Post: #2
Title: Re: القول ما قال به الجنيد( لذلك هذا الرجل احب�
Author: Dahab Telbo
Date: 01-22-2016, 10:31 PM
Parent: #1
الاعتراف بالتنوع هو اساس تحضر الامم وسر تقدمها المعرفي والاجتماعي ولكن اهل السودان للمعضلة
الثقافية التي يعانونها يظنون عكس ذلك تماما حتى الذين يحملون منهم الافكار التي ابتكرت بواسطة التنوع
وهذه مشكلة ان لم تكن كارثة فكل البلاد الان تسعى الى ضخ دماء غريبة الى شعوبها (اللجوء واعادة التوطين)
بينما السودانيون (كل السودانيين) يسبحون عكس تيار الامم
عوجة دي والله
تلبو
|
Post: #3
Title: Re: القول ما قال به الجنيد( لذلك هذا الرجل احب�
Author: Dahab Telbo
Date: 01-22-2016, 10:37 PM
Parent: #2
نجي نقول المعضلة
اذا كان ياخ الذين يحملون الوية الاستنارة لا يستحملون مجرد الادعاء للأخر ويجرمونه فقط لأنه يظن
نفسه على خلاف ما يعتبرون هم انها الحقيقة فتيقى دي مش معضلة دا دمار ونكسة مفاهيمية عجيبة ياخ
الزول الشايق نفسوا ما عربي (وانا اولهم ) ليهو الحق في ان يكون كما يرى والزول الشايف نفسو عربي
ايضا له مطلق الحرية في ان يكون وين المشكلة هنا ؟
الموضوع اساسا موضوع عنصرية الدولة وانحيازها لإحدى الثقافات الكثيرة المكونة ليها
الموضوع موضوع غياب دولة القانون
الموضوع موضوع الحكم الديني والقهر بأسم الله
تلبو
|
Post: #4
Title: Re: القول ما قال به الجنيد( لذلك هذا الرجل احب�
Author: Dahab Telbo
Date: 01-22-2016, 11:00 PM
Parent: #3
جميع الذين يستميتون في دحض ادعاء عروبيي السودان هم في الاساس اكثر افتتان بالعروبة من المستعربين ذات انفسهم
وانهم فشلوا في ان يكونوا عربا (لظروف قاهرة) فعملوا بالمثل القائل (يا فيها يانكسر كراسيها  )
ودايما الزول المقهور بتظهر تصرفاتو عدوانية وغير مبررة  ي
اخ فليكن عرب السودان اكثر عروبة من العرب ذاتهم المشكلة وين يعني؟
طالما هم راضين بذلك وارتضوا لنفسهم ان يكونوا تابعين !
نحن كغير عرب ما علينا الا ان نقول ليهم انتم كما ترون انفسكم
مش نمشي نجتهد ونبحث ونشحتف روحنا فقط لنثبت انهم غير عرب !!
يبقى دا حقد مننا بس لأننا ما لاحقين مرتبة الادعاء لذلك نخرب على المدعيين 
والله دا بس التبرير المنطقي للاهثين وراء الدحض نرجع للمشكلة الاساسية
انا بأخذ على حكام السودان منذ خروج المستعمر تغييب بقية اهل السودان من الدولة
وتهميشهم وتسييد ثقافة واحدة من ثقافات البلد مع محارب الثقافات الاخرى ودي عنصرية دولة
وهي اشد واخطر انواع العنصرية لأن عنصرية الدولة تسبب اضرار كارثية كما رأيناها في دولة السودان الحديث
من حروب ودمار وفي حاجة مهمة هنا لابد من ذكرها مطلقا لا يعتبر اهل الثقافة السائدة مسئولين مسئولية جماعية
عما احدثه ابناء ثقافتهم من اضرار بالبلاد بل هم برآء من ذلك مالم يتورط احد منهم شخصيا في جرم ودي حقيقة بسيطة
جدا لكنها غايبة عن الكثيرون من الذين يدعون تقلد مهام التنوير بكارثة السودان
نرجع لكلام الهميم الجنيد حمد
ما يجب ان يُناقش هنا وفي اي مكان هو كيفية بناء دولة القانون التي تحتوي الكل بحسب ما يعتقد هو وليس ما يحدده
له الاخرون وتتعامل مع الكل على اساس المواطنة في الحقوق والواجبات بغض النظر عن دينه او اثنيته
وهذا هو ما ظل غائبا طوال فترة الحكم الوطني الذي دمر الوطن
عشان كدة اي محاولة لجر السودان للوراء بواسطة الدعاوي الدكتاتورية واصحاب الهوى القديم
