وردي يا عكليتة!!

03:34 PM Jan, 07 2016

سودانيز اون لاين
MUSA HAMID-
مكتبتى
رابط مختصر

ممكن نحكي حكاية خميس؟ بشرط، قبلها نهدي أغنية (عارفنو حبيبي/ عارفني بحبو/ ده حرام عليكم/ تقيفو في دربو/ حارمني ليه/ ليه والله بحبو).
وهي من كلمات إسماعيل حسن، أداء: عثمان حسين.


لأنّو (الكنتة) فيها هي ذاااااتا!!
ــــــــــــــــــــــــــــــ



الرحمة والمغفرة لي كل الوراد ذكرهم تالياً... ولينا برضو!!

في واحدة من أيام سودان السبعينيات، سجّل الشاعر إسماعيل حسن، الى الفنان عثمان حسين في منزله، يُرافقه في الزيارة محمد وردي (الفنان الجميل العِكْلِيتة)، الما بخلي حقو بالساهل
. وتصادف أنْ كانت قصيدة (حارمني ليه/ ليه والله بحبو) في ورقة على طاولة في منزل عثمان حسين.
ويبدو –والله أعلم- إن عثمان حسين كان يبحث جاداً في البحث عن لحنٍ يُقابل به جمال هذه القصيدة التي أهداها له إسماعيل حسن قبل أيام!!!
المهم.....
ببساطة، ناول إسماعيل حسن وردي القصيدة، وطلب منه محاولة تلحينها (كان بقدر). مضيفاً بأنّ عثمان حسين أُعجب بالقصيدة، ويحاول تلحينها.
قوووم يا وردي، شيل الورقة ودندن..

ولما عاد عثمان حسين بمستلزمات ضيافة السبعينيات، لضيفيه العزيزين، كان المقطع الأول من الأغنية ملحّناً، وساااخناً من ناورو، والزباين في انتظارو!!
ثم بدأ وردي في ترديد اللحن، وشاركه عثمان في الترديد، ورويداً رويداً لان اللحن للجميع، بعد أنْ دخل عليهم عمّك عبد الله برعي، بكمانه الجميل البديع
، وهاك يا ضبح...
وجيييتك جيييتك، الأغنية اتسمكرتْ!!
وهم في البروسيس بتاع السمكرة ده، يخش عليهم صدّيق منزول، لاعب الهلال الكارثة، الذي تجمعه صداقة بعصمان حسين، حاملاً جهاز تسجيل،
وزبطك زبطك،
رايح مسجّل البروسيس كوووووولو، من طق طق لي السلامو عليكم،
والغونية مسخّنة حشرها ليك في الشريط.

المهم....


أيام وتمر... أيام وليالي، العكّة دوّرت ما بين وردي وعثمان حسين في لحن الأغنية. كل واحد بفتكر إنّو اللحن حقو..
وقوووم يا شريف طمبل، ووقتها كان مدير تحرير جريدة الصحافة، خش في المعركة، مناصراً لي صاحبو عثمان حسين، ويكتب مينشيت في الصحافة:

- من هو وردي ليُلحّن لعثمان حسين!!

وعثمان -وقتها- كان فنان الخرطوم الأول، وقاتل ومداوي قلوب العذارى، معشوق الشباب المخنفس والشارلستون، وكذا إذاعة أم درمان...
وعيييييك!!!
المهم....
قوووو يا صديق منزول، شيل مسجّلك، وختّو اليوم التاني قدام شريف طمبل، وشغّل ليهو البروسيس بتاع ورشة التلحين.
صاحبك آمن وصدّق، ورايح كاتب اليوم البعدو في نفس الجريدة:

- فليصمتْ عثمان حسين!!

في يوم من الأيام،
وعثمان حسين، بيستعد للمشاركة في حفل غنائي، في سينما أم درمان الوطنية.
تصادف إنو شغال بيوقّع في الأغنية ذاااتا عشان يغنيها في الحفلة. فما كان من وردي إلا وقال ليهو:

- يا عثمان، الأغنية دي أغنيتي. ومهما كان ح أغنيها في الحفلة دي، ونشوف الح يغنيها أحسن من التاتي منو؟

فما كان من عثمان إلا أنْ غادر الحفل، وبهدوء!!

بعدها بفترة رجعت العلاقة في مسماها بين عثمان ووردي –عليهما الرحمة- وعلينا أيضاً!!

لكن بعد أن اعترف عثمان باللحن الأولي لوردي.

يا سلاااام على الحكي الطاعم ..
انت زول حَكًااااءْ .. أوكما كان ليقولها أستاذنا فوزي بشرى !!

ثم يا سلااام على المحكي عنهم ..
اسمعين وعثمان حسن ووردي وبرعي وصديق منزول و .. ذلك السودان .. ذااااااك الوطن !!

Quote: اسمعين وعثمان حسن

خطأ أجمل من صوابه ..
او جات كده على اية حال !!

