معقولة الكلام دا يحصل في الخرطوم وفي السَهَلِي كدي.. لا رقيب ولا رقابة؟؟؟!!!

10:56 AM Feb, 02 2016

سودانيز اون لاين
أبو الحسين-المملكة السعودية ـ الخُبر
مكتبتى
رابط مختصر

الفيديو إسمو...

Quote: كشف الصوفية ومن يعاونهم من أنصار السنة - الداعية عبدالحليم أبوشوك

الداعية دا... قائم من الأول بي نمرة خمسة...

وألذَّ ما في الموضوع بدأ بي جماعتُو الكُباااااار...

حتى عرَّج علي أهل الله شيخنا البرعي...

والغريبة حتى التُرابي أدَّاهُو الفي النصيب!!!!

السؤال البيطرح نفسُو...

هل مثل هذه اللقاءات الفي سهلة الله ساااااكت دي قاعدين يصدقُوها من السلطات المختصة ولة كُل واحد يشيل مكرفُونُو ويقع في خلق الله تكفير وتشريك وتفسيق؟؟؟

هل من إجابة؟؟؟

الغريبة شابكنا إن حسابه على الله وهو قاعد يحاسب فيهم
بالشتيمة وقلة الأدب ..
الناس دي قاعدة تجىء من وين ؟
عرفناهو انتشار الغنائيين الزحموا السوق وبقي أي زول حفظ ليهو غنيتين
ولبس جنيز وفنلة كت بقي فنان يشار إليه بالأصبع الكبير..
أها كمان جاتنا موضة أي زول حفظ ليهو آيتين وعمل ليهو دقينة بقي داعية ومبلغ ..
بعدين الزول بتاع القرآن دا ما لاقتو في المصحف البستشهد بيهو دا
أية [ ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ وَجَادِلْهُمْ بِالَّتِي هِيَ أَحْسَنُ إِنَّ رَبَّكَ هُوَ أَعْلَمُ بِمَنْ ضَلَّ عَنْ سَبِيلِهِ وَهُوَ أَعْلَمُ بِالْمُهْتَدِينَ (125) ]
وما تلى على القاعدين ديل :"ولو كنت فظا غليظ القلب لانفضوا من حولك"

خليك من دا كلو اسي البرعي القاعد يقول ليهو عفن ومجرم وما عارف شنو
ما خايف يلم فيهو زول قريبو ينتف ليهو دقينتو ويملصوا على الله اللابسا
دي يخليهو أمفكو في الصقيعة ؟؟

المكرفون عندكم يا أخوان أحمدونا بما ان أنصار السنة وقعوا في مرمي النيران برضو.

Quote: خليك من دا كلو اسي البرعي القاعد يقول ليهو عفن ومجرم وما عارف شنو ما خايف يلم فيهو زول قريبو ينتف ليهو دقينتو ويملصوا على الله اللابسا دي يخليهو أمفكو في الصقيعة ؟؟ المكرفون عندكم يا أخوان أحمدونا بما ان أنصار السنة وقعوا في مرمي النيران برضو.

هلا بيك حبيبنا طلحة... وتساؤلاتك دي تُضاف لي سؤالي الأول المحيرني بالجَدْ...
هل ممكن كل واحد يمتلك ليهُو مايكرفون يعمل ليهو حلقة في السهلة كدي ساكت ويكفِّر في الناس؟؟؟

القضية تكفير المُعيَّن القايم بيهُو سداري دا... وبالعربي الواضح كَفَّر شيخ التُرابي تَنْقَرَنْقْ!!!!

أما صديقي اللدُود أحمدُونا فمن أوَّل المحاضرة أدَّاهُو الفي النصيب ولي شيوخُو الكُبار ذاتُن... ههههههههه

نفس اسلوب الشيخ محمد مصطفى عبدالقادر!
وذات الحنجرة!

Quote: نفس اسلوب الشيخ محمد مصطفى عبدالقادر! وذات الحنجرة!

يشبهُو في التهريج يا شيخ قُصي...

لكن الشاب دا شويي كدي مزوِّدها في التكفير!!!

أبو الحسين
لك الود والتحايا الطيبات
تهريج مسئ للدين ومن بعد مسئ للآخرين .... هل أصبح
السودان بلا قانون؟ .... سبحان الله ....

