ياشباب هل مسموح الان بالسفر بالجواز الاخضر اذا تم تمديده ... ؟؟؟

06:30 AM Jan, 16 2016

سودانيز اون لاين
usama Babiker-
مكتبتى
رابط مختصر

سؤال لمن يعرف اي شخص سافر بالجواز الاخضر بعد بداية السنه ... لانه حسب علمي الاقوال متضاربة تجد من يقول لك بانه ساري ويمكن ان تسافر به وتجد من يقول لك بانه مسموح به السفر للسودان فقط ... ياريت من لديه معلومات اكيدة افادتي ...

up

دكتور(عثمان) سلام
اللي عارفو انا برجعوك من مطارات المملكة يعني غير معترف بيه .....
التمديد فقط لتجديد الإقامة .....

تحياتي و إحترامي دكتور أسامة

سلامات يا اسامة
القرار عالمي افتكر منظمة او هيئة الطيران المدني هي التي اصدرته وما خاص بالسودان
بالتالي اي دولة لن تعطيك سفارتها تأشيرة مالم يكون جوازك الكتروني - ما عدا الحالات الخاصة
بالنسبة لبلدك دائما يمكنك الرجوع لها حتى لو بدون جواز وبوثيقة سفر لرحلة عودة واحدة لكن لا يمكنك الخروج منها بالطبع بلا جواز الكتروني
لو اتضايقت خلاص, ارجع السودان بالأخضر و طلع الاكتروني هناك بالظروف العادية بياخد اسبوعين تلاتة و بالواسطة - تقرأ الرشوة ههههه - ممكن ياخد اسبوع واحد

تحياتي اسامة والحضور
من السودان
جوازك القديم حتي لو ممدد لي نهاية تلاتة 2016
ما بدوك ياشيرة خروج الا في الأكتروني

قبل يومين مشيت قنصلية جدة عشان أطلع الجواز الإلكتروني لأنو راجع السودان شهر مارس
المهم لقيت صف طويل جداً وزحمة ويدوك مواعيد للإجراءات بعد كذا شهر
مشيت محل التجديد قالو لي الا تكون اقامتك قربت تنتهي
إتكلمت مع الموظف قلت ليو انا شهر 3 لازم أكون في السودان
قاللي خلاص نجدد ليك 6 شهور وتمشي تطلع الإلكتروني من السودان
فعلاً جدد لي الجواز لغاية يوم 30 يوليو وقاللي بترجع بيو عادي
رسوم تجديد الجواز 215 ريال

فووووق

ممكن تسافر به للسودان لكن شريطة الحجز على الخطوط السودانية ، لانو ما في خطوط طيران اخرى تقبله، بطاعتنا وردت لنا.

تحياتي أخي أسامة بابكر
ولكل زورا البوست

اليك هذه المعلومة ربما تجد ضالتك فيها فيها :
قبل أسبوع سافر شقيقي للسودان بجوازه القديم ( الأخضر ) ولم يواجه أي مشكلة في ذلك ـ وقد أفادوه حينها أنه بالإمكان السفر بالجواز القديم حتى نهاية شهر يناير
وقبله بأسبوع سافر أبناءه للسودان أيضاً بالجواز القديم أيضاً ـ لكن الملفت للنظر أنهم سافروا عن طريق قطر ولم يتم أعتراضهم رغم سفرهم بالجواز غير الألكتروني

السلام عليكم
باستفساري من مدير وكالة سفر وسياحة سوداني بالرياض أفادني بأنه يمكن استخدام الجواز القديم لحين انتهاء صلاحيته للسفر لأي وجهةٍ كانت على متن أي خطوط عدا السعودية والسودانية ..
مودتي ،،،

شكرا ياشباب ياشباب على مروركم وافاداتكم الجميلة ....غايتو يا ابو الحسين مافي اي حاجة بتفوته قلت لي عثمان ....؟؟؟؟

الأخ أسامة سلام

بخصوص الجواز القديم فعندى أحد معارفى سافر به يوم الجمعة الفائت الى السودان من الرياض

على الخطوط السودانية

يمكنك السفر بالجواز لأي دولة شريطة الحصول على فيزة الدخول لتلك الدول مع العلم
ان بعض الدول قد أوقفت إصدار تأشيرة الدخول على الجواز الأخضر اي تصدر فقط للحاملين الجواز إلكتروني
مثال لدول أوقفت تأشيرة الدخول على الجوار العادي
قطر
دبي
ماليزيا
اعتقد اندونيسيا
اليابان

دول لا تزال تصدر او تمنحك تأشيرة الدخول على الجواز العادي
تايلاند
فيتنام


بعض شركات الطيران ترفض سفر حاملي الجواز الالكتروني حتى لو كان للمسافر تأشيرة دخول لدولة المسافر اليها
ومثال لهذه الشركات الخطوط الماليزية
الا ان هذه الخطوة او القرار من الماليزية تبدو انها غير قانونية واعلم ان الإخوة تقدم بشكوة ضد الماليزية لانها رفضت تسفيره وأسرته لدولة كان يحمل تأشيرة دخولها
مع العلم انه سافر لتلك الدولة في اليوم التالي عير الاماراتية
الخلاصة
الاخضر ساري المفعول وقفا للتوضيح أعلاه
والشرط الوحيد صلاحية ستة شهور او اكثر

الافادات متضاربة

ما زلنا نعشم في كلام نجيض ..

