ، حال الصومال المتشظي ، فهم امة عجيبة ، يجمعها الإسلام وتفرقها الألسن والإثنيات..وعندي هذه الإثنيات انتصرت ، كفكرة ، على الإسلام ، ووضعونا في تحدي قاسي للغاية امام مقولة أن الدين قد يكون عامل وحدة ، فالدين في جوهره قد يكون عامل وحدة ، ولكنه لا يتحدث ، وانما التي تتحدث هي ألسنة البشر تلك التي تفسر الدين كما تهوى..!!

النموذج جلبته قبل سنتين تقريبا في هذا المنتدى و فتحت به خيط بعنوان (الله وين)..لكن الناس خافت..الخوف الواحد ده لأنها ظنت ان مثل هذا التفكير قد يهدم عليها اشياء كثر..!!

حينما اتأمل هذا الفيديو أمتثل قول الحلاج:

رأَيتُ ربّي بعين قلبِ فقلتُ من أنت قال أنت
فليس للأين منك أينٌ و ليس أين بحيثُ أنت
و ليس للوهم منك وهمٌ فيعلم الوهم أين أنت
أنت الذي حُزْتَ كل أين بنحو لا أينَ فأينَ أنت
و في فنائي فنا فنائي و في فنائي وجدت أنت

ثم خلي بالك من ذكر البينة للشفيع (وانذر به الذين يخافون ان يحشروا الى ربهم ليس لهم من دونه ولي ولا شفيع)..وقبله قولها (الله الإ اشا وين: الله لا اله الإ هو وين..!!)..ثم الإشارة لأية الكرسي..!!
مجمل العمل يبدا بترنيمة منائحية حزينة: الله ليا..!

البنيات بيمثلنا صوت اليقين ( الله هنا وماهو وين/نفس فكرة الحلاج)..و الأولاد بيمثلوا صوت الرفض (النكران).. وكلهم بتلاحظ بيحرصوا على افراد ألأصبع (علامة التوحيد)..!!

عجايب..مش؟

ودمت..
كبر

Quote: البنية ، يا حيدر ، لمن تقول (أيا ري..يا ري..فهي بتقول أيا رحيم ، يارحيم..!!!).. حصل شفت ليك مغني/ة باللغة العربية بيجيب اسم (الرحيم) بصورة حنينة زي كده؟..

تعديل الصوت دا وباء

ضرب غرب أفريقيا وشمالها الله أعلم يطلع في القرن دا. أقصد عملية (Auto-tune) ظهرت في مطلع الألفية، بدوا بيها المغاربة ودقشت ورا موريتانيا والسنغال والنيجر ونيجريا وأفريقيا الوسطى، لن تجد أغنية إلا ومشوهة بهذا التأثير غير المطلوب. عادة يمكن إضافة تحليات في كلمتين أو ثلاثة لكن ليس الأغنية كلها. _____ التعديل هو التواء النغمة بحيث يظهر الصوت غير طبيعي لكنه محبب، يسمى أيضاً (Cher effect).

مؤكد ده بوست راقى يهدى الاعصاب
وانا شخصيا فتحنى على ثقافات قريبة لينا وما بنعرفها
شكرا يا كبر ويا حاتم

حاتم..حبابك يا صديق

وهو الإسلام الرسمي فاضي لينا من دعم خطل بوكو حرام وانصار الدين (المجموعة التي قامت بتخريب اثار تمبكتو الإسلامية ابان كعة مالي ، اسوة بتخريب طالبان حينما دمرت ارث حضاري يفوق عمره الست الف سنة..!!)

اما عن فليم ري شارلس ، ما عارف جمي فوكس عملها كيف (عندي دمو تقيل وزول بيض ومتكلف ومتصنع للغاية ، الحاجة الوحيدة الكان جادي فيها دورو في ري ودورو في فيلم بريكنق اوول ذا روولز) بيعجبني الكاست النسائي (شيرون وارين /لعبت دور ام ري ، والمليحات الظريفات كيري واشنطون (حصل شفتا ليها شغل بتتكلم اسباني؟/جن عديل) و ريجينا كنج)..!

الفيلم من ضمن مقتنياتي البسيطة (عاد حاجات زي دي بتفوت)..!

بالضبط ، ياها ملامح الخرطوم زمان ، واكتر ما يدهشني لمن اتفرج في تسجيلات قديمة (حفلات رمضان زايد ، حفلات اسماعيل حسب الدايم ، وتوثيقات عضو المنبر صديقنا عماد احمد..ياهم الخالق الناطق بتاع امريكا في الزمن داك..ككيف التاثيرات دي كانت بتنتقل؟..ياهو الماجيك ذاتو..!!)..