الكارثة قطعا في الطريق...

سينفجر البركان لا محالة..

بمثل هؤلاء وغيرهم .....لن يكون السودان هو السودان......

وربنا يستر ..

تحياتي ل ابوالحسين وضيوفه ..

الناس تعاين ليهم ساكت و مرات يضحكوا فيهم و عاملين الموضوع هزار و لكن
سيجئ اليوم الذي سيشهر فيه هؤلاء سكاكينهم في وجوه الناس و سينحرونهم في الشوارع و الطرقات
تماما كما حدث في العراق و سوريا و ليبيا و اليمن. القتل قد حدث في السودان من قبل و كان
انصار السنة هم ضحاياه، و لكن مع تمدد هذا التيار سيعم الشر الجميع.
هل هناك طريقة للقضاء على هذا الأمر قبل أن يستفحل؟.... لا ادري و اظنه امر ليس سهلا ابدا.
هل عدم منحهم التراخيص و التضييق عليهم سينهي وجودهم و تمددهم؟... لا اظن
المشكلة قديمة و البذرة قد تم زرعها و الشجرة قد نمت و انصار السنة انفسهم هم جلب البذرة و هم من تولى بذرها
و قد حان وقت الحصاد.

بدأت داعش بمثل هذا
بل قد اغلب الظن ان مثل هؤلاء يؤيدون داعش وينتظرون الفرصة للتنقيذ
يعني دواعش نائمة
لكن تساؤلك في محله اخي الحسين
كيف تسمح السلطات لمثل هؤلاء باللقاءات الجماهيرية وترفض ترخيص ندوة سياسية او اعتصام او مظاهرة

Quote: بدأت داعش بمثل هذا بل قد اغلب الظن ان مثل هؤلاء يؤيدون داعش وينتظرون الفرصة للتنقيذ يعني دواعش نائمة لكن تساؤلك في محله اخي الحسين كيف تسمح السلطات لمثل هؤلاء باللقاءات الجماهيرية وترفض ترخيص ندوة سياسية او اعتصام او مظاهرة

تسلم حبيبنا ود الشيخ...

وتوصيفك أُوافقك عليه تماماً... الخوارج لا يظهرون وجههم القبيح إلا عند زعزعة الدولة...

ودُونك ظهورهم الأول في عهد الإمام علي بن أبي طالب عليه السلام...

وبيني وبينك التنظيم في كل شي سمح... حتى زي المُهرِّج دا لو هسع عاوزين يرجَعُو لي شيخُو يشتكُوهُو ليهُو يقُولُولُو تلميذك دا يكفر في خلق الله يرجعُو لي منو؟؟؟!!!

Quote: المشكلة قديمة و البذرة قد تم زرعها و الشجرة قد نمت و انصار السنة انفسهم هم جلب البذرة و هم من تولى بذرها و قد حان وقت الحصاد.

كلامك صحيح يا دكتور...

الغريبة في الأمر الآن الصوفي + الشيعي + أنصاري السُنة + كل طوائف المُسلمين في كُوم وناس صاحبك الفوق دا في كوم تاني!!!

الجميع بين كافر ومُشرك ومُبتَدِع... وهُم برااااااااااااهُم أهل النجاة...

يا ربي علم المَنْطِق ما مرَّ عليهم ولو ضحوية؟؟؟!!!

الرجل عنده تصديق لأنه قال للصوفي تعال أعمل ليك حلقة جنبنا وأنا بوريك تطلع تصديق كيف

للأسف هو بمثل هذا الخطاب يجد جمهوراً يتابعه

ربنا يهدينا لما فيه الخير والصلاح

التحية بدون فرز ..


امثال هولاء وشيخ اللمين افراز طبيعي لنظام الفوضي العارمة !!

سلام صاحب البوست
لا حول ولا قوة الا بالله
بعدين فرانكلى محتج فى ايه
ما هو شبهه

الناس عايثة فسادا ليلا نهار،سرا وجهارا،تحت مظلة التقدم والرقي والعولمة والإنفتاح ..

بقت على أخونا الطيب ده.. لا حول ولا قوة إلا بالله..

