الصورة في الباوقة، بالليل كنت وآقف تحت شُدرة منقة قامت بِت أُختي شاتت ليك الصلعة كأنها حبة كتشنير . يشبكوك يا خال تعال بجاي، جيبو موية للخال، افتحو المروحة للخال، جيبو العضة للخال، بعد تدقس تلقى صلعتك علي الهواء مباشرة !.
الصلعة كعبة، عِلآ نسوي شنو حُكم السيِّد غلب . اللهُمّ لا اعتراض في حُكمك يا رب، وبالنسبة لسحب الصلعة أقول، حسبنا الله ونِعم الوكيل ...
و بت اختك كانت طالعة فوق الشدرة ولا كيف؟ بالنسبة للبوستات المشكلة مافي السحب, الحاصل انو زي ناس التنظيم و تخطيط المدن وكت يخططوا لفتح شارع بمروا بالنهار بوسّموا الحيطو البيوت العليها الإزالة تجي الكراكة بالليل زي المواعيد دي وآبتفرز, تشيل الموسّم كلو اها إن بقى عندك مكتبة بدوك تعوويضاتك في خشم بابها, وإن بقيت عدمان فا الله يعوّض عليك وكفاك الفايدة الجنيتها من وساع الشارع أو الميدان فا شنو... مو كعبة الكراكة و لا كعبة الصلعة كعب عدم المكتبة يا اخوي هههههههههههههههههههههههههههههههه
و الشماتة موصولة لود المشرف وجلالدونا وتنظير و كل من هو عدمان اسم المكتبة خخخخخخخخخخخ
Post: #9 Title: Re: سِري للغاية . الصلعة حاااارة . والله صحي ... Author: ناذر محمد الخليفة Date: 02-11-2016, 11:20 PM Parent: #7
أزرعها و توكل !!!!!
Post: #10 Title: Re: سِري للغاية . الصلعة حاااارة . والله صحي ... Author: محمد حيدر المشرف Date: 02-12-2016, 04:58 AM Parent: #9
Quote: غاغا في مستنقع ابو صلعة . حقوق الطبع محفوظة - Sudanese
في المدآخلة دي انا حا إتبع الطريقة الكبسورية، والفرق بينها والأصل إنو البوست حقي برآي . هسّع كلمة غاغا دي فوقا حاجة ؟. لا ما فوقا حاجة . طيّب كلمة مستنقع ؟. ما فوقا حاجة إلا إذا أُضيفت لها كلمة آسِن . سمح ابو صلعة ؟. والله ياخ دي إحتمال الزول يتحسس منها شوية . خلآس ممكن نعتذر لو في حساسيّة . أها، كلمة ورجغة ؟. برضها ما فوقا حاجة . طيّب إتلحس ليييه ؟. يمكن لآمن مشيت نُمت وآحد فكا فيهو مدآخلة لغم . طيّب ما تخليها لآمن اصحى من النوم، علي اليمين كان مشيت جبت اللِستِيّكة من فرانكلي ؤُ عدمتها ليك النقطة .
إفتكر كدا الإمور وضحت لو عايز إيضاح اكتر نوضح ؤُ منتظرين نشوف حكاية الحرية لنا ولغيرنا .
Quote: حزنك ياوطنى احزنى ودالمدير على قول اخوانا الكيزان نحسبك ان شاءالله من كبار ملاك الصلع والصلعه زاتو وقارا اكبر من وقار الشيب. بالنظر الى الصوره اعلاه واضح انو امكانياتك الصلعيه اكبر من المعقول يعنى الصوره قدر ماغطت لم يفتح الله عليها ان تظهر شعرايه واحده بس. لذلك اقترح ترشيحك رئيس فخرى لاتحاد اصحاب الصلع والجلحات الصغيره بالمنبر والامانه العامه اديها لملهم طالما انو جلحاتو لاباس بها. وابرز المهام المنوطه بهذا الاتحاد هو العمل بقوة لاسقاط نظام الجبهه والشعر الكثيف ونشر ثقافة التصليع لاقامة دولة الصلع الديمقراطيه ايمانا بمبدا اقلكم شعرا اكثركم عدلا.
حبابك يا وطن، كدي أُخُدلك جولة في الدفتر القديم دا دوب ما جيّت لمداخلتك التانية، كان الله مدّ في عُمر البوست :
Quote: إشـتـهـيـت الـحـلآق... والله صـحـي ...
