Post: #7 Title: Re: ماهي اغنيتك المفضلة ؟ Author: سيف اليزل سعد عمر Date: 01-03-2016, 10:36 PM Parent: #6
الحبيبة منى عمسيب..
كل سنة وانتى طيبة يا زهرة البورد.. عندي أغنية كنت داير أشارك بيها الأيام دي زاانا لي في راسي وبسمعها كتير...مفضلة عندي الأيام دي بس بمناسبة رأس السنة وكده. لكن داخل من الموبايل وفي صعوبة شوية في رفع الفديو... أشارك بيها في مداخلة ثانية....
الزول سيد القناة الفي يو تيوب الجاب من اوصاف عديده و عملها منتجة و صوت نقي و رفعها
ما تدوهوا كلمة معاكم تطيبوا خاطروا ... و الله الزول ده بحب الغنا زيكم تمام ... :)
Post: #9 Title: Re: ماهي اغنيتك المفضلة ؟ Author: محمد الكامل عبد الحليم Date: 01-04-2016, 02:45 AM Parent: #8
تحية.
من يحملون الاشراق غناوي وحكاوي وانت منهم يا قباني وصاحبك الجميل واختنا مني المذدهية بعطر الأغاني في غاية الأمال ,مرفوعة اشواقنا بقوة النوستالجيا بحنينها الذي لا يشفي الغليل ,هم روافد الحب وحاملي محرابه...جادكم الغيث...(كان يا جميل حنيت...ورددت لحن غناي)......كان..
Post: #10 Title: Re: ماهي اغنيتك المفضلة ؟ Author: سيف اليزل سعد عمر Date: 01-04-2016, 03:11 PM Parent: #9
مني كل سنة وإنتى طيبة دي غنيتي المفضلة الأسبوع ده:
لك ارق التحايا وعاطر الابداع .. ولصاحب القناة اليوتيوبية المميزة . حقيقة مميزة !
Quote: الزول سيد القناة الفي يو تيوب الجاب من اوصاف عديده و عملها منتجة و صوت نقي و رفعها
ما تدوهوا كلمة معاكم تطيبوا خاطروا ... و الله الزول ده بحب الغنا زيكم تمام ... :)
طيب يا حبيب المابعرفك ما بعزك بما انو نحن بنعز الجميع بدون فرز ههههههه لكن العتب علي النظر في بعض الاحيان .. المطلوب منك ممكن تعرفنا بهذه القناة اليوتيوبية وصاحبها لازم تحفظ الحقوق ...
تحية لك أخت منى ولضيوفك الكرام أول شيء انا عندي متلازمة اسمها { متلازمة القيقم } !!! لمن اسمعه طوالي بتجيني ملاريا حتى انني لا اذهب للمعمل للفحص انما اذهب مباشرة لشراء حبوب الراجمات !!!!
كثير من الأغاني التي حينما نستمع اليها تاتينا عبر الأثير وهي مصحوبة بالكثير من الذكريات الجميلة والعطرة انا { اغنية الطير المهاجر } تتفاعل كيميائيا في جسدي وتغير حتى فصيلة دمي
والفنان الذري يزرعني في حواف الغمام اضافة الى غاية الآمال فهناك اغنية اسمعها يوميا { ابسمي يا أيامي } !!!!! عشت معاك سعيد اعز عزيز وكل هذه الأغاني اعشقها بلحنها وموسيقاها الأصلية والقديمة وحينما تعزف وتغني بطريقة اخرى اشعر وكأن وصفتها السحرية قد تغيرت
اما اغنية عثمان حسين { لاتسلني كم تعانقنا على رقة لحن } هذه الأغنية استمع لها حينما { افلس } لأنها اغنية تجلب الرزق !!!!
نحن من جيل الأغاني الذهبية بل هي بمقياس اليوم ليست ذهبية .. إنما ماسية !!!