Quote: هل هناك طريقة للقضاء على هذا الأمر قبل أن يستفحل؟

لو لم يكن هنالك طريقة تستند إلى شرع الله فلاداعي .. الراجل ما قصر ، اثابه الله..
لا داعي أن يقضى على من يجتهد في التذكير بالله بواسطة أهل الفكر الملحد والعلماني.
----
أسأل الله أن يتقبل منه ..

Quote: أها كمان جاتنا موضة أي زول حفظ ليهو آيتين ...... بقي داعية ومبلغ

الله يجزيه خير ويعلي من شأنه ويعينه على الصواب ويوفقه لما يحبه ويرضاه.
-----

قصي يا الحبيب
وين التبليغ في شتيمة الناس والتلفظ عليهم .
الزول القاعد يكورك في السهلة دا ما عندو أية علاقة بالدين
يا اللخو فما تساند المنكر .

وناس المؤتمر السوداني لمن يعملو مخاطبة جماهيرية في السوق
يعتقلوهم ويجلدوم لانو بكلمو الناس عن الفتريتة والموية النضيفة

Quote: وناس المؤتمر السوداني لمن يعملو مخاطبة جماهيرية في السوق يعتقلوهم ويجلدوم لانو بكلمو الناس عن الفتريتة والموية النضيفة

طبعا الفرق وااااضح
والنظام يعمل علي تخدير الشعب السوداني وصرفه عن قضاياه الحقيقية بمثل هذا الهوس
بينما اشاوس المؤتمر السوداني قاعدين ينشروا في وعي حقيقي وبلمسوا العصب الحي

ــــــــــــــــــــــــــــــــــــــــــــــــــــــــــــــــــــــــــــــــــــــــــــ
وليسَ لنا فِي الحنين يَد، وفي البُعد كان لنا ألف يَد، سلامٌ عليك، إفتقدتكَ جدًا ..
وعليّ السَلام فِيما إفتقِد !. (درويش)

سلام يابو حسين
من هنا ومن هذه السهله تفقس يرقات داعش
هى الينابيع التى بربد العالم تجفيفها ولكن لا تحفل
بذلك حكومتنا وتظن ان عواقبها بعيده عنها
هو خطاب تكفير مفتوح لايستثنى احد يزرع
فى نفوس الشباب الكراهيه تحت سمع وبصر
ومباركة الكثبربن وبكره مجتمعنا المسالم
دا حتشوف فبه العجب
النظام

Quote: قصي يا الحبيب وين التبليغ في شتيمة الناس والتلفظ عليهم . الزول القاعد يكورك في السهلة دا ما عندو أية علاقة بالدين يا اللخو فما تساند المنكر .

أسهَل شي عندهم يا أخي طلحة الشتيمة والسب...

لكن تناقشُوا نقاش علمي بعد شوية ينطط ليك في المواضيع وبعدها كافر ومُشرك ومُبتدع!!!

قبل يومين نناقش في واحد أول حاجة قال الإمام القُشيري صاحب الرسالة والصُوفية ما عندهم أي علاقة بالإسلام... دي نمرة واحدي...

نمرة إتنين قال الصوفية ضُلاَّاااااااااال وحا يدُخْلُو النار وبي حليفتها كمان؟؟؟!!!! ولاحظ كلامُو:

(البدعة هي الزبادة في الدين والزيادة في الدين عملتوها إنتوا وجيتوا تشككوا الناس في التوحيد عشان يرجعوا لعبادة القبور ويركعوا لشيوخ الصوفية الذين في الحقيقة هم طواغيت ((((وﷲ الذي يتبع الصوفية لن يفلح ابدا وﷲ طرق الصوفية كلها طرق ضلال وﷲ ماتوديك إلا إلى جهنم والعياذ بالله)))) اعقل يارجل واترك عبادة البشر واعبد رب البشر
أعجبني · رد · ‏3 فبراير‏، الساعة ‏05:34 مساءً‏ · تم تعديله)

أها زي ديل تمشي معاهُم لا وِينْ؟؟؟!!!!!

Quote: الله يجزيه خير ويعلي من شأنه ويعينه على الصواب ويوفقه لما يحبه ويرضاه.

نسال الله أن يهدينا ويهديهُو لطريق الخير والصلاح...

وأن يجنبه وإيانا سُبل التكفير والتشريك والخوض في أعراض الناس...