يا حليل أيام زمان، زمن الزمن زيّن، والشَعَر مغتي الإضنين . زمن الإستعدادآت للعيد تبدأ قبل شهر. كان عيد رمضان، إرهاصات البسكويت و الكعك، وكان عيد الضحيّة، إرهاصات اب اربعة يا قول نسوان النضُر. الأفران نيرانا ملهلِبة و الصواني تطاقش علي الفرن. تسمع: خبزتو ؟؟؟ كان خبزتو ادونا صوانيكم، والشنافات شغالآت: خبِيز فلآنة !!! برِي بس طُوّب الكماين. في عيد الضحيّة تسمعِن: خروّف ناس سعدية، يخربو جلطة كركار تجلُطا في راسا ما مرقا ليها. الترزية مكبسين فوق المكن الوآحد لو رموا جنبو قنبُلة ما يتلفِت، و في سوق البهايم تسمع الطلآق وآقف لمّبة، وأُماتنا المِسيكيِنات في تكلتِن و عُواستِن ما جايبات خبر. في السوق المقصات كلما تجي قِدآم دُكان أقمشة تسمعا ظِيييييييييطك في طاقات القماش. ناس النِعلآت شغالين، وناس البرسيم شغالين، حاجات التسالي، المطاعم، الحلوآني، المواصلآت...إلخ، السوق في حركة دآئبة لا يهدأ غباره إلا بعد دخول العيد. كنا أكتر الناس سعادة بالعيد و نحن في أيام جهلنا. يسوقونا للترزي، ونطلع مِنو بجلآبية كرت ترزي. بروُّد العيد كان أهمّ حاجة، لكننا كنا نهابه عندما يقع العيد في الشتاء. كان عندنا برودين مُهمات في السنة، برود العيد، والبرود بعد حلآقة العيد. يا حِليل الحلآق. فارقتو فُرآق الطريفي لجملو. كنا نمشي ننتظر دورنا في الحلآق. نقعد فوق الكرسي قدآم المرآيا التي وُضعت لغيرنا من الناس الكُبار، و يبدأ الحلآق يجعل مكنته التي تشبه فكين راس النِيّفة تعمل العجب في روسينا. الشعر ينزل فوق الرقبة مع العرق والـوسـخ ويسبب لينا ضيّق، ويقرِصنا، إضافة لظعطات المكنة المتوآلية، وقرضات المقص الحآرة، وهرشات الحلآق عندما يصيبنا النعاس والراس يقع فوق السدُر. الحلآقين كانوا دايماً يهرشونا وينهزرونا عندما تنزل قملة، قملتين مع الشعر. الحلآق بعد يحلق للوآحد عادي بعدو بيقعِد التاني يجزو زي الماحصل شي. لا بنعرف ايدز، لا يحزنون. والله صحي...
في فترة من فترات عمرنا الحلآقين ضربتُم بوّرة العدو. أصبح سوق الحلآقة في حالة كساد بعد ان جلب لنا الغرب موضة الخنفسة. خنفسنا الشعر، ولِبسنا الشارلستونات، وأصبح اجعص خُلآل يدخل في شعرنا الشعر جب يبلعو. بقينا نسمع بوني أم، والبِي جيز، وتينا تشارلز، وبوب مارلي، والحلآقين زآتُم خنفسو بعد قِنعوا من خيراً فيها. كنا في البحر الوآحد يغتس و يجي بآقي مع نفضة للشعر في الهواء علي طريقة نفضة شامي كابور. قاصرنا الأدروبات في الشَعَر و الخُلالآت التي كانوا بارعين في صناعتها. الصينيين النجيضيين إنتهزوا فُرصة الخنفسة، ودفسوا العالم بالخُلالآت مع إنهم شعرهم سبيبي. كنا باقيين في شعرنا عشرة. سبيبة وآحدة ما بنخليها تنزل من راسنا، وكان الوآحد حنّ علي الحلآقين ورآح للحلآق واسالوا الشعر المتطاير، اليوم التاني الجكس يجوك: يخسي عليك يا ود المدير، يعني حلقت مآلك ؟؟؟. بعد زمن رجعنا من شرنقة الخنفسة إلي يرقة الحِلآقة تاني. إستيقظ الحلآقين من فترة البيات التي فُرضت عليهم ليظهروا بمظهر جديد. اليافطة بدل دُكان حلآق، بقى مكتوب عليها صالون حلآقة. المكنة راس النِيّفة حلّت محلها وآحدة بالكهربا معاها المطواة البسنوها بالجِلدة المعلقة في باب الصالون لزوم القطعيّة. ممكن تلقى صورة لفريق الهلآل أو المريخ معلقة في الصالون. أو صورة لمصطفى النقر مع صورة لنجلآ فتحي و عادل إمام. قطعة نضيّفة لتقيك من لسع الشعر، بخاخ كلونيا، بُودرة و فرشاة. الصالون نضيّف و الحلآق دايماً بتكون عندو شِلّة بتاعت ونسة. الزبون تلقائياً بيكون دخل في الونسة التي غالباً ما تكون في مجال الكورة أو السياسة. مسألة الحِلآقة أصبحت نوع من البرنامج الممتع، والحلآقين بقو يظبطوا حلآقة مُبالغة. والله صحي...
