Post: #1
Title: تكويعة...
Author: بله محمد الفاضل
Date: 01-03-2016, 09:26 AM
08:26 AM Jan, 03 2016 سودانيز اون لاين
بله محمد الفاضل-جدة
مكتبتى
رابط مختصر يا صحو أنسى الاتجاه
خليني غرقان في حلم
مر من يمين باب السهر
واتغطى بالندى والهيام
لو كنت للأشواق وتر
تلقاني في برك قيام
أنا يا أنيس جل البشر
ما ببقى منك غير حطام
يا صحو
أنسى
الاتجاه.
|
Post: #2
Title: Re: تكويعة...
Author: بله محمد الفاضل
Date: 01-16-2016, 08:33 AM
Parent: #1
عصافير
في ليل وأنين
شايلين إشراق وحنين
ماسكين بأجنحة النور
ماشين على حد سكين
والليل شالع باﻷنس
يا ليل ما تخش في الحس
تدينا نجوم وهسيس
تملانا ندى وتكوين..!!
|
Post: #3
Title: Re: تكويعة...
Author: بله محمد الفاضل
Date: 01-18-2016, 08:42 AM
Parent: #2
يا منار بيساسِق بين الـــــــــروح واﻷيد
المار جوّاي دا الريـــــــد ما دم في وريد
ووحاتِك يا واحة القلبِ و زهــــر التنهيد
ما غِشـــــــــــــــــاني عليك أبداً تمهيد
ولا ساورني الشـــك إنك مغناي والعيد
|
Post: #4
Title: Re: تكويعة...
Author: بله محمد الفاضل
Date: 01-18-2016, 10:16 AM
Parent: #3
محجوب شريف
مدك بعيد
وإيدك تعيد
للروح ندى.
محجوب شريف
يا ها النضيف
كفكً تضيف
للكون صدى.
محجوب شريف
بالحق ملاك
ما أظِن سِواك
للناس هدى.
في ها الزمن
محجوب شريف
حد النزيف
والشوق كفيف
يا دا العفيف
في الناس شذى.
شخاتر
إلى محجوب شريف
السكات الخطر على بال الريح
وأبت تكنس مزامير النواح
المثبتة في حلوق الغيم
والبنات البشابن
شان يدخل نجيض الضوء
يمرق خريف
يقيف
على طرف البحر
يفتح جداول الإندلاق
شووووووووووووووووووو
وابت المسادير تلتقط صورة الهتاف
الصاري وشو
ويرج
شان المسامات المِدفِقة في العدم
كلام متروس مواراة
ومستريح في ضل نشيد
مخروم بالعنا
وبالجهجهة
وأنت...
من يوم خِلقت
يا النسل الشريف
محجوب عن خاطر الإنكسار
مُخضر طريقك
بي كتوف الروح
الشايلة تبروقة البلد
وأصلاً مُحال يبراك ضُر
وأنت الغمام...
أنت السحاب...
أنت المطر...
عمق الوتر،
والدندنة...
2/6/2006م
الإسم الكامل: سودانى.....محجوب شريف فى ثنايا القلبالإسم الكامل: سودانى.....محجوب شريف فى ثنايا القلب
|
Post: #5
Title: Re: تكويعة...
Author: بله محمد الفاضل
Date: 02-20-2016, 08:53 AM
Parent: #4
مربض حزن...
-------
براحة عليك يا
قلبي..
وهاك:
هاك باقي الونسة،
الكانت زي نمل العافية المتسرب،
لزول ميرود..
هاك كلمة: يا عمك،
خيط بيها شراب الروح المقدود..
هاك: يا معلم، وحرم ما تدفع، ويا زول...
هاك: حردة ريدة،
وعيب يا اخي،
عيب ما يجوز..
هاك: آ جنا ألكع،
أقطع شامة الحزن الدار تتورم،
شوت،
شوت اﻷوجاع المرصوصة،
بس زي ما قاليك:
بالبوز..!!
|
|