اللهم آمين...

Quote: لو لم يكن هنالك طريقة تستند إلى شرع الله فلاداعي .. الراجل ما قصر ، اثابه الله.. لا داعي أن يقضى على من يجتهد في التذكير بالله بواسطة أهل الفكر الملحد والعلماني. ---- أسأل الله أن يتقبل منه ..

حبيبنا قُصي إنت يبقى لي هنا ركَّبْتَ مكنتَك الحقيقيي... المكنة المقسِّمة لا فوق ديك ماااااا أظنها تبعك شي... هههههههه

الراجل ما قصَّر كيفِنْ وهُو يكفر في خلق الله ساااااااااكت كدي!!!!

Quote: سلام صاحب البوست لا حول ولا قوة الا بالله بعدين فرانكلى محتج فى ايه ما هو شبهه

هلا بي دكتور أحمد الحُسين...

يا اخوي دا ما عندُو شبه بلا مزمل فقيري وأبو بكر آداب (المسمِّيهُن شيخُن محمد مصطفى عبد القادر العصبجية السُفهاء الشمَّاسَة)!!!
شُوف عينة الشيخ دا تطلِّع تلاميذ كيف!!!

نسال الله لنا ولهم الهداية...

Quote: التحية بدون فرز .. امثال هولاء وشيخ اللمين افراز طبيعي لنظام الفوضي العارمة !!

ولك التحية أُختنا الفاضلة بت عمسيب...

ونسأل الله التوفيق والصلاح للجميع...

Quote: الرجل عنده تصديق لأنه قال للصوفي تعال أعمل ليك حلقة جنبنا وأنا بوريك تطلع تصديق كيف للأسف هو بمثل هذا الخطاب يجد جمهوراً يتابعه ربنا يهدينا لما فيه الخير والصلاح

هلا بالأخ كمال... ودي ذاتها تبقى طامتين بعد مُو طامة...

يعني أي واحد يمشي يقول لي ناس التصاديق ديل أنا داعية عاوز لي تصديق... ويدفع الفيهُو النصيب "إذا كان التصديق بالقروش" ويجي يغزغز مايكروفُوناتُو في السهلي كدي ويكفِّر في خلق الله؟؟؟

حاجة بالجد تحيِّر... الحديث في الدِين والفَتْوَى الطالقِي درِبَها نتائجها خطيرة ووخيمة لو لم تُضبَط... نسال الله السلامة...

تقبل الله دعواتك ومرورك الطيب يا حبيب...

Quote: الكارثة قطعا في الطريق... سينفجر البركان لا محالة.. بمثل هؤلاء وغيرهم .....لن يكون السودان هو السودان...... وربنا يستر .. تحياتي ل ابوالحسين وضيوفه ..

قطِع شك أُستاذي الأمين...

والعاقِل من اتَّعظَ بمن حوله!!!

وربنا يهدي الجميع لما فيه الخير والصلاح...

Quote: أبو الحسين لك الود والتحايا الطيبات تهريج مسئ للدين ومن بعد مسئ للآخرين .... هل أصبح السودان بلا قانون؟ .... سبحان الله ....

ولك مثل هذه التحايا وزيادة أخي بابكر...

نفس التساؤل؟؟ والغريبة أن هذا الشاب كَفَّر شيخ التُرابي بالعدييييييل وأساء لكثير من الناس إساءات شخصية...

يعني زي النُوع دا مفروض يُحاكَم لو فعلاً موجُود قَانُون...

علي الأقل يسألُوهُو يقُولُولُو كفَّرْتَ شيخ الترابي دا في شنو؟؟؟

لأن تكفير المُعيَّن دا حاجة ما ساهلة أبداً... نسأل الله السلامة...

قبل ما الواحد يخوف الناس من البخاف منهم،
حقو يوريهم فهمو الفي راسو الممكن يغير من مفاهيمهم إيجابيا!
-----
وإلى هذه اللحظة:لا يزال هنا حديث صاحب الفيديو هو الأفضل ..
وسيظل كذلك ما لم يورد أفضل منه.