دآرت عجلة الزمن لتدخلنا إلي دآئرة الهموم. دخلنا مجال العمل، وبدينا مشوار البحث عن شريكة الحياة الزآخر بالأحلآم الوردية التي تقودك بدورها للتفكير في الغربة لزوم تصليح الوضع و كِدا. فترة الخطوبة وضطدت علآقتنا بالحلآقين اكتر. الونسة مع الحلآقين فرآيحيّة، والوآحد فينا بيكون مطمئن جداً للحلآق بعد يكون حلق عندو مرتين تلآتة، والحلآق عِرِف الإستايل بتاعو. صالونات الحلآقة بقت زي الصالونات الأدبية. الوآحد فينا أصبح حتي لو ما دآير يحلق بيرافق صاحبو للحلآق كي يمتع نفسو بالحوارات التي تتم في داخل صالون الحلآقة. الغربة حلم كان يراودني تحقق لأعتلي سلم الطيارة و شعري في كامل هيئته لم ينقص سبيبة وآحدة. إستمرّ التواصل مع الحلآقين في الغربة. صالونات الحلآقة في الغربة شبيهة بصالونات الحلآقة في بلدنا. الحلآق في الغربة برضو عندو شِلّة أُنس سوا كان جاميكي أو زلمي وهم الجنسين البنتعامل معاهم. سبق أن حلقت كم مرّة في صالون بتاع إيطالي، وأكاد أجزم إنو حكاية شلة الأُنس دي فكرتا نابعة من الحلآقين الإيطال. الراجل عندو شِلّة بتاعت ونسة مبالغة...
بعد الزواج حضرت زوجتي لِتمشي معي خُطى الغربة التي كُتبت علينا، وبعد دآك الجراكيك الإتنين إنضموا للركب، والحكاية بقت فيها نِقة من ثلآثتهم، وانا بقيت ما عارف القاها من العدو واللآ من الوفد المرافق له ؟؟؟!!!. علآمات التصحُر بدأت تظهر في نُص الكانكوج حيث أصبح الشعر خفيييييف جداً السبب الذي أفسد عليّ الونسة مع الحلآق حيث أصبح تركيزي كلو محصور في منطقة التصحر. بكون مرآقب الحلآق مُراقبة لصيقة جداً طُول فترة الحلآقة، وبمجرد ما يمشي علي المنطقة الصحراوية أنا طوالي الرجفة تمسكني، واقولوا: لالالالالالاأأأآ، المحلة دي لا تعصر عليها شديد، بس خلي الشعر كلو يكون موزون عليها. بعد فترة لقيت إنو الصِلة بيني و بين الحلآق إنقطعت، و الحكاية أصبحت لا تتعدى وقفة خمسة دقايق قدآم المرآيا اقضي فيها علي الشِعيرآت الفضلن لاصقات في جنبات الراس. كان ختيت الرحمن في قلبي وكشحت الشِعيرآت من الموس في صينيّة وقعدت فوقِن، لومكم بي تب بحسِبِن. والله صحي. لله ما أعطى، و ما أخذ. إنا لله و إنا إليه رآجعون... . . . ود المدير...