ودمت..
كبر

Quote: أقصد عملية (Auto-tune) ظهرت في مطلع الألفية، بدوا بيها المغاربة ودقشت ورا موريتانيا والسنغال والنيجر ونيجريا وأفريقيا الوسطى، لن تجد أغنية إلا ومشوهة بهذا التأثير غير المطلوب. عادة يمكن إضافة تحليات في كلمتين أو ثلاثة لكن ليس الأغنية كلها.

بالضبط ، واتفق معاك في الملاحظة دي ، واضيف ، معظم غنا الهوسا بيعتمد على (التكنو) والأظرط التشبه بالهنود في الإكسسوار وطرق معالجة النص بتصوير مصاحب..افلام هندية بس..!
المغاربة لاحظتها في بعض فنانيهم (ناس الشاب منو كده ما عارف ، ماعدا الشاب خالد فتجربته فيها شوية جدية ووشوية مفارقة)..

كبر

استاذنا احمد الحسين..حبابك ياصديق
كتر خيرك على المتابعة..
وهناك نماذج ومفارقات طريفة للغاية..
وسوف نضيف ما وعدنا باضافته ، وبعد داك نماذج اخرى ...

Quote: بيعجبني الكاست النسائي (شيرون وارين /لعبت دور ام ري +++ الفيلم من ضمن مقتنياتي البسيطة (عاد حاجات زي دي بتفوت)..!

دي صاقعة

أها دي بالذات بكتني في تلاتة لقطات: لما الدكتور قال ليها الحالة ميئوس منها وحيعمى تماماً في النهاية. في اللقطة القررت تنصح ري الطفل بالمصير الحيواجهو. وفي اللقطة التالتة الاتجاهلت مناداتو ليها في المطبخ عشان تعلموا يقوم ويقع ويعتمد على نفسه بدون شوف. _____ ما بتفوت فيلم زي دا، جيمي عندو فيلم تاني كويس (Django unchained).

ههههههههههههههههههه...

ايواتا ليك ، وصوت الصرصور..!


العتب على النظر يا حاتم..


برضك شفت شغل كيري واشنطون كيف في ديجانقو..؟

البينات (شهد وشروق) واقفين في محطة دي كابريو..و لغاية الليلة زعلانات ككيف يترشح لكم طاشر مهرجان اوسكار وما ينال التكتح..!!


يتخيل لي جمي فوكس دايما محتاج مظلة (ريجينا كنج ، كيري واشنطون ، غابرييلا يونيون..بس ربك يستر ما يقع لينا انجيلا باسط ولا سناء ليثان..كده ح نتغبي فيهو العرفة)..!!

كتر خيرك على هذا التداعي ياحاتم..

عارفك لامن تقوم عليك الحالة ► ون ◄
ايوة كده سوقنا للعجب العجيب ده يااخ
ناس رابطهم مع ربهم عمق الاحساس بيه و التسليم له
التجانى زمان كتب
امنت بالحسن بردا وبالصبابة نارا
وبالكنيسة عقدا منضدا من عذارى
وبالمسيح ومن طاف حوله واستجارا
ايمان من يعشق الحسن فى عيون النصارى
و بدون موسيقى و رقيص اظن كفروهو
انتا بتلعب كمان مع اهل السلف
الا بس كمان ما تظلم الكابلى متعه الله بالصحة
و المجدوب عليه رحمة الله
فقد خاضو فى هذا المجال و ابدعوا قبل ناسك ديل فى ليلة المولد

سلام يا كبر وشكرا على البوست الظريف

غايتو السودانيين لو ختوا الرحمن دا في قلوبهم واتوحدوا وقعدوا في الواطـــة أخوان وحبايب العالم يكون موعود بالعجايب.

سلامات ود ابا كبر..لك التحية والتقدير

الفا بلندي ( الابراهيمي) هو من اعظم دروايش غرب افريقيا ..



ابراهيميته تتبدي في اغنيات كثيرة ومن بينها اغنية جورسيليم ..او القدس.. وهذه الاغنية مع فرقة الويلارس



هو رجل صوفي بحق ..كما قال الصديق حيدر ميرغني

سلام للصديق ولد ابا كبر وضيوفه الأفاضل.مشكور على البوست البهيج. غايتو يوم بتفتح بوست ونلقى الخاصيات كلها اختفت وبكري ذاتو!!!.