كل مجال مطلوب فيه التخصص
ماعدا الدعوة
حتى الآن ابوابها مفتوحة ومشرعة للجميع
وهذه مصيبة
التخصص المطلوب ليس في الدين بصفة عامة
لكن التخصص في الدعوة كعلم ومنهاج
خاصة والآن لدينا كليات في عديد من الجامعات
اذا وصلنا لهذا المنهج ساعتها لن نخشي من داعية
اما الآن فان الميدان مفتوح لمثل هذا الصبي الذي لا تكاد تخرج منه بفائدة واحدة غير الهجوم وقوة العين

هذا الرجل لا يختلف عن البشير في شيئ !!
فالكذب هو الكذب !!
جريرته واحدة !!

ست البنات.

ما دامت الطرق الصوفية عاجزة عن أصلاح تراثها وتنقيته من الدجل والشعوذة والمتاجرة بالدين والاعتقاد الخاطئ بالوصول لدرجات عليا في الولاية والرؤى المنامية المضللة التي يظن بعضهم فيها أنه رأى الرسول صلى الله عليه وسلم والانتساب لأهل البيت بأنساب منتحلة فسيجد هذا وأمثاله أرضا خصبة لنشر دعواهم.

سلامات أبو الحسين

بالجد أمر محير أن يطلق العنان للمهاويس بمخاطبة الناس نهارا جهارا
وبعدين يقولوا داعش دي جاتنا من وين !!!

Quote: ما دامت الطرق الصوفية عاجزة عن أصلاح تراثها وتنقيته من الدجل والشعوذة والمتاجرة بالدين والاعتقاد الخاطئ بالوصول لدرجات عليا في الولاية والرؤى المنامية المضللة التي يظن بعضهم فيها أنه رأى الرسول صلى الله عليه وسلم والانتساب لأهل البيت بأنساب منتحلة فسيجد هذا وأمثاله أرضا خصبة لنشر دعواهم.

محمد عثمان الحاج خج بخسة الصوفية فهل من مصلح؟

سلام
وبعد

ركن نقاش مولع نار٫ برغم اللغة العنيفة والخطاب الهبوب٫
بس التحية ليهم وهم ينقلون النقاشات في الهواء٫ اتمني ان تنتقل نقاشات الافكار الديني منها والدنيوي في الهواء اي في الاذقة والجخانين

اعتقد انها اكتر اساليب و وسائل التوعية والتعليم الجماهيري الفعالة جدا٫ بقولو شنو ما مهم المهم انهم يقولو وان يحترم حقهم وىصان فيه






الود والورد

صاحب البوست ، وصحبه الكرام .......

السلام عليكم ، ، ، ،
لو انت شايف أن الراجل كلامو غلط ، الفضاء مفتوح ياخي أعمل ليك حلقة
جنبو وفند الكلام البقول فيه ده ....!!! وانتهت القضية .
كل الكلام البتقول فيه أنت والمداخلات اللوجستية المساندة لوجهة نظرك ده
كلو يعتبر خارج النص وتغريد خارج السرب ، لأنو لم نر أي مداخلة ردت على
صاحب الفيديو رد منطقي وعقلاني بمرجعية ونصوص دينية ، كلها انتقادات تحوم
حول الموضوع فقط ليس إلا ولم تطعن في لب الموضوع ...!!!

( الراجل قال الناس البتنادي غير الله ديل ناس ما موحدين واستند في ذلك إلى نصوص القرآن
لأن الإنسان مفروض ينادي الله وحده دون غيره )
لو عندك كلام بفند الكلام ده ونصوص من القرآن والسنة هاتها علنا نستفيد ، غير ذلك يكون
كلامكم كلام ساااااااااااااااااااااااااااااااااااااااااااااااااااااي .

Quote: الراجل قال الناس البتنادي غير الله ديل ناس ما موحدين واستند في ذلك إلى نصوص القرآن لأن الإنسان مفروض ينادي الله وحده دون غيره )

يا عثمان الحسن

يا زول إنتا قايل الصحابة شالوا السلاح وحاربوا بعض وكتلوا بعض استندوا
على التوراة ولا على الإنجيل. ما استندوا على القرآن دا.
كتلوا الخلفاء وبرضو استندوا على النصوص القرآنية.

أديني نص قرآني حأديك واحد ضده.
حتقول لي دا توحيد حأقول ليك دا شرك بالله.
الزول دا شبه انصار السنة بالمنافقين.