Quote: و بت اختك كانت طالعة فوق الشدرة ولا كيف؟ بالنسبة للبوستات المشكلة مافي السحب, الحاصل انو زي ناس التنظيم و تخطيط المدن وكت يخططوا لفتح شارع بمروا بالنهار بوسّموا الحيطو البيوت العليها الإزالة تجي الكراكة بالليل زي المواعيد دي وآبتفرز, تشيل الموسّم كلو
Quote: تجي الكراكة بالليل زي المواعيد دي وآبتفرز, تشيل الموسّم كلو اها إن بقى عندك مكتبة بدوك تعوويضاتك في خشم بابها, وإن بقيت عدمان فا الله يعوّض عليك وكفاك الفايدة الجنيتها من وساع الشارع أو الميدان فا شنو... مو كعبة الكراكة و لا كعبة الصلعة كعب عدم المكتبة يا اخوي هههههههههههههههههههههههههههههههه و الشماتة موصولة لود المشرف وجلالدونا وتنظير و كل من هو عدمان اسم المكتبة خخخخخخخخخخخ
والله عدم المكتبة بالحيل كعب، أخونا قيقراوي الله يطرا بالخير يلآهي بيها لآمن مرق فد خترة . والله المكتبة ما عندي لكن بيتي مِلِك ؤُ ماني ماكل لي شي من الشارع عشان يقلعو حقي، غايتو المخيّر الله نحن الحكومة ما بنقدر عليها . يعني اصلو مافي سبباً كدي يخلي نفر النادرة دي تبقى علي، عِلآ كان الصلعة، ؤُ قلت بعتذر . دحين الصلعة كعبة يا ود البشرى .
الجماعة اللِنتَ شمتان فوقُن ديّل وكِت ما عندهم مكتبات مسويلنا غاغا ؤُ ورجغة الليل والنهار فوق كم ؟...
يا ود المشرف قول للزعيم ود المدير عفاك من الحِليّف وكان دآير تلحّق البوست دا اخوهو خُد راحتك بعد الجماعة دعسو الأبنص ...
Post: #21 Title: Re: سِري للغاية . الصلعة حاااارة . والله صحي ... Author: محمد البشرى الخضر Date: 02-12-2016, 10:47 AM Parent: #19
Quote: يعني اصلو مافي سبباً كدي يخلي نفر النادرة دي تبقى علي
يا معلّم جايب لينا فيديو اطناشر ساعة غاغ غاغ شغلته وانا مارق الدوام جيت العصر لقيتهم لسة يغاغو وتقول لي ما عندك سبب!! أنا لو عندي القلم احظرك من الفيس بوك زاتو خلي اخورن ليك بوست ههههههه
اسمع كلام حزنك يا وطني الأخير عن صلعتك و الشامبو و الكاشير و بتاع دا هل يعتبر تحرش ولا عنصرية ساكت ؟
Quote: يا معلّم جايب لينا فيديو اطناشر ساعة غاغ غاغ شغلته وانا مارق الدوام جيت العصر لقيتهم لسة يغاغو وتقول لي ما عندك سبب!! أنا لو عندي القلم احظرك من الفيس بوك زاتو خلي اخورن ليك بوست ههههههه
l]
Post: #24 Title: Re: سِري للغاية . الصلعة حاااارة . والله صحي ... Author: حمد عبد الغفار عمر Date: 02-12-2016, 11:41 AM Parent: #23
قصة قصيرة
Quote: جلست بالقرب من زوجها وقالت وهي تبتسم ابتسامه جميله : هل تعرف نساء اخريات غيري؟ فاجاب : نعم !!! قالت وقد تغيرت ملامح وجهها : كم عددهن؟؟ قال : بعدد شعر راسي!!!! هنا اغرورقت عيناها بالدموع وخرجت من عنده مكسورة الخاطر ثم بعد فترة عادت واعطته لبعة قوية في ظهره وهي تضحك قائلة له : الله يجازيك ياااااا أب صلعه وقعت قلبي ..
