الزبير أحمد حسن مع الطاهر حسن التوم في مراجعات.. ماذا يقول عن الفكرة الجمهورية؟؟

من الدقيقة 39.. الطاهر حسن التوم نرمز له بـ(س) والزبير أحمد الحسن بـ(ج)..
س: طيب تأثير الفكر الجمهوري على، تاني ارجع تاني شوية الجامعة من الجامعة وأعاين الحركة الاسلامية تأثرت بالجدل مع الجمهوريين حتى رسالة الصلاة ياها رسالة الصلاة عند محمود الموضوع عن المرأة بتلقى شئ عن المرأة عند محمود، هل تأثرت الحركة الإسلامية فى جدلها وكانت جامعة الخرطوم واحدة من تجلياتها هل تأثرت بنقاشاتها مع الفكر الجمهوري محمود محمد طه؟
ج: والله طبعاً قضية الحداثة وحل محمود محمد طه ليها بأنه الاسلام رسالتين والاسلام برسالته الاولى لا يصلح لانسانية القرن العشرين الحركة الاسلامية والحركة الاسلامية السنية فى كل العالم بما فيها الاخوان المسلمين حلها ليهو بصلاحية الاسلام لكل زمان ومكان بيجي من اجتهادات من داخل النصوص بدون الخروج عليها ففعلا ما كانت استجابة للجمهوريين يعني لكن استجابة لروح العصر كانت موجودة والجدل الكثيف الأكثف لم يكن مع الجمهوريين وحدهم وإن كان الجمهوريين ظهروا فى فترة أيام نميري اعطاهم حرية واسعة هم ذاتم كان معترفين بنميري بيدافعوا عنه بصورة واضحة وأحياناً يستعدوهو علينا يعني وان كان ذلك كذلك لكن الجدل الرئيسي والأساسي كان مع الشيوعيين واليساريين والعلمانيين حول الاسلام وانه صالح حول انه زي ما الجمهوريين بتكلموا عن الأخوان المسلمين، الشيوعيين عندهم كتب عن الاخوان المسلمين أعداء الله وأعداء رسوله وانهم خرجوا من الدين ويحاولوا استنساخ ما قالوه الشيوعيين المصريين عن الاخوان المسلمين فى مصر فى السودان فى قضايا إخراج الاخوان المسلمين عن الدين وانهم بتخذوا الدين وسيلة للسياسة وغيرها كان ده التحدي الرئيسي والأساسي باعتبارهم كانوا أخطر من الجمهوريين، الجمهوريين كانوا مجموعة بسيطة..
س: (مقاطعاً) لكنها مجموعة بتناقشك من داخل الميدان نفسه ميدان الفكر الاسلامي نفسه من داخل فضاء النص نفسه وإن كانت متأولة للنص يعني أو عندها رؤية خاصة بالنص لكن كانت لاعبة فى الملعب نفسه والأركان فى الجامعة كانت أركان..
ج: لكن أنا أفتكر انه الندوات والمحاضرات والمجموعات التى تخصصت فيهم زي أخونا النور محمد احمد وأخونا المرحوم عبد الجبار المبارك وأخونا فى الجامعة محمد عثمان محجوب رحمه الله كانت كافية للرد عليهم وتثبيت الفكر الاسلامي الصحيح.
س: بتقول شنو لصالح الجمهوريين؟
ج: نعم؟
س: ممكن تقول شنو لصالح الجمهوريين من خلال الجامعة؟
ج: والله حاجتين رئيسيات معلمين رئيسيات: الولاء الشديد لي محمود (هنا تظهر على الشاشة صورة الاستاذ محمود) يطابق نظرة الصوفية المريد للشيخ بطريقة 100% والتانية: سعة البال والأفق فى الحوار كانوا أوسع صدوراً مننا فى الرأي والرأي الآخر مع أنهم يعني فى الجدل أحيانا يكون الكلام حقهم حتى الغير المنطقي يكرروهو ويصبروا عليهو ويقولوهو يعني حتى قالوا النار فى النهاية بتزول ويقوم محلها جرجير شجر جرجير بدافعوا عن الحكاية دي وبس صبر شديد يعني فمثابرتهم على الحوار وصبرهم كان مثال فعلا للمحاورين وكانوا اوسع مننا صدوراً فى الحوار.
س: شفت محمود؟
ج: إلا فى ندوة عامة استمعتلو وهو موجود لكن ما قابلته مقابلة ثنائية.
س: كيف كنت بتشوفو وهو متحدث وكده بتعاين ليهو كيف انت الزبير فى الوكت داك الشاب؟
ج: والله طبعاً ما..يعني ما الزبير الشاب الوكت داك قارئ عنه أنه هو زول آآآ..