Post: #20 Title: Re: ماهي اغنيتك المفضلة ؟ Author: محمد عبد الله الحسين Date: 01-04-2016, 09:33 PM Parent: #19
بت عمسيب الراقية.يا صاحبة الدرر الفريدة الله يخليك. يا غاية الآمال ديبتذوقها منذ عمري 10 سنوات. لكن اعتقد إنه التسجيل ده جديد او طريقة الاداء.انا في ذاكرتي انطبع التسجيل القديم بتاع الغذاعة و بعتقد إنه أجمل. شكرا ليك
Quote: طيب يا حبيب المابعرفك ما بعزك بما انو نحن بنعز الجميع بدون فرز ههههههه لكن العتب علي النظر في بعض الاحيان .. المطلوب منك ممكن تعرفنا بهذه القناة اليوتيوبية وصاحبها لازم تحفظ الحقوق ...
يا بت ناس عم عمسيب ...
و الله قايل رقبتي بشاغل ... و قايلك عارفاها قناتي انا العبد الفقير لله ... :)
ما شايفه القباني بالانجليزي ؟ كتبتها بحرف الـ E لانو واحد ( قباني ) تاني شال القباني بال A وواحد قباني تالت شال قباني بس ... elgabbani
Quote: وبعدين لو سمحت ممكن تسمعني غنيوتك المفضلة ؟
وتسلم يا اصلي علي الطله المفرحة .
اما دي ... فصعبة شديد ... أغاني لا حصر لها مفضلات عندي يا منى ...
عندك مثلاً اسمع عثمان حسين و بازرعة و القبلة السكرى ... أقول بس هي دي المفضلة ...
أقوم اسمع وردي و الود و عمر الدوش ... أدوش معاهم و أقول بسسسس هي دي ...
أقوم اجيب كابلي و الحسين الحسن و أقول حبيبة عمري دي مافي زيها ...
و يوم اسمع أبو داؤود يغني مساء الخير يا أمير أقول كده وصلت ...
صعب يا منى ... سلسلة لا تنتهي ... و عقد لا ينفرط ...
عموما ... عثمان حسين لما يطلع كم سلم كده في القبلة السكرى و يقول :
تذكّرى عهد لُقيـــانا .. ويوم القبــلة السَكـــرى وقبلي ثغـرى الظامى .. فقد لا تنفــع الذكــــرى
انا بكون جبت آخري ...
الغُنا البحب أسمعه بيعتمد عندي على مزاجية يومي ...
Post: #22 Title: Re: اغنيتك المفضلة ؟ Author: محمد مجيدو Date: 01-05-2016, 07:26 AM Parent: #1
منى بت نفيسه ... سلام ليك ولضيوفك ...
كل سنة وانتي طيبه .. وربنا يحقق ليك امنياتك ..
انا اغاني عثمان حسين كلها مفضله لي ... واهديك هذا المقطع ...
لكن الايام دي معلقة معاي حروف اسمك للموسيقار محمد الامين
حروف إسمِك : كلمات هاشم صديق
لحن وغناء الموسيقار محمد الامين
حروف إسمِك جمال الفال وراحة البال وهجعة زول بعد ترحال وتنّية حلوة للشبّال ودنيتنا ومشاويرنا وغنواتنا الما بتِنقال *** حروف اسمِك نجوم ركّت على الياسمين فرح فى عين جمالها حزين أساور فى إيدين طفلة بتحفظ فى كتاب الدين زَفَافَ عاشقين بعد فرقه وسط باقات دُعَا الطيبين *** حروف إسمِك عقد منضوم بخيط النور وطلة وردة من السور ونغمة تنادى من طمبور وشُعلة فرحة فى الوادى تَشِع جَذلانه ليها شهور *** حروف إسمِك وَكِت أشتاق وأرحل ليك وأسرح فى عسل عينيك بِتَحضِنّىِ...... قَبُل ألمسَ حرير إيديك تأرجِحنى..وتَفَرحنى..وتخلينى أدُق صدرى وأقيف وسط البلد واهتف بريدك يا صَباح عمرى