اكيد يامعاوية سحبوا بالبوست حقك عشان مداخلتى ردا على مداخلتك التى ورد فيها كلام مافهمتوا فيه ايحاءات الشجار وتحدثت بكلام مبهم عن الذين تكرموا على بمفتاح حقيقة لم افهم فى ردى الاخير وضحت لك فيه ان اننى افهم الغاغا كويس وصوت القعوى وما قصدته عندما سالتك ماعندك هديل قمارى بدل صوت القعوى حتى لاتنقل الغاغا من بكان لى بكان وهى فعلا كانت منقوله المهم فى الاخر انا اعتذرت عن مداخلتى الاولى طبعا مداخلتى جابت مداخلات قد تكون ذادت الغاغا الاصله موجوده
Entrance ود المدير لا تنكأ الجرح القديم فإنني ودعت شعراً أسوداً وطويلاً رحم الله مصطفى سيد أحمد الصلعة مشكلة المشاكل وهي كما قال الأستاذ الرائع التجاني حاج موسى في غير هذا الموضع " الزمن غير ملامحنا ونحن بقينا ما نحن وأنا الصابر على المحنة" ، لقد أصبت بصلعة وراثية من الدرجة الثانية حاولت عبثاً إيقافها لكن هيهات جربت طب العطارين والدجالين والفنانين والحواة والهواة ولم يتعدل شيئاً البته. أصبحت أبكي على الأطلال فأنا كنت ذات مرة خنفساً متخنفساً ذا شعر متجعد فاحم كثيف يحاكي شعر الكولمبي فالديراما ، وما بين غضمة عين وإنتباهتها تمعط وتزعمط وتصحر وتحور حتى أصبحت أغسل وجهي من منتصف نافوخي ، إنها نكبة روما والمتمة كما إستشهد بذلك أهل حلمنتيش في مكان غير هذا. حاولت أن أتعامل معها كحالة ملازمة لا فاكاك منها إلا بالحل بله من القيد والذلة فكنت أنجح مرات وأخسر الرهان في مرات أخر ، وتبقي جميع دعايات الشامبوهات وصوالين تصفيف الشعر وما في حكمة مستفزة إيما إستفزاز لشخصي الإصلع. وهي في أحسن الأحوال تعلمك الهبالة ، وأنا ماشي في أي شارع أسمع نداء إنت هوي يا أب صلعة فألتفت لا أرادياً فإذا بالمقصود أصلع آخر لا أنا فآكلها في حنان حناني وأواصل السير. أدلف إلى حافلة مواصلات فيتجاذب إثنين أطراف حديث الراجل: محمد إبراهيم السيدة: ياخ محمد إبراهيم منو الراجل: النقلوهو من عطبرة السيدة: ما عرفتو الراجل: يا أخي راجل كده بلبس نضارات نظر ومن النوع البحشي قميصو في البنطلون وتلقيهو طوالي بدري في المكتب السيدة: أيوه أيوه أيوه عرفتو دا الراجل أب صلعه داك عندها تتشحط عروق صلعتي بالقدر الذي تصبح معه قابله للإنفجار فأكورك للكمساري لو سمحت نازل هنا مع العلم أن بيني وبين محطتي تلاته كيلومترات. -- هذا بعض من البعض وما خفي كان أصلع .... يار يت نعمل رابطه للصلع وممكن نصل بيها مرحلة وزارة ونطلق عليها وزارة الصلعات والجلحات ، يكون هنا وزير دولة للصلعات وآخر للجلحات وممثلية ترعي شئون السودانيين الصلع بالخارج بشرط أن تكون الصلعة طبيعية ، كما أننا في حاجة إلى تثقيف لكيفية التعامل مع الصلع كشئ حتمي أو سيك سيك معلق فيك لا بنفعو دهان لا بخور تيمان ، وأن لا ندقس ونشتت قروشنا في أمور لن تعيد لنا سبيبه واحده من باب سيد الرايحه فتح خشم البقرة " وبمناسبة البقرة دي بالذات قرأت مقالاً مفاده أن لسان البقرة بما فيه من خشونه ولزوجه قادر على أن يعيد للرأس الأصلع شعره ، فذهب إلى قريتنا الكائنة وفي الزراعة مشيت لي زربية البقر ووجدت بقرتنا البعرفها وتعرفني فنظرت إلي نظرة فيها الكثير من التحدى والريبة لا تشبه نظراتها في أيام قد خلت وكأنها تقرأ بنات أفكاري ويقيني بأنها تفعل خاصة بعد أن إنكشف المستور في الرأس فأصبحت الأفكار في منتهى الشفافية ويمكن قراءتها دون عوائق أو موانع أها في الحته دي "تريت" أو تراجعت لا فرق ولعنت أبو الفكرة التي ربما كانت سوف توردني موارد التهلكة بعد أن تخيلت أنه ربما تفهم البقرة الوضع بأنه نوع من العداوة أو التحدي فتقوم بنحطي في نص صنقوري الأصلع فيزداد الأمر سوء على ما هو عليه بغرز طبية يبقى أثرها ما بقيت حياً. وآن لي أن أتوقف لأجفف عرق الصلعة الذي يشبه مجاز قطر الندي في أب سبعين وفي صباح باكر في جروفنا. أما الحلاقيين فإنني أمقتهم برغم عشقي لهم فكل ما أمر أمام صالون حلاقة أردد بين السر والعلن يا حليهم دوام بطراهم