س: يعني كنت ما داير تسمع منه أي حاجة باعتبار الصورة الفي ذهنك ولا كنت بمنطق الحجاج والجدل داير تسمعه اكتر
ج:قريت واستمعت ليهو لكن القضايا الرئيسية والأساسية بالنسبة ليهو هو يعني انه أشبه بالنبي كده يعني أشبه بإدعاء النبوة فى الرسالة التانية دي كانت فى حاجات كثيرة جداً كانت بالنسبة لينا حاجة رئيسية وأساسية يعني (تظهر فى الشاشة صورة غلاف كتاب الرسالة الثانية من الإسلام) ما بتخلي الزول بعد داك..
س: (مقاطعاً) بعاين ليهو من زاوية الزهد الخاص..
ج: الزهد الخاص والأدب والصبر على الناس يعني سمت المشايخ بتاع التواضع والبساطة والتبسط والزهد وطبعا دي ميزة عند كل شيوخنا الصوفية بتلاحظ عليهم البساطة والصبر على الناس.
س: تفتكر محمود صوفي؟
ج: آآآ
س: تفتكر محمود صوفي بامتياز؟
ج: والله مدرسة شاطحة من الصوفية هو يعني صوفية الإنسان الكامل عبد الكريم الجيلي وابن سبعين وشطحات ابن عربي المنسوبة ليه.. المنسوبة ليه معناها يعني فى كلام أنها لا تصح عنه فى جزء منها.
س: قرأت حاجة لشيخ محي الدين بن عربي؟
ج:آآآي قريت ليهوعدة قراءات يعني.
س: كيف قادر تلقى محي الدين بن عربي فى صلة بينه وبين محمود؟ تلقى في حاجة؟ في خيط؟
ج: البحث عن باطن النص، أنه النص عنده ظاهر وباطن وتأويله بما لا يتواءم مع اللغة ولمان يحتاج لنص بتاع حديث عشان يصحح بيهو بجيب أحاديث لمان ترجع لسندها بتلقاها ضعيفة لكن هو عنده طالما وافقت أصل فى تفكيره القرآني وتأويله الباطني ده بعتبرها، وإن لم تصح، هي صحيحة.
س: نقدر نقول أنه الحركة الجمهورية بالنسبة لطلاب جامعة الخرطوم شكلت بركن النقاش، أركان النقاش دي ابتدعوها هم (ج: نعم) شكلت تحدي حقيقي ليكم شكلت تحدي فكري انه لازم تقرأ.
ج: أيوة شكلت تحدي فكريلازم تقرأ وتقرأ كتبهم وتمشى تشوف ما قالوا فى كتبهم دي الناس ديل اتكلموا عن محمود شبهوهو بالإنسان الكامل مشينا قرينا الانسان الكامل فى الأوائل والأواخر وقالولنا جزء منه مكتوب فى كتاب اسمه عنقاء مغرب منسوب للغزالي (س مصححاً: ابن عربي) منسوب لابن عربي وقالولنا كتاب اسمه المضنون به على غير أهله مطبوع ومنسوب للغزالي فعلا كان تحدي.
س: الحركة الاسلامية فرحت بإعدام محمود؟
ج: والله مقتنعين وكيف مفروض يعدموهو فى الوكت داك كانت الحركة الاسلامية مبسوطة.
س: الشيخ الترابي قال: نحنا ما كنا وراء اعدامه؟
ج: والله انا ما عارف لكن إعدام محمود كان حكم..
س: هل أعدم محمود بالفكر ولا السياسة؟
ج: والله الفكر والسياسة كان فصلتهن من بعض بيبقى ما محمود يبقى فى كتاب يشوفو صاح ويحرقوه وزول..
س: بمعنى انه فى تاريخنا دائماً ما بيتداخل الديني والسياسي الناس بيقولوا الكلام ده: انه محمود أعدم سياسيا اكثر منو فكريا
ج: محمود لم يكن خطر على نميري كحاكم عشان يرجح قتله لأنه خطر عليه زي الشيوعيين والأخوان المسلمين ح يعمل انقلاب يغيرو يعني عشان تقول اعدم سياسيا ما الوافق على اعدامه نميري.
س: كيف تفرح الحركة الاسلامية وهى تعتقد ان المرتد لا يجب ان يقتل؟
ج: شنو؟
س: فى تجديدات الشيخ حسن فى موقف من الردة. الردة بمعنى ال.. يعني أنه الردة المحظورة هى الردة بالمعنى المسلح مش الردة الفكرية يعني..
ج: لكن لا الحركة الاسلامية لا القضاة لا نميري كانوا عندهم رأي شيخ حسن.
س: بمعنى انه قصدي الفرح يعني
ج: شنو؟
س: كيف إنسان ممكن بكون ينسجم يحصل انسجام انت كنت من الـ.. قلت قبال شوية انه كنتوا مبسوطين على الاقل يعني الناس الكانوا بيروا رأي شيخ حسن ما مفروض يكونوا مبسوطين لأنه ما بيفتكروا انه المرتد يقتل
ج: نحنا ما بنوافق رأي شيخ حسن مية المية ياخي.