Quote: ياحبيب الزول ده اكيد صوفي

حبيبنا حيدر تعرف مسألة التصوف دي حاجة معقدة محيّره، ولحدي فترة قريبة كانت محيراني. بوب مارلي رغم انه كتب " Natural Mystic" لكنه نفى نفيا قاطعا مسألة تصوفه. والحاجة دي خلقت لي حيرة كبيرة في تصنيفه إلى أن اخرجني من ذلك الاشكال الموسيقار العالمي نصير شمة حين سألته، في حوار مطول معه، عن علاقته بالتصوّف، خاصة وأنه الف مقطوعة بعنوان: " قبل أن اُصلب" وأهداها إلى روح الحلاج، فقال لي :" الصوفي الحقيقي لن تعرفه ولن يقول لك أنا صوفي لأن التصوف عنده هو علاقة توحّد وتخلّي وتحلّي، تخلّي عن الدنيا وتحلّي بالخالق!أهدي اليكم Amazing Grace بصوت الديفا سيلين ديون وهي تؤدي هذه الترنيمة البديعة التي كتبها جون نيوتن في بداية القرن التاسع عشر:
لمن اسمع الشطر الثاني من هذه الترنيمة و الذي ويقول فيه:
لطفه علـّم قلبــــي الخشوع
ولمخاوفي لطفه قد بدد
كم ْ بديعا وثمينا ذلك اللطف بدا
ساعة أن خفق قلبي وساعة أن اهتدى
( ترجمة بتصرف)
بجيني احساس إنو الزول ده لو طار صوفي ولو ما طار برضو صوفي!
ول ابا كبر انا ما عافي ليك.لووووووول.محبتي

Quote: Mona Medani في معلوماتين غير صحيحات في البوست ده عن ألفا بلوندي Alpha Blondy . الأولي هو ما من السنغال بل من ساحل العاج ، و التانيه هو مامسلم ، ألفا بلوندي مولود من اب مسلم و ام مسيحيه لكن هو بعتقد و يحترم كل الأديان و ما عنده ميل لديانه محدده ، ألفا بدعو للتسامح والتعايش السلمي وسط معتقدي جميع الديانات ولو سمعت ليه أغنية الاله واحد God is one او أغنية Jerusalem ح تعرف انه ما بدعو لديانه محدده بل لاحترام كل الأديان و التعايش السلمي - ودي حاجه سايده في غرب افريقيا حتي وسط الأسره الواحده بتلقي بعض الابناء يعتنقون الاسلام و البعض الاخر يعتنقون المسيحيه و عايشين في سلام مع بعض وبرضه زواج المراه المسلمه من المسيحي غير محرم في تلك المناطق

منى..حبابك
كتر خيرك على المرور والمشاركة،
كتر خيرك على غنية (الله واحد) ،
وشكرا على التصويب ، فالفا بلوندي من ساحل العاج ، وليس السنغال..
فعلا اجمل مافي تجربته هي الغناء للتسامح والسلام واحترام الناس لبعضها البعض ، وله كونسيرات كثيرة تقوم على هذا الاساس..
كتبت عنه من قبل في ثيمات اخرى ، في اغسطس 2012 ، وكان الحديث وقتها عن الريقي والثورة..


واهديك الخيط للمراجعة..


عن الريقي و الثورة: الى الفاتح ميرغني و اخرين و اخريات كثر..!!!عن الريقي و الثورة: الى الفاتح ميرغني و اخرين و اخريات كثر..!!!

كتر خيرك على المرور.
ودمت
كبر

ول ابا جلالدونا..حبابك يا صديقي
كتر خيرك على المرور..

زمان يا صاحب الخواطر مثل دي كانت نظام بريكات ، لكن بعد شوية اكتشفنا انها مهمة و بنحاول نجادع فيها شوية شوية ، فالمزيكا عالم رحب ومدهش ، والجميلة فيهو كل مرة بيديك فرصة تكتشف حاجات جديدة.
كتر خيرك على كلام التجاني ، ورجعني زمن بعيد..

وكتر خيرك على اضافة تجربة استاذنا الكابلي في (ليلة المولد)..

المفارقة يا صديقي ليس تحديد من خاض اولا ام ثانيا ، ولكن المفارقة في طريقة توظيف المزيكا والتعامل مع جمهور اكثر رحابة ، فالكابلي حينما يغني هذا النص سيتفاعل معه كل من يتحدث اللغة العربية ، ولكن في تجربة الأخرين ، هي ناس لا تتحدث اللغة العربية ولا تعرف كثيرا عن الإسلام ، فهي ناس جاية بتطرب وتنتعش ..
Having good time
عشان كده دهشتنا جاية من هنا..
امسودان عندها باع كبير في الأغاني الدينية وقاعدين يسموها المديح ، وشغل ناس اولاد حاج الماحي مثلا ، محتاج الناس تزيح عنو الغبار وترجعو بنفس الهيئة الأولى ، وممكن يكون شغل متميز ومفارق..