بت عمسيب (منى) عمري وزماني حسب قول عبدالرحمن الريح لى منى الخير من وجهة نظر موسيقية وفنية بحتة الاغنية الكاملة الاركان كلمات ولحن ولزمات موسيقية واداء الالات الموسيقية فيها وتوظيف الوتريات فيها بعبقرية ... هي اغنية الاغنيات مكتملة من جميع الجهات لم اسمع في حياتي اغنية بهذا الجمال والمتعة والشجن .. هي ايقونة من ايقونات غنانا السمح تاتي في المرتبة الثانية بعد (عزة في هواك) للخليل الله يا منى روحي وزماني قلت ارحل التجاني سعيد + وردي وردي والصوت التينور ...... وتاتي الطير المهاجر بكل الشجن الموجود في الدنيا ....... ومن ثم ... بتتعلم من الايام (ودي حكاية الحكايات) مع ابواللمين
العزيزة بت عمسيب وضيوفك الكرام اسعد الله ايامكم بكل خير
.... الاغنية دي حسب الحكاوي الشعبية اتكتبت في فترة عمل الطاهر ابراهيم باشمفتش بمشروع الجزيرة وزمن الجزيرة جزيرة والمفتش ساكن سرايا سرايا الطاهر ابراهيم كانت جنب قرية ام كوراك محلية المحيريبا اها كل ما يمشي قدام جهة الحصاحيصا بلاقي الحروم واردات الترع ولا الفزع وشاف الزولة دي القصة دي سمعتها بدري واستاذنا قباني ممكن يدينا النجيضة
وذات غرام كده وقعت لي في جرح وعلقت فيها من ديك وعيك
Post: #29 Title: Re: اغنيتك المفضلة ؟ Author: فردوس جامع Date: 01-10-2016, 08:02 AM Parent: #28
سلام منى اللطيفة ... بوست جميل كما جمال روحك...
و أنا زي الأخ العزيز سيف بشبك لي في أغنية و خلاص... و لكن المفضلات كُثُرْ...
الموسيقى في رأيي هي اللغة القومية لسكان كوكب الأرض! أها بعض من الأغاني المفضلة عندي بلغات ما بفهمها...
برجع أشاركك بيهن كان الله مد في الآجال... و تبقى من كل بستان زهرة. أو من كل لغة بألفها لحن مفضل نغير شوية من نمط البوست... تحياتي لك ...
Post: #30 Title: Re: اغنيتك المفضلة ؟ Author: فردوس جامع Date: 01-10-2016, 08:08 AM Parent: #29
أغنية جميلة بلغتي الأم... اللغة الصومالية.
Post: #31 Title: Re: اغنيتك المفضلة ؟ Author: فردوس جامع Date: 01-10-2016, 08:13 AM Parent: #30
سلام منى بت نفيسة وسلام لكل أصحاب هذه الأغنيات المفضلة لديهم
أغنيتي المفضلة ( يا نور العين ) عندما غناها وردي ومحمد الأمين
( ما قدرت أنزل الفيديو ، مساعدة يا شباب )
Post: #33 Title: Re: اغنيتك المفضلة ؟ Author: محمد عبد الله الامين Date: 01-11-2016, 09:31 AM Parent: #32
تحيه طيبة اخت منى وضيوفك الكرام ....
اغنية احب اسمعها دائما ... خمسة سنين ... كلمات د . عمر خالد ....
أداء الموسيقار محمد الامين __________________________ خمسة سنين معاك يا زينة الأيام يا نوّارة الحلوين مرّت حِلوة زي أنسام وزي أحلام صبيّة نديّة، زي ياسمين وزي لهفة بعيد مشتاق يلاقي أحبّته الغايبن خمسة سنين ودرب الريد معاك أخضر خمسة سنين، بريدك كل يوم أكتر أحاول مرّة بس أنساك عشان يا غالية أتذّكر أجي وألقاك، ديمة معاي وألقى هواك ملك دنياي وفي أعماقي إتحكّّر