س: يعني على الاقل فى ناس جوة الحركة الاسلامية انت قلت انه الحركة الاسلامية كانت مبسوطة يعني مفروض يكونوا ما مبسوطين يعني
ج: يعني يكونوا..
س: طبعاً ما لأنو المرتد عندهم لا يقتل إلا إذا كانت الردة بعمل مسلح مش كده؟
ج: والله يعني كان الـآآآآآآآآآآآآآ
س: يعني الموقف ده ما بينسجم مع رؤية الدكتور الترابي..
ج: الدور التخريبي للمناخ الاسلامي والسياسي وتطبيق الشريعة الاسلامية ومحمود ضدها فى الوقت داكا كان بخلي فعلا كونو يحكم عليه بالاعدام بموجب الشريعة الاسلامية يكون مقبول عند الناس كلهم.
س: هل طبق النميري الشريعة الإسلامية؟ يعني هل دي الشريعة الاسلامية؟ تقدر تقول انه نميري طبق الشريعة الاسلامية؟
ج: نميري وضع قوانين إسلامية واجتهد فى ان يطبقها او يطبق جزء منها وحنا نفسنا عدَّلنا فيها وحسَّنا فيها وطبقنا جزء منها (صورة نميري تظهر فى الشاشة) وجزء قد يكون صحيح أو غلط لكن المهم القوانين وما تم بعدها من تعديلات.......... قانوني وضعنا إطار تشريعي وقانونيا تقدر تقول فى تشريعات إسلامية هى المرجع من قانون اصول الاحكام إذا تعارضت أي حكم من الأحكام فى كل قوانين السودان مع أصل من أصول الشريعة بنرجع فيهو للاسلام فالمرجعية دي كونه انه يبقى الاطار القانوني زي ما كان الاطار القانوني السابق الانجليزي البريطاني كونو يكون القانون الإسلامي هو المرجعية ويطبق جزء منه ويطبق غلط فى بعض الشئ يخطئ فيهو المجتهد يكون ظالم ومطبق للشريعة الاسلامية ويكون ديكتاتور يطلبق للشريعة الاسلامية لكنه عمل اطار قانوني وتشريعي ما زال موجود ويمكن تطبيقه وتعديله.
س: هل كانت الحركة الاسلامية وراء تطبيق الشريعة الاسلامية فى عهد نميري؟ هل كانت وراء النصوص حتى نفسها؟
ج: لم تكن وراءها بمعنى انها يعني اشرفت عليها أو صاغتها قد يكون جزء من الناس الساهموا فى صياغتها كان عندهم علاقة بيها او جزء منهم شاور ناس تانيين عندهم علاقة بى الحركة الاسلامية فى نصوص القوانين وكده لكن ما..
س: تفتكر التطبيق كان معيب؟
ج: معيب كيف يعني؟
س: يعني كان فيهو تجاوزات؟ تجربة نميري فى تطبيق الشريعة الاسلامية هل كان فيها تجاوزات؟
ج: والله ما بتقدر تقول فيها تجاوزات يعني تجاوزات (س مقاطعاً: تشهير بالناس وقراءة اسمائهم والتساهل فى تطبيق العقوبات الحدية) التدرج في يعني قد يكون كنا محتاجين.. قد يكون كنا محتاجين لرأي فقهي وحركي أعمق فى أنها تتدرج فى أنها تيسر فى بعض الاشياء فى أنها ترى المتغيرات العالمية والظرفية فى بعض الاشياء..
س: معليش يعني أقاطعك لمان تقول أنه كنا محتاجين زي كأنو الحركة الاسلامية كانت وراء الموضوع ده. ده النميري يعني. هي حقت النميري
ج: السودان يعني المجتمع..
س: النميري..
ج: التطبيق أو التجربة كلها كانت محتاجة لأن تكون أحسن وأجود من كده لكن بالنسبة لي أنا يا الطاهر بعدما كتشنر جاء وقضى على الدولة المهدية الكانت بتحكم بالشريعة الاسلامية وألغى كل معالم المرجعية الاسلامية فى قوانيننا إلا فى الأحوال الشخصية وبنى جيل من العلمانيين عشان يحكموا السودان بالعلمانية ويكون القانون الانجليزي وقانون الاثبات الانجليزي وقانون اصول القوانين البريطانية هو المرجع بالنسبة لـ.. كونو يجي شخص يتسبب فى أنه المرجعية تبقى اسلامية فى أصول احكامها وتفاصيل أحكامها ده انجاز كبير خلاص رينا يجزى النميري ده عنه خير الجزاء والله تجنى وكتل أخواننا واي شئ لكن والله مبسوطين منه وعافين منه لأنو سوالنا حاجة بعد داك نحنا نرقّع فيها ونصلح فيها تجيب ناس بى ديمقراطية عشان يعدلوها تجيب ناس فاهمين الواقع العالمي يتجاوبوا معاها افتكر بتتصلح طالما البنيان الرئيسي الأساسي يتبني كمرجعية قانونية افتكر ده انجاز كبير خلاص...