عودة إلى بدء هناك الكثير من العبارات الجارحة التي يمكن تصنفيها بأنها عنصرية منتنه بغيضه في حق قبيلة الصلع. فمطربة في بيت عرس يضم لفيف من الناس تقول وبصوت عالي بعد أن ينقسم الليل "أموت أنا في الخنافس وأريت أب صلعه طاير" فتتعالي أصوات الحضور وصفافير الناس أما من هم على شاكلتي من الحضور فياكلوها في حنانهم ويتحسسوا رؤؤسهم النووية ويتمنوا لو تنشق الأرض وتبلع المغنية وبتاع البنقز والبيز جيتار لتجاوبهم الكبير مع الجملة وإبتسامتهم التي أضاءت ليل الفرح ، وتلك البت المفعوصة التي تتلوى في وسط الدايرة وتوزع البسمات بالمجان وكأن الموضوع وقع ليها في جرح أو عندها غبينه مع حبيب أصلع. أو يأتي إليك صديق من أبناء مصر فيقول لك "منور يا بيه" فتتلعثم وتتبوم وتتجهم وتقرب تقول ليهو يا اخي عيب عليك ما تقول كده تاني ، وتحشر حته الدين في النقاش وتقول ليهو قول حمدا لله على السلامه وبلاش كلام الحداثة يا أخا العرب فيتجهم الرجل ويفكر في أخذ كورس تقوية في لسان العرب ويتخيل نفسه في العصر الأموي أو العباسي بكل ما فيه من جناس وطباق. في بدايات الزحف الصحراوي كنا ثلة نفتخر بشعورنا ونفاخر بها فكانت تففنا جمع تفه غجرية مجنونة ، ولما بدأ ذلكم الزحف الرهيب يتسلل إلى رأس أحد الأصدقاء كنا نسخر منه ونعايره فكان يتضايق إيما ضيق وفي إحدى جلسات السمر قال له أحدهم يا برعي إنت داير تجيك صلعه فرد عليه وبسرعة الصوت أنا ما داير لكن أعمل شنو هي ما بإختياري ، فضحك الجميع من سرعة بديهته وجهجهته للموضوع وتشتيت نظرات الشماته عن أم رأسه. والآن أصبحنا جميعنا في المسخرة شرق بعد أن ضرب الصلع معظم رؤوس شلتنا ولم يبقى إلا القليل منهم صادماً محافظاً بكل ما تسرب إلى رأسه من شعر أبيض.
ود المدير الله يجازي محنك ضحكتنى لما دمعتا الصلعة دى معقدة ناس كتاااار وانا ما بحبها نهائ في الراجل عندنا طبيب زميلنا قصة الصلعة دى مزهجة ليك زهج شديد ومعقد منها قام واحد من دفعتوا علق لى على صورتوا في الفيس هههههه قال لى الصلعة كبرت يا مستر طوالى حذف ليك المداخلة بتاعتوا وحذفوا من الفيس والله ضحكت ضحك
الصلعة ما مشكلة يا ود المدير انا عندى مشكلة مع طول الرجال ياخي جنى وجن الراجل القصير ياخى ما بحبوا علشان انا طويلة والمصيبة اى واحد يتقدم لى بكون قصير ههههههه دى يحلوها كييييف
وضاحه شكراً على الهدية والفيك إتعرفت (كمية بتاعت وجوه ضاحكه) والله يجازي محن ود المدير فقد أوردني موارد التهلكه ، من هنا أدعو إلى تبني إستراتيجية وطنية لمكافحة إستفزاز أي زول عنده صلعه. الصلعة تعامل معها البعض بحلاقة الجنبات بنمرة واحد ووسط النافوخ والرأس نمره إتنين نظام غش عديل كده لإخفاء ما يمكن إخفاؤه وفي ناس طبعاً عايشه وهم كبيييييييييير مطلقين لما تبقى من شعر رأسهم العنان بالقدر الذي أصبح الواحد فيهم كما قال أخونا جعفر لأحد الأخوان "خنفس حركة ورا" فتشوف رأس الواحد من هؤلاء زي خيط القطن في المترار على أن يكون طاله من الأمام هجوم لـ whatsoever خلاهو نصف دائري والأمثلة على ذلك كثيرة في المجتمع حتى تقرب تعدل المثل وتحرفه للصيغة التالية من ورا هلا هلا ومن قدام برضو هاها هاها ما أن يلتفت لكين لو فضل معسم وبعاين قدام وسابقك بي خطوه يظل هلا هلا.