(امة واحدة ...عرق واحد)
مرفوضة لأن البشرية تجاوزت دولة العرق الواحد والدين الواحد والثقافة الواحدة الان العالم أمن بالتعدد
ويقدم كل ما يملك من سبل في جعل العالم متنوع بتجانس يخلق به التطور والتقدم
فياريت انو السودانيين (كل السودانيين) ان يرتقوا بفكرهم قليلا
تلبو
_____________________________
التعديل لأضافة الخمسة اسطر الاخيرة
|
Post: #5
Title: Re: القول ما قال به الجنيد( لذلك هذا الرجل احب�
Author: محمد البشرى الخضر
Date: 01-22-2016, 11:17 PM
Parent: #4
التحية لك يا دهب و للجنيد
كلام رزين ومليان و يكيّف علي اليمين
الليل أليل و الصباح رباح نجي تاني نقرأ ونشارك معاك بإذن الله
|
Post: #6
Title: Re: القول ما قال به الجنيد( لذلك هذا الرجل احب�
Author: Abu Baker Ahmed Abdel Rahman
Date: 01-22-2016, 11:53 PM
Parent: #5
| Quote: طالما هم راضين بذلك وارتضوا لنفسهم ان يكونوا تابعين ! |
تحياتى عزيزى دهب
|
Post: #7
Title: Re: القول ما قال به الجنيد( لذلك هذا الرجل احب�
Author: الجنيد حمد
Date: 01-23-2016, 11:01 AM
Parent: #6
تحية طيبة
الحبيب الاديب دهب طبت وطابت ايامك
ولك كل المحبة والاجلال
الحمدلله انو الشد الحاصل في الاسافير بعيد من الواقع وان كانت هناك احداث
نشاذ خلفها الساسة لكنها لن توثر على العلاقات المترابطة بين شعوب السودان .
عندنا في الحلال بتلقى الناس جمعتهم مصالح وكونوا الحلة وبقى ارتباطهم بيها اقوى
رغم انو بتلقى الواحد منهم اخوه وابوه او اهله ساكنين في القرية الام لكن ولاءه بكون
للموطن الجديد وبعمل مع الجيران الجداد من اجل تعمير القرية شيء كهرباء وشيء مدارس
ولو اتلعبت كورة ساي بين الحلة الجديدة والحلة القديمة بكون متشدد في تشجيع فريق الحلة الجديدة
الواقع ده ياهو حال السودان ككل كل من له جذور ممتدة خارج السودان تبقى جذور تقراء تاريخيا بس
لكن المحبة والولاء للسودان .
وياريت الساسة يخدموا البلد بالجد بدل ما يدمروه من اجل مكاسبهم
البلد ماهل بشيلنا كلنا
|
Post: #10
Title: Re: القول ما قال به الجنيد( لذلك هذا الرجل احب�
Author: Dahab Telbo
Date: 01-23-2016, 03:40 PM
Parent: #7
استاذي السمح الجنيد حمد
سلام يغشاك وكل الطيبين في حلال الله الماهلة
ياخ والله كلامك يثلج الصدر ويجعل النفس تبقي بعض من امل في صلاح بلدنا
ووالله كل انسان عاش في السودان يعلم علم اليقين بأن الناس البساط فيهو اكتر ناس قابلين للتسامح والتعايش
ولكن الازمة الان اضحت في الناس القاعدة الا لنكت الفتن والازمات من الذين ضاعت كياسة عقولهم بين طيات الكتب
يازول ابشر طالما انو الناس ماعدمت البقول الحق فأن القافلة ستصل ولو متأخرة بعض الشيء
دمت
تلبو
|
Post: #9
Title: Re: القول ما قال به الجنيد( لذلك هذا الرجل احب�
Author: Dahab Telbo
Date: 01-23-2016, 03:35 PM
Parent: #6
الجميل ابوبكر احمد
سلام ومودة
مشكور على المرور ياغالي
وكان الله في عون الوطن
مودتي
تلبو
|
Post: #8
Title: Re: القول ما قال به الجنيد( لذلك هذا الرجل احب�
Author: Dahab Telbo
Date: 01-23-2016, 03:33 PM
Parent: #5
الاستاذ محمد البشرى التحيات الزاكيات استاذي ومرحب بيك
بعض الناس عدائيين اكثر من اللازم وخصوصا فيما يخص القضايا العامة وهو سلوك ترضي مع الجهل
نسأل الله ان يبعد الفتن عن السودان
تلبو
|
|