أها الزول دا (أطلع الغيب أم اتخذ عند الرحمن عهدا ) عشان يقول فلان مجرم
وغيرو كافر وغيروا بيعبد الرجال.

شفتا كيف يا أخونا، امشي اشد لي ركن اخليهو يضارى.

واختم بالآية
(قل هل ننبئكم بالأخسرين أعمالا . الذين ضل سعيهم في الحياة الدنيا وهم يحسبون أنهم يحسنون صنعا )


ولا اقول ليه أنتا مالك ومالهم
مش النص القرآني (واخد بالك يا عثمان) بيقول
(ولو شاء ربك لآمن من في الأرض كلهم جميعا أفأنت تكره الناس حتى يكونوا مؤمنين * وما كان لنفس أن تؤمن إلا بإذن الله ويجعل الرجس على الذين لا يعقلون)

اقول ليك إنتا داير تقيف ضد مشيئة الله سبحانه وتعالى

(ربنا داير كدا إنتا دخلك شنو في الموضوع من اساسو)



أنا بقول ليك الكلام دا يا عثمانن لأنه النص القرآني دا ممكن تعمل بيهو الدايرو

يا خي البشير عمل بيهو انقلاب عسكري
وزاد بيهو الأسعار وعمل بيهو خدمة الزاميةن وقطع بيهو العلاقة مع ايران
وسكن بيهو في القصر الجمهوري
وشال بيهو قروض من الصين.


فموضوع النص القرآني دا ما بيحلك هنا، ولو كان بيحل، ما كان في داعش
وانصار السنة والحوثيين وحزب الله
والقرآنيين والجمهورين والعلمانيين.

أها زولك دا القى ليك فرقة في مكرفونا دا اكفروا ليك زي ما الحصل شيء


وكلو بالقرآن يا مان ولا محتاج لأي حديث، اخلي ليك يضاير

حله الوحيد بكرة يهدر دمي ويلم فيني يضبحني
غير كدا يجيب آية اجيب ليهو آيتين
يعمل ليها فيها موحد اطلعوا ليك مشرك يعمل ليها في كافر اطلعوا ليك مؤمن
وكله بالنصوص.


أها يا عثمان
داير تتناقش هسع بالقرآن والنصوص القرآنية عن إنه كلام الزول دا صاح

نبدأ نقاش.


وبالمناسبة لو قلت لي أنا ما فقيه في الدين (حاطلعك كافر) وبرضو بالقرآن
ما عندك حل، شفتا كيف؟






------------------------------------------------------------------------
الموضوع ما بالسهولة دي ومحتاج لإعمال الفكر والعقل
ودا هدف المداخلة أعلاه، وأعني فيها اي كلمة قلتها

الأخ الصادق اسماعيل

لك التحية ، ، ،

تطرقت في مداخلتك إلى أكثر من نقطة ، نعم يمكنك أن تستخدم النص القرآني في أي
موقف كما ذكرت أنت ومثلت لذلك بدخول البشير إلى القصر الجمهوري استناداً إلى
نص قرآني ، وزيادة الأسعار أيضا ً إستناداً إلى نص قرآني ، والإنقلاب نفسه استناداً
إلى نص قرآني ، لكن كل ذلك يا أخي الكريم يعتمد على قناعتك أنت كمسلم أن هذا النص
فعلاً تم استخدامه في المكان الصحيح أم لا ؟؟
بمعنى هل أنت الصادق اسماعيل مقتنع أن النص الذي استخدمه البشير في انقلابه هل هو
نص صحيح ؟؟؟ وهل النص الذي استخدمه في تعذيب المعارضين هل هو نص صحيح ؟؟
أي هل تم تأويله التأويل الصحيح ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