الجاتك في شعرك جهجهتك أبو الأصلع الزلبطي مرة كده متكل في البيت وفاتح التلفزيون وبعاين في الشاشه وما متابع وفجأة كده صفا إنتباه "شدني التالي" إن كنت عزيزتي من السيدات اللائي تعانين من مشكل الشعر الخفيف أو الصلع لا سمح الله، فلدينا الحل الأمثل الذي سيخلصك من هذا المشكل... إنها وصفة بسيطة لن تكلفك الكثير، مكوناتها متواجدة لديك في المنزل و هي سهلة للغاية إنها وصفة الجرجير خدي ربطة من الجرجير و اغسليها جيدا، ثم ضعيها بالخلاط الكهربائي دون نزع جذورها و أضيفي إليها القليل من الياغورت الطبيعي الخالي من المنكهات، اخلطي كل العناصر جيدا ثم ضعي الخليط على شعرك من الجذور إلى الأطراف و اتركيه لمدة ساعتين على الأقل، ثم اغسليه بالطريقة المعتادة بالشامبو الذي يتناسب مع طبيعة شعرك استعملي هذه الوصفة مرتين خلال الأسبوع و لمدة شهر، و قبل انقضاء 30 يوم ستلاحظين بأن هناك شعيرات صغيرة قد بدأت بالنمو في المناطق التي تعانين فيها من الصلع أو من الشعر الخفيف أتمنى أن تنال هذه الوصفة إعجابكن. ورغم أن الحديث موجه للمرأة بالدرجة الأولى وبكل ما في نون النسوة من أنوثة إلا أنني ومن باب سيد الرايحه فتح خشم البقرة وربما أغوار غير مثبورة ولخلو الجو لي من الناس يعني نظام "خلا لك الجو فبيضي وأصفري: ، قمت على التلاجة وشلت لي ربطة جرير كنا ندخرها للسلطه أما يقورت دي بعد فترة حتى عرفت إنها زبادي بالإنجليزي وبحروف عربية المهم كابو بدون نكهات ينفع ، أها عندي خلاط براون مقرش ليهو فترة لضيق حوض تلاجتنا أقوم أدفس الخليط فيهو زي ما قالت القناة الفضائية وأجلبط نفسي من نص رأسي لي كرعيا أو لغاية قريب من الحواجب نظام أنا الحا أحدد بدايات منابت الشعر في مقدمة رأسي ، وبعد مضي أقل من خمسة دقائق الباب يدق وويدق معه قلبي وكأنني سوف أقوم بتنفيذ ركلة جزاء ترجيحية في ملعب الماركانا الشهير ، وقبل أن أقوم من مقامي إذا بسئ الذكر الموبايل يرن وما عرفت أقبل وين في الباب أكثر أصحابي سخرية على وجه الأرض وفي الجوال أم العيال تطلب أن أقوم بشراء رغيف لأنها ميممة صوب الدار لإعداد وجبة الغداء المنقوصة جرجيراً ومقصورة يوغورتاً وما بين هذا وذاك بدأت أتصبب عرقاً وبدأت الخلطة السحرية في الزوبان لتغطي كل الوجه وأنا في هذه الحالة يزداد الطرق على الباب فلم يكن هناك بد فقررت وأعلنت وأسررت وتوش فتحت الباب وليكن ما يكون ولا نامت أعين الجبناء ، فعاجلني صديقي بنظره ملؤها الإستغراب دا شنو يا عمك دا رأسك ولا الرأس الأخضر مالك يا زول أوع تقول لي نظام حفلة تنكرية لا لا دا الهالوين شتت من زمان ، يا زول ما تقول لي وقعت في صحن وبقت قصة وكمية تعليقات أربأ بنفسي عن تمكين القارئ منها يعني بإختصار