نسمة عليلة في منبر كتاحتة في السما ...موسى يا ود حامد ... ات زولي من الليلة دي ...جاييك هنا انشاء الله و هناك لمني الخير ... منى عمري و زماني ...اوعك تغيب ...

التحية لموسى و هو يتحفنا بهذه الذكريات الجميلة
واصل و متابعين يا حبيب
يا دكتور ياخ ده من اجمل الاخطاء
و الاجمل انك ما صححتو
____
القبانى .. لقيت هواك هنا .. اها ضرّى عيشك
التحية ليكم كلكم و للمشاركين و القراء الجايين لى بحر الابداع ده

v=OnMMlUZP8Lshttps://www.youtube.com/watch؟v=OnMMlUZP8Lshttps://www.youtube.com/watch؟v=OnMMlUZP8Ls

Quote: عبد الله برعي، بكمانه الجميل البديع ، وهاك يا ضبح

عبدالله برعي منو؟

عارف يا موسى
نهاية الاغنية

ياالناسين ضميركم.. وماخايفين عذابو
يوم الحق هناك.. يوم واقفين في بابو
يوم يسألكم الله.. يا الناسين حسابو
وردي عمل فيها شغل عجيب
وكان يصر على عثمان حسين وقال ليهو:
(عشان لامن يسمعا اي زول يخاف)
والعزومة زاتا جات لبيت عثمان حسين باصرار شديد من اسماعين حسن ود حدالزين
اسماعين قال لى عثمان .. كدي ادي الورقة للبربري دا يمكن يقدر يلحنا
وبعد ما اتلحنت الاغنية واتغنت واتسجلت
واحد قال لى وردي الظاهر يا وردي عثمان حسين دردقك عشان تلحن الاغنية دي
وردي قال ليهو (والله اظن كدة .... ما تستبعد الكلام دا)
عليهم الرحمة والمغفرة جميعا

شكرآ علي هذا الجمال

Quote: دخل عليهم عمّك عبد الله برعي، بكمانه الجميل البديع ، وهاك يا ضبح...

أخ موسـى
صباح الـخيـر

يا سلام عليك ياخـي
متابع كويّس
كنت صبيّاً عندما أذكر هذه الـمعلومة
يغالطونـي النّاس غلاط شديـد

أعلـم أنّك تعنـي العـم عبد الله عربـي، وليس برعـي
أردت فقط الإشارة لذلك





تـحاياي

Quote: وردي يا عكليتة!!

ياخي البوست دا من عنوانو طاعم!!فنانين و شاعر و لاعب كورة و صحفي و كلو واحد بي طعم خاص!!التحية لصاحب البوست على هذا الاسلوب الجميل و البوست المميز و التحية لضيوف البوست و متابع بي مزاج.

التحية لصاحب البوست

مستمتعين ونتابع لهذه الذكريات الجميلة

مع التحية

الأحباب
سلام
وأمنيات جميلة للجميع
رحم الله وردي وعثمان حسين، فقد شكلا روحنا السودانية....




ــــــــــــــــ
كسرة:
لؤي يا جميل، صباحك سعيد
بالطبع المقصود هو: عبد الله عربي
وانتباهتك في مكانها، فأنت سيّد العارفين

Quote: في يوم من الأيام، وعثمان حسين، بيستعد للمشاركة في حفل غنائي، في سينما أم درمان الوطنية. تصادف إنو شغال بيوقّع في الأغنية ذاااتا عشان يغنيها في الحفلة. فما كان من وردي إلا وقال ليهو: - يا عثمان، الأغنية دي أغنيتي. ومهما كان ح أغنيها في الحفلة دي، ونشوف الح يغنيها أحسن من التاتي منو؟ فما كان من عثمان إلا أنْ غادر الحفل، وبهدوء!! بعدها بفترة رجعت العلاقة في مسماها بين عثمان ووردي –عليهما الرحمة- وعلينا أيضاً!! لكن بعد أن اعترف عثمان باللحن الأولي لوردي.

Quote: فما كان من عثمان إلا أنْ غادر الحفل، وبهدوء!! بعدها بفترة رجعت العلاقة في مسماها بين عثمان ووردي –عليهما الرحمة- وعلينا أيضاً!!

فن و رقي و أدب..يا سلام عليهم

Quote: عارف يا موسى نهاية الاغنية ياالناسين ضميركم.. وماخايفين عذابو يوم الحق هناك.. يوم واقفين في بابو يوم يسألكم الله.. يا الناسين حسابو

دي ذكرتني طرفة لظرف الشعبية و بحري حيدر (الجقدلي) قال: أمبارح مشينا لينا (بارتي) الجماعة يرقصوا (Slow Dance) و كل واحد حاضن ليهو واحدة و يغنوا: يوم يسالكم يتا الناسين حسابو..قال يعني هم كل واحد يرقص ليهو مع واحدة بالشكل متذكرين الحساب؟