لكن حتى لا يتشعب النقاش خلينا في مسألة الدعاء لغير الله والتي ركز عليها صاحب الفيديو
الذي قال يجب على الناس أن تنادي الله تعالى لوحده ولا ينادون غيره ويجب على المسلم في
كل أموره أن يدعو الله وحده دون غيره والمرجع في ذلك كثير من نصوص القرآن :
- قال عز وجل: {فَادْعُوا اللَّهَ مُخْلِصِينَ لَهُ الدِّينَ وَلَوْ كَرِهَ الْكَافِرُونَ}[8]،
- وقال عز وجل: {وَأَنَّ الْمَسَاجِدَ لِلَّهِ فَلا تَدْعُوا مَعَ اللَّهِ أَحَدًا}[9]،
- وقال تعالى: {وَلا تَدْعُ مِنْ دُونِ اللَّهِ مَا لا يَنْفَعُكَ وَلا يَضُرُّكَ}[10]،
إلى غير ذلك من نصوص القرآن والسنة ......
فهل لديك من نصوص القرآن التي تنازل فيها الله تعالى عن حق من حقوقه للصالحين أو الشيوخ أو أياً كان ؟؟؟؟
هل ورد في القرآن في أي موضع بأنه يمكن للمسلم أن يدعو غير الله أو أن يعتمد على غير الله ؟؟؟؟؟؟؟؟؟؟؟؟؟؟

تحياتي

قال ابن سلول قرا مع الرسول !
القُر الإنفخك يا جاهل وضال
التحية لصاحب البوست أبو الحسين

سلام صاحب البوست وضيوفه الكرام

هذا هو الحصاد المر لزرع خراب الانقاذ فماذا تنتظرون من الخراب غير المر

Quote: الله يجزيه خير ويعلي من شأنه ويعينه على الصواب ويوفقه لما يحبه ويرضاه.

يجزيه خير على اضلال الناس ؟!

لو أنت تعتبر هؤلاء الشيوخ آلهة فهذا شأنك ...
أما من دعوهم لم يسموهنهم آلهه

Quote: ما دامت الطرق الصوفية عاجزة عن أصلاح تراثها وتنقيته من الدجل والشعوذة والمتاجرة بالدين والاعتقاد الخاطئ بالوصول لدرجات عليا في الولاية والرؤى المنامية المضللة التي يظن بعضهم فيها أنه رأى الرسول صلى الله عليه وسلم والانتساب لأهل البيت بأنساب منتحلة فسيجد هذا وأمثاله أرضا خصبة لنشر دعواهم.

أنت يا محمد عثمان اعتبرت القرآن نفسه دجل ...وشككت في القرآن في هذا المنبر
وفتح المنابر والميادين باستباحة الدين وعروض المسلمين وأئمة الدين للجهلة أمثالك هو البلاء الذي أصابنا في مقتل
فهذا جاهل مثلك يتحدث بغير علم...فاصلح نفسك سيصلح غيرك.

Quote: ما دامت الطرق الصوفية عاجزة عن أصلاح تراثها وتنقيته من الدجل والشعوذة والمتاجرة بالدين والاعتقاد الخاطئ بالوصول لدرجات عليا في الولاية والرؤى المنامية المضللة التي يظن بعضهم فيها أنه رأى الرسول صلى الله عليه وسلم والانتساب لأهل البيت بأنساب منتحلة فسيجد هذا وأمثاله أرضا خصبة لنشر دعواهم.

أنت يا محمد عثمان اعتبرت القرآن نفسه دجل ...وشككت في القرآن في هذا المنبر
وفتح المنابر والميادين باستباحة الدين وعروض المسلمين وأئمة الدين للجهلة أمثالك هو البلاء الذي أصابنا في مقتل
فهذا جاهل مثلك يتحدث بغير علم...فاصلح نفسك سيصلح غيرك.

Quote: ما دامت الطرق الصوفية عاجزة عن أصلاح تراثها وتنقيته من الدجل والشعوذة والمتاجرة بالدين والاعتقاد الخاطئ بالوصول لدرجات عليا في الولاية والرؤى المنامية المضللة التي يظن بعضهم فيها أنه رأى الرسول صلى الله عليه وسلم والانتساب لأهل البيت بأنساب منتحلة فسيجد هذا وأمثاله أرضا خصبة لنشر دعواهم.

أنت يا محمد عثمان اعتبرت القرآن نفسه دجل ...وشككت في القرآن في هذا المنبر
وفتح المنابر والميادين باستباحة الدين وعروض المسلمين وأئمة الدين للجهلة أمثالك هو البلاء الذي أصابنا في مقتل
فهذا جاهل مثلك يتحدث بغير علم...فاصلح نفسك سيصلح غيرك.