يا محمد البشرى
بالواسطة والرشوة ممكن تطلع الرقم الوطني والجواز الالكتروتي معا في ساعتين بس
وما اسبوع كامل...
..والماعنده جواز الكتروني يا اسامة ومقيم خارج السودان يمشي اي سفارة ويستخرج وثيقة سفر
اضطرارية ويسافر بيها السودان وهي معترف بها في مطارات
الترانزيت وانت متوجه للسودان...بس خلي في جيبك ٥٠ دولار
احتياطي للرشوة وتاخد الجوازىفي ساعتين فقط...
وبدون الرشوة دي اجازتك حتكمل بدون ما تتحصل على
الجواز الالكتروني ..
ودمتم بالف خير

سلام استاذ أسامة

جارنا سافر أمس بالجواز القديم بعد أن مدده في السفارة


وقبله بنت عمتنا لكنها استخرجت الجواز الجديد من هناك ورجعت بيه


مع التحية لك وللمعاك

الاغرب

اخوي عندو جواز الكتروني على وشك الانتهاء (خمس سنوات)
مشى السفارة عشان يستفسر عن كيفية التجديد
السفارة افادتو بانو تجديد الجواز الالكتروني ما عندهم الاجراء انو يتم استخراج جواز جديد اخضر

تااااااااااااااااااانى بعد اتعذب فى الرقم الوطني والجواز الالكتروني يرجع للقديم الاخضر
او

يسافر السودان يجددو هناك

الكلام دا فى الامارات
سفارة السودان بالامارات

Quote: إتكلمت مع الموظف قلت ليو انا شهر 3 لازم أكون في السودان قاللي خلاص نجدد ليك 6 شهور وتمشي تطلع الإلكتروني من السودان فعلاً جدد لي الجواز لغاية يوم 30 يوليو وقاللي بترجع بيو عادي رسوم تجديد الجواز 215 ريال

دي همبتة من ناس السفارة .. ما دام مسافر بلدك ممكن تسافر بأي جواز حتى لو كان منتهي (ما لم تكون عايز تجدد إقامة)
عملتها أكتر من مرة .. بسافر بجوازي (المنتهي) وبجدده في السودان.

تحيه صباحيه مباركه لأصحاب السمو والفخامه
من أسامه لحدى محمد أبو العزايم ..
سين سؤال
هل يصلح الجواز المنتهى فى أن يكون وسيلة اثبات معترف بها
فى التعاملات المصرفيه
وصرافات النقد الاجنبي
يعنى كوسيلة اثبات غير مرفوضه لإنتهاء صلاحيتة
؟؟؟

Quote: بالواسطة والرشوة ممكن تطلع الرقم الوطني والجواز الالكتروتي معا في ساعتين بسوما اسبوع كامل...

هههه العلم اتطور معناها يا بسمات على زمنا كان بقولوا لينا الجواز الالكتروني الداتا لازم تمش المانيا ولا شنو ما عارف عشان كدا اقل شي اسبوع يكونوا طلعوا بينا العالي أو واسطتنا ما قوية :)

يا هاشم الجواز الاكتروني ما بتجدد, لما تنتهي المدة يطلع واحد جديد, تخيل نفس الزحمة و الاجراءات الأسي دي ح تتكرر كل خمسة سنوات باعتبار الاغلبية طلّعت في نفس الفترة

ويا ملهم الجواز المنتهي يفقد قيمته كوسيلة اثبات و لا يقبل في اي معاملة

اخونا اسامة

ضاع رقمك مني

نعم يسمح له بذلك

مؤكد

مرحب يا ملهم،

Quote: هل يصلح الجواز المنتهى فى أن يكون وسيلة اثبات معترف بها فى التعاملات المصرفيه وصرافات النقد الاجنبي يعنى كوسيلة اثبات غير مرفوضه لإنتهاء صلاحيتة

لا يصلح،
لا الجواز ولا البطاقة الشخصية ولا رخصة القيادة كوسيلة إثبات بعد تاريخ صلاحيتهم.

الحاجات دي مفروض تكون موجودة على موقع السفارة السودانية .. عشان الناس ما تجي تحكي انو (جارنا) سافر بيهو و(زوجة اخوي) سافرت بالجواز الاخضر !
حتى الاجراءات ذاتها تخضع للمزاج .. عندك جواز الكتروني مرات عديدة لما تمشي تجدد يطلعوا ليك الاخضر ..
ياخ نحن شعب مكتوب علينا الشقاء .. لازم نتبهدل في اي اجراء نقوم بيهو ليه ما عارف .