سر لن أبوح به إلا إذا ظهر ذلكم الصديق في منتدانا هذا ولم تكن روحه رياضيه كالمعتاد ونشر ذلكم الغسيل القذر على الملأ بالرغم من مرور فترة ليست بالقصيرة على الحادثة لكنه صديقي الساخر موهبةً لا تصنعاً يعني أصلو ما بتلفت ليها ويجيبا ليك بالمقاس قميص عامر كما يقولون. ثم يأتي الدور على أم العيال وهاك يا شماته ولأنني لم أقدم السبت معها يوماً كان لابد أن أتلقى سيلاً من الشماته الصامته نظام بعاين بي عيوني وبكل هذه الشماته لا بالحور قتلننا ثم لم يحيين قتلانا. المهم أيقنت أنه من الغباء بمكان أن نفتح خشم البقرة للبحث عن ضآلتنا وأياً كانت المبالغة في المثل فهو مثل تعجيزي أو تعسفي فكفرت بمثل هذا المثل البائد ، وفي المقابل أيقنت أن العطار لا يصلح ما أفسده الدهر. ملهم كردفان: يبدأ الأمر بسيطاً ثم يستفحل جلحاتك مشروع صلعه تضوي ود المدير: قفا نبك كل الصلع من العزاب: أقول ليهم ما تنسوا "هي الليل العديل والزين والليلة العديلة تقدمو وتبرا" دي فيها ضريرة في نص الرأس زي حلاقة الإيطالي باولوتيلي أها دي دبارتا كيف
Post: #38 Title: Re: سِري للغاية . الصلعة حاااارة . والله صحي ... Author: معاوية المدير Date: 02-17-2016, 09:04 AM
Quote: الصلعة ما مشكلة يا ود المدير انا عندى مشكلة مع طول الرجال ياخي جنى وجن الراجل القصير ياخى ما بحبوا علشان انا طويلة والمصيبة اى واحد يتقدم لى بكون قصير ههههههه دى يحلوها كييييف
Quote: اكيد يامعاوية سحبوا بالبوست حقك عشان مداخلتى ردا على مداخلتك التى ورد فيها كلام مافهمتوا فيه ايحاءات الشجار وتحدثت بكلام مبهم عن الذين تكرموا على بمفتاح حقيقة لم افهم فى ردى الاخير وضحت لك فيه ان اننى افهم الغاغا كويس وصوت القعوى وما قصدته عندما سالتك ماعندك هديل قمارى بدل صوت القعوى حتى لاتنقل الغاغا من بكان لى بكان وهى فعلا كانت منقوله المهم فى الاخر انا اعتذرت عن مداخلتى الاولى طبعا مداخلتى جابت مداخلات قد تكون ذادت الغاغا الاصله موجوده
وتانى بعتذر عن مداخلتى الاولى معك
دهب يا دهب، ياخي الدهب عمرو ما يصدأ . اغلطو أنتم يا من عفرتُم اجسادكم بتراب اتبرا ؤُ نجيكم نحن بالأعذار . يا زول إنت في بوستاتي سيد بيت ...
Quote: والآن أصبحنا جميعنا في المسخرة شرق بعد أن ضرب الصلع معظم رؤوس شلتنا ولم يبقى إلا القليل منهم صادماً محافظاً بكل ما تسرب إلى رأسه من شعر أبيض.
أها، شُفت نوع القليل دا انا بيتوّر علي العصبي، ياخ الوآحد يكون اكبر مِنّك زاتو ؤُ تلقاهو ما عندو حِتة خفيفة بالغلط في راسو ضِف إلي ذلك كان ختيت الرحمن في قلبك بتعد الشيبات . نوع ديل بصراحة بيعكرو دمي حتي لو كانوا اصحابي زي ابراهيم ناصر دا . قال نايب رئيس قال ! .
l]