كتر خيرك يا صديقي..

ياسر..حبابك يا صديقي
كتر خيرك على المرور..
نحن ناس امسودان رايحة لينا ضيقة ساكت.. في كل منعطف الناس بتتضايق لحد بعيد..لكن زي ما قلت لو روقنا شوية ، عندنا حاجات سمحة كتيرة..
سعيد أن عجبك الخيط..
ودمت..
كبر

ول ابا محمدين..حبابك يا صديقي
ولينا طولة يااااااااااااااخ..

كتر خيرك على المرور ،
وتجربة الفا بلوندي فيها ملامح كثيرة مدهشة ، ومنها هذا الجانب الصوفي ،
وقد كتبت عن جانب من تجربته من قبل ، حينما حاولنا تتبع اثار الريقي في افريقيا..
الجميلة في الناس ديل يا ول ابا منفتحين على العالم بصورة طيبة ، وعارفين انهم بيملكوا الحاجات المختلفة ومستعدين تقديمها في أي مكان كان ، وبتلقى التجاوب والإعتبار.
كتر خيرك على اضافة هذه النماذج..
ودمت
كبر

ههههههه

كلنا نجضانين يا الفاتح..نجاض شديد يااااخ..

حبابك ول ابا الفاتح ميرغني ،

كتر خيرك على المرور والترنيمة اللطيفة..

وح ارجع ليك بالتفصيل..


ودمتم جميعا..

كبر

غايتو يا ول أبا عليك جنس محن..
ما هو دا البجنن العالم..
وهسى يجو يقولوا ليك مجنون..
وودوه الامراض العقليه..
لامن يقطعوا هدومهم..

وبالجنبه كدى.
ومن سنين طوال..
سمعت آية الكرسى بتغنيها مغنية سنقاليه..
آى والله آية الكرسى الواااحدة دى..
عليها صوت يفلق الحجر..

وعليه...
نحن مرابطين..
سنة قمرية للحول..
لو جاك عكاز طاير..
ولا تشيل هم..
وراك رجال ياكلو الظلط !

ياسلام يالفاتح على المداخلة الشحمانة دي
عجبني كلام نصير عن التصوّف
الديفا سيلين ديون دي جارة كبر حيطة بالحيطة
تسلم كبرنا على البوست الحلو دة

ول أبا كبر
تحيات كتيرات بالحيل
دخلت البوست العجيب ده من الصباح في المكتب وقرأت التعليقات
إلا أن الفيديوهات لا تعمل عندي في المكتب لسبب فني .. فأرجأت
مداخلتي لحين العودة للبيت وسماع الفيديوهات وكلي أمل في أن أجد
ضالتي التي قتلتها بحثاً في النت ولم أجدها .. سبحان الله هي في نفس
سياق البوست وهي أغنية أحسب أن من غناها هو Isac Hayes
في سبعينيات القرن الماضي وفيها عبارة (لا إله إلا الله - محمد رسول)
ولكني منيت بخيبة أمل ومازال الأمل معقود , وأناشدكم جميعاً المساعدة.
ألفا بلوندي فنان عظيم تستمع إليه فيخلق فيك شعور مزدوج - حالة مزدوجة
من طرب وتصوف.
صوت عصفورة الواسولو (أومو سنقري) يطربني لدرجة أتمنى معها أن أكون
(قريوت كبير) في مالي لأبذل لها عطاءً لا نهاية له من الأغاني.
مالي .... محطة تشكل في حياتي وقفة كبيرة بإنسانها الذي عاشرته منذ أن كان
الكولونيل موسى تراوري على سدة الحكم, وهي محطة سنلتقي فيها كثيراً
بإذن الله .... لك محبتي وتقديري ول أبا كبر.

هناك أغنية، لعلها للمغني آيساك هيز* إسمها لا إله إلاّ الله (La Ila Lalla Ila Lalla)

غناها على إيقاع الذكر التقيل (النوبة) كانت في السبعينات أو الثمانينات لا أذكر

_____
* لست متأكد يقيناً أنه آيساك هيز

حباب الأصدقاء ..ن
ور..
حيدر ..
بابكر

محمد ابو العزائم ،
وجميع من يتابع هنا..

نأسف لعدم المتابعة ، وسوف نعود بالتفصيل..

نهديكم خيارة عربي..وللحديث بقية..





دمتم.

كبر

ناسف على الخطأ..

والفيديو المقصود لخيارة عربي (صلوا)




كبر